𑌶𑌿𑌵 𑌪𑌾𑌦𑌾𑌦𑌿 𑌕𑍇𑌶𑌾𑌂𑌤 𑌵𑌰𑍍𑌣𑌨 𑌸𑍍𑌤𑍋𑌤𑍍𑌰𑌂

𑌕𑌳𑍍𑌯𑌾𑌣𑌂 𑌨𑍋 𑌵𑌿𑌧𑌤𑍍𑌤𑌾𑌂 𑌕𑌟𑌕𑌤𑌟𑌲𑌸𑌤𑍍𑌕𑌲𑍍𑌪𑌵𑌾𑌟𑍀𑌨𑌿𑌕𑍁𑌂𑌜-
-𑌕𑍍𑌰𑍀𑌡𑌾𑌸𑌂𑌸𑌕𑍍𑌤𑌵𑌿𑌦𑍍𑌯𑌾𑌧𑌰𑌨𑌿𑌕𑌰𑌵𑌧𑍂𑌗𑍀𑌤𑌰𑍁𑌦𑍍𑌰𑌾𑌪𑌦𑌾𑌨𑌃 ।
𑌤𑌾𑌰𑍈𑌰𑍍𑌹𑍇𑌰𑌂𑌬𑌨𑌾𑌦𑍈𑌸𑍍𑌤𑌰𑌳𑌿𑌤𑌨𑌿𑌨𑌦𑌤𑍍𑌤𑌾𑌰𑌕𑌾𑌰𑌾𑌤𑌿𑌕𑍇𑌕𑍀
𑌕𑍈𑌲𑌾𑌸𑌃 𑌶𑌰𑍍𑌵𑌨𑌿𑌰𑍍𑌵𑍃𑌤𑍍𑌯𑌭𑌿𑌜𑌨𑌕𑌪𑌦𑌃 𑌸𑌰𑍍𑌵𑌦𑌾 𑌪𑌰𑍍𑌵𑌤𑍇𑌂𑌦𑍍𑌰𑌃 ॥ 1 ॥

𑌯𑌸𑍍𑌯 𑌪𑍍𑌰𑌾𑌹𑍁𑌃 𑌸𑍍𑌵𑌰𑍂𑌪𑌂 𑌸𑌕𑌲𑌦𑌿𑌵𑌿𑌷𑌦𑌾𑌂 𑌸𑌾𑌰𑌸𑌰𑍍𑌵𑌸𑍍𑌵𑌯𑍋𑌗𑌂
𑌯𑌸𑍍𑌯𑍇𑌷𑍁𑌃 𑌶𑌾𑌰𑍍‍𑌂𑌗𑌧𑌨𑍍𑌵𑌾 𑌸𑌮𑌜𑌨𑌿 𑌜𑌗𑌤𑌾𑌂 𑌰𑌕𑍍𑌷𑌣𑍇 𑌜𑌾𑌗𑌰𑍂𑌕𑌃 ।
𑌮𑍌𑌰𑍍𑌵𑍀 𑌦𑌰𑍍𑌵𑍀𑌕𑌰𑌾𑌣𑌾𑌮𑌪𑌿 𑌚 𑌪𑌰𑌿𑌬𑍃𑌢𑌃 𑌪𑍂𑌸𑍍𑌤𑍍𑌰𑌯𑍀 𑌸𑌾 𑌚 𑌲𑌕𑍍𑌷𑍍𑌯𑌂
𑌸𑍋𑌽𑌵𑍍𑌯𑌾𑌦𑌵𑍍𑌯𑌾𑌜𑌮𑌸𑍍𑌮𑌾𑌨𑌶𑌿𑌵𑌭𑌿𑌦𑌨𑌿𑌶𑌂 𑌨𑌾𑌕𑌿𑌨𑌾𑌂 𑌶𑍍𑌰𑍀𑌪𑌿𑌨𑌾𑌕𑌃 ॥ 2 ॥

𑌆𑌤𑌂𑌕𑌾𑌵𑍇𑌗𑌹𑌾𑌰𑍀 𑌸𑌕𑌲𑌦𑌿𑌵𑌿𑌷𑌦𑌾𑌮𑌂𑌘𑍍𑌰𑌿𑌪𑌦𑍍𑌮𑌾𑌶𑍍𑌰𑌯𑌾𑌣𑌾𑌂
𑌮𑌾𑌤𑌂𑌗𑌾𑌦𑍍𑌯𑍁𑌗𑍍𑌰𑌦𑍈𑌤𑍍𑌯𑌪𑍍𑌰𑌕𑌰𑌤𑌨𑍁𑌗𑌲𑌦𑍍𑌰𑌕𑍍𑌤𑌧𑌾𑌰𑌾𑌕𑍍𑌤𑌧𑌾𑌰𑌃 ।
𑌕𑍍𑌰𑍂𑌰𑌃 𑌸𑍂𑌰𑌾𑌯𑍁𑌤𑌾𑌨𑌾𑌮𑌪𑌿 𑌚 𑌪𑌰𑌿𑌭𑌵𑌂 𑌸𑍍𑌵𑍀𑌯𑌭𑌾𑌸𑌾 𑌵𑌿𑌤𑌨𑍍𑌵-
-𑌨𑍍𑌘𑍋𑌰𑌾𑌕𑌾𑌰𑌃 𑌕𑍁𑌠𑌾𑌰𑍋 𑌦𑍃𑌢𑌤𑌰𑌦𑍁𑌰𑌿𑌤𑌾𑌖𑍍𑌯𑌾𑌟𑌵𑍀𑌂 𑌪𑌾𑌟𑌯𑍇𑌨𑍍𑌨𑌃 ॥ 3 ॥

𑌕𑌾𑌲𑌾𑌰𑌾𑌤𑍇𑌃 𑌕𑌰𑌾𑌗𑍍𑌰𑍇 𑌕𑍃𑌤𑌵𑌸𑌤𑌿𑌰𑍁𑌰𑌃𑌶𑌾𑌣𑌶𑌾𑌤𑍋 𑌰𑌿𑌪𑍂𑌣𑌾𑌂
𑌕𑌾𑌲𑍇 𑌕𑌾𑌲𑍇 𑌕𑍁𑌲𑌾𑌦𑍍𑌰𑌿𑌪𑍍𑌰𑌵𑌰𑌤𑌨𑌯𑌯𑌾 𑌕𑌲𑍍𑌪𑌿𑌤𑌸𑍍𑌨𑍇𑌹𑌲𑍇𑌪𑌃 ।
𑌪𑌾𑌯𑌾𑌨𑍍𑌨𑌃 𑌪𑌾𑌵𑌕𑌾𑌰𑍍𑌚𑌿𑌃𑌪𑍍𑌰𑌸𑌰𑌸𑌖𑌮𑍁𑌖𑌃 𑌪𑌾𑌪𑌹𑌂𑌤𑌾 𑌨𑌿𑌤𑌾𑌂𑌤𑌂
𑌶𑍂𑌲𑌃 𑌶𑍍𑌰𑍀𑌪𑌾𑌦𑌸𑍇𑌵𑌾𑌭𑌜𑌨𑌰𑌸𑌜𑍁𑌷𑌾𑌂 𑌪𑌾𑌲𑌨𑍈𑌕𑌾𑌂𑌤𑌶𑍀𑌲𑌃 ॥ 4 ॥

𑌦𑍇𑌵𑌸𑍍𑌯𑌾𑌂𑌕𑌾𑌶𑍍𑌰𑌯𑌾𑌯𑌾𑌃 𑌕𑍁𑌲𑌗𑌿𑌰𑌿𑌦𑍁𑌹𑌿𑌤𑍁𑌰𑍍𑌨𑍇𑌤𑍍𑌰𑌕𑍋𑌣𑌪𑍍𑌰𑌚𑌾𑌰-
-𑌪𑍍𑌰𑌸𑍍𑌤𑌾𑌰𑌾𑌨𑌤𑍍𑌯𑍁𑌦𑌾𑌰𑌾𑌨𑍍𑌪𑌿𑌪𑌠𑌿𑌷𑍁𑌰𑌿𑌵 𑌯𑍋 𑌨𑌿𑌤𑍍𑌯𑌮𑌤𑍍𑌯𑌾𑌦𑌰𑍇𑌣 ।
𑌆𑌧𑌤𑍍𑌤𑍇 𑌭𑌂𑌗𑌿𑌤𑍁𑌂𑌗𑍈𑌰𑌨𑌿𑌶𑌮𑌵𑌯𑌵𑍈𑌰𑌂𑌤𑌰𑌂𑌗𑌂 𑌸𑌮𑍋𑌦𑌂
𑌸𑍋𑌮𑌾𑌪𑍀𑌡𑌸𑍍𑌯 𑌸𑍋𑌽𑌯𑌂 𑌪𑍍𑌰𑌦𑌿𑌶𑌤𑍁 𑌕𑍁𑌶𑌲𑌂 𑌪𑌾𑌣𑌿𑌰𑌂𑌗𑌃 𑌕𑍁𑌰𑌂𑌗𑌃 ॥ 5 ॥

