ગણેશ માનસ પૂજ

ગૃત્સમદ ઉવાચ ।
વિઘ્નેશવીર્યાણિ વિચિત્રકાણિ
બંદીજનૈર્માગધકૈઃ સ્મૃતાનિ ।
શ્રુત્વા સમુત્તિષ્ઠ ગજાનન ત્વં
બ્રાહ્મે જગન્મંગળકં કુરુષ્વ ॥ 1 ॥

એવં મયા પ્રાર્થિત વિઘ્નરાજ-
-શ્ચિત્તેન ચોત્થાય બહિર્ગણેશઃ ।
તં નિર્ગતં વીક્ષ્ય નમંતિ દેવાઃ
શંભ્વાદયો યોગિમુખાસ્તથાહમ્ ॥ 2 ॥

શૌચાદિકં તે પરિકલ્પયામિ
હેરંબ વૈ દંતવિશુદ્ધિમેવમ્ ।
વસ્ત્રેણ સંપ્રોક્ષ્ય મુખારવિંદં
દેવં સભાયાં વિનિવેશયામિ ॥ 3 ॥

દ્વિજાદિસર્વૈરભિવંદિતં ચ
શુકાદિભિર્મોદસુમોદકાદ્યૈઃ ।
સંભાષ્ય ચાલોક્ય સમુત્થિતં તં
સુમંડપં કલ્પ્ય નિવેશયામિ ॥ 4 ॥

રત્નૈઃ સુદીપ્તૈઃ પ્રતિબિંબિતં તં
પશ્યામિ ચિત્તેન વિનાયકં ચ ।
તત્રાસનં રત્નસુવર્ણયુક્તં
સંકલ્પ્ય દેવં વિનિવેશયામિ ॥ 5 ॥

સિદ્ધ્યા ચ બુદ્ધ્યા સહ વિઘ્નરાજ
પાદ્યં કુરુ પ્રેમભરેણ સર્વૈઃ ।
સુવાસિતં નીરમથો ગૃહાણ
ચિત્તેન દત્તં ચ સુખોષ્ણભાવમ્ ॥ 6 ॥

તતઃ સુવસ્ત્રેણ ગણેશમાદૌ
સંપ્રોક્ષ્ય દૂર્વાદિભિરર્ચયામિ ।
ચિત્તેન ભાવપ્રિય દીનબંધો
મનો વિલીનં કુરુ તે પદાબ્જે ॥ 7 ॥

કર્પૂરકૈલાદિસુવાસિતં તુ
સુકલ્પિતં તોયમથો ગૃહાણ ।
આચમ્ય તેનૈવ ગજાનન ત્વં
કૃપાકટાક્ષેણ વિલોકયાશુ ॥ 8 ॥

પ્રવાલમુક્તાફલહાટકાદ્યૈઃ
સુસંસ્કૃતં હ્યંતરભાવકેન ।
અનર્ઘ્યમર્ઘ્યં સફલં કુરુષ્વ
મયા પ્રદત્તં ગણરાજ ઢુંઢે ॥ 9 ॥

સૌગંધ્યયુક્તં મધુપર્કમાદ્યં
સંકલ્પિતં ભાવયુતં ગૃહાણ ।
પુનસ્તથાચમ્ય વિનાયક ત્વં
ભક્તાંશ્ચ ભક્તેશ સુરક્ષયાશુ ॥ 10 ॥

સુવાસિતં ચંપકજાતિકાદ્યૈ-
-સ્તૈલં મયા કલ્પિતમેવ ઢુંઢે ।
ગૃહાણ તેન પ્રવિમર્દયામિ
સર્વાંગમેવં તવ સેવનાય ॥ 11 ॥

તતઃ સુખોષ્ણેન જલેન ચાહ-
-મનેકતીર્થાહૃતકેન ઢુંઢે ।
ચિત્તેન શુદ્ધેન ચ સ્નાપયામિ
સ્નાનં મયા દત્તમથો ગૃહાણ ॥ 12 ॥

