નારાયણીયં દશક 11 – સનકાદીનાં વૈકુંઠદર્શનં ચ હિરણ્યાક્ષસ્ય તથા હિરણ્યકશિપોઃ જનનમ્

ક્રમેણ સર્ગે પરિવર્ધમાને
કદાપિ દિવ્યાઃ સનકાદયસ્તે ।
ભવદ્વિલોકાય વિકુંઠલોકં
પ્રપેદિરે મારુતમંદિરેશ ॥1॥

મનોજ્ઞનૈશ્રેયસકાનનાદ્યૈ-
રનેકવાપીમણિમંદિરૈશ્ચ ।
અનોપમં તં ભવતો નિકેતં
મુનીશ્વરાઃ પ્રાપુરતીતકક્ષ્યાઃ ॥2॥

ભવદ્દિદ્દૃક્ષૂન્ભવનં વિવિક્ષૂન્
દ્વાઃસ્થૌ જયસ્તાન્ વિજયોઽપ્યરુંધામ્ ।
તેષાં ચ ચિત્તે પદમાપ કોપઃ
સર્વં ભવત્પ્રેરણયૈવ ભૂમન્ ॥3॥

વૈકુંઠલોકાનુચિતપ્રચેષ્ટૌ
કષ્ટૌ યુવાં દૈત્યગતિં ભજેતમ્ ।
ઇતિ પ્રશપ્તૌ ભવદાશ્રયૌ તૌ
હરિસ્મૃતિર્નોઽસ્ત્વિતિ નેમતુસ્તાન્ ॥4॥

તદેતદાજ્ઞાય ભવાનવાપ્તઃ
સહૈવ લક્ષ્મ્યા બહિરંબુજાક્ષ ।
ખગેશ્વરાંસાર્પિતચારુબાહુ-
રાનંદયંસ્તાનભિરામમૂર્ત્યા ॥5॥

પ્રસાદ્ય ગીર્ભિઃ સ્તુવતો મુનીંદ્રા-
નનન્યનાથાવથ પાર્ષદૌ તૌ ।
સંરંભયોગેન ભવૈસ્ત્રિભિર્મા-
મુપેતમિત્યાત્તકૃપં ન્યગાદીઃ ॥6॥

ત્વદીયભૃત્યાવથ કાશ્યપાત્તૌ
સુરારિવીરાવુદિતૌ દિતૌ દ્વૌ ।
સંધ્યાસમુત્પાદનકષ્ટચેષ્ટૌ
યમૌ ચ લોકસ્ય યમાવિવાન્યૌ ॥7॥

હિરણ્યપૂર્વઃ કશિપુઃ કિલૈકઃ
પરો હિરણ્યાક્ષ ઇતિ પ્રતીતઃ ।
ઉભૌ ભવન્નાથમશેષલોકં
રુષા ન્યરુંધાં નિજવાસનાંધૌ ॥8॥

તયોર્હિરણ્યાક્ષમહાસુરેંદ્રો
રણાય ધાવન્નનવાપ્તવૈરી ।
ભવત્પ્રિયાં ક્ષ્માં સલિલે નિમજ્ય
ચચાર ગર્વાદ્વિનદન્ ગદાવાન્ ॥9॥

તતો જલેશાત્ સદૃશં ભવંતં
નિશમ્ય બભ્રામ ગવેષયંસ્ત્વામ્ ।
ભક્તૈકદૃશ્યઃ સ કૃપાનિધે ત્વં
નિરુંધિ રોગાન્ મરુદાલયેશ ॥10।