બહુરૂપ ગણપતિ (દ્વાત્રિંશદ્ગણપતિ) ધ્યાન શ્લોકાઃ

1. શ્રી બાલ ગણપતિઃ
કરસ્થ કદલીચૂતપનસેક્ષુકમોદકમ્ ।
બાલસૂર્યનિભં વંદે દેવં બાલગણાધિપમ્ ॥ 1 ॥

2. શ્રી તરુણ ગણપતિઃ
પાશાંકુશાપૂપકપિત્થજંબૂ-
-સ્વદંતશાલીક્ષુમપિ સ્વહસ્તૈઃ ।
ધત્તે સદા યસ્તરુણારુણાભઃ
પાયાત્ સ યુષ્માંસ્તરુણો ગણેશઃ ॥ 2 ॥

3. શ્રી ભક્ત ગણપતિઃ
નારિકેળામ્રકદલીગુડપાયસધારિણમ્ ।
શરચ્ચંદ્રાભવપુષં ભજે ભક્તગણાધિપમ્ ॥ 3 ॥

4. શ્રી વીર ગણપતિઃ
વેતાલશક્તિશરકાર્મુકચક્રખડ્ગ-
-ખટ્વાંગમુદ્ગરગદાંકુશનાગપાશાન્ ।
શૂલં ચ કુંતપરશું ધ્વજમુદ્વહંતં
વીરં ગણેશમરુણં સતતં સ્મરામિ ॥ 4 ॥

5. શ્રી શક્તિ ગણપતિઃ
આલિંગ્ય દેવીં હરિતાંગયષ્ટિં
પરસ્પરાશ્લિષ્ટકટિપ્રદેશમ્ ।
સંધ્યારુણં પાશસૃણી વહંતં
ભયાપહં શક્તિગણેશમીડે ॥ 5 ॥

6. શ્રી દ્વિજ ગણપતિઃ
યં પુસ્તકાક્ષ ગુણદંડકમંડલુ શ્રી-
-વિદ્યોતમાનકરભૂષણમિંદુવર્ણમ્ ।
સ્તંબેરમાનનચતુષ્ટયશોભમાનં
ત્વાં યઃ સ્મરેત્ દ્વિજગણાધિપતે સ ધન્યઃ ॥ 6 ॥

7. શ્રી સિદ્ધ ગણપતિઃ
પક્વચૂતફલપુષ્પમંજરી-
-રિક્ષુદંડતિલમોદકૈઃ સહ ।
ઉદ્વહન્ પરશુમસ્તુ તે નમઃ
શ્રીસમૃદ્ધિયુત હેમપિંગળ ॥ 7 ॥

8. શ્રી ઉચ્છિષ્ટ ગણપતિઃ
નીલાબ્જદાડિમીવીણાશાલીગુંજાક્ષસૂત્રકમ્ ।
દધદુચ્છિષ્ટનામાયં ગણેશઃ પાતુ મેચકઃ ॥ 8 ॥

9. શ્રી વિઘ્ન ગણપતિઃ
શંખેક્ષુચાપકુસુમેષુકુઠારપાશ-
-ચક્રસ્વદંતસૃણિમંજરિકાશરાદ્યૈઃ ।
પાણિશ્રિતૈઃ પરિસમીહિતભૂષણશ્રી-
-વિઘ્નેશ્વરો વિજયતે તપનીયગૌરઃ ॥ 9 ॥

10. શ્રી ક્ષિપ્ર ગણપતિઃ
દંતકલ્પલતાપાશરત્નકુંભાંકુશોજ્જ્વલમ્ ।
બંધૂકકમનીયાભં ધ્યાયેત્ ક્ષિપ્રગણાધિપમ્ ॥ 10 ॥

11. શ્રી હેરંબ ગણપતિઃ
અભયવરદહસ્તઃ પાશદંતાક્ષમાલા-
-સૃણિપરશુ દધાનો મુદ્ગરં મોદકં ચ ।
ફલમધિગતસિંહઃ પંચમાતંગવક્ત્રો
ગણપતિરતિગૌરઃ પાતુ હેરંબનામા ॥ 11 ॥

