દેવ્યપરાધ ક્ષમાપણ સ્તોત્રમ્

ન મંત્રં નો યંત્રં તદપિ ચ ન જાને સ્તુતિમહો
ન ચાહ્વાનં ધ્યાનં તદપિ ચ ન જાને સ્તુતિકથાઃ ।
ન જાને મુદ્રાસ્તે તદપિ ચ ન જાને વિલપનં
પરં જાને માતસ્ત્વદનુસરણં ક્લેશહરણમ્ ॥ 1 ॥

વિધેરજ્ઞાનેન દ્રવિણવિરહેણાલસતયા
વિધેયાશક્યત્વાત્તવ ચરણયોર્યા ચ્યુતિરભૂત્ ।
તદેતત્ ક્ષંતવ્યં જનનિ સકલોદ્ધારિણિ શિવે
કુપુત્રો જાયેત ક્વચિદપિ કુમાતા ન ભવતિ ॥ 2 ॥

પૃથિવ્યાં પુત્રાસ્તે જનનિ બહવઃ સંતિ સરલાઃ
પરં તેષાં મધ્યે વિરલતરલોઽહં તવ સુતઃ ।
મદીયોઽયં ત્યાગઃ સમુચિતમિદં નો તવ શિવે
કુપુત્રો જાયેત ક્વચિદપિ કુમાતા ન ભવતિ ॥ 3 ॥

જગન્માતર્માતસ્તવ ચરણસેવા ન રચિતા
ન વા દત્તં દેવિ દ્રવિણમપિ ભૂયસ્તવ મયા ।
તથાપિ ત્વં સ્નેહં મયિ નિરુપમં યત્પ્રકુરુષે
કુપુત્રો જાયેત ક્વચિદપિ કુમાતા ન ભવતિ ॥ 4 ॥

પરિત્યક્તા દેવાન્વિવિધવિધિસેવાકુલતયા
મયા પંચાશીતેરધિકમપનીતે તુ વયસિ ।
ઇદાનીં ચેન્માતસ્તવ યદિ કૃપા નાપિ ભવિતા
નિરાલંબો લંબોદરજનનિ કં યામિ શરણમ્ ॥ 5 ॥

શ્વપાકો જલ્પાકો ભવતિ મધુપાકોપમગિરા
નિરાતંકો રંકો વિહરતિ ચિરં કોટિકનકૈઃ ।
તવાપર્ણે કર્ણે વિશતિ મનુવર્ણે ફલમિદં
જનઃ કો જાનીતે જનનિ જપનીયં જપવિધૌ ॥ 6 ॥

ચિતાભસ્માલેપો ગરળમશનં દિક્પટધરો
જટાધારી કંઠે ભુજગપતિહારી પશુપતિઃ ।
કપાલી ભૂતેશો ભજતિ જગદીશૈકપદવીં
ભવાની ત્વત્પાણિગ્રહણપરિપાટી ફલમિદમ્ ॥ 7 ॥

ન મોક્ષસ્યાકાંક્ષા ન ચ વિભવવાંછાપિ ચ ન મે
ન વિજ્ઞાનાપેક્ષા શશિમુખિ સુખેચ્છાપિ ન પુનઃ ।
અતસ્ત્વાં સંયાચે જનનિ જનનં યાતુ મમ વૈ
મૃડાની રુદ્રાણી શિવ શિવ ભવાનીતિ જપતઃ ॥ 8 ॥

નારાધિતાસિ વિધિના વિવિધોપચારૈઃ
કિં રૂક્ષચિંતનપરૈર્ન કૃતં વચોભિઃ ।
શ્યામે ત્વમેવ યદિ કિંચન મય્યનાથે
ધત્સે કૃપામુચિતમંબ પરં તવૈવ ॥ 9 ॥

આપત્સુ મગ્નઃ સ્મરણં ત્વદીયં
કરોમિ દુર્ગે કરુણાર્ણવે શિવે ।
નૈતચ્છઠત્વં મમ ભાવયેથાઃ
ક્ષુધાતૃષાર્તાઃ જનનીં સ્મરંતિ ॥ 10 ॥

જગદંબ વિચિત્રમત્ર કિં
પરિપૂર્ણા કરુણાસ્તિ ચેન્મયિ ।
અપરાધપરંપરાવૃતં
ન હિ માતા સમુપેક્ષતે સુતમ્ ॥ 11 ॥

મત્સમઃ પાતકી નાસ્તિ પાપઘ્ની ત્વત્સમા ન હિ ।
એવં જ્ઞાત્વા મહાદેવી યથા યોગ્યં તથા કુરુ ॥ 12 ॥

ઇતિ શ્રીમચ્છંકરાચાર્ય વિરચિતં દેવ્યપરાધક્ષમાપણ સ્તોત્રમ્ ।