મણિદ્વીપ વર્ણન – 2 (દેવી ભાગવતમ્)

(શ્રીદેવીભાગવતં, દ્વાદશ સ્કંધં, એકાદશોઽધ્યાયઃ, મણિદ્વીપ વર્ણન – 2)

વ્યાસ ઉવાચ ।
પુષ્પરાગમયાદગ્રે કુંકુમારુણવિગ્રહઃ ।
પદ્મરાગમયઃ સાલો મધ્યે ભૂશ્ચૈવતાદૃશી ॥ 1 ॥

દશયોજનવાંદૈર્ઘ્યે ગોપુરદ્વારસંયુતઃ ।
તન્મણિસ્તંભસંયુક્તા મંડપાઃ શતશો નૃપ ॥ 2 ॥

મધ્યે ભુવિસમાસીનાશ્ચતુઃષષ્ટિમિતાઃ કલાઃ ।
નાનાયુધધરાવીરા રત્નભૂષણભૂષિતાઃ ॥ 3 ॥

પ્રત્યેકલોકસ્તાસાં તુ તત્તલ્લોકસ્યનાયકાઃ ।
સમંતાત્પદ્મરાગસ્ય પરિવાર્યસ્થિતાઃ સદા ॥ 4 ॥

સ્વસ્વલોકજનૈર્જુષ્ટાઃ સ્વસ્વવાહનહેતિભિઃ ।
તાસાં નામાનિ વક્ષ્યામિ શૃણુ ત્વં જનમેજય ॥ 5 ॥

પિંગળાક્ષી વિશાલાક્ષી સમૃદ્ધિ વૃદ્ધિરેવ ચ ।
શ્રદ્ધા સ્વાહા સ્વધાભિખ્યા માયા સંજ્ઞા વસુંધરા ॥ 6 ॥

ત્રિલોકધાત્રી સાવિત્રી ગાયત્રી ત્રિદશેશ્વરી ।
સુરૂપા બહુરૂપા ચ સ્કંદમાતાઽચ્યુતપ્રિયા ॥ 7 ॥

વિમલા ચામલા તદ્વદરુણી પુનરારુણી ।
પ્રકૃતિર્વિકૃતિઃ સૃષ્ટિઃ સ્થિતિઃ સંહૃતિરેવ ચ ॥ 8 ॥

સંધ્યામાતા સતી હંસી મર્દિકા વજ્રિકા પરા ।
દેવમાતા ભગવતી દેવકી કમલાસના ॥ 9 ॥

ત્રિમુખી સપ્તમુખ્યન્યા સુરાસુરવિમર્દિની ।
લંબોષ્ટી ચોર્ધ્વકેશી ચ બહુશીર્ષા વૃકોદરી ॥ 10 ॥

રથરેખાહ્વયા પશ્ચાચ્છશિરેખા તથા પરા ।
ગગનવેગા પવનવેગા ચૈવ તતઃ પરમ્ ॥ 11 ॥

અગ્રે ભુવનપાલા સ્યાત્તત્પશ્ચાન્મદનાતુરા ।
અનંગાનંગમથના તથૈવાનંગમેખલા ॥ 12 ॥

અનંગકુસુમા પશ્ચાદ્વિશ્વરૂપા સુરાદિકા ।
ક્ષયંકરી ભવેચ્છક્તિ રક્ષોભ્યા ચ તતઃ પરમ્ ॥ 13 ॥

સત્યવાદિન્યથ પ્રોક્તા બહુરૂપા શુચિવ્રતા ।
ઉદારાખ્યા ચ વાગીશી ચતુષ્ષષ્ટિમિતાઃ સ્મૃતાઃ ॥ 14 ॥

જ્વલજ્જિહ્વાનનાઃ સર્વાવમંત્યો વહ્નિમુલ્બણમ્ ।
જલં પિબામઃ સકલં સંહરામોવિભાવસુમ્ ॥ 15 ॥