𑌕𑌂𑌠𑌪𑍍𑌰𑌾𑌂𑌤𑌾𑌵𑌸𑌜𑍍𑌜𑌤𑍍𑌕𑌨𑌕𑌮𑌯𑌮𑌹𑌾𑌘𑌂𑌟𑌿𑌕𑌾𑌘𑍋𑌰𑌘𑍋𑌷𑍈𑌃
𑌕𑌂𑌠𑌾𑌰𑌾𑌵𑍈𑌰𑌕𑍁𑌂𑌠𑍈𑌰𑌪𑌿 𑌭𑌰𑌿𑌤𑌜𑌗𑌚𑍍𑌚𑌕𑍍𑌰𑌵𑌾𑌲𑌾𑌂𑌤𑌰𑌾𑌳𑌃 ।
𑌚𑌂𑌡𑌃 𑌪𑍍𑌰𑍋𑌦𑍍𑌦𑌂𑌡𑌶𑍃𑌂𑌗𑌃 𑌕𑌕𑍁𑌦𑌕𑌬𑌲𑌿𑌤𑍋𑌤𑍍𑌤𑍁𑌂𑌗𑌕𑍈𑌲𑌾𑌸𑌶𑍃𑌂𑌗𑌃
𑌕𑌂𑌠𑍇𑌕𑌾𑌲𑌸𑍍𑌯 𑌵𑌾𑌹𑌃 𑌶𑌮𑌯𑌤𑍁 𑌶𑌮𑌲𑌂 𑌶𑌾𑌶𑍍𑌵𑌤𑌃 𑌶𑌾𑌕𑍍𑌵𑌰𑍇𑌂𑌦𑍍𑌰𑌃 ॥ 6 ॥

𑌨𑌿𑌰𑍍𑌯𑌦𑍍𑌦𑌾𑌨𑌾𑌂𑌬𑍁𑌧𑌾𑌰𑌾𑌪𑌰𑌿𑌮𑌲𑌤𑌰𑌲𑍀𑌭𑍂𑌤𑌰𑍋𑌲𑌂𑌬𑌪𑌾𑌲𑍀-
-𑌝𑌂𑌕𑌾𑌰𑍈𑌃 𑌶𑌂𑌕𑌰𑌾𑌦𑍍𑌰𑍇𑌃 𑌶𑌿𑌖𑌰𑌶𑌤𑌦𑌰𑍀𑌃 𑌪𑍂𑌰𑌯𑌨𑍍𑌭𑍂𑌰𑌿𑌘𑍋𑌷𑍈𑌃 ।
𑌶𑌾𑌰𑍍𑌵𑌃 𑌸𑍌𑌵𑌰𑍍𑌣𑌶𑍈𑌲𑌪𑍍𑌰𑌤𑌿𑌮𑌪𑍃𑌥𑍁𑌵𑌪𑍁𑌃 𑌸𑌰𑍍𑌵𑌵𑌿𑌘𑍍𑌨𑌾𑌪𑌹𑌰𑍍𑌤𑌾
𑌶𑌰𑍍𑌵𑌾𑌣𑍍𑌯𑌾𑌃 𑌪𑍂𑌰𑍍𑌵𑌸𑍂𑌨𑍁𑌃 𑌸 𑌭𑌵𑌤𑍁 𑌭𑌵𑌤𑌾𑌂 𑌸𑍍𑌵𑌸𑍍𑌤𑌿𑌦𑍋 𑌹𑌸𑍍𑌤𑌿𑌵𑌕𑍍𑌤𑍍𑌰𑌃 ॥ 𑍭 ॥

𑌯𑌃 𑌪𑍁𑌣𑍍𑌯𑍈𑌰𑍍𑌦𑍇𑌵𑌤𑌾𑌨𑌾𑌂 𑌸𑌮𑌜𑌨𑌿 𑌶𑌿𑌵𑌯𑍋𑌃 𑌶𑍍𑌲𑌾𑌘𑍍𑌯𑌵𑍀𑌰𑍍𑌯𑍈𑌕𑌮𑌤𑍍𑌯𑌾-
-𑌦𑍍𑌯𑌨𑍍𑌨𑌾𑌮𑍍𑌨𑌿 𑌶𑍍𑌰𑍂𑌯𑌮𑌾𑌣𑍇 𑌦𑌿𑌤𑌿𑌜𑌭𑌟𑌘𑌟𑌾 𑌭𑍀𑌤𑌿𑌭𑌾𑌰𑌂 𑌭𑌜𑌂𑌤𑍇 ।
𑌭𑍂𑌯𑌾𑌤𑍍𑌸𑍋𑌽𑌯𑌂 𑌵𑌿𑌭𑍂𑌤𑍍𑌯𑍈 𑌨𑌿𑌶𑌿𑌤𑌶𑌰𑌶𑌿𑌖𑌾𑌪𑌾𑌟𑌿𑌤𑌕𑍍𑌰𑍌𑌂𑌚𑌶𑍈𑌲𑌃
𑌸𑌂𑌸𑌾𑌰𑌾𑌗𑌾𑌧𑌕𑍂𑌪𑍋𑌦𑌰𑌪𑌤𑌿𑌤𑌸𑌮𑍁𑌤𑍍𑌤𑌾𑌰𑌕𑌸𑍍𑌤𑌾𑌰𑌕𑌾𑌰𑌿𑌃 ॥ 𑍮 ॥

𑌆𑌰𑍂𑌢𑌃 𑌪𑍍𑌰𑍌𑌢𑌵𑍇𑌗𑌪𑍍𑌰𑌵𑌿𑌜𑌿𑌤𑌪𑌵𑌨𑌂 𑌤𑍁𑌂𑌗𑌤𑍁𑌂𑌗𑌂 𑌤𑍁𑌰𑌂𑌗𑌂
𑌚𑍇𑌲𑌂 𑌨𑍀𑌲𑌂 𑌵𑌸𑌾𑌨𑌃 𑌕𑌰𑌤𑌲𑌵𑌿𑌲𑌸𑌤𑍍𑌕𑌾𑌂𑌡𑌕𑍋𑌦𑌂𑌡𑌦𑌂𑌡𑌃 ।
𑌰𑌾𑌗𑌦𑍍𑌵𑍇𑌷𑌾𑌦𑌿𑌨𑌾𑌨𑌾𑌵𑌿𑌧𑌮𑍃𑌗𑌪𑌟𑌲𑍀𑌭𑍀𑌤𑌿𑌕𑍃𑌦𑍍𑌭𑍂𑌤𑌭𑌰𑍍𑌤𑌾
𑌕𑍁𑌰𑍍𑌵𑌨𑍍𑌨𑌾𑌖𑍇𑌟𑌲𑍀𑌲𑌾𑌂 𑌪𑌰𑌿𑌲𑌸𑌤𑍁 𑌮𑌨𑌃𑌕𑌾𑌨𑌨𑍇 𑌮𑌾𑌮𑌕𑍀𑌨𑍇 ॥ 𑍯 ॥

𑌅𑌂𑌭𑍋𑌜𑌾𑌭𑍍𑌯𑌾𑌂 𑌚 𑌰𑌂𑌭𑌾𑌰𑌥𑌚𑌰𑌣𑌲𑌤𑌾𑌦𑍍𑌵𑌂𑌦𑍍𑌵𑌕𑍁𑌂𑌭𑍀𑌂𑌦𑍍𑌰𑌕𑍁𑌂𑌭𑍈-
-𑌰𑍍𑌬𑌿𑌂𑌬𑍇𑌨𑍇𑌂𑌦𑍋𑌶𑍍𑌚 𑌕𑌂𑌬𑍋𑌰𑍁𑌪𑌰𑌿 𑌵𑌿𑌲𑌸𑌤𑌾 𑌵𑌿𑌦𑍍𑌰𑍁𑌮𑍇𑌣𑍋𑌤𑍍𑌪𑌲𑌾𑌭𑍍𑌯𑌾𑌮𑍍 ।
𑌅𑌂𑌭𑍋𑌦𑍇𑌨𑌾𑌪𑌿 𑌸𑌂𑌭𑌾𑌵𑌿𑌤𑌮𑍁𑌪𑌜𑌨𑌿𑌤𑌾𑌡𑌂𑌬𑌰𑌂 𑌶𑌂𑌬𑌰𑌾𑌰𑍇𑌃
𑌶𑌂𑌭𑍋𑌃 𑌸𑌂𑌭𑍋𑌗𑌯𑍋𑌗𑍍𑌯𑌂 𑌕𑌿𑌮𑌪𑌿 𑌧𑌨𑌮𑌿𑌦𑌂 𑌸𑌂𑌭𑌵𑍇𑌤𑍍𑌸𑌂𑌪𑌦𑍇 𑌨𑌃 ॥ 10 ॥

𑌵𑍇𑌣𑍀𑌸𑍌𑌭𑌾𑌗𑍍𑌯𑌵𑌿𑌸𑍍𑌮𑌾𑌪𑌿𑌤𑌤𑌪𑌨𑌸𑍁𑌤𑌾𑌚𑌾𑌰𑍁𑌵𑍇𑌣𑍀𑌵𑌿𑌲𑌾𑌸𑌾-
-𑌨𑍍𑌵𑌾𑌣𑍀𑌨𑌿𑌰𑍍𑌧𑍂𑌤𑌵𑌾𑌣𑍀𑌕𑌰𑌤𑌲𑌵𑌿𑌧𑍃𑌤𑍋𑌦𑌾𑌰𑌵𑍀𑌣𑌾𑌵𑌿𑌰𑌾𑌵𑌾𑌨𑍍 ।
𑌏𑌣𑍀𑌨𑍇𑌤𑍍𑌰𑌾𑌂𑌤𑌭𑌂𑌗𑍀𑌨𑌿𑌰𑌸𑌨𑌨𑌿𑌪𑍁𑌣𑌾𑌪𑌾𑌂𑌗𑌕𑍋𑌣𑌾𑌨𑍁𑌪𑌾𑌸𑍇
𑌶𑍋𑌣𑌾𑌨𑍍𑌪𑍍𑌰𑌾𑌣𑌾𑌨𑍁𑌦𑍂𑌢𑌪𑍍𑌰𑌤𑌿𑌨𑌵𑌸𑍁𑌷𑌮𑌾𑌕𑌂𑌦𑌲𑌾𑌨𑌿𑌂𑌦𑍁𑌮𑍌𑌳𑍇𑌃 ॥ 11 ॥

