શ્રીમદ્ભગવદ્ગીતા પારાયણ – ગીતા મહાત્મ્યમ્

અથ ગીતામાહાત્મ્યં

ધરોવાચ

ભગવન્ પરમેશાન ભક્તિરવ્યભિચારિણી ।
પ્રારબ્ધં ભુજ્યમાનસ્ય કથં ભવતિ હે પ્રભો ॥ 1 ॥

શ્રીવિષ્ણુરુવાચ
પ્રારબ્ધં ભુજ્યમાનો હિ ગીતાભ્યાસરતઃ સદા ।
સ મુક્તઃ સ સુખી લોકે કર્મણા નોપલિપ્યતે ॥ 2 ॥

મહાપાપાદિપાપાનિ ગીતાધ્યાનં કરોતિ ચેત્ ।
ક્વચિત્સ્પર્શં ન કુર્વંતિ નલિનીદલમંબુવત્ ॥ 3 ॥

ગીતાયાઃ પુસ્તકં યત્ર યત્ર પાઠઃ પ્રવર્તતે ।
તત્ર સર્વાણિ તીર્થાનિ પ્રયાગાદીનિ તત્ર વૈ ॥ 4 ॥

સર્વે દેવાશ્ચ ઋષયઃ યોગિનઃ પન્નગાશ્ચ યે ।
ગોપાલા ગોપિકા વાઽપિ નારદોદ્ધવપાર્ષદૈઃ ॥ 5 ॥

સહાયો જાયતે શીઘ્રં યત્ર ગીતા પ્રવર્તતે ।
યત્ર ગીતાવિચારશ્ચ પઠનં પાઠનં શ્રુતમ્ ।
તત્રાહં નિશ્ચિતં પૃથ્વિ નિવસામિ સદૈવ હિ ॥ 6 ॥

ગીતાશ્રયેઽહં તિષ્ઠામિ ગીતા મે ચોત્તમં ગૃહમ્ ।
ગીતાજ્ઞાનમુપાશ્રિત્ય ત્રીँલ્લોકાન્-પાલયામ્યહમ્ ॥ 7 ॥

ગીતા મે પરમા વિદ્યા બ્રહ્મરૂપા ન સંશયઃ ।
અર્ધમાત્રાક્ષરા નિત્યા સ્વાનિર્વાચ્યપદાત્મિકા ॥ 8 ॥

ચિદાનંદેન કૃષ્ણેન પ્રોક્તા સ્વમુખતોઽર્જુનમ્ ।
વેદત્રયી પરાનંદા તત્ત્વાર્થજ્ઞાનસંયુતા ॥ 9 ॥

યોઽષ્ટાદશં જપેન્નિત્યં નરો નિશ્ચલમાનસઃ ।
જ્ઞાનસિદ્ધિં સ લભતે તતો યાતિ પરં પદમ્ ॥ 10 ॥

પાઠેઽસમર્થઃ સંપૂર્ણે તતોઽર્ધં પાઠમાચરેત્ ।
તદા ગોદાનજં પુણ્યં લભતે નાત્ર સંશયઃ ॥ 11 ॥

ત્રિભાગં પઠમાનસ્તુ ગંગાસ્નાનફલં લભેત્ ।
ષડંશં જપમાનસ્તુ સોમયાગફલં લભેત્ ॥ 12 ॥

એકાધ્યાયં તુયો નિત્યં પઠતે ભક્તિસંયુતઃ ।
રુદ્રલોકમવાપ્નોતિ ગણો ભૂત્વા વસેચ્ચિરમ્ ॥ 13 ॥

અધ્યાયં શ્લોકપાદં વા નિત્યં યઃ પઠતે નરઃ ।
સ યાતિ નરતાં યાવત્ મન્વંતરં વસુંધરે ॥ 14 ॥

ગીતાયાઃ શ્લોકદશકં સપ્ત પંચ ચતુષ્ટયમ્ ।
દ્વૌત્રીનેકં તદર્ધં વા શ્લોકાનાં યઃ પઠેન્નરઃ ॥ 15 ॥

ચંદ્રલોકમવાપ્નોતિ વર્ષાણામયુતં ધૃવમ્ ।
ગીતાપાઠસમાયુક્તઃ મૃતો માનુષતાં વ્રજેત્ ॥ 16 ॥

ગીતાભ્યાસં પુનઃ કૃત્વા લભતે મુક્તિમુત્તમમ્ ।
ગીતેત્યુચ્ચારસંયુક્તઃ મ્રિયમાણો ગતિં લભેત્ ॥ 17 ॥

ગીતાર્થશ્રવણાસક્તઃ મહાપાપયુતોઽપિ વા ।
વૈકુંઠં સમવાપ્નોતિ વિષ્ણુના સહમોદતે ॥ 18 ॥

ગીતાર્થં ધ્યાયતે નિત્યં કૃત્વા કર્માણિ ભૂરિશઃ ।
જીવન્મુક્તઃ સ વિજ્ઞેયઃ દેહાંતે પરમં પદમ્ ॥ 19 ॥

મલનિર્મોચનં પુંસાં જલસ્નાનં દિને દિને ।
સકૃદ્ગીતાંભસિ સ્નાનં સંસારમલનાશનમ્ ॥ 20 ॥

ગીતામાશ્રિત્ય બહવઃ ભૂભુજો જનકાદયઃ ।
નિર્ધૂતકલ્મષા લોકે ગીતા યાતાઃ પરં પદમ્ ॥ 21 ॥

તે શૃણ્વંતિ પઠંત્યેવ ગીતાશાસ્ત્રમહર્નિશમ્ ।
ન તે વૈ માનુષા જ્ઞેયા દેવા એવ ન સંશયઃ ॥ 22 ॥

જ્ઞાનાજ્ઞાનકૃતં નિત્યં ઇંદ્રિયૈર્જનિતં ચ યત્ ।
તત્સર્વં નાશમાયાતિ ગીતાપાઠેન તક્ષણમ્ ॥ 23 ॥

ધિક્ તસ્ય જ્ઞાનમાચારં વ્રતં ચેષ્ટાં તપો યશઃ ।
ગીતાર્થપઠનં નાઽસ્તિ નાધમસ્તત્પરો જનઃ ॥ 24 ॥

સંસારસાગરં ઘોરં તર્તુમિચ્છતિ યો જનઃ ।
ગીતાનાવં સમારુહ્ય પારં યાતિ સુખેન સઃ ॥ 25 ॥

ગીતાયાઃ પઠનં કૃત્વા માહાત્મ્યં નૈવ યઃ પઠેત્ ।
વૃથા પાઠો ભવેત્તસ્ય શ્રમ એવ હ્યુદાહૃતઃ ॥ 26 ॥

એતન્માહાત્મ્યસંયુક્તં ગીતાભ્યાસં કરોતિ યઃ ।
સ તત્ફલમવાપ્નોતિ દુર્લભાં ગતિમાપ્નુયાત્ ॥ 27 ॥

સૂત ઉવાચ
માહાત્મ્યમેતદ્ગીતાયાઃ મયા પ્રોક્તં સનાતનમ્ ।
ગીતાંતે ચ પઠેદ્યસ્તુ યદુક્તં તત્ફલં ભવેત્ ॥ 28 ॥

ઇતિ શ્રી વરાહપુરાણે શ્રી ગીતામાહાત્મ્યં સંપૂર્ણમ્ ॥

ઓં શાંતિઃ શાંતિઃ શાંતિઃ ॥