પવનં સ્તંભયામોદ્ય ભક્ષયામોઽખિલં જગત્ ।
ઇતિ વાચં સંગિરતે ક્રોધ સંરક્તલોચનાઃ ॥ 16 ॥

ચાપબાણધરાઃ સર્વાયુદ્ધાયૈવોત્સુકાઃ સદા ।
દંષ્ટ્રા કટકટારાવૈર્બધિરીકૃત દિઙ્મુખાઃ ॥ 17 ॥

પિંગોર્ધ્વકેશ્યઃ સંપ્રોક્તાશ્ચાપબાણકરાઃ સદા ।
શતાક્ષૌહિણિકા સેનાપ્યેકૈકસ્યાઃ પ્રકીર્તિતા ॥ 18 ॥

એકૈક શક્તેઃ સામર્થ્યં લક્ષબ્રહ્માંડનાશને ।
શતાક્ષૌહિણિકાસેના તાદૃશી નૃપ સત્તમ ॥ 19 ॥

કિં ન કુર્યાજ્જગત્યસ્મિન્નશક્યં વક્તુમેવ તત્ ।
સર્વાપિ યુદ્ધસામગ્રી તસ્મિન્સાલે સ્થિતા મુને ॥ 20 ॥

રથાનાં ગણના નાસ્તિ હયાનાં કરિણાં તથા ॥
શસ્ત્રાણાં ગણના તદ્વદ્ગણાનાં ગણના તથા ॥ 21 ॥

પદ્મરાગમયાદગ્રે ગોમેદમણિનિર્મિતઃ ।
દશયોજનદૈર્ઘ્યેણ પ્રાકારો વર્તતે મહાન્ ॥ 22 ॥

ભાસ્વજ્જપાપ્રસૂનાભો મધ્યભૂસ્તસ્ય તાદૃશી ।
ગોમેદકલ્પિતાન્યેવ તદ્વાસિ સદનાનિ ચ ॥ 23 ॥

પક્ષિણઃ સ્તંભવર્યાશ્ચ વૃક્ષાવાપ્યઃ સરાંસિ ચ ।
ગોમેદકલ્પિતા એવ કુંકુમારુણવિગ્રહાઃ ॥ 24 ॥

તન્મધ્યસ્થા મહાદેવ્યો દ્વાત્રિંશચ્છક્તયઃ સ્મૃતાઃ ।
નાના શસ્ત્રપ્રહરણા ગોમેદમણિભૂષિતાઃ ॥ 25 ॥

પ્રત્યેક લોક વાસિન્યઃ પરિવાર્ય સમંતતઃ ।
ગોમેદસાલે સન્નદ્ધા પિશાચવદના નૃપ ॥ 26 ॥

સ્વર્લોકવાસિભિર્નિત્યં પૂજિતાશ્ચક્રબાહવઃ ।
ક્રોધરક્તેક્ષણા ભિંધિ પચ ચ્છિંધિ દહેતિ ચ ॥ 27 ॥

વદંતિ સતતં વાચં યુદ્ધોત્સુકહૃદંતરાઃ ।
એકૈકસ્યા મહાશક્તેર્દશાક્ષૌહિણિકા મતા ॥ 28 ॥

સેના તત્રાપ્યેકશક્તિર્લક્ષબ્રહ્માંડનાશિની ।
તાદૃશીનાં મહાસેના વર્ણનીયા કથં નૃપ ॥ 29 ॥

રથાનાં નૈવ ગણાના વાહનાનાં તથૈવ ચ ।
સર્વયુદ્ધસમારંભસ્તત્ર દેવ્યા વિરાજતે ॥ 30 ॥

તાસાં નામાનિ વક્ષ્યામિ પાપનાશકરાણિ ચ ।
વિદ્યા હ્રી પુષ્ટ યઃ પ્રજ્ઞા સિનીવાલી કુહૂસ્તથા ॥ 31 ॥

