નારાયણીયં દશક 25 – નરસિંહાવતારમ્

સ્તંભે ઘટ્ટયતો હિરણ્યકશિપોઃ કર્ણૌ સમાચૂર્ણય-
ન્નાઘૂર્ણજ્જગદંડકુંડકુહરો ઘોરસ્તવાભૂદ્રવઃ ।
શ્રુત્વા યં કિલ દૈત્યરાજહૃદયે પૂર્વં કદાપ્યશ્રુતં
કંપઃ કશ્ચન સંપપાત ચલિતોઽપ્યંભોજભૂર્વિષ્ટરાત્ ॥1॥

દૈત્યે દિક્ષુ વિસૃષ્ટચક્ષુષિ મહાસંરંભિણિ સ્તંભતઃ
સંભૂતં ન મૃગાત્મકં ન મનુજાકારં વપુસ્તે વિભો ।
કિં કિં ભીષણમેતદદ્ભુતમિતિ વ્યુદ્ભ્રાંતચિત્તેઽસુરે
વિસ્ફૂર્જ્જદ્ધવલોગ્રરોમવિકસદ્વર્ષ્મા સમાજૃંભથાઃ ॥2॥

તપ્તસ્વર્ણસવર્ણઘૂર્ણદતિરૂક્ષાક્ષં સટાકેસર-
પ્રોત્કંપપ્રનિકુંબિતાંબરમહો જીયાત્તવેદં વપુઃ ।
વ્યાત્તવ્યાપ્તમહાદરીસખમુખં ખડ્ગોગ્રવલ્ગન્મહા-
જિહ્વાનિર્ગમદૃશ્યમાનસુમહાદંષ્ટ્રાયુગોડ્ડામરમ્ ॥3॥

ઉત્સર્પદ્વલિભંગભીષણહનુ હ્રસ્વસ્થવીયસ્તર-
ગ્રીવં પીવરદોશ્શતોદ્ગતનખક્રૂરાંશુદૂરોલ્બણમ્ ।
વ્યોમોલ્લંઘિ ઘનાઘનોપમઘનપ્રધ્વાનનિર્ધાવિત-
સ્પર્ધાલુપ્રકરં નમામિ ભવતસ્તન્નારસિંહં વપુઃ ॥4॥

નૂનં વિષ્ણુરયં નિહન્મ્યમુમિતિ ભ્રામ્યદ્ગદાભીષણં
દૈત્યેંદ્રં સમુપાદ્રવંતમધૃથા દોર્ભ્યાં પૃથુભ્યામમુમ્ ।
વીરો નિર્ગલિતોઽથ ખડ્ગફલકૌ ગૃહ્ણન્વિચિત્રશ્રમાન્
વ્યાવૃણ્વન્ પુનરાપપાત ભુવનગ્રાસોદ્યતં ત્વામહો ॥5॥

ભ્રામ્યંતં દિતિજાધમં પુનરપિ પ્રોદ્ગૃહ્ય દોર્ભ્યાં જવાત્
દ્વારેઽથોરુયુગે નિપાત્ય નખરાન્ વ્યુત્ખાય વક્ષોભુવિ ।
નિર્ભિંદન્નધિગર્ભનિર્ભરગલદ્રક્તાંબુ બદ્ધોત્સવં
પાયં પાયમુદૈરયો બહુ જગત્સંહારિસિંહારવાન્ ॥6॥

ત્યક્ત્વા તં હતમાશુ રક્તલહરીસિક્તોન્નમદ્વર્ષ્મણિ
પ્રત્યુત્પત્ય સમસ્તદૈત્યપટલીં ચાખાદ્યમાને ત્વયિ ।
ભ્રામ્યદ્ભૂમિ વિકંપિતાંબુધિકુલં વ્યાલોલશૈલોત્કરં
પ્રોત્સર્પત્ખચરં ચરાચરમહો દુઃસ્થામવસ્થાં દધૌ ॥7॥

તાવન્માંસવપાકરાલવપુષં ઘોરાંત્રમાલાધરં
ત્વાં મધ્યેસભમિદ્ધકોપમુષિતં દુર્વારગુર્વારવમ્ ।
અભ્યેતું ન શશાક કોપિ ભુવને દૂરે સ્થિતા ભીરવઃ
સર્વે શર્વવિરિંચવાસવમુખાઃ પ્રત્યેકમસ્તોષત ॥8॥

ભૂયોઽપ્યક્ષતરોષધામ્નિ ભવતિ બ્રહ્માજ્ઞયા બાલકે
પ્રહ્લાદે પદયોર્નમત્યપભયે કારુણ્યભારાકુલઃ ।
શાંતસ્ત્વં કરમસ્ય મૂર્ધ્નિ સમધાઃ સ્તોત્રૈરથોદ્ગાયત-
સ્તસ્યાકામધિયોઽપિ તેનિથ વરં લોકાય ચાનુગ્રહમ્ ॥9॥

એવં નાટિતરૌદ્રચેષ્ટિત વિભો શ્રીતાપનીયાભિધ-
શ્રુત્યંતસ્ફુટગીતસર્વમહિમન્નત્યંતશુદ્ધાકૃતે ।
તત્તાદૃઙ્નિખિલોત્તરં પુનરહો કસ્ત્વાં પરો લંઘયેત્
પ્રહ્લાદપ્રિય હે મરુત્પુરપતે સર્વામયાત્પાહિ મામ્ ॥10॥