ગીતગોવિંદં દશમઃ સર્ગઃ – ચતુર ચતુર્ભુજઃ

॥ દશમઃ સર્ગઃ ॥
॥ ચતુરચતુર્ભુજઃ ॥

અત્રાંતરે મસૃણરોષવશામસીમ્-નિઃશ્વાસનિઃસહમુખીં સુમુખીમુપેત્ય ।
સવ્રીડમીક્ષિતસખીવદનાં દિનાંતે સાનંદગદ્ગદપદં હરિરિત્યુવાચ ॥ 53 ॥

॥ ગીતં 19 ॥

વદસિ યદિ કિંચિદપિ દંતરુચિકૌમુદી હરતિ દરતિમિરમતિઘોરમ્ ।
સ્ફુરદધરસીધવે તવ વદનચંદ્રમા રોચયતુ લોચનચકોરમ્ ॥
પ્રિયે ચારુશીલે મુંચ મયિ માનમનિદાનં સપદિ મદનાનલો દહતિ મમ માનસં દેહિ મુખકમલમધુપાનમ્ ॥ 1 ॥

સત્યમેવાસિ યદિ સુદતિ મયિ કોપિની દેહિ ખરનખશરઘાતમ્ ।
ઘટય ભુજબંધનં જનય રદખંડનં યેન વા ભવતિ સુખજાતમ્ ॥ 2 ॥

ત્વમસિ મમ ભૂષણં ત્વમસિ મમ જીવનં ત્વમસિ ભવજલધિરત્નમ્ ।
ભવતુ ભવતીહ મયિ સતતમનોરોધિનિ તત્ર મમ હૃદયમતિરત્નમ્ ॥ 3 ॥

નીલનલિનાભમપિ તન્વિ તવ લોચનં ધારયતિ કોકનદરૂપમ્ ।
કુસુમશરબાણભાવેન યદિ રંજયસિ કૃષ્ણમિદમેતદનુરૂપમ્ ॥ 4 ॥

સ્ફુરતુ કુચકુંભયોરુપરિ મણિમંજરી રંજયતુ તવ હૃદયદેશમ્ ।
રસતુ રશનાપિ તવ ઘનજઘનમંડલે ઘોષયતુ મન્મથનિદેશમ્ ॥ 5 ॥

સ્થલકમલગંજનં મમ હૃદયરંજનં જનિતરતિરંગપરભાગમ્ ।
ભણ મસૃણવાણિ કરવાણિ પદપંકજં સરસલસદલક્તકરાગમ્ ॥ 6 ॥

સ્મરગરલખંડનં મમ શિરસિ મંડનં દેહિ પદપલ્લવમુદારમ્ ।
જ્વલતિ મયિ દારુણો મદનકદનારુણો હરતુ તદુપાહિતવિકારમ્ ॥ 7 ॥

ઇતિ ચટુલચાટુપટુચારુ મુરવૈરિણો રાધિકામધિ વચનજાતમ્ ।
જયતિ પદ્માવતીરમણજયદેવકવિ-ભારતીભણિતમતિશાતમ્ ॥ 8 ॥

પરિહર કૃતાતંકે શંકાં ત્વયા સતતં ઘન-સ્તનજઘનયાક્રાંતે સ્વાંતે પરાનવકાશિનિ ।
વિશતિ વિતનોરન્યો ધન્યો ન કોઽપિ મમાંતરં સ્તનભરપરીરંભારંભે વિધેહિ વિધેયતામ્ ॥ 54 ॥

મુગ્ધે વિધેહિ મયિ નિર્દયદંતદંશ-દોર્વલ્લિબંધનિબિડસ્તનપીડનાનિ ।
ચંડિ ત્વમેવ મુદમંચ ન પંચબાણ-ચંડાલકાંડદલનાદસવઃ પ્રયાંતુ ॥ 55 ॥

વ્યથયતિ વૃથા મૌનં તન્વિ પ્રપંચય પંચમં તરુણી મધુરાલાપૈસ્તાપં વિનોદય દૃષ્ટિભિઃ ।
સુમુખિ વિમુખીભાવં તાવદ્વિમુંચ ન મુંચ માં સ્વયમતિશયસ્નિગ્ધો મુગ્ધે પ્રિયિઽહમુપસ્થિતઃ ॥ 56 ॥

બંધૂકદ્યુતિબાંધવોઽયમધરઃ સ્નિગ્ધો મધૂકચ્ચવિ-ર્ગંડશ્ચંડિ ચકાસ્તિ નીલનલિનશ્રીમોચનં લોચનમ્ ।
નાસાભ્યેતિ તિલપ્રસૂનપદવીં કુંદાભદાંતિ પ્રિયે પ્રાયસ્ત્વન્મુખસેવયા વિજયતે વિશ્વં સ પુષ્પાયુધઃ ॥ 57 ॥

દૃશૌ તવ મદાલસે વદનમિંદુસંદીપકં ગતિર્જનમનોરમા વિધુતરંભમૂરુદ્વયમ્ ।
રતિસ્તવ કલાવતી રુચિરચિત્રલેખે ભ્રુવા-વહો વિબુધયૌવનં વહસિ તન્વી પૃથ્વીગતા ॥ 58 ॥

॥ ઇતિ શ્રીગીતગોવિંદે માનિનીવર્ણને ચતુરચતુર્ભુજો નામ દશમઃ સર્ગઃ ॥