12. શ્રી લક્ષ્મી ગણપતિઃ
બિભ્રાણઃ શુકબીજપૂરકમિલન્માણિક્યકુંભાકુશાન્
પાશં કલ્પલતાં ચ ખડ્ગવિલસજ્જ્યોતિઃ સુધાનિર્ઝરઃ ।
શ્યામેનાત્તસરોરુહેણ સહિતં દેવીદ્વયં ચાંતિકે
ગૌરાંગો વરદાનહસ્તસહિતો લક્ષ્મીગણેશોઽવતાત્ ॥ 12 ॥

13. શ્રી મહા ગણપતિઃ
હસ્તીંદ્રાનનમિંદુચૂડમરુણચ્છાયં ત્રિનેત્રં રસા-
-દાશ્લિષ્ટં પ્રિયયા સપદ્મકરયા સ્વાંકસ્થયા સંતતમ્ ।
બીજાપૂરગદેક્ષુકાર્મુકલસચ્ચક્રાબ્જપાશોત્પલ-
-વ્રીહ્યગ્રસ્વવિષાણરત્નકલશાન્ હસ્તૈર્વહંતં ભજે ॥ 13 ॥

14. શ્રી વિજય ગણપતિઃ
પાશાંકુશસ્વદંતામ્રફલવાનાખુવાહનઃ ।
વિઘ્નં નિહંતુ નઃ સર્વં રક્તવર્ણો વિનાયકઃ ॥ 14 ॥

15. શ્રી નૃત્ત ગણપતિઃ
પાશાંકુશાપૂપકુઠારદંત-
-ચંચત્કરાક્લુપ્તવરાંગુલીકમ્ ।
પીતપ્રભં કલ્પતરોરધસ્થં
ભજામિ નૃત્તોપપદં ગણેશમ્ ॥ 15 ॥

16. શ્રી ઊર્ધ્વ ગણપતિઃ
કલ્હારશાલિકમલેક્ષુકચાપબાણ-
-દંતપ્રરોહકગદી કનકોજ્જ્વલાંગઃ ।
આલિંગનોદ્યતકરો હરિતાંગયષ્ટ્યા
દેવ્યા કરોતુ શુભમૂર્ધ્વગણાધિપો મે ॥ 16 ॥

17. શ્રી એકાક્ષર ગણપતિઃ
રક્તો રક્તાંગરાગાંકુશકુસુમયુતસ્તુંદિલશ્ચંદ્રમૌળિઃ
નેત્રૈર્યુક્તસ્ત્રિભિર્વામનકરચરણો બીજપૂરં દધાનઃ ।
હસ્તાગ્રાક્લુપ્ત પાશાંકુશરદવરદો નાગવક્ત્રોઽહિભૂષો
દેવઃ પદ્માસનસ્થો ભવતુ સુખકરો ભૂતયે વિઘ્નરાજઃ ॥ 17 ॥

18. શ્રી વર ગણપતિઃ
સિંદૂરાભમિભાનનં ત્રિનયનં હસ્તે ચ પાશાંકુશૌ
બિભ્રાણં મધુમત્કપાલમનિશં સાધ્વિંદુમૌળિં ભજે ।
પુષ્ટ્યાશ્લિષ્ટતનું ધ્વજાગ્રકરયા પદ્મોલ્લસદ્ધસ્તયા
તદ્યોન્યાહિત પાણિમાત્તવસુમત્પાત્રોલ્લસત્પુષ્કરમ્ ॥ 18 ॥

19. શ્રી ત્ર્યક્ષર ગણપતિઃ
ગજેંદ્રવદનં સાક્ષાચ્ચલત્કર્ણસુચામરં
હેમવર્ણં ચતુર્બાહું પાશાંકુશધરં વરમ્ ।
સ્વદંતં દક્ષિણે હસ્તે સવ્યે ત્વામ્રપલં તથા
પુષ્કરૈર્મોદકં ચૈવ ધારયંતમનુસ્મરેત્ ॥ 19 ॥

