ગીતગોવિંદં દ્વાદશઃ સર્ગઃ – સુપ્રીત પીતાંબરઃ

॥ દ્વાદશઃ સર્ગઃ ॥
॥ સુપ્રીતપીતાંબરઃ ॥

ગતવતિ સખીવૃંદેઽમંદત્રપાભરનિર્ભર-સ્મરપરવશાકૂતસ્ફીતસ્મિતસ્નપિતાધરમ્ ।
સરસમનસં દૃષ્ટ્વા રાધાં મુહુર્નવપલ્લવ-પ્રસવશયને નિક્ષિપ્તાક્ષીમુવાચ હરઃ ॥ 68 ॥

॥ ગીતં 23 ॥

કિસલયશયનતલે કુરુ કામિનિ ચરણનલિનવિનિવેશમ્ ।
તવ પદપલ્લવવૈરિપરાભવમિદમનુભવતુ સુવેશમ્ ॥
ક્ષણમધુના નારાયણમનુગતમનુસર રાધિકે ॥ 1 ॥

કરકમલેન કરોમિ ચરણમહમાગમિતાસિ વિદૂરમ્ ।
ક્ષણમુપકુરુ શયનોપરિ મામિવ નૂપુરમનુગતિશૂરમ્ ॥ 2 ॥

વદનસુધાનિધિગલિતમમૃતમિવ રચય વચનમનુકૂલમ્ ।
વિરહમિવાપનયામિ પયોધરરોધકમુરસિ દુકૂલમ્ ॥ 3 ॥

પ્રિયપરિરંભણરભસવલિતમિવ પુલકિતમતિદુરવાપમ્ ।
મદુરસિ કુચકલશં વિનિવેશય શોષય મનસિજતાપમ્ ॥ 4 ॥

અધરસુધારસમુપનય ભાવિનિ જીવય મૃતમિવ દાસમ્ ।
ત્વયિ વિનિહિતમનસં વિરહાનલદગ્ધવપુષમવિલાસમ્ ॥ 5 ॥

શશિમુખિ મુખરય મણિરશનાગુણમનુગુણકંઠનિદાનમ્ ।
શ્રુતિયુગલે પિકરુતવિકલે મમ શમય ચિરાદવસાદમ્ ॥ 6 ॥

મામતિવિફલરુષા વિકલીકૃતમવલોકિતમધુનેદમ્ ।
મીલિતલજ્જિતમિવ નયનં તવ વિરમ વિસૃજ રતિખેદમ્ ॥ 7 ॥

શ્રીજયદેવભણિતમિદમનુપદનિગદિતમધુરિપુમોદમ્ ।
જનયતુ રસિકજનેષુ મનોરમતિરસભાવવિનોદમ્ ॥ 8 ॥

મારંકે રતિકેલિસંકુલરણારંભે તયા સાહસ-પ્રાયં કાંતજયાય કિંચિદુપરિ પ્રારંભિ યત્સંભ્રમાત્ ।
નિષ્પંદા જઘનસ્થલી શિથિલતા દોર્વલ્લિરુત્કંપિતં વક્ષો મીલિતમક્ષિ પૌરુષરસઃ સ્ત્રીણાં કુતઃ સિધ્યતિ ॥ 69 ॥

અથ કાંતં રતિક્લાંતમપિ મંડનવાંછયા ।
નિજગાદ નિરાબાધા રાધા સ્વાધીનભર્તૃકા ॥ 70 ॥

॥ ગીતં 24 ॥

કુરુ યદુનંદન ચંદનશિશિરતરેણ કરેણ પયોધરે ।
મૃગમદપત્રકમત્ર મનોભવમંગલકલશસહોદરે ।
નિજગાદ સા યદુનંદને ક્રીડતિ હૃદયાનંદને ॥ 1 ॥

અલિકુલગંજનમંજનકં રતિનાયકસાયકમોચને ।
ત્વદધરચુંબનલંબિતકજ્જલમુજ્જ્વલય પ્રિય લોચને ॥ 2 ॥

નયનકુરંગતરંગવિકાસનિરાસકરે શ્રુતિમંડલે ।
મનસિજપાશવિલાસધરે શુભવેશ નિવેશય કુંડલે ॥ 3 ॥

ભ્રમરચયં રચહયંતમુપરિ રુચિરં સુચિરં મમ સંમુખે ।
જિતકમલે વિમલે પરિકર્મય નર્મજનકમલકં મુખે ॥ 4 ॥

મૃગમદરસવલિતં લલિતં કુરુ તિલકમલિકરજનીકરે ।
વિહિતકલંકકલં કમલાનન વિશ્રમિતશ્રમશીકરે ॥ 5 ॥

મમ રુચિરે ચિકુરે કુરુ માનદ માનસજધ્વજચામરે ।
રતિગલિતે લલિતે કુસુમાનિ શિખંડિશિખંડકડામરે ॥ 6 ॥

સરસઘને જઘને મમ શંબરદારણવારણકંદરે ।
મણિરશનાવસનાભરણાનિ શુભાશય વાસય સુંદરે ॥ 7 ॥

શ્રીજયદેવવચસિ રુચિરે હૃદયં સદયં કુરુ મંડને ।
હરિચરણસ્મરણામૃતકૃતકલિકલુષભવજ્વરખંડને ॥ 8 ॥

રચય કુચયોઃ પત્રં ચિત્રં કુરુષ્વ કપોલયો-ર્ઘટય જઘને કાંચીમંચ સ્રજા કબરીભરમ્ ।
કલય વલયશ્રેણીં પાણૌ પદે કુરુ નૂપુરા-વિતિ નિગતિતઃ પ્રીતઃ પીતાંબરોઽપિ તથાકરોત્ ॥ 71 ॥

યદ્ગાંધ્ગર્વકલાસુ કૌશલમનુધ્યાનં ચ યદ્વૈષ્ણવં યચ્છૃંગારવિવેકતત્વમપિ યત્કાવ્યેષુ લીલાયિતમ્ ।
તત્સર્વં જયદેવપંડિતકવેઃ કૃષ્ણૈકતાનાત્મનઃ સાનંદાઃ પરિશોધયંતુ સુધિયઃ શ્રીગીતગોવિંદતઃ ॥ 72 ॥

શ્રીભોજદેવપ્રભવસ્ય રામાદેવીસુતશ્રીજયદેવકસ્ય ।
પરાશરાદિપ્રિયવર્ગકંઠે શ્રીગીતગોવિંદકવિત્વમસ્તુ ॥ 73 ॥

॥ ઇતિ શ્રીજયદેવકૃતૌ ગીતગોવિંદે સુપ્રીતપીતાંબરો નામ દ્વાદશઃ સર્ગઃ ॥
॥ ઇતિ ગીતગોવિંદં સમાપ્તમ્ ॥