ગીતગોવિંદં એકાદશઃ સર્ગઃ – સાનંદ દામોદરઃ

॥ એકાદશઃ સર્ગઃ ॥
॥ સાનંદદામોદરઃ ॥

સુચિરમનુનયને પ્રીણયિત્વા મૃગાક્ષીં ગતવતિ કૃતવેશે કેશવે કુંજશય્યામ્ ।
રચિતરુચિરભૂષાં દૃષ્ટિમોષે પ્રદોષે સ્ફુરતિ નિરવસાદાં કાપિ રાધાં જગાદ ॥ 59 ॥

॥ ગીતં 20 ॥

વિરચિતચાટુવચનરચનં ચરણે રચિતપ્રણિપાતમ્ ।
સંપ્રતિ મંજુલવંજુલસીમનિ કેલિશયનમનુયાતમ્ ॥
મુગ્ધે મધુમથનમનુગતમનુસર રાધિકે ॥ 1 ॥

ઘનજઘનસ્તનભારભરે દરમંથરચરણવિહારમ્ ।
મુખરિતમણીમંજીરમુપૈહિ વિધેહિ મરાલવિકારમ્ ॥ 2 ॥

શૃણુ રમણીયતરં તરુણીજનમોહનમધુપવિરાવમ્ ।
કુસુમશરાસનશાસનબંદિનિ પિકનિકરે ભજ ભાવમ્ ॥ 3 ॥

અનિલતરલકિસલયનિકરેણ કરેણ લતાનિકુરંબમ્ ।
પ્રેરણમિવ કરભોરુ કરોતિ ગતિં પ્રતિમુંચ વિલંબમ્ ॥ 4 ॥

સ્ફુરિતમનંગતરંગવશાદિવ સૂચિતહરિપરિરંભમ્ ।
પૃચ્છ મનોહરહારવિમલજલધારમમું કુચકુંભમ્ ॥ 5 ॥

અધિગતમખિલસખીભિરિદં તવ વપુરપિ રતિરણસજ્જમ્ ।
ચંડિ રસિતરશનારવડિંડિમમભિસર સરસમલજ્જમ્ ॥ 6 ॥

સ્મરશરસુભગનખેન કરેણ સખીમવલંબ્ય સલીલમ્ ।
ચલ વલયક્વણીતૈરવબોધય હરમપિ નિજગતિશીલમ્ ॥ 7 ॥

શ્રીજયદેવભણિતમધરીકૃતહારમુદાસિતવામમ્ ।
હરિવિનિહિતમનસામધિતિષ્ઠતુ કંઠતટીમવિરામમ્ ॥ 8 ॥

સા માં દ્રક્ષ્યતિ વક્ષ્યતિ સ્મરકથાં પ્રત્યંગમાલિંગનૈઃ પ્રીતિં યાસ્યતિ રમ્યતે સખિ સમાગત્યેતિ ચિંતાકુલઃ ।
સ ત્વાં પશ્યતિ વેપતે પુલકયત્યાનંદતિ સ્વિદ્યતિ પ્રત્યુદ્ગચ્છતિ મૂર્ચ્છતિ સ્થિરતમઃપુંજે નિકુંજે પ્રિયઃ ॥ 60 ॥

અક્ષ્ણોર્નિક્ષિપદંજનં શ્રવણયોસ્તાપિચ્છગુચ્છાવલીં મૂર્ધ્નિ શ્યામસરોજદામ કુચયોઃ કસ્તૂરિકાપાત્રકમ્ ।
ધૂર્તાનામભિસારસત્વરહૃદાં વિષ્વઙ્નિકુંજે સખિ ધ્વાંતં નીલનિચોલચારુ સદૃશાં પ્રત્યંગમાલિંગતિ ॥ 61 ॥

કાશ્મીરગૌરવપુષામભિસારિકાણાં આબદ્ધરેખમભિતો રુચિમંજરીભિઃ ।
એતત્તમાલદલનીલતમં તમિશ્રં તત્પ્રેમહેમનિકષોપલતાં તનોતિ ॥ 62 ॥

હારાવલીતરલકાંચનકાંચિદામ-કેયૂરકંકણમણિદ્યુતિદીપિતસ્ય ।
દ્વારે નિકુંજનિલયસ્યહરિં નિરીક્ષ્ય વ્રીડાવતીમથ સખી નિજગાહ રાધામ્ ॥ 63 ॥