𑌨𑍃𑌤𑍍𑌤𑌾𑌰𑌂𑌭𑍇𑌷𑍁 𑌹𑌸𑍍𑌤𑌾𑌹𑌤𑌮𑍁𑌰𑌜𑌧𑌿𑌮𑌿𑌦𑍍𑌧𑌿𑌂𑌕𑍃𑌤𑍈𑌰𑌤𑍍𑌯𑍁𑌦𑌾𑌰𑍈-
-𑌶𑍍𑌚𑌿𑌤𑍍𑌤𑌾𑌨𑌂𑌦𑌂 𑌵𑌿𑌧𑌤𑍍𑌤𑍇 𑌸𑌦𑌸𑌿 𑌭𑌗𑌵𑌤𑌃 𑌸𑌂𑌤𑌤𑌂 𑌯𑌃 𑌸 𑌨𑌂𑌦𑍀 ।
𑌚𑌂𑌡𑍀𑌶𑌾𑌦𑍍𑌯𑌾𑌸𑍍𑌤𑌥𑌾𑌨𑍍𑌯𑍇 𑌚𑌤𑍁𑌰𑌗𑍁𑌣𑌗𑌣𑌪𑍍𑌰𑍀𑌣𑌿𑌤𑌸𑍍𑌵𑌾𑌮𑌿𑌸𑌤𑍍𑌕𑌾-
-𑌰𑍋𑌤𑍍𑌕𑌰𑍍𑌷𑍋𑌦𑍍𑌯𑌤𑍍𑌪𑍍𑌰𑌸𑌾𑌦𑌾𑌃 𑌪𑍍𑌰𑌮𑌥𑌪𑌰𑌿𑌬𑍃𑌢𑌾𑌃 𑌪𑌾𑌂𑌤𑍁 𑌸𑌂𑌤𑍋𑌷𑌿𑌣𑍋 𑌨𑌃 ॥ 12 ॥

𑌮𑍁𑌕𑍍𑌤𑌾𑌮𑌾𑌣𑌿𑌕𑍍𑌯𑌜𑌾𑌲𑍈𑌃 𑌪𑌰𑌿𑌕𑌲𑌿𑌤𑌮𑌹𑌾𑌸𑌾𑌲𑌮𑌾𑌲𑍋𑌕𑌨𑍀𑌯𑌂
𑌪𑍍𑌰𑌤𑍍𑌯𑍁𑌪𑍍𑌤𑌾𑌨𑌰𑍍𑌘𑌰𑌤𑍍𑌨𑍈𑌰𑍍𑌦𑌿𑌶𑌿 𑌦𑌿𑌶𑌿 𑌭𑌵𑌨𑍈𑌃 𑌕𑌲𑍍𑌪𑌿𑌤𑍈𑌰𑍍𑌦𑌿𑌕𑍍𑌪𑌤𑍀𑌨𑌾𑌮𑍍 ।
𑌉𑌦𑍍𑌯𑌾𑌨𑍈𑌰𑌦𑍍𑌰𑌿𑌕𑌨𑍍𑌯𑌾𑌪𑌰𑌿𑌜𑌨𑌵𑌨𑌿𑌤𑌾𑌮𑌾𑌨𑌨𑍀𑌯𑍈𑌃 𑌪𑌰𑍀𑌤𑌂
𑌹𑍃𑌦𑍍𑌯𑌂 𑌹𑍃𑌦𑍍𑌯𑌸𑍍𑌤𑍁 𑌨𑌿𑌤𑍍𑌯𑌂 𑌮𑌮 𑌭𑍁𑌵𑌨𑌪𑌤𑍇𑌰𑍍𑌧𑌾𑌮 𑌸𑍋𑌮𑌾𑌰𑍍𑌧𑌮𑍌𑌳𑍇𑌃 ॥ 13 ॥

𑌸𑍍𑌤𑌂𑌭𑍈𑌰𑍍𑌜𑌂𑌭𑌾𑌰𑌿𑌰𑌤𑍍𑌨𑌪𑍍𑌰𑌵𑌰𑌵𑌿𑌰𑌚𑌿𑌤𑍈𑌃 𑌸𑌂𑌭𑍃𑌤𑍋𑌪𑌾𑌂𑌤𑌭𑌾𑌗𑌂
𑌶𑍁𑌂𑌭𑌤𑍍𑌸𑍋𑌪𑌾𑌨𑌮𑌾𑌰𑍍𑌗𑌂 𑌶𑍁𑌚𑌿𑌮𑌣𑌿𑌨𑌿𑌚𑌯𑍈𑌰𑍍𑌗𑍁𑌂𑌭𑌿𑌤𑌾𑌨𑌲𑍍𑌪𑌶𑌿𑌲𑍍𑌪𑌮𑍍 ।
𑌕𑍁𑌂𑌭𑍈𑌃 𑌸𑌂𑌪𑍂𑌰𑍍𑌣𑌶𑍋𑌭𑌂 𑌶𑌿𑌰𑌸𑌿 𑌸𑍁𑌘𑌟𑌿𑌤𑍈𑌃 𑌶𑌾𑌤𑌕𑍁𑌂𑌭𑍈𑌰𑌪𑌂𑌕𑍈𑌃
𑌶𑌂𑌭𑍋𑌃 𑌸𑌂𑌭𑌾𑌵𑌨𑍀𑌯𑌂 𑌸𑌕𑌲𑌮𑍁𑌨𑌿𑌜𑌨𑍈𑌃 𑌸𑍍𑌵𑌸𑍍𑌤𑌿𑌦𑌂 𑌸𑍍𑌯𑌾𑌤𑍍𑌸𑌦𑍋 𑌨𑌃 ॥ 14 ॥

𑌨𑍍𑌯𑌸𑍍𑌤𑍋 𑌮𑌧𑍍𑌯𑍇 𑌸𑌭𑌾𑌯𑌾𑌃 𑌪𑌰𑌿𑌸𑌰𑌵𑌿𑌲𑌸𑌤𑍍𑌪𑌾𑌦𑌪𑍀𑌠𑌾𑌭𑌿𑌰𑌾𑌮𑍋
𑌹𑍃𑌦𑍍𑌯𑌃 𑌪𑌾𑌦𑍈𑌶𑍍𑌚𑌤𑍁𑌰𑍍𑌭𑌿𑌃 𑌕𑌨𑌕𑌮𑌣𑌿𑌮𑌯𑍈𑌰𑍁𑌚𑍍𑌚𑌕𑍈𑌰𑍁𑌜𑍍𑌜𑍍𑌵𑌲𑌾𑌤𑍍𑌮𑌾 ॥
𑌵𑌾𑌸𑍋𑌰𑌤𑍍𑌨𑍇𑌨 𑌕𑍇𑌨𑌾𑌪𑍍𑌯𑌧𑌿𑌕𑌮𑍃𑌦𑍁𑌤𑌰𑍇𑌣𑌾𑌸𑍍𑌤𑍃𑌤𑍋 𑌵𑌿𑌸𑍍𑌤𑍃𑌤𑌶𑍍𑌰𑍀𑌃
𑌪𑍀𑌠𑌃 𑌪𑍀𑌡𑌾𑌭𑌰𑌂 𑌨𑌃 𑌶𑌮𑌯𑌤𑍁 𑌶𑌿𑌵𑌯𑍋𑌃 𑌸𑍍𑌵𑍈𑌰𑌸𑌂𑌵𑌾𑌸𑌯𑍋𑌗𑍍𑌯𑌃 ॥ 15 ॥

𑌆𑌸𑍀𑌨𑌸𑍍𑌯𑌾𑌧𑌿𑌪𑍀𑌠𑌂 𑌤𑍍𑌰𑌿𑌜𑌗𑌦𑌧𑌿𑌪𑌤𑍇𑌰𑌂𑌘𑍍𑌰𑌿𑌪𑍀𑌠𑌾𑌨𑍁𑌷𑌕𑍍𑌤𑍌
𑌪𑌾𑌥𑍋𑌜𑌾𑌭𑍋𑌗𑌭𑌾𑌜𑍌 𑌪𑌰𑌿𑌮𑍃𑌦𑍁𑌲𑌤𑌲𑍋𑌲𑍍𑌲𑌾𑌸𑌿𑌪𑌦𑍍𑌮𑌾𑌦𑌿𑌰𑍇𑌖𑍌 ।
𑌪𑌾𑌤𑌾𑌂 𑌪𑌾𑌦𑌾𑌵𑍁𑌭𑍌 𑌤𑍌 𑌨𑌮𑌦𑌮𑌰𑌕𑌿𑌰𑍀𑌟𑍋𑌲𑍍𑌲𑌸𑌚𑍍𑌚𑌾𑌰𑍁𑌹𑍀𑌰-
-𑌶𑍍𑌰𑍇𑌣𑍀𑌶𑍋𑌣𑌾𑌯𑌮𑌾𑌨𑍋𑌨𑍍𑌨𑌤𑌨𑌖𑌦𑌶𑌕𑍋𑌦𑍍𑌭𑌾𑌸𑌮𑌾𑌨𑍌 𑌸𑌮𑌾𑌨𑍌 ॥ 16 ॥