રુદ્રાવીર્યા પ્રભાનંદા પોષિણી ઋદ્ધિદા શુભા ।
કાલરાત્રિર્મહારાત્રિર્ભદ્રકાલી કપર્દિની ॥ 32 ॥

વિકૃતિર્દંડિમુંડિન્યૌ સેંદુખંડા શિખંડિની ।
નિશુંભશુંભમથિની મહિષાસુરમર્દિની ॥ 33 ॥

ઇંદ્રાણી ચૈવ રુદ્રાણી શંકરાર્ધશરીરિણી ।
નારી નારાયણી ચૈવ ત્રિશૂલિન્યપિ પાલિની ॥ 34 ॥

અંબિકાહ્લાદિની પશ્ચાદિત્યેવં શક્તયઃ સ્મૃતાઃ ।
યદ્યેતાઃ કુપિતા દેવ્યસ્તદા બ્રહ્માંડનાશનમ્ ॥ 35 ॥

પરાજયો ન ચૈતાસાં કદાચિત્ક્વચિદસ્તિ હિ ।
ગોમેદકમયાદગ્રે સદ્વજ્રમણિનિર્મિતઃ ॥ 36 ॥

દશયોજન તુંગોઽસૌ ગોપુરદ્વારસંયુતઃ ।
કપાટશૃંખલાબદ્ધો નવવૃક્ષ સમુજ્જ્વલઃ ॥ 37 ॥

સાલસ્તન્મધ્યભૂમ્યાદિ સર્વં હીરમયં સ્મૃતમ્ ।
ગૃહાણિવીથયો રથ્યા મહામાર્ગાં ગણાનિ ચ ॥ 38 ॥

વૃક્ષાલવાલ તરવઃ સારંગા અપિ તાદૃશાઃ ।
દીર્ઘિકાશ્રેણયોવાપ્યસ્તડાગાઃ કૂપ સંયુતાઃ ॥ 39 ॥

તત્ર શ્રીભુવનેશ્વર્યા વસંતિ પરિચારિકાઃ ।
એકૈકા લક્ષદાસીભિઃ સેવિતા મદગર્વિતાઃ ॥ 40 ॥

તાલવૃંતધરાઃ કાશ્ચિચ્ચષકાઢ્ય કરાંબુજાઃ ।
કાશ્ચિત્તાંબૂલપાત્રાણિ ધારયંત્યોઽતિગર્વિતાઃ ॥ 41 ॥

કાશ્ચિત્તચ્છત્રધારિણ્યશ્ચામરાણાં વિધારિકાઃ ।
નાના વસ્ત્રધરાઃ કાશ્ચિત્કાશ્ચિત્પુષ્પ કરાંબુજાઃ ॥ 42 ॥

નાનાદર્શકરાઃ કાશ્ચિત્કાશ્ચિત્કુંકુમલેપનમ્ ।
ધારયંત્યઃ કજ્જલં ચ સિંદૂર ચષકં પરાઃ ॥ 43 ॥

કાશ્ચિચ્ચિત્રક નિર્માત્ર્યઃ પાદ સંવાહને રતાઃ ।
કાશ્ચિત્તુ ભૂષાકારિણ્યો નાના ભૂષાધરાઃ પરાઃ ॥ 44 ॥

પુષ્પભૂષણ નિર્માત્ર્યઃ પુષ્પશૃંગારકારિકાઃ ।
નાના વિલાસચતુરા બહ્વ્ય એવં વિધાઃ પરાઃ ॥ 45 ॥

નિબદ્ધ પરિધાનીયા યુવત્યઃ સકલા અપિ ।
દેવી કૃપા લેશવશાત્તુચ્છીકૃત જગત્ત્રયાઃ ॥ 46 ॥

એતા દૂત્યઃ સ્મૃતા દેવ્યઃ શૃંગારમદગર્વિતાઃ ।
તાસાં નામાનિ વક્ષ્યામિ શૃણુ મે નૃપસત્તમ ॥ 47 ॥