તતઃ પયઃસ્નાનમચિંત્યભાવ
ગૃહાણ તોયસ્ય તથા ગણેશ ।
પુનર્દધિસ્નાનમનામય ત્વં
ચિત્તેન દત્તં ચ જલસ્ય ચૈવ ॥ 13 ॥

તતો ઘૃતસ્નાનમપારવંદ્ય
સુતીર્થજં વિઘ્નહર પ્રસીદ ।
ગૃહાણ ચિત્તેન સુકલ્પિતં તુ
તતો મધુસ્નાનમથો જલસ્ય ॥ 14 ॥

સુશર્કરાયુક્તમથો ગૃહાણ
સ્નાનં મયા કલ્પિતમેવ ઢુંઢે ।
તતો જલસ્નાનમઘાપહંતૃ
વિઘ્નેશ માયાભ્રમં વારયાશુ ॥ 15 ॥

સુયક્ષપંકસ્થમથો ગૃહાણ
સ્નાનં પરેશાધિપતે તતશ્ચ ।
કૌમંડલીસંભવજં કુરુષ્વ
વિશુદ્ધમેવં પરિકલ્પિતં તુ ॥ 16 ॥

તતસ્તુ સૂક્તૈર્મનસા ગણેશં
સંપૂજ્ય દૂર્વાદિભિરલ્પભાવૈઃ ।
અપારકૈર્મંડલભૂતબ્રહ્મ-
-ણસ્પત્યકૈસ્તં હ્યભિષેચયામિ ॥ 17 ॥

તતઃ સુવસ્ત્રેણ તુ પ્રોંછનં ત્વં
ગૃહાણ ચિત્તેન મયા સુકલ્પિતમ્ ।
તતો વિશુદ્ધેન જલેન ઢુંઢે
હ્યાચાંતમેવં કુરુ વિઘ્નરાજ ॥ 18 ॥

અગ્નૌ વિશુદ્ધે તુ ગૃહાણ વસ્ત્રે
હ્યનર્ઘ્યમૌલ્યે મનસા મયા તે ।
દત્તે પરિચ્છાદ્ય નિજાત્મદેહં
તાભ્યાં મયૂરેશ જનાંશ્ચ પાલય ॥ 19 ॥

આચમ્ય વિઘ્નેશ પુનસ્તથૈવ
ચિત્તેન દત્તં મુખમુત્તરીયમ્ ।
ગૃહાણ ભક્તપ્રતિપાલક ત્વં
નમો યથા તારકસંયુતં તુ ॥ 20 ॥

યજ્ઞોપવીતં ત્રિગુણસ્વરૂપં
સૌવર્ણમેવં હ્યહિનાથભૂતમ્ ।
ભાવેન દત્તં ગણનાથ તત્ત્વં
ગૃહાણ ભક્તોદ્ધૃતિકારણાય ॥ 21 ॥

આચાંતમેવં મનસા પ્રદત્તં
કુરુષ્વ શુદ્ધેન જલેન ઢુંઢે ।
પુનશ્ચ કૌમંડલકેન પાહિ વિશ્વં
પ્રભો ખેલકરં સદા તે ॥ 22 ॥

ઉદ્યદ્દિનેશાભમથો ગૃહાણ
સિંદૂરકં તે મનસા પ્રદત્તમ્ ।
સર્વાંગસંલેપનમાદરાદ્વૈ
કુરુષ્વ હેરંબ ચ તેન પૂર્ણમ્ ॥ 23 ॥

સહસ્રશીર્ષં મનસા મયા ત્વં
દત્તં કિરીટં તુ સુવર્ણજં વૈ ।
અનેકરત્નૈઃ ખચિતં ગૃહાણ
બ્રહ્મેશ તે મસ્તકશોભનાય ॥ 24 ॥

વિચિત્રરત્નૈઃ કનકેન ઢુંઢે
યુતાનિ ચિત્તેન મયા પરેશ ।
દત્તાનિ નાનાપદકુંડલાનિ
ગૃહાણ શૂર્પશ્રુતિભૂષણાય ॥ 25 ॥