𑌯𑌨𑍍𑌨𑌾𑌦𑍋 𑌵𑍇𑌦𑌵𑌾𑌚𑌾𑌂 𑌨𑌿𑌗𑌦𑌤𑌿 𑌨𑌿𑌖𑌿𑌲𑌂 𑌲𑌕𑍍𑌷𑌣𑌂 𑌪𑌕𑍍𑌷𑌿𑌕𑍇𑌤𑍁-
-𑌰𑍍𑌲𑌕𑍍𑌷𑍍𑌮𑍀𑌸𑌂𑌭𑍋𑌗𑌸𑍌𑌖𑍍𑌯𑌂 𑌵𑌿𑌰𑌚𑌯𑌤𑌿 𑌯𑌯𑍋𑌶𑍍𑌚𑌾𑌪𑌰𑍇 𑌰𑍂𑌪𑌭𑍇𑌦𑍇 ।
𑌶𑌂𑌭𑍋𑌃 𑌸𑌂𑌭𑌾𑌵𑌨𑍀𑌯𑍇 𑌪𑌦𑌕𑌮𑌲𑌸𑌮𑌾𑌸𑌂𑌗𑌤𑌸𑍍𑌤𑍁𑌂𑌗𑌶𑍋𑌭𑍇
𑌮𑌾𑌂𑌗𑌳𑍍𑌯𑌂 𑌨𑌃 𑌸𑌮𑌗𑍍𑌰𑌂 𑌸𑌕𑌲𑌸𑍁𑌖𑌕𑌰𑍇 𑌨𑍂𑌪𑍁𑌰𑍇 𑌪𑍂𑌰𑌯𑍇𑌤𑌾𑌮𑍍 ॥ 1𑍭 ॥

𑌅𑌂𑌗𑍇 𑌶𑍃𑌂𑌗𑌾𑌰𑌯𑍋𑌨𑍇𑌃 𑌸𑌪𑌦𑌿 𑌶𑌲𑌭𑌤𑌾𑌂 𑌨𑍇𑌤𑍍𑌰𑌵𑌹𑍍𑌨𑍌 𑌪𑍍𑌰𑌯𑌾𑌤𑍇
𑌶𑌤𑍍𑌰𑍋𑌰𑍁𑌦𑍍𑌧𑍃𑌤𑍍𑌯 𑌤𑌸𑍍𑌮𑌾𑌦𑌿𑌷𑍁𑌧𑌿𑌯𑍁𑌗𑌮𑌧𑍋 𑌨𑍍𑌯𑌸𑍍𑌤𑌮𑌗𑍍𑌰𑍇 𑌕𑌿𑌮𑍇𑌤𑌤𑍍 ।
𑌶𑌂𑌕𑌾𑌮𑌿𑌤𑍍𑌥𑌂 𑌨𑌤𑌾𑌨𑌾𑌮𑌮𑌰𑌪𑌰𑌿𑌷𑌦𑌾𑌮𑌂𑌤𑌰𑌂𑌕𑍂𑌰𑌯𑌤𑍍𑌤-
-𑌤𑍍𑌸𑌂𑌘𑌾𑌤𑌂 𑌚𑌾𑌰𑍁 𑌜𑌂𑌘𑌾𑌯𑍁𑌗𑌮𑌖𑌿𑌲𑌪𑌤𑍇𑌰𑌂𑌹𑌸𑌾𑌂 𑌸𑌂𑌹𑌰𑍇𑌨𑍍𑌨𑌃 ॥ 1𑍮 ॥

𑌜𑌾𑌨𑍁𑌦𑍍𑌵𑌂𑌦𑍍𑌵𑍇𑌨 𑌮𑍀𑌨𑌧𑍍𑌵𑌜𑌨𑍃𑌵𑌰𑌸𑌮𑍁𑌦𑍍𑌰𑍋𑌪𑌮𑌾𑌨𑍇𑌨 𑌸𑌾𑌕𑌂
𑌰𑌾𑌜𑌂𑌤𑍌 𑌰𑌾𑌜𑌰𑌂𑌭𑌾𑌕𑌰𑌿𑌕𑌰𑌕𑌨𑌕𑌸𑍍𑌤𑌂𑌭𑌸𑌂𑌭𑌾𑌵𑌨𑍀𑌯𑍌 ।
𑌊𑌰𑍂 𑌗𑍌𑌰𑍀𑌕𑌰𑌾𑌂𑌭𑍋𑌰𑍁𑌹𑌸𑌰𑌸𑌸𑌮𑌾𑌮𑌰𑍍𑌦𑌨𑌾𑌨𑌂𑌦𑌭𑌾𑌜𑍌
𑌚𑌾𑌰𑍂 𑌦𑍂𑌰𑍀𑌕𑍍𑌰𑌿𑌯𑌾𑌸𑍍𑌤𑌾𑌂 𑌦𑍁𑌰𑌿𑌤𑌮𑍁𑌪𑌚𑌿𑌤𑌂 𑌜𑌨𑍍𑌮𑌜𑌨𑍍𑌮𑌾𑌂𑌤𑌰𑍇 𑌨𑌃 ॥ 1𑍯 ॥

𑌆𑌮𑍁𑌕𑍍𑌤𑌾𑌨𑌰𑍍𑌘𑌰𑌤𑍍𑌨𑌪𑍍𑌰𑌕𑌰𑌕𑌰𑌪𑌰𑌿𑌷𑍍𑌵𑌕𑍍𑌤𑌕𑌳𑍍𑌯𑌾𑌣𑌕𑌾𑌂𑌚𑍀-
-𑌦𑌾𑌮𑍍𑌨𑌾 𑌬𑌦𑍍𑌦𑍇𑌨 𑌦𑍁𑌗𑍍𑌧𑌦𑍍𑌯𑍁𑌤𑌿𑌨𑌿𑌚𑌯𑌮𑍁𑌷𑌾 𑌚𑍀𑌨𑌪𑌟𑍍𑌟𑌾𑌂𑌬𑌰𑍇𑌣 ।
𑌸𑌂𑌵𑍀𑌤𑍇 𑌶𑍈𑌲𑌕𑌨𑍍𑌯𑌾𑌸𑍁𑌚𑌰𑌿𑌤𑌪𑌰𑌿𑌪𑌾𑌕𑌾𑌯𑌮𑌾𑌣𑍇 𑌨𑌿𑌤𑌂𑌬𑍇
𑌨𑌿𑌤𑍍𑌯𑌂 𑌨𑌰𑍍𑌨𑌰𑍍𑌤𑍁 𑌚𑌿𑌤𑍍𑌤𑌂 𑌮𑌮 𑌨𑌿𑌖𑌿𑌲𑌜𑌗𑌤𑍍𑌸𑍍𑌵𑌾𑌮𑌿𑌨𑌃 𑌸𑍋𑌮𑌮𑍌𑌳𑍇𑌃 ॥ 20 ॥

𑌸𑌂𑌧𑍍𑌯𑌾𑌕𑌾𑌲𑌾𑌨𑍁𑌰𑌜𑍍𑌯𑌦𑍍𑌦𑌿𑌨𑌕𑌰𑌸𑌰𑍁𑌚𑌾 𑌕𑌾𑌲𑌧𑍌𑌤𑍇𑌨 𑌗𑌾𑌢𑌂
𑌵𑍍𑌯𑌾𑌨𑌦𑍍𑌧𑌃 𑌸𑍍𑌨𑌿𑌗𑍍𑌧𑌮𑍁𑌗𑍍𑌧𑌃 𑌸𑌰𑌸𑌮𑍁𑌦𑌰𑌬𑌂𑌧𑍇𑌨 𑌵𑍀𑌤𑍋𑌪𑌮𑍇𑌨 ।
𑌉𑌦𑍍𑌦𑍀𑌪𑍍𑌤𑍈𑌃 𑌸𑍍𑌵𑌪𑍍𑌰𑌕𑌾𑌶𑍈𑌰𑍁𑌪𑌚𑌿𑌤𑌮𑌹𑌿𑌮𑌾 𑌮𑌨𑍍𑌮𑌥𑌾𑌰𑍇𑌰𑍁𑌦𑌾𑌰𑍋
𑌮𑌧𑍍𑌯𑍋 𑌮𑌿𑌥𑍍𑌯𑌾𑌰𑍍𑌥𑌸𑌧𑍍𑌰𑍍𑌯𑌙𑍍𑌮𑌮 𑌦𑌿𑌶𑌤𑍁 𑌸𑌦𑌾 𑌸𑌂𑌗𑌤𑌿𑌂 𑌮𑌂𑌗𑌳𑌾𑌨𑌾𑌮𑍍 ॥ 21 ॥

