ગીતગોવિંદં નવમઃ સર્ગઃ – મંદ મુકુંદઃ

॥ નવમઃ સર્ગઃ ॥
॥ મંદમુકુંદઃ ॥

તામથ મન્મથખિન્નાં રતિરસભિન્નાં વિષાદસંપન્નામ્ ।
અનુચિંતિતહરિચરિતાં કલહાંતરિતમુવાચ સખી ॥ 51 ॥

॥ ગીતં 18 ॥

હરિરભિસરતિ વહતિ મધુપવને ।
કિમપરમધિકસુખં સખિ ભુવને ॥
માધવે મા કુરુ માનિનિ માનમયે ॥ 1 ॥

તાલફલાદપિ ગુરુમતિસરસમ્ ।
કિં વિફલીકુરુષે કુચકલશમ્ ॥ 2 ॥

કતિ ન કથિતમિદમનુપદમચિરમ્ ।
મા પરિહર હરિમતિશયરુચિરમ્ ॥ 3 ॥

કિમિતિ વિષીદસિ રોદિષિ વિકલા ।
વિહસતિ યુવતિસભા તવ સકલા ॥ 4 ॥

સજલનલિનીદલશીતલશયને ।
હરિમવલોક્ય સફલય્ નયને ॥ 5 ॥

જનયસિ મનસિ કિમિતિ ગુરુખેદમ્ ।
શૃણુ મમ વચનમનીહિતભેદમ્ ॥ 6 ॥

હરિરુપયાતુ વદતુ બહુમધુરમ્ ।
કિમિતિ કરોષિ હૃદયમતિવિધુરમ્ ॥ 7 ॥

શ્રીજયદેવભણિતમતિલલિતમ્ ।
સુખયતુ રસિકજનં હરિચરિતમ્ ॥ 8 ॥

સ્નિગ્ધે યત્પરુષાસિ યત્પ્રણમતિ સ્તબ્ધાસિ યદ્રાગિણિ દ્વેષસ્થાસિ યદુન્મુખે વિમુખતાં યાતાસિ તસ્મિન્પ્રિયે ।
યુક્તં તદ્વિપરીતકારિણિ તવ શ્રીખંડચર્ચા વિષં શીતાંશુસ્તપનો હિમં હુતવહઃ ક્રીડામુદો યાતનાઃ ॥ 52 ॥

॥ ઇતિ ગીતગોવિંદે કલહાંતરિતાવર્ણને મંદમુકુંદો નામ નવમઃ સર્ગઃ ॥