શુંડાવિભૂષાર્થમનંતખેલિન્
સુવર્ણજં કંચુકમાગૃહાણ ।
રત્નૈશ્ચ યુક્તં મનસા મયા ય-
-દ્દત્તં પ્રભો તત્સફલં કુરુષ્વ ॥ 26 ॥

સુવર્ણરત્નૈશ્ચ યુતાનિ ઢુંઢે
સદૈકદંતાભરણાનિ કલ્પ્ય ।
ગૃહાણ ચૂડાકૃતયે પરેશ
દત્તાનિ દંતસ્ય ચ શોભનાર્થમ્ ॥ 27 ॥

રત્નૈઃ સુવર્ણેન કૃતાનિ તાનિ
ગૃહાણ ચત્વારિ મયા પ્રકલ્પ્ય ।
સંભૂષય ત્વં કટકાનિ નાથ
ચતુર્ભુજેષુ હ્યજ વિઘ્નહારિન્ ॥ 28 ॥

વિચિત્રરત્નૈઃ ખચિતં સુવર્ણ-
-સંભૂતકં ગૃહ્ય મયા પ્રદત્તમ્ ।
તથાંગુલીષ્વંગુલિકં ગણેશ
ચિત્તેન સંશોભય તત્પરેશ ॥ 29 ॥

વિચિત્રરત્નૈઃ ખચિતાનિ ઢુંઢે
કેયૂરકાણિ હ્યથ કલ્પિતાનિ ।
સુવર્ણજાનિ પ્રમથાધિનાથ
ગૃહાણ દત્તાનિ તુ બાહુષુ ત્વમ્ ॥ 30 ॥

પ્રવાલમુક્તાફલરત્નજૈસ્ત્વં
સુવર્ણસૂત્રૈશ્ચ ગૃહાણ કંઠે ।
ચિત્તેન દત્તા વિવિધાશ્ચ માલા
ઉરોદરે શોભય વિઘ્નરાજ ॥ 31 ॥

ચંદ્રં લલાટે ગણનાથ પૂર્ણં
વૃદ્ધિક્ષયાભ્યાં તુ વિહીનમાદ્યમ્ ।
સંશોભય ત્વં વરસંયુતં તે
ભક્તિપ્રિયત્વં પ્રકટીકુરુષ્વ ॥ 32 ॥

ચિંતામણિં ચિંતિતદં પરેશ
હૃદ્દેશગં જ્યોતિર્મયં કુરુષ્વ ।
મણિં સદાનંદસુખપ્રદં ચ
વિઘ્નેશ દીનાર્થદ પાલયસ્વ ॥ 33 ॥

નાભૌ ફણીશં ચ સહસ્રશીર્ષં
સંવેષ્ટનેનૈવ ગણાધિનાથ ।
ભક્તં સુભૂષં કુરુ ભૂષણેન
વરપ્રદાનં સફલં પરેશ ॥ 34 ॥

કટીતટે રત્નસુવર્ણયુક્તાં
કાંચીં સુચિત્તેન ચ ધારયામિ ।
વિઘ્નેશ જ્યોતિર્ગણદીપનીં તે
પ્રસીદ ભક્તં કુરુ માં દયાબ્ધે ॥ 35 ॥

હેરંબ તે રત્નસુવર્ણયુક્તે
સુનૂપુરે મંજિરકે તથૈવ ।
સુકિંકિણીનાદયુતે સુબુદ્ધ્યા
સુપાદયોઃ શોભય મે પ્રદત્તે ॥ 36 ॥

ઇત્યાદિ નાનાવિધભૂષણાનિ
તવેચ્છયા માનસકલ્પિતાનિ ।
સંભૂષયામ્યેવ ત્વદંગકેષુ
વિચિત્રધાતુપ્રભવાનિ ઢુંઢે ॥ 37 ॥

સુચંદનં રક્તમમોઘવીર્યં
સુઘર્ષિતં હ્યષ્ટકગંધમુખ્યૈઃ ।
યુક્તં મયા કલ્પિતમેકદંત
ગૃહાણ તે ત્વંગવિલેપનાર્થમ્ ॥ 38 ॥

