નારાયણીયં દશક 41 – પૂતનાદહનં તથા કૃષ્ણલાલનાહ્લાદમ્

વ્રજેશ્વરૈઃ શૌરિવચો નિશમ્ય સમાવ્રજન્નધ્વનિ ભીતચેતાઃ ।
નિષ્પિષ્ટનિશ્શેષતરું નિરીક્ષ્ય કંચિત્પદાર્થં શરણં ગતસ્વામ્ ॥1॥

નિશમ્ય ગોપીવચનાદુદંતં સર્વેઽપિ ગોપા ભયવિસ્મયાંધાઃ ।
ત્વત્પાતિતં ઘોરપિશાચદેહં દેહુર્વિદૂરેઽથ કુઠારકૃત્તમ્ ॥2॥

ત્વત્પીતપૂતસ્તનતચ્છરીરાત્ સમુચ્ચલન્નુચ્ચતરો હિ ધૂમઃ ।
શંકામધાદાગરવઃ કિમેષ કિં ચાંદનો ગૌલ્ગુલવોઽથવેતિ ॥3॥

મદંગસંગસ્ય ફલં ન દૂરે ક્ષણેન તાવત્ ભવતામપિ સ્યાત્ ।
ઇત્યુલ્લપન્ વલ્લવતલ્લજેભ્યઃ ત્વં પૂતનામાતનુથાઃ સુગંધિમ્ ॥4॥

ચિત્રં પિશાચ્યા ન હતઃ કુમારઃ ચિત્રં પુરૈવાકથિ શૌરિણેદમ્ ।
ઇતિ પ્રશંસન્ કિલ ગોપલોકો ભવન્મુખાલોકરસે ન્યમાંક્ષીત્ ॥5॥

દિનેદિનેઽથ પ્રતિવૃદ્ધલક્ષ્મીરક્ષીણમાંગલ્યશતો વ્રજોઽયમ્ ।
ભવન્નિવાસાદયિ વાસુદેવ પ્રમોદસાંદ્રઃ પરિતો વિરેજે ॥6॥

ગૃહેષુ તે કોમલરૂપહાસમિથઃકથાસંકુલિતાઃ કમન્યઃ ।
વૃત્તેષુ કૃત્યેષુ ભવન્નિરીક્ષાસમાગતાઃ પ્રત્યહમત્યનંદન્ ॥7॥

અહો કુમારો મયિ દત્તદૃષ્ટિઃ સ્મિતં કૃતં માં પ્રતિ વત્સકેન ।
એહ્યેહિ મામિત્યુપસાર્ય પાણી ત્વયીશ કિં કિં ન કૃતં વધૂભિઃ ॥8॥

ભવદ્વપુઃસ્પર્શનકૌતુકેન કરાત્કરં ગોપવધૂજનેન ।
નીતસ્ત્વમાતામ્રસરોજમાલાવ્યાલંબિલોલંબતુલામલાસીઃ ॥9॥

નિપાયયંતી સ્તનમંકગં ત્વાં વિલોકયંતી વદનં હસંતી ।
દશાં યશોદા કતમાં ન ભેજે સ તાદૃશઃ પાહિ હરે ગદાન્મામ્ ॥10॥