𑌨𑌾𑌭𑍀𑌚𑌕𑍍𑌰𑌾𑌲𑌵𑌾𑌲𑌾𑌨𑍍𑌨𑌵𑌨𑌵𑌸𑍁𑌷𑌮𑌾𑌦𑍋𑌹𑌦𑌶𑍍𑌰𑍀𑌪𑌰𑍀𑌤𑌾-
-𑌦𑍁𑌦𑍍𑌗𑌚𑍍𑌛𑌂𑌤𑍀 𑌪𑍁𑌰𑌸𑍍𑌤𑌾𑌦𑍁𑌦𑌰𑌪𑌥𑌮𑌤𑌿𑌕𑍍𑌰𑌮𑍍𑌯 𑌵𑌕𑍍𑌷𑌃 𑌪𑍍𑌰𑌯𑌾𑌂𑌤𑌿 ।
𑌶𑍍𑌯𑌾𑌮𑌾 𑌕𑌾𑌮𑌾𑌗𑌮𑌾𑌰𑍍𑌥𑌪𑍍𑌰𑌕𑌥𑌨𑌲𑌿𑌪𑌿𑌵𑌦𑍍𑌭𑌾𑌸𑌤𑍇 𑌯𑌾 𑌨𑌿𑌕𑌾𑌮𑌂
𑌸𑌾 𑌮𑌾 𑌸𑍋𑌮𑌾𑌰𑍍𑌧𑌮𑍌𑌳𑍇𑌃 𑌸𑍁𑌖𑌯𑌤𑍁 𑌸𑌤𑌤𑌂 𑌰𑍋𑌮𑌵𑌲𑍍𑌲𑍀𑌮𑌤𑌲𑍍𑌲𑍀 ॥ 22 ॥

𑌆𑌶𑍍𑌲𑍇𑌷𑍇𑌷𑍍𑌵𑌦𑍍𑌰𑌿𑌜𑌾𑌯𑌾𑌃 𑌕𑌠𑌿𑌨𑌕𑍁𑌚𑌤𑌟𑍀𑌲𑌿𑌪𑍍𑌤𑌕𑌾𑌶𑍍𑌮𑍀𑌰𑌪𑌂𑌕-
-𑌵𑍍𑌯𑌾𑌸𑌂𑌗𑌾𑌦𑍁𑌦𑍍𑌯𑌦𑌰𑍍𑌕𑌦𑍍𑌯𑍁𑌤𑌿𑌭𑌿𑌰𑍁𑌪𑌚𑌿𑌤𑌸𑍍𑌪𑌰𑍍𑌧𑌮𑍁𑌦𑍍𑌦𑌾𑌮𑌹𑍃𑌦𑍍𑌯𑌮𑍍 ।
𑌦𑌕𑍍𑌷𑌾𑌰𑌾𑌤𑍇𑌰𑍁𑌦𑍂𑌢𑌪𑍍𑌰𑌤𑌿𑌨𑌵𑌮𑌣𑌿𑌮𑌾𑌲𑌾𑌵𑌲𑍀𑌭𑌾𑌸𑌮𑌾𑌨𑌂
𑌵𑌕𑍍𑌷𑍋 𑌵𑌿𑌕𑍍𑌷𑍋𑌭𑌿𑌤𑌾𑌘𑌂 𑌸𑌤𑌤𑌨𑌤𑌿𑌜𑍁𑌷𑌾𑌂 𑌰𑌕𑍍𑌷𑌤𑌾𑌦𑌕𑍍𑌷𑌤𑌂 𑌨𑌃 ॥ 23 ॥

𑌵𑌾𑌮𑌾𑌂𑌕𑍇 𑌵𑌿𑌸𑍍𑌫𑍁𑌰𑌂𑌤𑍍𑌯𑌾𑌃 𑌕𑌰𑌤𑌲𑌵𑌿𑌲𑌸𑌚𑍍𑌚𑌾𑌰𑍁𑌰𑌕𑍍𑌤𑍋𑌤𑍍𑌪𑌲𑌾𑌯𑌾𑌃
𑌕𑌾𑌂𑌤𑌾𑌯𑌾 𑌵𑌾𑌮𑌵𑌕𑍍𑌷𑍋𑌰𑍁𑌹𑌭𑌰𑌶𑌿𑌖𑌰𑍋𑌨𑍍𑌮𑌰𑍍𑌦𑌨𑌵𑍍𑌯𑌗𑍍𑌰𑌮𑍇𑌕𑌮𑍍 ।
𑌅𑌨𑍍𑌯𑌾𑌂𑌸𑍍𑌤𑍍𑌰𑍀𑌨𑌪𑍍𑌯𑍁𑌦𑌾𑌰𑌾𑌨𑍍𑌵𑌰𑌪𑌰𑌶𑍁𑌮𑍃𑌗𑌾𑌲𑌂𑌕𑍃𑌤𑌾𑌨𑌿𑌂𑌦𑍁𑌮𑍌𑌳𑍇-
-𑌰𑍍𑌬𑌾𑌹𑍂𑌨𑌾𑌬𑌦𑍍𑌧𑌹𑍇𑌮𑌾𑌂𑌗𑌦𑌮𑌣𑌿𑌕𑌟𑌕𑌾𑌨𑌂𑌤𑌰𑌾𑌲𑍋𑌕𑌯𑌾𑌮𑌃 ॥ 24 ॥

𑌸𑌂𑌭𑍍𑌰𑌾𑌂𑌤𑌾𑌯𑌾𑌃 𑌶𑌿𑌵𑌾𑌯𑌾𑌃 𑌪𑌤𑌿𑌵𑌿𑌲𑌯𑌭𑌿𑌯𑌾 𑌸𑌰𑍍𑌵𑌲𑍋𑌕𑍋𑌪𑌤𑌾𑌪𑌾-
-𑌤𑍍𑌸𑌂𑌵𑌿𑌗𑍍𑌨𑌸𑍍𑌯𑌾𑌪𑌿 𑌵𑌿𑌷𑍍𑌣𑍋𑌃 𑌸𑌰𑌭𑌸𑌮𑍁𑌭𑌯𑍋𑌰𑍍𑌵𑌾𑌰𑌣𑌪𑍍𑌰𑍇𑌰𑌣𑌾𑌭𑍍𑌯𑌾𑌮𑍍 ।
𑌮𑌧𑍍𑌯𑍇 𑌤𑍍𑌰𑍈𑌶𑌂𑌕𑌵𑍀𑌯𑌾𑌮𑌨𑍁𑌭𑌵𑌤𑌿 𑌦𑌶𑌾𑌂 𑌯𑌤𑍍𑌰 𑌹𑌾𑌲𑌾𑌹𑌲𑍋𑌷𑍍𑌮𑌾
𑌸𑍋𑌽𑌯𑌂 𑌸𑌰𑍍𑌵𑌾𑌪𑌦𑌾𑌂 𑌨𑌃 𑌶𑌮𑌯𑌤𑍁 𑌨𑌿𑌚𑌯𑌂 𑌨𑍀𑌲𑌕𑌂𑌠𑌸𑍍𑌯 𑌕𑌂𑌠𑌃 ॥ 25 ॥

𑌹𑍃𑌦𑍍𑌯𑍈𑌰𑌦𑍍𑌰𑍀𑌂𑌦𑍍𑌰𑌕𑌨𑍍𑌯𑌾𑌮𑍃𑌦𑍁𑌦𑌶𑌨𑌪𑌦𑍈𑌰𑍍𑌮𑍁𑌦𑍍𑌰𑌿𑌤𑍋 𑌵𑌿𑌦𑍍𑌰𑍁𑌮𑌶𑍍𑌰𑍀-
-𑌰𑍁𑌦𑍍𑌦𑍍𑌯𑍋𑌤𑌂𑌤𑍍𑌯𑌾 𑌨𑌿𑌤𑌾𑌂𑌤𑌂 𑌧𑌵𑌲𑌧𑌵𑌲𑌯𑌾 𑌮𑌿𑌶𑍍𑌰𑌿𑌤𑍋 𑌦𑌂𑌤𑌕𑌾𑌂𑌤𑍍𑌯𑌾 ।
𑌮𑍁𑌕𑍍𑌤𑌾𑌮𑌾𑌣𑌿𑌕𑍍𑌯𑌜𑌾𑌲𑌵𑍍𑌯𑌤𑌿𑌕𑌰𑌸𑌦𑍃𑌶𑌾 𑌤𑍇𑌜𑌸𑌾 𑌭𑌾𑌸𑌮𑌾𑌨𑌃
𑌸𑌦𑍍𑌯𑍋𑌜𑌾𑌤𑌸𑍍𑌯 𑌦𑌦𑍍𑌯𑌾𑌦𑌧𑌰𑌮𑌣𑌿𑌰𑌸𑍌 𑌸𑌂𑌪𑌦𑌾𑌂 𑌸𑌂𑌚𑌯𑌂 𑌨𑌃 ॥ 26 ॥