લિપ્તેષુ વૈચિત્ર્યમથાષ્ટગંધૈ-
-રંગેષુ તેઽહં પ્રકરોમિ ચિત્રમ્ ।
પ્રસીદ ચિત્તેન વિનાયક ત્વં
તતઃ સુરક્તં રવિમેવ ફાલે ॥ 39 ॥

ઘૃતેન વૈ કુંકુમકેન રક્તાન્
સુતંડુલાંસ્તે પરિકલ્પયામિ ।
ફાલે ગણાધ્યક્ષ ગૃહાણ પાહિ
ભક્તાન્ સુભક્તિપ્રિય દીનબંધો ॥ 40 ॥

ગૃહાણ ભો ચંપકમાલતીનિ
જલપંકજાનિ સ્થલપંકજાનિ ।
ચિત્તેન દત્તાનિ ચ મલ્લિકાનિ
પુષ્પાણિ નાનાવિધવૃક્ષજાનિ ॥ 41 ॥

પુષ્પોપરિ ત્વં મનસા ગૃહાણ
હેરંબ મંદારશમીદળાનિ ।
મયા સુચિત્તેન પ્રકલ્પિતાનિ
હ્યપારકાણિ પ્રણવાકૃતે તુ ॥ 42 ॥

દૂર્વાંકુરાન્વૈ મનસા પ્રદત્તાં-
-સ્ત્રિપંચપત્રૈર્યુતકાંશ્ચ સ્નિગ્ધાન્ ।
ગૃહાણ વિઘ્નેશ્વર સંખ્યયા ત્વં
હીનાંશ્ચ સર્વોપરિ વક્રતુંડ ॥ 43 ॥

દશાંગભૂતં મનસા મયા તે
ધૂપં પ્રદત્તં ગણરાજ ઢુંઢે ।
ગૃહાણ સૌરભ્યકરં પરેશ
સિદ્ધ્યા ચ બુદ્ધ્યા સહ ભક્તપાલ ॥ 44 ॥

દીપં સુવર્ત્યા યુતમાદરાત્તે
દત્તં મયા માનસકં ગણેશ ।
ગૃહાણ નાનાવિધજં ઘૃતાદિ-
-તૈલાદિસંભૂતમમોઘદૃષ્ટે ॥ 45 ॥

ભોજ્યં ચ લેહ્યં ગણરાજ પેયં
ચોષ્યં ચ નાનાવિધષડ્રસાઢ્યમ્ ।
ગૃહાણ નૈવેદ્યમથો મયા તે
સુકલ્પિતં પુષ્ટિપતે મહાત્મન્ ॥ 46 ॥

સુવાસિતં ભોજનમધ્યભાગે
જલં મયા દત્તમથો ગૃહાણ ।
કમંડલુસ્થં મનસા ગણેશ
પિબસ્વ વિશ્વાદિકતૃપ્તિકારિન્ ॥ 47 ॥

તતઃ કરોદ્વર્તનકં ગૃહાણ
સૌગંધ્યયુક્તં મુખમાર્જનાય ।
સુવાસિતેનૈવ સુતીર્થજેન
સુકલ્પિતં નાથ ગૃહાણ ઢુંઢે ॥ 48 ॥

પુનસ્તથાચમ્ય સુવાસિતં ચ
દત્તં મયા તીર્થજલં પિબસ્વ ।
પ્રકલ્પ્ય વિઘ્નેશ તતઃ પરં તે
સંપ્રોંછનં હસ્તમુખે કરોમિ ॥ 49 ॥

દ્રાક્ષાદિરંભાફલચૂતકાનિ
ખાર્જૂરકાર્કંધુકદાડિમાનિ ।
સુસ્વાદયુક્તાનિ મયા પ્રકલ્પ્ય
ગૃહાણ દત્તાનિ ફલાનિ ઢુંઢે ॥ 50 ॥

