ગૌરી દશકં

લીલાલબ્ધસ્થાપિતલુપ્તાખિલલોકાં
લોકાતીતૈર્યોગિભિરંતશ્ચિરમૃગ્યામ્ ।
બાલાદિત્યશ્રેણિસમાનદ્યુતિપુંજાં
ગૌરીમંબામંબુરુહાક્ષીમહમીડે ॥ 1 ॥

પ્રત્યાહારધ્યાનસમાધિસ્થિતિભાજાં
નિત્યં ચિત્તે નિર્વૃતિકાષ્ઠાં કલયંતીમ્ ।
સત્યજ્ઞાનાનંદમયીં તાં તનુરૂપાં
ગૌરીમંબામંબુરુહાક્ષીમહમીડે ॥ 2 ॥

ચંદ્રાપીડાનંદિતમંદસ્મિતવક્ત્રાં
ચંદ્રાપીડાલંકૃતનીલાલકભારામ્ ।
ઇંદ્રોપેંદ્રાદ્યર્ચિતપાદાંબુજયુગ્માં
ગૌરીમંબામંબુરુહાક્ષીમહમીડે ॥ 3 ॥

આદિક્ષાંતામક્ષરમૂર્ત્યા વિલસંતીં
ભૂતે ભૂતે ભૂતકદંબપ્રસવિત્રીમ્ ।
શબ્દબ્રહ્માનંદમયીં તાં તટિદાભાં
ગૌરીમંબામંબુરુહાક્ષીમહમીડે ॥ 4 ॥

મૂલાધારાદુત્થિતવીથ્યા વિધિરંધ્રં
સૌરં ચાંદ્રં વ્યાપ્ય વિહારજ્વલિતાંગીમ્ ।
યેયં સૂક્ષ્માત્સૂક્ષ્મતનુસ્તાં સુખરૂપાં
ગૌરીમંબામંબુરુહાક્ષીમહમીડે ॥ 5 ॥

નિત્યઃ શુદ્ધો નિષ્કલ એકો જગદીશઃ
સાક્ષી યસ્યાઃ સર્ગવિધૌ સંહરણે ચ ।
વિશ્વત્રાણક્રીડનલોલાં શિવપત્નીં
ગૌરીમંબામંબુરુહાક્ષીમહમીડે ॥ 6 ॥

યસ્યાઃ કુક્ષૌ લીનમખંડં જગદંડં
ભૂયો ભૂયઃ પ્રાદુરભૂદુત્થિતમેવ ।
પત્યા સાર્ધં તાં રજતાદ્રૌ વિહરંતીં
ગૌરીમંબામંબુરુહાક્ષીમહમીડે ॥ 7 ॥

યસ્યામોતં પ્રોતમશેષં મણિમાલા-
-સૂત્રે યદ્વત્કાપિ ચરં ચાપ્યચરં ચ ।
તામધ્યાત્મજ્ઞાનપદવ્યા ગમનીયાં
ગૌરીમંબામંબુરુહાક્ષીમહમીડે ॥ 8 ॥

નાનાકારૈઃ શક્તિકદંબૈર્ભુવનાનિ
વ્યાપ્ય સ્વૈરં ક્રીડતિ યેયં સ્વયમેકા ।
કલ્યાણીં તાં કલ્પલતામાનતિભાજાં
ગૌરીમંબામંબુરુહાક્ષીમહમીડે ॥ 9 ॥

આશાપાશક્લેશવિનાશં વિદધાનાં
પાદાંભોજધ્યાનપરાણાં પુરુષાણામ્ ।
ઈશામીશાર્ધાંગહરાં તામભિરામાં
ગૌરીમંબામંબુરુહાક્ષીમહમીડે ॥ 10 ॥

પ્રાતઃકાલે ભાવવિશુદ્ધઃ પ્રણિધાના-
-દ્ભક્ત્યા નિત્યં જલ્પતિ ગૌરીદશકં યઃ ।
વાચાં સિદ્ધિં સંપદમગ્ર્યાં શિવભક્તિં
તસ્યાવશ્યં પર્વતપુત્રી વિદધાતિ ॥ 11 ॥

ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિંદભગવત્પૂજ્યપાદશિષ્યસ્ય શ્રીમચ્છંકરભગવતઃ કૃતૌ ગૌરી દશકમ્ ।