॥ ગીતં 21 ॥

મંજુતરકુંજતલકેલિસદને ।
વિલસ રતિરભસહસિતવદને ॥
પ્રવિશ રાધે માધવસમીપમિહ ॥ 1 ॥

નવભવદશોકદલશયનસારે ।
વિલસ કુચકલશતરલહારે ॥ 2 ॥

કુસુમચયરચિતશુચિવાસગેહે ।
વિલસ કુસુમસુકુમારદેહે ॥ 3 ॥

ચલમલયવનપવનસુરભિશીતે ।
વિલસ રસવલિતલલિતગીતે ॥ 4 ॥

મધુમુદિતમધુપકુલકલિતરાવે ।
વિલસ મદનરસસરસભાવે ॥ 5 ॥

મધુતરલપિકનિકરનિનદમુખરે ।
વિલસ દશનરુચિરુચિરશિખરે ॥ 6 ॥

વિતત બહુવલ્લિનવપલ્લવઘને ।
વિલસ ચિરમલસપીનજઘને ॥ 7 ॥

વિહિતપદ્માવતીસુખસમાજે ।
ભણતિ જયદેવકવિરાજે ॥ 8 ॥

ત્વાં ચિત્તેન ચિરં વહન્નયમતિશ્રાંતો ભૃશં તાપિતઃ કંદર્પેણ તુ પાતુમિચ્છતિ સુધાસંબાધબિંબાધરમ્ ।
અસ્યાંગં તદલંકુરુ ક્ષણમિહ ભ્રૂક્ષેપલક્ષ્મીલવ-ક્રીતે દાસ ઇવોપસેવિતપદાંભોજે કુતઃ સંભ્રમઃ ॥ 64 ॥

સા સસાધ્વસસાનંદં ગોવિંદે લોલલોચના ।
સિંજાનમંજુમંજીરં પ્રવિવેશ નિવેશનમ્ ॥ 65 ॥

॥ ગીતં 22 ॥

રાધાવદનવિલોકનવિકસિતવિવિધવિકારવિભંગમ્ ।
જલનિધિમિવ વિધુમંડલદર્શનતરલિતતુંગતરંગમ્ ॥
હરિમેકરસં ચિરમભિલષિતવિલાસં સા દદાર્શ ગુરુહર્ષવશંવદવદનમનંગનિવાસમ્ ॥ 1 ॥

હારમમલતરતારમુરસિ દધતં પરિરભ્ય વિદૂરમ્ ।
સ્ફુટતરફેનકદંબકરંબિતમિવ યમુનાજલપૂરમ્ ॥ 2 ॥

શ્યામલમૃદુલકલેવરમંડલમધિગતગૌરદુકૂલમ્ ।
નીલનલિનમિવ પીતપરાગપતલભરવલયિતમૂલમ્ ॥ 3 ॥

તરલદૃગંચલચલનમનોહરવદનજનિતરતિરાગમ્ ।
સ્ફુટકમલોદરખેલિતખંજનયુગમિવ શરદિ તડાગમ્ ॥ 4 ॥

વદનકમલપરિશીલનમિલિતમિહિરસમકુંડલશોભમ્ ।
સ્મિતરુચિરુચિરસમુલ્લસિતાધરપલ્લવકૃતરતિલોભમ્ ॥ 5 ॥

શશિકિરણચ્છુરિતોદરજલધરસુંદરસકુસુમકેશમ્ ।
તિમિરોદિતવિધુમણ્દલનિર્મલમલયજતિલકનિવેશમ્ ॥ 6 ॥

વિપુલપુલકભરદંતુરિતં રતિકેલિકલાભિરધીરમ્ ।
મણિગણકિરણસમૂહસમુજ્જ્વલભૂષણસુભગશરીરમ્ ॥ 7 ॥

શ્રીજયદેવભણિતવિભવદ્વિગુણીકૃતભૂષણભારમ્ ।
પ્રણમત હૃદિ સુચિરં વિનિધાય હરિં સુકૃતોદયસારમ્ ॥ 8 ॥

અતિક્રમ્યાપાંગં શ્રવણપથપર્યંતગમન-પ્રયાસેનેવાક્ષ્ણોસ્તરલતરતારં પતિતયોઃ ।
ઇદાનીં રાધાયાઃ પ્રિયતમસમાલોકસમયે પપાત સ્વેદાંબુપ્રસર ઇવ હર્ષાશ્રુનિકરઃ ॥ 66 ॥

ભવંત્યાસ્તલ્પાંતં કૃતકપટકંડૂતિપિહિત-સ્મિતં યાતે ગેહાદ્બહિરવહિતાલીપરિજને ।
પ્રિયાસ્યં પશ્યંત્યાઃ સ્મરશરસમાકૂલસુભગં સલજ્જા લજ્જાપિ વ્યગમદિવ દૂરં મૃગદૃશઃ ॥ 67 ॥

॥ ઇતિ શ્રીગીતગોવિંદે રાધિકામિલને સાનંદદામોદરો નામૈકાદશઃ સર્ગઃ ॥