નારાયણીયં દશક 61 – વિપ્રપત્ન્યનુગ્રહમ્

તતશ્ચ વૃંદાવનતોઽતિદૂરતો
વનં ગતસ્ત્વં ખલુ ગોપગોકુલૈઃ ।
હૃદંતરે ભક્તતરદ્વિજાંગના-
કદંબકાનુગ્રહણાગ્રહં વહન્ ॥1॥

તતો નિરીક્ષ્યાશરણે વનાંતરે
કિશોરલોકં ક્ષુધિતં તૃષાકુલમ્ ।
અદૂરતો યજ્ઞપરાન્ દ્વિજાન્ પ્રતિ
વ્યસર્જયો દીદિવિયાચનાય તાન્ ॥2॥

ગતેષ્વથો તેષ્વભિધાય તેઽભિધાં
કુમારકેષ્વોદનયાચિષુ પ્રભો ।
શ્રુતિસ્થિરા અપ્યભિનિન્યુરશ્રુતિં
ન કિંચિદૂચુશ્ચ મહીસુરોત્તમાઃ ॥3॥

અનાદરાત્ ખિન્નધિયો હિ બાલકાઃ ।
સમાયયુર્યુક્તમિદં હિ યજ્વસુ ।
ચિરાદભક્તાઃ ખલુ તે મહીસુરાઃ
કથં હિ ભક્તં ત્વયિ તૈઃ સમર્પ્યતે ॥4॥

નિવેદયધ્વં ગૃહિણીજનાય માં
દિશેયુરન્નં કરુણાકુલા ઇમાઃ ।
ઇતિ સ્મિતાર્દ્રં ભવતેરિતા ગતા-
સ્તે દારકા દારજનં યયાચિરે ॥5॥

ગૃહીતનામ્નિ ત્વયિ સંભ્રમાકુલા-
શ્ચતુર્વિધં ભોજ્યરસં પ્રગૃહ્ય તાઃ ।
ચિરંધૃતત્વત્પ્રવિલોકનાગ્રહાઃ
સ્વકૈર્નિરુદ્ધા અપિ તૂર્ણમાયયુઃ ॥6॥

વિલોલપિંછં ચિકુરે કપોલયોઃ
સમુલ્લસત્કુંડલમાર્દ્રમીક્ષિતે ।
નિધાય બાહું સુહૃદંસસીમનિ
સ્થિતં ભવંતં સમલોકયંત તાઃ ॥7॥

તદા ચ કાચિત્ત્વદુપાગમોદ્યતા
ગૃહીતહસ્તા દયિતેન યજ્વના ।
તદૈવ સંચિંત્ય ભવંતમંજસા
વિવેશ કૈવલ્યમહો કૃતિન્યસૌ ॥8॥

આદાય ભોજ્યાન્યનુગૃહ્ય તાઃ પુન-
સ્ત્વદંગસંગસ્પૃહયોજ્ઝતીર્ગૃહમ્ ।
વિલોક્ય યજ્ઞાય વિસર્જયન્નિમા-
શ્ચકર્થ ભર્તૃનપિ તાસ્વગર્હણાન્ ॥9॥

નિરૂપ્ય દોષં નિજમંગનાજને
વિલોક્ય ભક્તિં ચ પુનર્વિચારિભિઃ
પ્રબુદ્ધતત્ત્વૈસ્ત્વમભિષ્ટુતો દ્વિજૈ-
ર્મરુત્પુરાધીશ નિરુંધિ મે ગદાન્ ॥10॥