અનંગરૂપા પ્રથમાપ્યનંગમદના પરા ।
તૃતીયાતુ તતઃ પ્રોક્તા સુંદરી મદનાતુરા ॥ 48 ॥

તતો ભુવનવેગાસ્યાત્તથા ભુવનપાલિકા ।
સ્યાત્સર્વશિશિરાનંગવેદનાનંગમેખલા ॥ 49 ॥

વિદ્યુદ્દામસમાનાંગ્યઃ ક્વણત્કાંચીગુણાન્વિતાઃ ।
રણન્મંજીરચરણા બહિરંતરિતસ્તતઃ ॥ 50 ॥

ધાવમાનાસ્તુ શોભંતે સર્વા વિદ્યુલ્લતોપમાઃ ।
કુશલાઃ સર્વકાર્યેષુ વેત્રહસ્તાઃ સમંતતઃ ॥ 51 ॥

અષ્ટદિક્ષુતથૈતાસાં પ્રાકારાદ્બહિરેવ ચ ।
સદનાનિ વિરાજંતે નાના વાહનહેતિભિઃ ॥ 52 ॥

વજ્રસાલાદગ્રભાગે સાલો વૈદૂર્યનિર્મિતઃ ।
દશયોજનતુંગોઽસૌ ગોપુરદ્વારભૂષિતઃ ॥ 53 ॥

વૈદૂર્યભૂમિઃ સર્વાપિગૃહાણિ વિવિધાનિ ચ ।
વીથ્યો રથ્યા મહામાર્ગાઃ સર્વે વેદૂર્યનિર્મિતાઃ ॥ 54 ॥

વાપી કૂપ તડાગાશ્ચ સ્રવંતીનાં તટાનિ ચ ।
વાલુકા ચૈવ સર્વાઽપિ વૈદૂર્યમણિનિર્મિતા ॥ 55 ॥

તત્રાષ્ટદિક્ષુપરિતો બ્રાહ્મ્યાદીનાં ચ મંડલમ્ ।
નિજૈર્ગણૈઃ પરિવૃતં ભ્રાજતે નૃપસત્તમ ॥ 56 ॥

પ્રતિબ્રહ્માંડમાતૃણાં તાઃ સમષ્ટય ઈરિતાઃ ।
બ્રાહ્મી માહેશ્વરી ચૈવ કૌમારી વૈષ્ણવી તથા ॥57 ॥

વારાહી ચ તથેંદ્રાણી ચામુંડાઃ સપ્તમાતરઃ ।
અષ્ટમી તુ મહાલક્ષ્મીર્નામ્ના પ્રોક્તાસ્તુ માતરઃ ॥ 58 ॥

બ્રહ્મરુદ્રાદિદેવાનાં સમાકારા સ્તુતાઃ સ્મૃતાઃ ।
જગત્કળ્યાણકારિણ્યઃ સ્વસ્વસેનાસમાવૃતાઃ ॥ 59 ॥

તત્સાલસ્ય ચતુર્દ્વાર્ષુ વાહનાનિ મહેશિતુઃ ।
સજ્જાનિ નૃપતે સંતિ સાલંકારાણિ નિત્યશઃ ॥ 60 ॥

દંતિનઃ કોટિશો વાહાઃ કોટિશઃ શિબિકાસ્તથા ।
હંસાઃ સિંહાશ્ચ ગરુડા મયૂરા વૃષભાસ્તથા ॥ 61 ॥

તૈર્યુક્તાઃ સ્યંદનાસ્તદ્વત્કોટિશો નૃપનંદન ।
પાર્ષ્ણિગ્રાહસમાયુક્તા ધ્વજૈરાકાશચુંબિનઃ ॥ 62 ॥

કોટિશસ્તુ વિમાનાનિ નાના ચિહ્નાન્વિતાનિ ચ ।
નાના વાદિત્રયુક્તાનિ મહાધ્વજયુતાનિ ચ ॥ 63 ॥