𑌕𑌰𑍍𑌣𑌾𑌲𑌂𑌕𑌾𑌰𑌨𑌾𑌨𑌾𑌮𑌣𑌿𑌨𑌿𑌕𑌰𑌰𑍁𑌚𑌾𑌂 𑌸𑌂𑌚𑌯𑍈𑌰𑌂𑌚𑌿𑌤𑌾𑌯𑌾𑌂
𑌵𑌰𑍍𑌣𑍍𑌯𑌾𑌯𑌾𑌂 𑌸𑍍𑌵𑌰𑍍𑌣𑌪𑌦𑍍𑌮𑍋𑌦𑌰𑌪𑌰𑌿𑌵𑌿𑌲𑌸𑌤𑍍𑌕𑌰𑍍𑌣𑌿𑌕𑌾𑌸𑌂𑌨𑌿𑌭𑌾𑌯𑌾𑌮𑍍 ।
𑌪𑌦𑍍𑌧𑌤𑍍𑌯𑌾𑌂 𑌪𑍍𑌰𑌾𑌣𑌵𑌾𑌯𑍋𑌃 𑌪𑍍𑌰𑌣𑌤𑌜𑌨𑌹𑍃𑌦𑌂𑌭𑍋𑌜𑌵𑌾𑌸𑌸𑍍𑌯 𑌶𑌂𑌭𑍋-
-𑌰𑍍𑌨𑌿𑌤𑍍𑌯𑌂 𑌨𑌶𑍍𑌚𑌿𑌤𑍍𑌤𑌮𑍇𑌤𑌦𑍍𑌵𑌿𑌰𑌚𑌯𑌤𑍁 𑌸𑍁𑌖𑍇𑌨𑌾𑌸𑌿𑌕𑌾𑌂 𑌨𑌾𑌸𑌿𑌕𑌾𑌯𑌾𑌮𑍍 ॥ 2𑍭 ॥

𑌅𑌤𑍍𑌯𑌂𑌤𑌂 𑌭𑌾𑌸𑌮𑌾𑌨𑍇 𑌰𑍁𑌚𑌿𑌰𑌤𑌰𑌰𑍁𑌚𑌾𑌂 𑌸𑌂𑌗𑌮𑌾𑌤𑍍𑌸𑌨𑍍𑌮𑌣𑍀𑌨𑌾-
-𑌮𑍁𑌦𑍍𑌯𑌚𑍍𑌚𑌂𑌡𑌾𑌂𑌶𑍁𑌧𑌾𑌮𑌪𑍍𑌰𑌸𑌰𑌨𑌿𑌰𑌸𑌨𑌸𑍍𑌪𑌷𑍍𑌟𑌦𑍃𑌷𑍍𑌟𑌾𑌪𑌦𑌾𑌨𑍇 ।
𑌭𑍂𑌯𑌾𑌸𑍍𑌤𑌾𑌂 𑌭𑍂𑌤𑌯𑍇 𑌨𑌃 𑌕𑌰𑌿𑌵𑌰𑌜𑌯𑌿𑌨𑌃 𑌕𑌰𑍍𑌣𑌪𑌾𑌶𑌾𑌵𑌲𑌂𑌬𑍇
𑌭𑌕𑍍𑌤𑌾𑌲𑍀𑌭𑌾𑌲𑌸𑌜𑍍𑌜𑌜𑍍𑌜𑌨𑌿𑌮𑌰𑌣𑌲𑌿𑌪𑍇𑌃 𑌕𑍁𑌂𑌡𑌲𑍇 𑌕𑍁𑌂𑌡𑌲𑍇 𑌤𑍇 ॥ 2𑍮 ॥

𑌯𑌾𑌭𑍍𑌯𑌾𑌂 𑌕𑌾𑌲𑌵𑍍𑌯𑌵𑌸𑍍𑌥𑌾 𑌭𑌵𑌤𑌿 𑌤𑌨𑍁𑌮𑌤𑌾𑌂 𑌯𑍋 𑌮𑍁𑌖𑌂 𑌦𑍇𑌵𑌤𑌾𑌨𑌾𑌂
𑌯𑍇𑌷𑌾𑌮𑌾𑌹𑍁𑌃 𑌸𑍍𑌵𑌰𑍂𑌪𑌂 𑌜𑌗𑌤𑌿 𑌮𑍁𑌨𑌿𑌵𑌰𑌾 𑌦𑍇𑌵𑌤𑌾𑌨𑌾𑌂 𑌤𑍍𑌰𑌯𑍀𑌂 𑌤𑌾𑌮𑍍 ।
𑌰𑍁𑌦𑍍𑌰𑌾𑌣𑍀𑌵𑌕𑍍𑌤𑍍𑌰𑌪𑌂𑌕𑍇𑌰𑍁𑌹𑌸𑌤𑌤𑌵𑌿𑌹𑌾𑌰𑍋𑌤𑍍𑌸𑍁𑌕𑍇𑌂𑌦𑌿𑌂𑌦𑌿𑌰𑍇𑌭𑍍𑌯-
-𑌸𑍍𑌤𑍇𑌭𑍍𑌯𑌸𑍍𑌤𑍍𑌰𑌿𑌭𑍍𑌯𑌃 𑌪𑍍𑌰𑌣𑌾𑌮𑌾𑌂𑌜𑌲𑌿𑌮𑍁𑌪𑌰𑌚𑌯𑍇 𑌤𑍍𑌰𑍀𑌕𑍍𑌷𑌣𑌸𑍍𑌯𑍇𑌕𑍍𑌷𑌣𑍇𑌭𑍍𑌯𑌃 ॥ 2𑍯 ॥

𑌵𑌾𑌮𑌂 𑌵𑌾𑌮𑌾𑌂𑌕𑌗𑌾𑌯𑌾 𑌵𑌦𑌨𑌸𑌰𑌸𑌿𑌜𑍇 𑌵𑍍𑌯𑌾𑌵𑌲𑌦𑍍𑌵𑌲𑍍𑌲𑌭𑌾𑌯𑌾
𑌵𑍍𑌯𑌾𑌨𑌮𑍍𑌰𑍇𑌷𑍍𑌵𑌨𑍍𑌯𑌦𑌨𑍍𑌯𑌤𑍍𑌪𑍁𑌨𑌰𑌲𑌿𑌕𑌭𑌵𑌂 𑌵𑍀𑌤𑌨𑌿𑌃𑌶𑍇𑌷𑌰𑍌𑌕𑍍𑌷𑍍𑌯𑌮𑍍 ।
𑌭𑍂𑌯𑍋 𑌭𑍂𑌯𑍋𑌪𑌿 𑌮𑍋𑌦𑌾𑌨𑍍𑌨𑌿𑌪𑌤𑌦𑌤𑌿𑌦𑌯𑌾𑌶𑍀𑌤𑌲𑌂 𑌚𑍂𑌤𑌬𑌾𑌣𑍇
𑌦𑌕𑍍𑌷𑌾𑌰𑍇𑌰𑍀𑌕𑍍𑌷𑌣𑌾𑌨𑌾𑌂 𑌤𑍍𑌰𑌯𑌮𑌪𑌹𑌰𑌤𑌾𑌦𑌾𑌶𑍁 𑌤𑌾𑌪𑌤𑍍𑌰𑌯𑌂 𑌨𑌃 ॥ 30 ॥

𑌯𑌸𑍍𑌮𑌿𑌨𑍍𑌨𑌰𑍍𑌧𑍇𑌂𑌦𑍁𑌮𑍁𑌗𑍍𑌧𑌦𑍍𑌯𑍁𑌤𑌿𑌨𑌿𑌚𑌯𑌤𑌿𑌰𑌸𑍍𑌕𑌾𑌰𑌨𑌿𑌸𑍍𑌤𑌂𑌦𑍍𑌰𑌕𑌾𑌂𑌤𑍌
𑌕𑌾𑌶𑍍𑌮𑍀𑌰𑌕𑍍𑌷𑍋𑌦𑌸𑌂𑌕𑌲𑍍𑌪𑌤𑌮𑌿𑌵 𑌰𑍁𑌚𑌿𑌰𑌂 𑌚𑌿𑌤𑍍𑌰𑌕𑌂 𑌭𑌾𑌤𑌿 𑌨𑍇𑌤𑍍𑌰𑌮𑍍 ।
𑌤𑌸𑍍𑌮𑌿𑌨𑍍𑌨𑍁𑌲𑍍𑌲𑍀𑌲𑌚𑌿𑌲𑍍𑌲𑍀𑌨𑌟𑌵𑌰𑌤𑌰𑍁𑌣𑍀𑌲𑌾𑌸𑍍𑌯𑌰𑌂𑌗𑌾𑌯𑌮𑌾𑌣𑍇
𑌕𑌾𑌲𑌾𑌰𑍇𑌃 𑌫𑌾𑌲𑌦𑍇𑌶𑍇 𑌵𑌿𑌹𑌰𑌤𑍁 𑌹𑍃𑌦𑌯𑌂 𑌵𑍀𑌤𑌚𑌿𑌂𑌤𑌾𑌂𑌤𑌰𑌂 𑌨𑌃 ॥ 31 ॥

