નારાયણીયં દશક 43 – તૃણાવર્તવધમ્

ત્વામેકદા ગુરુમરુત્પુરનાથ વોઢું
ગાઢાધિરૂઢગરિમાણમપારયંતી ।
માતા નિધાય શયને કિમિદં બતેતિ
ધ્યાયંત્યચેષ્ટત ગૃહેષુ નિવિષ્ટશંકા ॥1॥

તાવદ્વિદૂરમુપકર્ણિતઘોરઘોષ-
વ્યાજૃંભિપાંસુપટલીપરિપૂરિતાશઃ ।
વાત્યાવપુસ્સ કિલ દૈત્યવરસ્તૃણાવ-
ર્તાખ્યો જહાર જનમાનસહારિણં ત્વામ્ ॥2॥

ઉદ્દામપાંસુતિમિરાહતદૃષ્ટિપાતે
દ્રષ્ટું કિમપ્યકુશલે પશુપાલલોકે ।
હા બાલકસ્ય કિમિતિ ત્વદુપાંતમાપ્તા
માતા ભવંતમવિલોક્ય ભૃશં રુરોદ ॥3॥

તાવત્ સ દાનવવરોઽપિ ચ દીનમૂર્તિ-
ર્ભાવત્કભારપરિધારણલૂનવેગઃ ।
સંકોચમાપ તદનુ ક્ષતપાંસુઘોષે
ઘોષે વ્યતાયત ભવજ્જનનીનિનાદઃ ॥4॥

રોદોપકર્ણનવશાદુપગમ્ય ગેહં
ક્રંદત્સુ નંદમુખગોપકુલેષુ દીનઃ ।
ત્વાં દાનવસ્ત્વખિલમુક્તિકરં મુમુક્ષુ-
સ્ત્વય્યપ્રમુંચતિ પપાત વિયત્પ્રદેશાત્ ॥5॥

રોદાકુલાસ્તદનુ ગોપગણા બહિષ્ઠ-
પાષાણપૃષ્ઠભુવિ દેહમતિસ્થવિષ્ઠમ્ ।
પ્રૈક્ષંત હંત નિપતંતમમુષ્ય વક્ષ-
સ્યક્ષીણમેવ ચ ભવંતમલં હસંતમ્ ॥6॥

ગ્રાવપ્રપાતપરિપિષ્ટગરિષ્ઠદેહ-
ભ્રષ્ટાસુદુષ્ટદનુજોપરિ ધૃષ્ટહાસમ્ ।
આઘ્નાનમંબુજકરેણ ભવંતમેત્ય
ગોપા દધુર્ગિરિવરાદિવ નીલરત્નમ્ ॥7॥

એકૈકમાશુ પરિગૃહ્ય નિકામનંદ-
ન્નંદાદિગોપપરિરબ્ધવિચુંબિતાંગમ્ ।
આદાતુકામપરિશંકિતગોપનારી-
હસ્તાંબુજપ્રપતિતં પ્રણુમો ભવંતમ્ ॥8॥

ભૂયોઽપિ કિન્નુ કૃણુમઃ પ્રણતાર્તિહારી
ગોવિંદ એવ પરિપાલયતાત્ સુતં નઃ ।
ઇત્યાદિ માતરપિતૃપ્રમુખૈસ્તદાનીં
સંપ્રાર્થિતસ્ત્વદવનાય વિભો ત્વમેવ ॥9॥

વાતાત્મકં દનુજમેવમયિ પ્રધૂન્વન્
વાતોદ્ભવાન્ મમ ગદાન્ કિમુ નો ધુનોષિ ।
કિં વા કરોમિ પુનરપ્યનિલાલયેશ
નિશ્શેષરોગશમનં મુહુરર્થયે ત્વામ્ ॥10॥