કનકધારા સ્તોત્રમ્

વંદે વંદારુ મંદારમિંદિરાનંદકંદલમ્ ।
અમંદાનંદસંદોહ બંધુરં સિંધુરાનનમ્ ॥

અંગં હરેઃ પુલકભૂષણમાશ્રયંતી
ભૃંગાંગનેવ મુકુળાભરણં તમાલમ્ ।
અંગીકૃતાખિલવિભૂતિરપાંગલીલા
માંગળ્યદાસ્તુ મમ મંગળદેવતાયાઃ ॥ 1 ॥

મુગ્ધા મુહુર્વિદધતી વદને મુરારેઃ
પ્રેમત્રપાપ્રણિહિતાનિ ગતાગતાનિ ।
માલા દૃશોર્મધુકરીવ મહોત્પલે યા
સા મે શ્રિયં દિશતુ સાગરસંભવાયાઃ ॥ 2 ॥

આમીલિતાક્ષમધિગમ્ય મુદા મુકુંદમ્-
આનંદકંદમનિમેષમનંગતંત્રમ્ ।
આકેકરસ્થિતકનીનિકપક્ષ્મનેત્રં
ભૂત્યૈ ભવેન્મમ ભુજંગશયાંગનાયાઃ ॥ 3 ॥

બાહ્વંતરે મધુજિતઃ શ્રિતકૌસ્તુભે યા
હારાવળીવ હરિનીલમયી વિભાતિ ।
કામપ્રદા ભગવતોઽપિ કટાક્ષમાલા
કલ્યાણમાવહતુ મે કમલાલયાયાઃ ॥ 4 ॥

કાલાંબુદાળિલલિતોરસિ કૈટભારેઃ
ધારાધરે સ્ફુરતિ યા તટિદંગનેવ ।
માતુસ્સમસ્તજગતાં મહનીયમૂર્તિઃ
ભદ્રાણિ મે દિશતુ ભાર્ગવનંદનાયાઃ ॥ 5 ॥

પ્રાપ્તં પદં પ્રથમતઃ ખલુ યત્પ્રભાવાત્
માંગળ્યભાજિ મધુમાથિનિ મન્મથેન ।
મય્યાપતેત્તદિહ મંથરમીક્ષણાર્ધં
મંદાલસં ચ મકરાલયકન્યકાયાઃ ॥ 6 ॥

વિશ્વામરેંદ્રપદવિભ્રમદાનદક્ષં
આનંદહેતુરધિકં મુરવિદ્વિષોઽપિ ।
ઈષન્નિષીદતુ મયિ ક્ષણમીક્ષણાર્થં [ક્ષણમીક્ષણાર્ધં]
ઇંદીવરોદરસહોદરમિંદિરાયાઃ ॥ 7 ॥

ઇષ્ટા વિશિષ્ટમતયોઽપિ યયા દયાર્દ્ર
દૃષ્ટ્યા ત્રિવિષ્ટપપદં સુલભં લભંતે ।
દૃષ્ટિઃ પ્રહૃષ્ટકમલોદરદીપ્તિ-રિષ્ટાં
પુષ્ટિં કૃષીષ્ટ મમ પુષ્કરવિષ્ટરાયાઃ ॥ 8 ॥

દદ્યાદ્દયાનુપવનો દ્રવિણાંબુધારા-
મસ્મિ-ન્નકિંચન વિહંગશિશૌ વિષણ્ણે ।
દુષ્કર્મઘર્મમપનીય ચિરાય દૂરં
નારાયણપ્રણયિનીનયનાંબુવાહઃ ॥ 9 ॥

ગીર્દેવતેતિ ગરુડધ્વજસુંદરીતિ
શાકંભરીતિ શશિશેખરવલ્લભેતિ ।
સૃષ્ટિસ્થિતિપ્રળયકેલિષુ સંસ્થિતાયૈ
તસ્યૈ નમસ્ત્રિભુવનૈકગુરોસ્તરુણ્યૈ ॥ 10 ॥