વૈદૂર્યમણિ સાલસ્યાપ્યગ્રે સાલઃ પરઃ સ્મૃતઃ ।
દશયોજન તુંગોઽસાવિંદ્રનીલાશ્મનિર્મિતઃ ॥ 64 ॥

તન્મધ્ય ભૂસ્તથા વીથ્યો મહામાર્ગા ગૃહાણિ ચ ।
વાપી કૂપ તડાગાશ્ચ સર્વે તન્મણિનિર્મિતાઃ ॥ 65 ॥

તત્ર પદ્મ તુ સંપ્રોક્તં બહુયોજન વિસ્તૃતમ્ ।
ષોડશારં દીપ્યમાનં સુદર્શનમિવાપરમ્ ॥ 66 ॥

તત્ર ષોડશશક્તીનાં સ્થાનાનિ વિવિધાનિ ચ ।
સર્વોપસ્કરયુક્તાનિ સમૃદ્ધાનિ વસંતિ હિ ॥ 67 ॥

તાસાં નામાનિ વક્ષ્યામિ શૃણુ મે નૃપસત્તમ ।
કરાળી વિકરાળી ચ તથોમા ચ સરસ્વતી ॥ 68 ॥

શ્રી દુર્ગોષા તથા લક્ષ્મીઃ શ્રુતિશ્ચૈવ સ્મૃતિર્ધૃતિઃ ।
શ્રદ્ધા મેધા મતિઃ કાંતિરાર્યા ષોડશશક્તયઃ ॥ 69 ॥

નીલજીમૂતસંકાશાઃ કરવાલ કરાંબુજાઃ ।
સમાઃ ખેટકધારિણ્યો યુદ્ધોપક્રાંત માનસાઃ ॥ 70 ॥

સેનાન્યઃ સકલા એતાઃ શ્રીદેવ્યા જગદીશિતુઃ ।
પ્રતિબ્રહ્માંડસંસ્થાનાં શક્તીનાં નાયિકાઃ સ્મૃતાઃ ॥ 71 ॥

બ્રહ્માંડક્ષોભકારિણ્યો દેવી શક્ત્યુપબૃંહિતાઃ ।
નાના રથસમારૂઢા નાના શક્તિભિરન્વિતાઃ ॥ 72 ॥

એતત્પરાક્રમં વક્તું સહસ્રાસ્યોઽપિ ન ક્ષમઃ ।
ઇંદ્રનીલમહાસાલાદગ્રે તુ બહુવિસ્તૃતઃ ॥ 73 ॥

મુક્તાપ્રાકાર ઉદિતો દશયોજન દૈર્ઘ્યવાન્ ।
મધ્યભૂઃ પૂર્વવત્પ્રોક્તા તન્મધ્યેઽષ્ટદળાંબુજમ્ ॥ 74 ॥

મુક્તામણિગણાકીર્ણં વિસ્તૃતં તુ સકેસરમ્ ।
તત્ર દેવીસમાકારા દેવ્યાયુધધરાઃ સદા ॥ 75 ॥

સંપ્રોક્તા અષ્ટમંત્રિણ્યો જગદ્વાર્તાપ્રબોધિકાઃ ।
દેવીસમાનભોગાસ્તા ઇંગિતજ્ઞાસ્તુપંડિતાઃ ॥ 76 ॥

કુશલાઃ સર્વકાર્યેષુ સ્વામિકાર્યપરાયણાઃ ।
દેવ્યભિપ્રાય બોધ્યસ્તાશ્ચતુરા અતિસુંદરાઃ ॥ 77 ॥

નાના શક્તિસમાયુક્તાઃ પ્રતિબ્રહ્માંડવર્તિનામ્ ।
પ્રાણિનાં તાઃ સમાચારં જ્ઞાનશક્ત્યાવિદંતિ ચ ॥ 78 ॥