20. શ્રી ક્ષિપ્રપ્રસાદ ગણપતિઃ
ધૃતપાશાંકુશકલ્પલતા સ્વરદશ્ચ બીજપૂરયુતઃ
શશિશકલકલિતમૌળિસ્ત્રિલોચનોઽરુણશ્ચ ગજવદનઃ ।
ભાસુરભૂષણદીપ્તો બૃહદુદરઃ પદ્મવિષ્ટરોલ્લસિતઃ
વિઘ્નપયોધરપવનઃ કરધૃતકમલઃ સદાસ્તુ મે ભૂત્યૈ ॥ 20 ॥

21. શ્રી હરિદ્રા ગણપતિઃ
હરિદ્રાભં ચતુર્બાહું કરીંદ્રવદનં પ્રભુમ્ ।
પાશાંકુશધરં દેવં મોદકં દંતમેવ ચ ।
ભક્તાભયપ્રદાતારં વંદે વિઘ્નવિનાશનમ્ ॥ 21 ॥

22. શ્રી એકદંત ગણપતિઃ
લંબોદરં શ્યામતનું ગણેશં
કુઠારમક્ષસ્રજમૂર્ધ્વગાત્રમ્ ।
સલડ્ડુકં દંતમધઃ કરાભ્યાં
વામેતરાભ્યાં ચ દધાનમીડે ॥ 22 ॥

23. શ્રી સૃષ્ટિ ગણપતિઃ
પાશાંકુશસ્વદંતામ્રફલવાનાખુવાહનઃ ।
વિઘ્નં નિહંતુ નઃ શોણઃ સૃષ્ટિદક્ષો વિનાયકઃ ॥ 23 ॥

24. શ્રી ઉદ્દંડ ગણપતિઃ
કલ્હારાંબુજબીજપૂરકગદાદંતેક્ષુચાપં સુમં
બિભ્રાણો મણિકુંભશાલિકલશૌ પાશં સૃણિં ચાબ્જકમ્ ।
ગૌરાંગ્યા રુચિરારવિંદકરયા દેવ્યા સમાલિંગતઃ
શોણાંગઃ શુભમાતનોતુ ભજતામુદ્દંડવિઘ્નેશ્વરઃ ॥ 24 ॥

25. શ્રી ઋણમોચક ગણપતિઃ
પાશાંકુશૌ દંતજંબુ દધાનઃ સ્ફાટિકપ્રભઃ ।
રક્તાંશુકો ગણપતિર્મુદે સ્યાદૃણમોચકઃ ॥ 25 ॥

26. શ્રી ઢુંઢિ ગણપતિઃ
અક્ષમાલાં કુઠારં ચ રત્નપાત્રં સ્વદંતકમ્ ।
ધત્તે કરૈર્વિઘ્નરાજો ઢુંઢિનામા મુદેઽસ્તુ નઃ ॥ 26 ॥

27. શ્રી દ્વિમુખ ગણપતિઃ
સ્વદંતપાશાંકુશરત્નપાત્રં
કરૈર્દધાનો હરિનીલગાત્રઃ ।
રક્તાંશુકો રત્નકિરીટમાલી
ભૂત્યૈ સદા મે દ્વિમુખો ગણેશઃ ॥ 27 ॥

28. શ્રી ત્રિમુખ ગણપતિઃ
શ્રીમત્તીક્ષ્ણશિખાંકુશાક્ષવરદાન્ દક્ષે દધાનઃ કરૈઃ
પાશં ચામૃતપૂર્ણકુંભમભયં વામે દધાનો મુદા ।
પીઠે સ્વર્ણમયારવિંદવિલસત્સત્કર્ણિકાભાસુરે
સ્વાસીનસ્ત્રિમુખઃ પલાશરુચિરો નાગાનનઃ પાતુ નઃ ॥ 28 ॥

