ગીતગોવિંદં તૃતીયઃ સર્ગઃ – મુગ્ધ મધુસૂદનઃ

॥ તૃતીયઃ સર્ગઃ ॥
॥ મુગ્ધમધુસૂદનઃ ॥

કંસારિરપિ સંસારવાસનાબંધશૃંખલામ્ ।
રાધામાધાય હૃદયે તત્યાજ વ્રજસુંદરીઃ ॥ 18 ॥

ઇતસ્તતસ્તામનુસૃત્ય રાધિકા-મનંગબાણવ્રણખિન્નમાનસઃ ।
કૃતાનુતાપઃ સ કલિંદનંદિની-તટાંતકુંજે વિષસાદ માધવઃ ॥ 19 ॥

॥ ગીતં 7 ॥

મામિયં ચલિતા વિલોક્ય વૃતં વધૂનિચયેન ।
સાપરાધતયા મયાપિ ન વારિતાતિભયેન ॥
હરિ હરિ હતાદરતયા ગતા સા કુપિતેવ ॥ 1 ॥

કિં કરિષ્યતિ કિં વદિષ્યતિ સા ચિરં વિરહેણ ।
કિં ધનેન જનેન કિં મમ જીવનેન ગૃહેણ ॥ 2 ॥

ચિંતયામિ તદાનનં કુટિલભ્રુ કોપભરેણ ।
શોણપદ્મમિવોપરિ ભ્રમતાકુલં ભ્રમરેણ ॥ 3 ॥

તામહં હૃદિ સંગતામનિશં ભૃશં રમયામિ ।
કિં વનેઽનુસરામિ તામિહ કિં વૃથા વિલપામિ ॥ 4 ॥

તન્વિ ખિન્નમસૂયયા હૃદયં તવાકલયામિ ।
તન્ન વેદ્મિ કુતો ગતાસિ ન તેન તેઽનુનયામિ ॥ 5 ॥

દૃશ્યતે પુરતો ગતાગતમેવ મે વિદધાસિ ।
કિં પુરેવ સસંભ્રમં પરિરંભણં ન દદાસિ ॥ 6 ॥

ક્ષમ્યતામપરં કદાપિ તવેદૃશં ન કરોમિ ।
દેહિ સુંદરિ દર્શનં મમ મન્મથેન દુનોમિ ॥ 7 ॥

વર્ણિતં જયદેવકેન હરેરિદં પ્રવણેન ।
કિંદુબિલ્વસમુદ્રસંભવરોહિણીરમણેન ॥ 8 ॥

હૃદિ બિસલતાહારો નાયં ભુજંગમનાયકઃ કુવલયદલશ્રેણી કંઠે ન સા ગરલદ્યુતિઃ ।
મલયજરજો નેદં ભસ્મ પ્રિયારહિતે મયિ પ્રહર ન હરભ્રાંત્યાનંગ ક્રુધા કિમુ ધાવસિ ॥ 20 ॥

પાણૌ મા કુરુ ચૂતસાયકમમું મા ચાપમારોપય ક્રીડાનિર્જિતવિશ્વ મૂર્છિતજનાઘાતેન કિં પૌરુષમ્ ।
તસ્યા એવ મૃગીદૃશો મનસિજપ્રેંખત્કટાક્ષાશુગ-શ્રેણીજર્જરિતં મનાગપિ મનો નાદ્યાપિ સંધુક્ષતે ॥ 21 ॥

ભ્રૂચાપે નિહિતઃ કટાક્ષવિશિખો નિર્માતુ મર્મવ્યથાં શ્યામાત્મા કુટિલઃ કરોતુ કબરીભારોઽપિ મારોદ્યમમ્ ।
મોહં તાવદયં ચ તન્વિ તનુતાં બિંબાદરો રાગવાન્ સદ્વૃત્તસ્તનમણ્દલસ્તવ કથં પ્રાણૈર્મમ ક્રીડતિ ॥ 22 ॥

તાનિ સ્પર્શસુખાનિ તે ચ તરલાઃ સ્નિગ્ધા દૃશોર્વિભ્રમા-સ્તદ્વક્ત્રાંબુજસૌરભં સ ચ સુધાસ્યંદી ગિરાં વક્રિમા ।
સા બિંબાધરમાધુરીતિ વિષયાસંગેઽપિ ચેન્માનસં તસ્યાં લગ્નસમાધિ હંત વિરહવ્યાધિઃ કથં વર્ધતે ॥ 23 ॥

ભ્રૂપલ્લવં ધનુરપાંગતરંગિતાનિ બાણાઃ ગુણઃ શ્રવણપાલિરિતિ સ્મરેણ ।
તસ્યામનંગજયજંગમદેવતાયાં અસ્ત્રાણિ નિર્જિતજગંતિ કિમર્પિતાનિ ॥ 24 ॥

[એષઃ શ્લોકઃ કેષુચન સંસ્કરણેષુ વિદ્યતે]

તિર્યક્કંઠ વિલોલ મૌલિ તરલોત્તં સસ્ય વંશોચ્ચરદ્-
દીપ્તિસ્થાન કૃતાવધાન લલના લક્ષૈર્ન સંલક્ષિતાઃ ।
સંમુગ્ધે મધુસૂદનસ્ય મધુરે રાધામુખેંદૌ સુધા-
સારે કંદલિતાશ્ચિરં દધતુ વઃ ક્ષેમં કટાક્ષોર્મ્મય ॥ (25) ॥

॥ ઇતિ શ્રીગીતગોવિંદે મુગ્ધમધુસૂદનો નામ તૃતીયઃ સર્ગઃ ॥