𑌸𑍍𑌵𑌾𑌮𑌿𑌨𑍍𑌗𑌂𑌗𑌾𑌮𑌿𑌵𑌾𑌂𑌗𑍀𑌕𑍁𑌰𑍁 𑌤𑌵 𑌶𑌿𑌰𑌸𑌾 𑌮𑌾𑌮𑌪𑍀𑌤𑍍𑌯𑌰𑍍𑌥𑌯𑌂𑌤𑍀𑌂
𑌧𑌨𑍍𑌯𑌾𑌂 𑌕𑌨𑍍𑌯𑌾𑌂 𑌖𑌰𑌾𑌂𑌶𑍋𑌃 𑌶𑌿𑌰𑌸𑌿 𑌵𑌹𑌤𑌿 𑌕𑌿𑌂 𑌨𑍍𑌵𑍇𑌷 𑌕𑌾𑌰𑍁𑌣𑍍𑌯𑌶𑌾𑌲𑍀 ।
𑌇𑌤𑍍𑌥𑌂 𑌶𑌂𑌕𑌾𑌂 𑌜𑌨𑌾𑌨𑌾𑌂 𑌜𑌨𑌯𑌦𑌤𑌿𑌘𑌨𑌂 𑌕𑍈𑌶𑌿𑌕𑌂 𑌕𑌾𑌲𑌮𑍇𑌘-
-𑌚𑍍𑌛𑌾𑌯𑌂 𑌭𑍂𑌯𑌾𑌦𑍁𑌦𑌾𑌰𑌂 𑌤𑍍𑌰𑌿𑌪𑍁𑌰𑌵𑌿𑌜𑌯𑌿𑌨𑌃 𑌶𑍍𑌰𑍇𑌯𑌸𑍇 𑌭𑍂𑌯𑌸𑍇 𑌨𑌃 ॥ 32 ॥

𑌶𑍃𑌂𑌗𑌾𑌰𑌾𑌕𑌲𑍍𑌪𑌯𑍋𑌗𑍍𑌯𑍈𑌃 𑌶𑌿𑌖𑌰𑌿𑌵𑌰𑌸𑍁𑌤𑌾𑌸𑌤𑍍𑌸𑌖𑍀𑌹𑌸𑍍𑌤𑌲𑍂𑌨𑍈𑌃
𑌸𑍂𑌨𑍈𑌰𑌾𑌬𑌦𑍍𑌧𑌮𑌾𑌲𑌾𑌵𑌲𑌿𑌪𑌰𑌿𑌵𑌿𑌲𑌸𑌤𑍍𑌸𑍌𑌰𑌭𑌾𑌕𑍃𑌷𑍍𑌟𑌭𑍃𑌂𑌗𑌮𑍍 ।
𑌤𑍁𑌂𑌗𑌂 𑌮𑌾𑌣𑌿𑌕𑍍𑌯𑌕𑌾𑌂𑌤𑍍𑌯𑌾 𑌪𑌰𑌿𑌹𑌸𑌿𑌤𑌸𑍁𑌰𑌾𑌵𑌾𑌸𑌶𑍈𑌲𑍇𑌂𑌦𑍍𑌰𑌶𑍃𑌂𑌗𑌂
𑌸𑌂𑌘𑌂 𑌨𑌃 𑌸𑌂𑌕𑌟𑌾𑌨𑌾𑌂 𑌵𑌿𑌘𑌟𑌯𑌤𑍁 𑌸𑌦𑌾 𑌕𑌾𑌂𑌕𑌟𑍀𑌕𑌂 𑌕𑌿𑌰𑍀𑌟𑌮𑍍 ॥ 33 ॥

𑌵𑌕𑍍𑌰𑌾𑌕𑌾𑌰𑌃 𑌕𑌲𑌂𑌕𑍀 𑌜𑌡𑌤𑌨𑍁𑌰𑌹𑌮𑌪𑍍𑌯𑌂𑌘𑍍𑌰𑌿𑌸𑍇𑌵𑌾𑌨𑍁𑌭𑌾𑌵𑌾-
-𑌦𑍁𑌤𑍍𑌤𑌂𑌸𑌤𑍍𑌵𑌂 𑌪𑍍𑌰𑌯𑌾𑌤𑌃 𑌸𑍁𑌲𑌭𑌤𑌰𑌘𑍃𑌣𑌾𑌸𑍍𑌯𑌂𑌦𑌿𑌨𑌶𑍍𑌚𑌂𑌦𑍍𑌰𑌮𑍌𑌳𑍇𑌃 ।
𑌤𑌤𑍍𑌸𑍇𑌵𑌂𑌤𑌾𑌂 𑌜𑌨𑍌𑌘𑌾𑌃 𑌶𑌿𑌵𑌮𑌿𑌤𑌿 𑌨𑌿𑌜𑌯𑌾𑌵𑌸𑍍𑌥𑌯𑍈𑌵 𑌬𑍍𑌰𑍁𑌵𑌾𑌣𑌂
𑌵𑌂𑌦𑍇 𑌦𑍇𑌵𑌸𑍍𑌯 𑌶𑌂𑌭𑍋𑌰𑍍𑌮𑍁𑌕𑍁𑌟𑌸𑍁𑌘𑌟𑌿𑌤𑌂 𑌮𑍁𑌗𑍍𑌧𑌪𑍀𑌯𑍂𑌷𑌭𑌾𑌨𑍁𑌮𑍍 ॥ 34 ॥

𑌕𑌾𑌂𑌤𑍍𑌯𑌾 𑌸𑌂𑌫𑍁𑌲𑍍𑌲𑌮𑌲𑍍𑌲𑍀𑌕𑍁𑌸𑍁𑌮𑌧𑌵𑌳𑌯𑌾 𑌵𑍍𑌯𑌾𑌪𑍍𑌯 𑌵𑌿𑌶𑍍𑌵𑌂 𑌵𑌿𑌰𑌾𑌜-
-𑌨𑍍𑌵𑍃𑌤𑍍𑌤𑌾𑌕𑌾𑌰𑍋 𑌵𑌿𑌤𑌨𑍍𑌵𑌨𑍍𑌮𑍁𑌹𑍁𑌰𑌪𑌿 𑌚 𑌪𑌰𑌾𑌂 𑌨𑌿𑌰𑍍𑌵𑍃𑌤𑌿𑌂 𑌪𑌾𑌦𑌭𑌾𑌜𑌾𑌮𑍍 ।
𑌸𑌾𑌨𑌂𑌦𑌂 𑌨𑌂𑌦𑌿𑌦𑍋𑌷𑍍𑌣𑌾 𑌮𑌣𑌿𑌕𑌟𑌕𑌵𑌤𑌾 𑌵𑌾𑌹𑍍𑌯𑌮𑌾𑌨𑌃 𑌪𑍁𑌰𑌾𑌰𑍇𑌃
𑌶𑍍𑌵𑍇𑌤𑌚𑍍𑌛𑌤𑍍𑌰𑌾𑌖𑍍𑌯𑌶𑍀𑌤𑌦𑍍𑌯𑍁𑌤𑌿𑌰𑌪𑌹𑌰𑌤𑌾𑌦𑌾𑌪𑌦𑌸𑍍𑌤𑌾𑌪𑌦𑌾 𑌨𑌃 ॥ 35 ॥

𑌦𑌿𑌵𑍍𑌯𑌾𑌕𑌲𑍍𑌪𑍋𑌜𑍍𑌜𑍍𑌵𑌲𑌾𑌨𑌾𑌂 𑌶𑌿𑌵𑌗𑌿𑌰𑌿𑌸𑍁𑌤𑌯𑍋𑌃 𑌪𑌾𑌰𑍍𑌶𑍍𑌵𑌯𑍋𑌰𑌾𑌶𑍍𑌰𑌿𑌤𑌾𑌨𑌾𑌂
𑌰𑍁𑌦𑍍𑌰𑌾𑌣𑍀𑌸𑌤𑍍𑌸𑌖𑍀𑌨𑌾𑌂 𑌮𑌦𑌤𑌰𑌲𑌕𑌟𑌾𑌕𑍍𑌷𑌾𑌂𑌚𑌲𑍈𑌰𑌂𑌚𑌿𑌤𑌾𑌨𑌾𑌮𑍍 ।
𑌉𑌦𑍍𑌵𑍇𑌲𑍍𑌲𑌦𑍍𑌬𑌾𑌹𑍁𑌵𑌲𑍍𑌲𑍀𑌵𑌿𑌲𑌸𑌨𑌸𑌮𑌯𑍇 𑌚𑌾𑌮𑌰𑌾𑌂𑌦𑍋𑌲𑌨𑍀𑌨𑌾-
-𑌮𑍁𑌦𑍍𑌭𑍂𑌤𑌃 𑌕𑌂𑌕𑌣𑌾𑌲𑍀𑌵𑌲𑌯𑌕𑌲𑌕𑌲𑍋 𑌵𑌾𑌰𑌯𑍇𑌦𑌾𑌪𑌦𑍋 𑌨𑌃 ॥ 36 ॥

𑌸𑍍𑌵𑌰𑍍𑌗𑍌𑌕𑌃𑌸𑍁𑌂𑌦𑌰𑍀𑌣𑌾𑌂 𑌸𑍁𑌲𑌲𑌿𑌤𑌵𑌪𑍁𑌷𑌾𑌂 𑌸𑍍𑌵𑌾𑌮𑌿𑌸𑍇𑌵𑌾𑌪𑌰𑌾𑌣𑌾𑌂
𑌵𑌲𑍍𑌗𑌦𑍍𑌭𑍂𑌷𑌾𑌣𑌿 𑌵𑌕𑍍𑌰𑌾𑌂𑌬𑍁𑌜𑌪𑌰𑌿𑌵𑌿𑌗𑌲𑌨𑍍𑌮𑍁𑌗𑍍𑌧𑌗𑍀𑌤𑌾𑌮𑍃𑌤𑌾𑌨𑌿 ।
𑌨𑌿𑌤𑍍𑌯𑌂 𑌨𑍃𑌤𑍍𑌤𑌾𑌨𑍍𑌯𑍁𑌪𑌾𑌸𑍇 𑌭𑍁𑌜𑌵𑌿𑌧𑍁𑌤𑌿𑌪𑌦𑌨𑍍𑌯𑌾𑌸𑌭𑌾𑌵𑌾𑌵𑌲𑍋𑌕-
-𑌪𑍍𑌰𑌤𑍍𑌯𑍁𑌦𑍍𑌯𑌤𑍍𑌪𑍍𑌰𑍀𑌤𑌿𑌮𑌾𑌦𑍍𑌯𑌤𑍍𑌪𑍍𑌰𑌮𑌥𑌨𑌟𑌨𑌟𑍀𑌦𑌤𑍍𑌤𑌸𑌂𑌭𑌾𑌵𑌨𑌾𑌨𑌿 ॥ 3𑍭 ॥