શ્રુત્યૈ નમોઽસ્તુ શુભકર્મફલપ્રસૂત્યૈ
રત્યૈ નમોઽસ્તુ રમણીયગુણાર્ણવાયૈ ।
શક્ત્યૈ નમોઽસ્તુ શતપત્રનિકેતનાયૈ
પુષ્ટ્યૈ નમોઽસ્તુ પુરુષોત્તમવલ્લભાયૈ ॥ 11 ॥

નમોઽસ્તુ નાળીકનિભાનનાયૈ
નમોઽસ્તુ દુગ્ધોદધિજન્મભૂમ્યૈ ।
નમોઽસ્તુ સોમામૃતસોદરાયૈ
નમોઽસ્તુ નારાયણવલ્લભાયૈ ॥ 12 ॥

નમોઽસ્તુ હેમાંબુજપીઠિકાયૈ
નમોઽસ્તુ ભૂમંડલનાયિકાયૈ ।
નમોઽસ્તુ દેવાદિદયાપરાયૈ
નમોઽસ્તુ શારંગાયુધવલ્લભાયૈ ॥ 13 ॥

નમોઽસ્તુ દેવ્યૈ ભૃગુનંદનાયૈ
નમોઽસ્તુ વિષ્ણોરુરસિસ્થિતાયૈ ।
નમોઽસ્તુ લક્ષ્મ્યૈ કમલાલયાયૈ
નમોઽસ્તુ દામોદરવલ્લભાયૈ ॥ 14 ॥

નમોઽસ્તુ કાંત્યૈ કમલેક્ષણાયૈ
નમોઽસ્તુ ભૂત્યૈ ભુવનપ્રસૂત્યૈ ।
નમોઽસ્તુ દેવાદિભિરર્ચિતાયૈ
નમોઽસ્તુ નંદાત્મજવલ્લભાયૈ ॥ 15 ॥

સંપત્કરાણિ સકલેંદ્રિયનંદનાનિ
સામ્રાજ્યદાનવિભવાનિ સરોરુહાક્ષિ ।
ત્વદ્વંદનાનિ દુરિતોદ્ધરણોદ્યતાનિ
મામેવ માતરનિશં કલયંતુ માન્યે ॥ 16 ॥

યત્કટાક્ષસમુપાસનાવિધિઃ
સેવકસ્ય સકલાર્થસંપદઃ ।
સંતનોતિ વચનાંગમાનસૈઃ
ત્વાં મુરારિહૃદયેશ્વરીં ભજે ॥ 17 ॥

સરસિજનિલયે સરોજહસ્તે [સરસિજનયને]
ધવળતમાંશુકગંધમાલ્યશોભે ।
ભગવતિ હરિવલ્લભે મનોજ્ઞે
ત્રિભુવનભૂતિકરિ પ્રસીદ મહ્યમ્ ॥ 18 ॥

દિગ્ઘસ્તિભિઃ કનકકુંભમુખાવસૃષ્ટ
સ્વર્વાહિનીવિમલચારુજલપ્લુતાંગીમ્ ।
પ્રાતર્નમામિ જગતાં જનનીમશેષ
લોકાધિનાથ-ગૃહિણીમ્-અમૃતાબ્ધિપુત્રીમ્ ॥ 19 ॥

કમલે કમલાક્ષવલ્લભે ત્વં
કરુણાપૂરતરંગિતૈરપાંગૈઃ ।
અવલોકય મામકિંચનાનાં
પ્રથમં પાત્રમકૃત્રિમં દયાયાઃ ॥ 20 ॥

સ્તુવંતિ યે સ્તુતિભિરમૂભિરન્વહં
ત્રયીમયીં ત્રિભુવનમાતરં રમામ્ ।
ગુણાધિકા ગુરુતર-ભાગ્ય-ભાગિનો [ભાગિનઃ]
ભવંતિ તે ભુવિ બુધભાવિતાશયાઃ ॥ 21 ॥

સુવર્ણધારાસ્તોત્રં યચ્છંકરાચાર્ય નિર્મિતમ્ ।
ત્રિસંધ્યં યઃ પઠેન્નિત્યં સ કુબેરસમો ભવેત્ ॥

ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિંદભગવત્પૂજ્યપાદશિષ્યસ્ય શ્રીમચ્છંકરભગવતઃ કૃતૌ કનકધારાસ્તોત્રં સંપૂર્ણમ્ ।