પુનર્જલેનૈવ કરાદિકં તે
સંક્ષાલયામિ મનસા ગણેશ ।
સુવાસિતં તોયમથો પિબસ્વ
મયા પ્રદત્તં મનસા પરેશ ॥ 51 ॥

અષ્ટાંગયુક્તં ગણનાથ દત્તં
તાંબૂલકં તે મનસા મયા વૈ ।
ગૃહાણ વિઘ્નેશ્વર ભાવયુક્તં
સદા સકૃત્તુંડવિશોધનાર્થમ્ ॥ 52 ॥

તતો મયા કલ્પિતકે ગણેશ
મહાસને રત્નસુવર્ણયુક્તે ।
મંદારકાર્પાસકયુક્તવસ્ત્રૈ-
-રનર્ઘ્યસંછાદિતકે પ્રસીદ ॥ 53 ॥

તતસ્ત્વદીયાવરણં પરેશ
સંપૂજયામિ મનસા યથાવત્ ।
નાનોપચારૈઃ પરમપ્રિયૈસ્તુ
ત્વત્પ્રીતિકામાર્થમનાથબંધો ॥ 54 ॥

ગૃહાણ લંબોદર દક્ષિણાં તે
હ્યસંખ્યભૂતાં મનસા પ્રદત્તામ્ ।
સૌવર્ણમુદ્રાદિકમુખ્યભાવાં
પાહિ પ્રભો વિશ્વમિદં ગણેશ ॥ 55 ॥

રાજોપચારાન્વિવિધાન્ગૃહાણ
હસ્ત્યશ્વછત્રાદિકમાદરાદ્વૈ ।
ચિત્તેન દત્તાન્ ગણનાથ ઢુંઢે
હ્યપારસંખ્યાન્ સ્થિરજંગમાંસ્તે ॥ 56 ॥

દાનાય નાનાવિધરૂપકાંસ્તે
ગૃહાણ દત્તાન્મનસા મયા વૈ ।
પદાર્થભૂતાન્ સ્થિરજંગમાંશ્ચ
હેરંબ માં તારય મોહભાવાત્ ॥ 57 ॥

મંદારપુષ્પાણિ શમીદળાનિ
દૂર્વાંકુરાંસ્તે મનસા દદામિ ।
હેરંબ લંબોદર દીનપાલ
ગૃહાણ ભક્તં કુરુ માં પદે તે ॥ 58 ॥

તતો હરિદ્રામબિરં ગુલાલં
સિંદૂરકં તે પરિકલ્પયામિ ।
સુવાસિતં વસ્તુ સુવાસભૂતૈ-
-ર્ગૃહાણ બ્રહ્મેશ્વર શોભનાર્થમ્ ॥ 59 ॥

તતઃ શુકાદ્યાઃ શિવવિષ્ણુમુખ્યા
ઇંદ્રાદયઃ શેષમુખાસ્તથાન્યે ।
મુનીંદ્રકાઃ સેવકભાવયુક્તાઃ
સભાસનસ્થં પ્રણમંતિ ઢુંઢિમ્ ॥ 60 ॥

વામાંગકે શક્તિયુતા ગણેશં
સિદ્ધિસ્તુ નાનાવિધસિદ્ધિભિસ્તમ્ ।
અત્યંતભાવેન સુસેવતે તુ
માયાસ્વરૂપા પરમાર્થભૂતા ॥ 61 ॥

ગણેશ્વરં દક્ષિણભાગસંસ્થા
બુદ્ધિઃ કલાભિશ્ચ સુબોધિકાભિઃ ।
વિદ્યાભિરેવં ભજતે પરેશ
માયાસુ સાંખ્યપ્રદચિત્તરૂપાઃ ॥ 62 ॥

પ્રમોદમોદાદયઃ પૃષ્ઠભાગે
ગણેશ્વરં ભાવયુતા ભજંતે ।
ભક્તેશ્વરા મુદ્ગલશંભુમુખ્યાઃ
શુકાદયસ્તં સ્મ પુરો ભજંતે ॥ 63 ॥

