ગીતગોવિંદં દ્વિતીયઃ સર્ગઃ – અક્લેશ કેશવઃ

॥ દ્વિતીયઃ સર્ગઃ ॥
॥ અક્લેશકેશવઃ ॥

વિહરતિ વને રાધા સાધારણપ્રણયે હરૌ વિગલિતનિજોત્કર્ષાદીર્ષ્યાવશેન ગતાન્યતઃ ।
ક્વચિદપિ લતાકુંજે ગુંજન્મધુવ્રતમંડલી-મુખરશિખરે લીના દીનાપ્યુવાચ રહઃ સખીમ્ ॥ 14 ॥

॥ ગીતં 5 ॥

સંચરદધરસુધામધુરધ્વનિમુખરિતમોહનવંશમ્ ।
ચલિતદૃગંચલચંચલમૌલિકપોલવિલોલવતંસમ્ ॥
રાસે હરિમિહ વિહિતવિલાસં સ્મરતિ મનો મમ કૃતપરિહાસમ્ ॥ 1 ॥

ચંદ્રકચારુમયૂરશિખંડકમંડલવલયિતકેશમ્ ।
પ્રચુરપુરંદરધનુરનુરંજિતમેદુરમુદિરસુવેશમ્ ॥ 2 ॥

ગોપકદંબનિતંબવતીમુખચુંબનલંભિતલોભમ્ ।
બંધુજીવમધુરાધરપલ્લવમુલ્લસિતસ્મિતશોભમ્ ॥ 3 ॥

વિપુલપુલકભુજપલ્લવવલયિતવલ્લવયુવતિસહસ્રમ્ ।
કરચરણોરસિ મણિગણભૂષણકિરણવિભિન્નતમિસ્રમ્ ॥ 4 ॥

જલદપટલવલદિંદુવિનંદકચંદનતિલકલલાટમ્ ।
પીનપયોધરપરિસરમર્દનનિર્દયહૃદયકવાટમ્ ॥ 5 ॥

મણિમયમકરમનોહરકુંડલમંડિતગંડમુદારમ્ ।
પીતવસનમનુગતમુનિમનુજસુરાસુરવરપરિવારમ્ ॥ 6 ॥

વિશદકદંબતલે મિલિતં કલિકલુષભયં શમયંતમ્ ।
મામપિ કિમપિ તરંગદનંગદૃશા મનસા રમયંતમ્ ॥ 7 ॥

શ્રીજયદેવભણિતમતિસુંદરમોહનમધુરિપુરૂપમ્ ।
હરિચરણસ્મરણં પ્રતિ સંપ્રતિ પુણ્યવતામનુરૂપમ્ ॥ 8 ॥

ગણયતિ ગુણગ્રામં ભામં ભ્રમાદપિ નેહતે વહતિ ચ પરિતોષં દોષં વિમુંચતિ દૂરતઃ ।
યુવતિષુ વલસ્તૃષ્ણે કૃષ્ણે વિહારિણિ માં વિના પુનરપિ મનો વામં કામં કરોતિ કરોમિ કિમ્ ॥ 15 ॥

॥ ગીતં 6 ॥

નિભૃતનિકુંજગૃહં ગતયા નિશિ રહસિ નિલીય વસંતમ્ ।
ચકિતવિલોકિતસકલદિશા રતિરભસરસેન હસંતમ્ ॥
સખિ હે કેશિમથનમુદારં રમય મયા સહ મદનમનોરથભાવિતયા સવિકારમ્ ॥ 1 ॥

પ્રથમસમાગમલજ્જિતયા પટુચાટુશતૈરનુકૂલમ્ ।
મૃદુમધુરસ્મિતભાષિતયા શિથિલીકૃતજઘનદુકૂલમ્ ॥ 2 ॥

કિસલયશયનનિવેશિતયા ચિરમુરસિ મમૈવ શયાનમ્ ।
કૃતપરિરંભણચુંબનયા પરિરભ્ય કૃતાધરપાનમ્ ॥ 3 ॥

અલસનિમીલિતલોચનયા પુલકાવલિલલિતકપોલમ્ ।
શ્રમજલસકલકલેવરયા વરમદનમદાદતિલોલમ્ ॥ 4 ॥

કોકિલકલરવકૂજિતયા જિતમનસિજતંત્રવિચારમ્ ।
શ્લથકુસુમાકુલકુંતલયા નખલિખિતઘનસ્તનભારમ્ ॥ 5 ॥

ચરણરણિતમનિનૂપુરયા પરિપૂરિતસુરતવિતાનમ્ ।
મુખરવિશૃંખલમેખલયા સકચગ્રહચુંબનદાનમ્ ॥ 6 ॥

રતિસુખસમયરસાલસયા દરમુકુલિતનયનસરોજમ્ ।
નિઃસહનિપતિતતનુલતયા મધુસૂદનમુદિતમનોજમ્ ॥ 7 ॥

શ્રીજયદેવભણિતમિદમતિશયમધુરિપુનિધુવનશીલમ્ ।
સુખમુત્કંઠિતગોપવધૂકથિતં વિતનોતુ સલીલમ્ ॥ 8 ॥

હસ્તસ્રસ્તવિલાસવંશમનૃજુભ્રૂવલ્લિમદ્બલ્લવી-વૃંદોત્સારિદૃગંતવીક્ષિતમતિસ્વેદાર્દ્રગંડસ્થલમ્ ।
મામુદ્વીક્ષ્ય વિલક્ષિતં સ્મિતસુધામુગ્ધાનનં કાનને ગોવિંદં વ્રજસુંદરીગણવૃતં પશ્યામિ હૃષ્યામિ ચ ॥ 16 ॥

દુરાલોકસ્તોકસ્તબકનવકાશોકલતિકા-વિકાસઃ કાસારોપવનપવનોઽપિ વ્યથયતિ ।
અપિ ભ્રામ્યદ્ભૃંગીરણિતરમણીયા ન મુકુલ-પ્રસૂતિશ્ચૂતાનાં સખિ શિખરિણીયં સુખયતિ ॥ 17 ॥

॥ ઇતિ ગીતગોવિંદે અક્લેશકેશવો નામ દ્વિતીયઃ સર્ગઃ ॥