નારાયણીયં દશક 21 – નવ વર્ષાઃ તથા સપ્તદ્વીપાઃ

મધ્યોદ્ભવે ભુવ ઇલાવૃતનામ્નિ વર્ષે
ગૌરીપ્રધાનવનિતાજનમાત્રભાજિ ।
શર્વેણ મંત્રનુતિભિઃ સમુપાસ્યમાનં
સંકર્ષણાત્મકમધીશ્વર સંશ્રયે ત્વામ્ ॥1॥

ભદ્રાશ્વનામક ઇલાવૃતપૂર્વવર્ષે
ભદ્રશ્રવોભિઃ ઋષિભિઃ પરિણૂયમાનમ્ ।
કલ્પાંતગૂઢનિગમોદ્ધરણપ્રવીણં
ધ્યાયામિ દેવ હયશીર્ષતનું ભવંતમ્ ॥2॥

ધ્યાયામિ દક્ષિણગતે હરિવર્ષવર્ષે
પ્રહ્લાદમુખ્યપુરુષૈઃ પરિષેવ્યમાણમ્ ।
ઉત્તુંગશાંતધવલાકૃતિમેકશુદ્ધ-
જ્ઞાનપ્રદં નરહરિં ભગવન્ ભવંતમ્ ॥3॥

વર્ષે પ્રતીચિ લલિતાત્મનિ કેતુમાલે
લીલાવિશેષલલિતસ્મિતશોભનાંગમ્ ।
લક્ષ્મ્યા પ્રજાપતિસુતૈશ્ચ નિષેવ્યમાણં
તસ્યાઃ પ્રિયાય ધૃતકામતનું ભજે ત્વામ્ ॥4॥

રમ્યે હ્યુદીચિ ખલુ રમ્યકનામ્નિ વર્ષે
તદ્વર્ષનાથમનુવર્યસપર્યમાણમ્ ।
ભક્તૈકવત્સલમમત્સરહૃત્સુ ભાંતં
મત્સ્યાકૃતિં ભુવનનાથ ભજે ભવંતમ્ ॥5॥

વર્ષં હિરણ્મયસમાહ્વયમૌત્તરાહ-
માસીનમદ્રિધૃતિકર્મઠકામઠાંગમ્ ।
સંસેવતે પિતૃગણપ્રવરોઽર્યમા યં
તં ત્વાં ભજામિ ભગવન્ પરચિન્મયાત્મન્ ॥6॥

કિંચોત્તરેષુ કુરુષુ પ્રિયયા ધરણ્યા
સંસેવિતો મહિતમંત્રનુતિપ્રભેદૈઃ ।
દંષ્ટ્રાગ્રઘૃષ્ટઘનપૃષ્ઠગરિષ્ઠવર્ષ્મા
ત્વં પાહિ બિજ્ઞનુત યજ્ઞવરાહમૂર્તે ॥7॥

યામ્યાં દિશં ભજતિ કિંપુરુષાખ્યવર્ષે
સંસેવિતો હનુમતા દૃઢભક્તિભાજા ।
સીતાભિરામપરમાદ્ભુતરૂપશાલી
રામાત્મકઃ પરિલસન્ પરિપાહિ વિષ્ણો ॥8॥

શ્રીનારદેન સહ ભારતખંડમુખ્યૈ-
સ્ત્વં સાંખ્યયોગનુતિભિઃ સમુપાસ્યમાનઃ ।
આકલ્પકાલમિહ સાધુજનાભિરક્ષી
નારાયણો નરસખઃ પરિપાહિ ભૂમન્ ॥9॥

પ્લાક્ષેઽર્કરૂપમયિ શાલ્મલ ઇંદુરૂપં
દ્વીપે ભજંતિ કુશનામનિ વહ્નિરૂપમ્ ।
ક્રૌંચેઽંબુરૂપમથ વાયુમયં ચ શાકે
ત્વાં બ્રહ્મરૂપમપિ પુષ્કરનામ્નિ લોકાઃ ॥10॥

સર્વૈર્ધ્રુવાદિભિરુડુપ્રકરૈર્ગ્રહૈશ્ચ
પુચ્છાદિકેષ્વવયવેષ્વભિકલ્પ્યમાનૈઃ ।
ત્વં શિંશુમારવપુષા મહતામુપાસ્યઃ
સંધ્યાસુ રુંધિ નરકં મમ સિંધુશાયિન્ ॥11॥

પાતાલમૂલભુવિ શેષતનું ભવંતં
લોલૈકકુંડલવિરાજિસહસ્રશીર્ષમ્ ।
નીલાંબરં ધૃતહલં ભુજગાંગનાભિ-
ર્જુષ્ટં ભજે હર ગદાન્ ગુરુગેહનાથ ॥12॥