ગંધર્વમુખ્યા મધુરં જગુશ્ચ
ગણેશગીતં વિવિધસ્વરૂપમ્ ।
નૃત્યં કલાયુક્તમથો પુરસ્તા-
-ચ્ચક્રુસ્તથા હ્યપ્સરસો વિચિત્રમ્ ॥ 64 ॥

ઇત્યાદિનાનાવિધભાવયુક્તૈઃ
સંસેવિતં વિઘ્નપતિં ભજામિ ।
ચિત્તેન ધ્યાત્વા તુ નિરંજનં વૈ
કરોમિ નાનાવિધદીપયુક્તમ્ ॥ 65 ॥

ચતુર્ભુજં પાશધરં ગણેશં
તથાંકુશં દંતયુતં તમેવમ્ ।
ત્રિનેત્રયુક્તં ત્વભયંકરં તં
મહોદરં ચૈકરદં ગજાસ્યમ્ ॥ 66 ॥

સર્પોપવીતં ગજકર્ણધારં
વિભૂતિભિઃ સેવિતપાદપદ્મમ્ ।
ધ્યાયેદ્ગણેશં વિવિધપ્રકારૈઃ
સુપૂજિતં શક્તિયુતં પરેશમ્ ॥ 67 ॥

તતો જપં વૈ મનસા કરોમિ
સ્વમૂલમંત્રસ્ય વિધાનયુક્તમ્ ।
અસંખ્યભૂતં ગણરાજ હસ્તે
સમર્પયામ્યેવ ગૃહાણ ઢુંઢે ॥ 68 ॥

આરાર્તિકાં કર્પૂરકાદિભૂતા-
-મપારદીપાં પ્રકરોમિ પૂર્ણામ્ ।
ચિત્તેન લંબોદર તાં ગૃહાણ
હ્યજ્ઞાનધ્વાંતાઘહરાં નિજાનામ્ ॥ 69 ॥

વેદેષુ વિઘ્નેશ્વરકૈઃ સુમંત્રૈઃ
સુમંત્રિતં પુષ્પદલં પ્રભૂતમ્ ।
ગૃહાણ ચિત્તેન મયા પ્રદત્ત-
-મપારવૃત્ત્યા ત્વથ મંત્રપુષ્પમ્ ॥ 70 ॥

અપારવૃત્યા સ્તુતિમેકદંતં
ગૃહાણ ચિત્તેન કૃતાં ગણેશ ।
યુક્તાં શ્રુતિસ્માર્તભવૈઃ પુરાણૈઃ
સર્વૈઃ પરેશાધિપતે મયા તે ॥ 71 ॥

પ્રદક્ષિણા માનસકલ્પિતાસ્તા
ગૃહાણ લંબોદર ભાવયુક્તાઃ ।
સંખ્યાવિહીના વિવિધસ્વરૂપા
ભક્તાન્ સદા રક્ષ ભવાર્ણવાદ્વૈ ॥ 72 ॥

નતિં તતો વિઘ્નપતે ગૃહાણ
સાષ્ટાંગકાદ્યાં વિવિધસ્વરૂપામ્ ।
સંખ્યાવિહીનાં મનસા કૃતાં તે
સિદ્ધ્યા ચ બુદ્ધ્યા પરિપાલયાશુ ॥ 73 ॥

ન્યૂનાતિરિક્તં તુ મયા કૃતં ચે-
-ત્તદર્થમંતે મનસા ગૃહાણ ।
દૂર્વાંકુરાન્વિઘ્નપતે પ્રદત્તાન્
સંપૂર્ણમેવં કુરુ પૂજનં મે ॥ 74 ॥

ક્ષમસ્વ વિઘ્નાધિપતે મદીયાન્
સદાપરાધાન્ વિવિધસ્વરૂપાન્ ।
ભક્તિં મદીયાં સફલાં કુરુષ્વ
સંપ્રાર્થયામિ મનસા ગણેશ ॥ 75 ॥