તાસાં નામાનિ વક્ષ્યામિ મત્તઃ શૃણુ નૃપોત્તમ ।
અનંગકુસુમા પ્રોક્તાપ્યનંગકુસુમાતુરા ॥ 79 ॥

અનંગમદના તદ્વદનંગમદનાતુરા ।
ભુવનપાલા ગગનવેગા ચૈવ તતઃ પરમ્ ॥ 80 ॥

શશિરેખા ચ ગગનરેખા ચૈવ તતઃ પરમ્ ।
પાશાંકુશવરાભીતિધરા અરુણવિગ્રહાઃ ॥ 81 ॥

વિશ્વસંબંધિનીં વાર્તાં બોધયંતિ પ્રતિક્ષણમ્ ।
મુક્તાસાલાદગ્રભાગે મહામારકતો પરઃ ॥ 82 ॥

સાલોત્તમઃ સમુદ્દિષ્ટો દશયોજન દૈર્ઘ્યવાન્ ।
નાના સૌભાગ્યસંયુક્તો નાના ભોગસમન્વિતઃ ॥ 83 ॥

મધ્યભૂસ્તાદૃશી પ્રોક્તા સદનાનિ તથૈવ ચ ।
ષટ્કોણમત્રવિસ્તીર્ણં કોણસ્થા દેવતાઃ શૃણુઃ ॥ 84 ॥

પૂર્વકોણે ચતુર્વક્ત્રો ગાયત્રી સહિતો વિધિઃ ।
કુંડિકાક્ષગુણાભીતિ દંડાયુધધરઃ પરઃ ॥ 85 ॥

તદાયુધધરા દેવી ગાયત્રી પરદેવતા ।
વેદાઃ સર્વે મૂર્તિમંતઃ શાસ્ત્રાણિ વિવિધાનિ ચ ॥ 86 ॥

સ્મૃતયશ્ચ પુરાણાનિ મૂર્તિમંતિ વસંતિ હિ ।
યે બ્રહ્મવિગ્રહાઃ સંતિ ગાયત્રીવિગ્રહાશ્ચ યે ॥ 87 ॥

વ્યાહૃતીનાં વિગ્રહાશ્ચ તે નિત્યં તત્ર સંતિ હિ ।
રક્ષઃ કોણે શંખચક્રગદાંબુજ કરાંબુજા ॥ 88 ॥

સાવિત્રી વર્તતે તત્ર મહાવિષ્ણુશ્ચ તાદૃશઃ ।
યે વિષ્ણુવિગ્રહાઃ સંતિ મત્સ્યકૂર્માદયોખિલાઃ ॥ 89 ॥

સાવિત્રી વિગ્રહા યે ચ તે સર્વે તત્ર સંતિ હિ ।
વાયુકોણે પરશ્વક્ષમાલાભયવરાન્વિતઃ ॥ 90 ॥

મહારુદ્રો વર્તતેઽત્ર સરસ્વત્યપિ તાદૃશી ।
યે યે તુ રુદ્રભેદાઃ સ્યુર્દક્ષિણાસ્યાદયો નૃપ ॥ 91 ॥

ગૌરી ભેદાશ્ચ યે સર્વે તે તત્ર નિવસંતિ હિ ।
ચતુઃષષ્ટ્યાગમા યે ચ યે ચાન્યેપ્યાગમાઃ સ્મૃતાઃ ॥ 92 ॥

તે સર્વે મૂર્તિમંતશ્ચ તત્ર વૈ નિવસંતિ હિ ।
અગ્નિકોણે રત્નકુંભં તથા મણિકરંડકમ્ ॥ 93 ॥

દધાનો નિજહસ્તાભ્યાં કુબેરો ધનદાયકઃ ।
નાના વીથી સમાયુક્તો મહાલક્ષ્મીસમન્વિતઃ ॥ 94 ॥

દેવ્યા નિધિપતિસ્ત્વાસ્તે સ્વગુણૈઃ પરિવેષ્ટિતઃ ।
વારુણે તુ મહાકોણે મદનો રતિસંયુતઃ ॥ 95 ॥