29. શ્રી સિંહ ગણપતિઃ
વીણાં કલ્પલતામરિં ચ વરદં દક્ષે વિદત્તે કરૈ-
-ર્વામે તામરસં ચ રત્નકલશં સન્મંજરીં ચાભયમ્ ।
શુંડાદંડલસન્મૃગેંદ્રવદનઃ શંખેંદુગૌરઃ શુભો
દીવ્યદ્રત્નનિભાંશુકો ગણપતિઃ પાયાદપાયત્ સ નઃ ॥ 29 ॥

30. શ્રી યોગ ગણપતિઃ
યોગારૂઢો યોગપટ્ટાભિરામો
બાલાર્કાભશ્ચેંદ્રનીલાંશુકાઢ્યઃ ।
પાશેક્ષ્વક્ષાન્ યોગદંડં દધાનો
પાયાન્નિત્યં યોગવિઘ્નેશ્વરો નઃ ॥ 30 ॥

31. શ્રી દુર્ગા ગણપતિઃ
તપ્તકાંચનસંકાશશ્ચાષ્ટહસ્તો મહત્તનુઃ
દીપ્તાંકુશં શરં ચાક્ષં દંતુ દક્ષે વહન્ કરૈઃ ।
વામે પાશં કાર્મુકં ચ લતાં જંબુ દધત્કરૈઃ
રક્તાંશુકઃ સદા ભૂયાદ્દુર્ગાગણપતિર્મુદે ॥ 31 ॥

32. શ્રી સંકષ્ટહર ગણપતિઃ
બાલાર્કારુણકાંતિર્વામે બાલાં વહન્નંકે
લસદિંદીવરહસ્તાં ગૌરાંગીં રત્નશોભાઢ્યામ્ ।
દક્ષેઽંકુશવરદાનં વામે પાશં ચ પાયસં પાત્રં
નીલાંશુકલસમાનઃ પીઠે પદ્મારુણે તિષ્ઠન્ ॥ 32 ॥
સંકટહરણઃ પાયાત્ સંકટપૂગાદ્ગજાનનો નિત્યમ્ ।

શ્રી વલ્લભ ગણપતિ
બીજાપૂર ગદેક્ષુકાર્મુકભુજાચક્રાબ્જ પાશોત્પલ
વ્રીહ્યગ્રસ્વવિષાણ રત્નકલશ પ્રોદ્યત્કરાંભોરુહઃ ।
ધ્યેયો વલ્લભયા ચ પદ્મકરયાશ્લિષ્ટો જ્વલદ્ભૂષયા
વિશ્વોત્પત્તિવિનાશસંસ્થિતિકરો વિઘ્નો વિશિષ્ટાર્થદઃ ॥

શ્રી સિદ્ધિદેવી
પીતવર્ણાં દ્વિનેત્રાં તામેકવક્ત્રાંબુજદ્વયાં
નવરત્નકિરીટાં ચ પીતાંબરસુધારિણીમ્ ।
વામહસ્તે મહાપદ્મં દક્ષે લંબકરાન્વિતાં
જાજીચંપકમાલાં ચ ત્રિભંગીં લલિતાંગિકામ્ ॥
ગણેશદક્ષિણે ભાગે ગુરુઃ સિદ્ધિં તુ ભાવયેત્ ॥

શ્રી બુદ્ધિદેવી
દ્વિહસ્તાં ચ દ્વિનેત્રાં તામેકવક્ત્રાં ત્રિભંગિકાં
મુક્તામણિકિરીટાં ચ દક્ષે હસ્તે મહોત્પલમ્ ।
વામે પ્રલંબહસ્તાં ચ દિવ્યાંબરસુધારિણીં
શ્યામવર્ણનિભાં ભાસ્વત્સર્વાભરણભૂષિતામ્ ॥
પારિજાતોત્પલામાલ્યાં ગણેશો વામપાર્શ્વકે
ધ્યાત્વા બુદ્ધિં સુરૂપાં સમર્ચયેદ્દેશિકોત્તમઃ ॥