તતઃ પ્રસન્નેન ગજાનનેન
દત્તં પ્રસાદં શિરસાભિવંદ્ય ।
સ્વમસ્તકે તં પરિધારયામિ
ચિત્તેન વિઘ્નેશ્વરમાનતોઽસ્મિ ॥ 76 ॥

ઉત્થાય વિઘ્નેશ્વર એવ તસ્મા-
-દ્ગતસ્તતસ્ત્વંતરધાનશક્ત્યા ।
શિવાદયસ્તં પ્રણિપત્ય સર્વે
ગતાઃ સુચિત્તેન ચ ચિંતયામિ ॥ 77 ॥

સર્વાન્નમસ્કૃત્ય તતોઽહમેવ
ભજામિ ચિત્તેન ગણાધિપં તમ્ ।
સ્વસ્થાનમાગત્ય મહાનુભાવૈ-
-ર્ભક્તૈર્ગણેશસ્ય ચ ખેલયામિ ॥ 78 ॥

એવં ત્રિકાલેષુ ગણાધિપં તં
ચિત્તેન નિત્યં પરિપૂજયામિ ।
તેનૈવ તુષ્ટઃ પ્રદદાતુ ભાવં
વિશ્વેશ્વરો ભક્તિમયં તુ મહ્યમ્ ॥ 79 ॥

ગણેશપાદોદકપાનકં ચ
હ્યુચ્છિષ્ટગંધસ્ય સુલેપનં તુ ।
નિર્માલ્યસંધારણકં સુભોજ્યં
લંબોદરસ્યાસ્તુ હિ ભુક્તશેષમ્ ॥ 80 ॥

યં યં કરોમ્યેવ તદેવ દીક્ષા
ગણેશ્વરસ્યાસ્તુ સદા ગણેશ ।
પ્રસીદ નિત્યં તવ પાદભક્તં
કુરુષ્વ માં બ્રહ્મપતે દયાલો ॥ 81 ॥

તતસ્તુ શય્યાં પરિકલ્પયામિ
મંદારકાર્પાસકવસ્ત્રયુક્તામ્ ।
સુવાસપુષ્પાદિભિરર્ચિતાં
તે ગૃહાણ નિદ્રાં કુરુ વિઘ્નરાજ ॥ 82 ॥

સિદ્ધ્યા ચ બુદ્ધ્યા સહિતં ગણેશ
સુનિદ્રિતં વીક્ષ્ય તથાહમેવ ।
ગત્વા સ્વવાસં ચ કરોમિ નિદ્રાં
ધ્યાત્વા હૃદિ બ્રહ્મપતિં તદીયઃ ॥ 83 ॥

એતાદૃશં સૌખ્યમમોઘશક્તે
દેહિ પ્રભો માનસજં ગણેશ ।
મહ્યં ચ તેનૈવ કૃતાર્થરૂપો
ભવામિ ભક્તિરસલાલસોઽહમ્ ॥ 84 ॥

ગાર્ગ્ય ઉવાચ ।
એવં નિત્યં મહારાજ ગૃત્સમદો મહાયશાઃ ।
ચકાર માનસીં પૂજાં યોગીંદ્રાણાં ગુરુઃ સ્વયમ્ ॥ 85 ॥

ય એતાં માનસીં પૂજાં કરિષ્યતિ નરોત્તમઃ ।
પઠિષ્યતિ સદા સોઽપિ ગાણપત્યો ભવિષ્યતિ ॥ 86 ॥

શ્રાવયિષ્યતિ યો મર્ત્યઃ શ્રોષ્યતે ભાવસંયુતઃ ।
સ ક્રમેણ મહીપાલ બ્રહ્મભૂતો ભવિષ્યતિ ॥ 87 ॥

યં યમિચ્છતિ તં તં વૈ સફલં તસ્ય જાયતે ।
અંતે સ્વાનંદગઃ સોઽપિ યોગિવંદ્યો ભવિષ્યતિ ॥ 88 ॥

ઇતિ શ્રીમદાંત્યે મૌદ્ગલ્યે ગણેશમાનસપૂજા સંપૂર્ણમ્ ।