પાશાંકુશધનુર્બાણધરો નિત્યં વિરાજતે ।
શૃંગારમૂર્તિમંતસ્તુ તત્ર સન્નિહિતાઃ સદા ॥ 96 ॥

ઈશાનકોણે વિઘ્નેશો નિત્યં પુષ્ટિસમન્વિતઃ ।
પાશાંકુશધરો વીરો વિઘ્નહર્તા વિરાજતે ॥ 97 ॥

વિભૂતયો ગણેશસ્ય યાયાઃ સંતિ નૃપોત્તમ ।
તાઃ સર્વા નિવસંત્યત્ર મહૈશ્વર્યસમન્વિતાઃ ॥ 98 ॥

પ્રતિબ્રહ્માંડસંસ્થાનાં બ્રહ્માદીનાં સમષ્ટયઃ ।
એતે બ્રહ્માદયઃ પ્રોક્તાઃ સેવંતે જગદીશ્વરીમ્ ॥ 99 ॥

મહામારકતસ્યાગ્રે શતયોજન દૈર્ઘ્યવાન્ ।
પ્રવાલશાલોસ્ત્યપરઃ કુંકુમારુણવિગ્રહઃ ॥ 100 ॥

મધ્યભૂસ્તાદૃશી પ્રોક્તા સદનાનિ ચ પૂર્વવત્ ।
તન્મધ્યે પંચભૂતાનાં સ્વામિન્યઃ પંચ સંતિ ચ ॥ 101 ॥

હૃલ્લેખા ગગના રક્તા ચતુર્થી તુ કરાળિકા ।
મહોચ્છુષ્મા પંચમી ચ પંચભૂતસમપ્રભાઃ ॥ 102 ॥

પાશાંકુશવરાભીતિધારિણ્યોમિતભૂષણાઃ ।
દેવી સમાનવેષાઢ્યા નવયૌવનગર્વિતાઃ ॥ 103 ॥

પ્રવાલશાલાદગ્રે તુ નવરત્ન વિનિર્મિતઃ ।
બહુયોજનવિસ્તીર્ણો મહાશાલોઽસ્તિ ભૂમિપ ॥ 104 ॥

તત્ર ચામ્નાયદેવીનાં સદનાનિ બહૂન્યપિ ।
નવરત્નમયાન્યેવ તડાગાશ્ચ સરાંસિ ચ ॥ 105 ॥

શ્રીદેવ્યા યેઽવતારાઃ સ્યુસ્તે તત્ર નિવસંતિ હિ ।
મહાવિદ્યા મહાભેદાઃ સંતિ તત્રૈવ ભૂમિપ ॥ 106 ॥

નિજાવરણદેવીભિર્નિજભૂષણવાહનૈઃ ।
સર્વદેવ્યો વિરાજંતે કોટિસૂર્યસમપ્રભાઃ ॥ 107 ॥

સપ્તકોટિ મહામંત્રદેવતાઃ સંતિ તત્ર હિ ।
નવરત્નમયાદગ્રે ચિંતામણિગૃહં મહત્ ॥ 108 ॥

તત્ર ત્યં વસ્તુ માત્રં તુ ચિંતામણિ વિનિર્મિતમ્ ।
સૂર્યોદ્ગારોપલૈસ્તદ્વચ્ચંદ્રોદ્ગારોપલૈસ્તથા ॥ 109 ॥

વિદ્યુત્પ્રભોપલૈઃ સ્તંભાઃ કલ્પિતાસ્તુ સહસ્રશઃ ।
યેષાં પ્રભાભિરંતસ્થં વસ્તુ કિંચિન્ન દૃશ્યતે ॥ 110 ॥

ઇતિ શ્રીદેવીભાગવતે મહાપુરાણે દ્વાદશસ્કંધે એકાદશોઽધ્યાયઃ ।