𑌸𑍍𑌥𑌾𑌨𑌪𑍍𑌰𑌾𑌪𑍍𑌤𑍍𑌯𑌾 𑌸𑍍𑌵𑌰𑌾𑌣𑌾𑌂 𑌕𑌿𑌮𑌪𑌿 𑌵𑌿𑌶𑌦𑌤𑌾𑌂 𑌵𑍍𑌯𑌂𑌜𑌯𑌨𑍍𑌮𑌂𑌜𑍁𑌵𑍀𑌣𑌾-
-𑌸𑍍𑌵𑌾𑌨𑌾𑌵𑌚𑍍𑌛𑌿𑌨𑍍𑌨𑌤𑌾𑌲𑌕𑍍𑌰𑌮𑌮𑌮𑍃𑌤𑌮𑌿𑌵𑌾𑌸𑍍𑌵𑌾𑌦𑍍𑌯𑌮𑌾𑌨𑌂 𑌶𑌿𑌵𑌾𑌭𑍍𑌯𑌾𑌮𑍍 ।
𑌨𑌾𑌨𑌾𑌰𑌾𑌗𑌾𑌤𑌿𑌹𑍃𑌦𑍍𑌯𑌂 𑌨𑌵𑌰𑌸𑌮𑌧𑍁𑌰𑌸𑍍𑌤𑍋𑌤𑍍𑌰𑌜𑌾𑌤𑌾𑌨𑍁𑌵𑌿𑌦𑍍𑌧𑌂
𑌗𑌾𑌨𑌂 𑌵𑍀𑌣𑌾𑌮𑌹𑌰𑍍𑌷𑍇𑌃 𑌕𑌲𑌮𑌤𑌿𑌲𑌲𑌿𑌤𑌂 𑌕𑌰𑍍𑌣𑌪𑍂𑌰𑌯𑌤𑌾𑌂 𑌨𑌃 ॥ 3𑍮 ॥

𑌚𑍇𑌤𑍋 𑌜𑌾𑌤𑌪𑍍𑌰𑌮𑍋𑌦𑌂 𑌸𑌪𑌦𑌿 𑌵𑌿𑌦𑌧𑌤𑍀 𑌪𑍍𑌰𑌾𑌣𑌿𑌨𑌾𑌂 𑌵𑌾𑌣𑌿𑌨𑍀𑌨𑌾𑌂
𑌪𑌾𑌣𑌿𑌦𑍍𑌵𑌂𑌦𑍍𑌵𑌾𑌗𑍍𑌰𑌜𑌾𑌗𑍍𑌰𑌤𑍍𑌸𑍁𑌲𑌲𑌿𑌤𑌰𑌣𑌿𑌤𑌸𑍍𑌵𑌰𑍍𑌣𑌤𑌾𑌲𑌾𑌨𑍁𑌕𑍂𑌲𑌾 ।
𑌸𑍍𑌵𑍀𑌯𑌾𑌰𑌾𑌵𑍇𑌣 𑌪𑌾𑌥𑍋𑌧𑌰𑌰𑌵𑌪𑌟𑍁𑌨𑌾 𑌨𑌾𑌦𑌯𑌂𑌤𑍀 𑌮𑌯𑍂𑌰𑍀𑌂
𑌮𑌾𑌯𑍂𑌰𑍀 𑌮𑌂𑌦𑌭𑌾𑌵𑌂 𑌮𑌣𑌿𑌮𑍁𑌰𑌜𑌭𑌵𑌾 𑌮𑌾𑌰𑍍𑌜𑌨𑌾 𑌮𑌾𑌰𑍍𑌜𑌯𑍇𑌨𑍍𑌨𑌃 ॥ 3𑍯 ॥

𑌦𑍇𑌵𑍇𑌭𑍍𑌯𑍋 𑌦𑌾𑌨𑌵𑍇𑌭𑍍𑌯𑌃 𑌪𑌿𑌤𑍃𑌮𑍁𑌨𑌿𑌪𑌰𑌿𑌷𑌤𑍍𑌸𑌿𑌦𑍍𑌧𑌵𑌿𑌦𑍍𑌯𑌾𑌧𑌰𑍇𑌭𑍍𑌯𑌃
𑌸𑌾𑌧𑍍𑌯𑍇𑌭𑍍𑌯𑌶𑍍𑌚𑌾𑌰𑌣𑍇𑌭𑍍𑌯𑍋 𑌮𑌨𑍁𑌜𑌪𑌶𑍁𑌪𑌤𑌜𑍍𑌜𑌾𑌤𑌿𑌕𑍀𑌟𑌾𑌦𑌿𑌕𑍇𑌭𑍍𑌯𑌃 ।
𑌶𑍍𑌰𑍀𑌕𑍈𑌲𑌾𑌸𑌪𑍍𑌰𑌰𑍂𑌢𑌾𑌸𑍍𑌤𑍃𑌣𑌵𑌿𑌟𑌪𑌿𑌮𑍁𑌖𑌾𑌶𑍍𑌚𑌾𑌪𑌿 𑌯𑍇 𑌸𑌂𑌤𑌿 𑌤𑍇𑌭𑍍𑌯𑌃
𑌸𑌰𑍍𑌵𑍇𑌭𑍍𑌯𑍋 𑌨𑌿𑌰𑍍𑌵𑌿𑌚𑌾𑌰𑌂 𑌨𑌤𑌿𑌮𑍁𑌪𑌰𑌚𑌯𑍇 𑌶𑌰𑍍𑌵𑌪𑌾𑌦𑌾𑌶𑍍𑌰𑌯𑍇𑌭𑍍𑌯𑌃 ॥ 40 ॥

𑌧𑍍𑌯𑌾𑌯𑌨𑍍𑌨𑌿𑌤𑍍𑌥𑌂 𑌪𑍍𑌰𑌭𑌾𑌤𑍇 𑌪𑍍𑌰𑌤𑌿𑌦𑌿𑌵𑌸𑌮𑌿𑌦𑌂 𑌸𑍍𑌤𑍋𑌤𑍍𑌰𑌰𑌤𑍍𑌨𑌂 𑌪𑌠𑍇𑌦𑍍𑌯𑌃
𑌕𑌿𑌂 𑌵𑌾 𑌬𑍍𑌰𑍂𑌮𑌸𑍍𑌤𑌦𑍀𑌯𑌂 𑌸𑍁𑌚𑌰𑌿𑌤𑌮𑌥𑌵𑌾 𑌕𑍀𑌰𑍍𑌤𑌯𑌾𑌮𑌃 𑌸𑌮𑌾𑌸𑌾𑌤𑍍 ।
𑌸𑌂𑌪𑌜𑍍𑌜𑌾𑌤𑌂 𑌸𑌮𑌗𑍍𑌰𑌂 𑌸𑌦𑌸𑌿 𑌬𑌹𑍁𑌮𑌤𑌿𑌂 𑌸𑌰𑍍𑌵𑌲𑍋𑌕𑌪𑍍𑌰𑌿𑌯𑌤𑍍𑌵𑌂
𑌸𑌂𑌪𑍍𑌰𑌾𑌪𑍍𑌯𑌾𑌯𑍁𑌃𑌶𑌤𑌾𑌂𑌤𑍇 𑌪𑌦𑌮𑌯𑌤𑌿 𑌪𑌰𑌬𑍍𑌰𑌹𑍍𑌮𑌣𑍋 𑌮𑌨𑍍𑌮𑌥𑌾𑌰𑍇𑌃 ॥ 41 ॥

𑌇𑌤𑌿 𑌶𑍍𑌰𑍀𑌮𑌤𑍍𑌪𑌰𑌮𑌹𑌂𑌸𑌪𑌰𑌿𑌵𑍍𑌰𑌾𑌜𑌕𑌾𑌚𑌾𑌰𑍍𑌯𑌸𑍍𑌯 𑌶𑍍𑌰𑍀𑌗𑍋𑌵𑌿𑌂𑌦𑌭𑌗𑌵𑌤𑍍𑌪𑍂𑌜𑍍𑌯𑌪𑌾𑌦𑌶𑌿𑌷𑍍𑌯𑌸𑍍𑌯 𑌶𑍍𑌰𑍀𑌮𑌚𑍍𑌛𑌂𑌕𑌰𑌭𑌗𑌵𑌤𑌃 𑌕𑍃𑌤𑍌 𑌶𑍍𑌰𑍀 𑌶𑌿𑌵 𑌪𑌾𑌦𑌾𑌦𑌿𑌕𑍇𑌶𑌾𑌂𑌤𑌵𑌰𑍍𑌣𑌨 𑌸𑍍𑌤𑍋𑌤𑍍𑌰𑌮𑍍 ॥