Sri Dakshina Murthy Kavacham (Rudrayamala)

pārvatyuvācha
namastē’stu trayīnātha paramānandakāraka ।
kavachaṃ dakṣiṇāmūrtēḥ kṛpayā vada mē prabhō ॥ 1 ॥

īśvara uvācha
vakṣyē’haṃ dēvadēvēśi dakṣiṇāmūrtiravyayam ।
kavachaṃ sarvapāpaghnaṃ vēdāntajñānagōcharam ॥ 2 ॥

aṇimādi mahāsiddhividhānachaturaṃ śubham ।
vēdaśāstrapurāṇāni kavitā tarka ēva cha ॥ 3 ॥

bahudhā dēvi jāyantē kavachasya prabhāvataḥ ।
ṛṣirbrahmā samuddiṣṭaśChandō’nuṣṭubudāhṛtam ॥ 4 ॥

dēvatā dakṣiṇāmūrtiḥ paramātmā sadāśivaḥ ।
bījaṃ vēdādikaṃ chaiva svāhā śaktirudāhṛtā ।
sarvajñatvē’pi dēvēśi viniyōgaṃ prachakṣatē ॥ 5 ॥

dhyānam
advandvanētramamalēndukaḻāvataṃsaṃ
haṃsāvalambita samāna jaṭākalāpam ।
ānīlakaṇṭhamupakaṇṭhamunipravīrān
adhyāpayantamavalōkaya lōkanātham ॥

kavacham
ōm । śirō mē dakṣiṇāmūrtiravyāt phālaṃ mahēśvaraḥ ।
dṛśau pātu mahādēvaḥ śravaṇē chandraśēkharaḥ ॥ 1 ॥

kapōlau pātu mē rudrō nāsāṃ pātu jagadguruḥ ।
mukhaṃ gaurīpatiḥ pātu rasanāṃ vēdarūpadhṛt ॥ 2 ॥

daśanāṃ tripuradhvaṃsī chōṣṭhaṃ pannagabhūṣaṇaḥ ।
adharaṃ pātu viśvātmā hanū pātu jaganmayaḥ ॥ 3 ॥

chubukaṃ dēvadēvastu pātu kaṇṭhaṃ jaṭādharaḥ ।
skandhau mē pātu śuddhātmā karau pātu yamāntakaḥ ॥ 4 ॥

kuchāgraṃ karamadhyaṃ cha nakharān śaṅkaraḥ svayam ।
hṛnmē paśupatiḥ pātu pārśvē paramapūruṣaḥ ॥ 5 ॥

madhyamaṃ pātu śarvō mē nābhiṃ nārāyaṇapriyaḥ ।
kaṭiṃ pātu jagadbhartā sakthinī cha mṛḍaḥ svayam ॥ 6 ॥

kṛttivāsāḥ svayaṃ guhyāmūrū pātu pinākadhṛt ।
jānunī tryambakaḥ pātu jaṅghē pātu sadāśivaḥ ॥ 7 ॥

smarāriḥ pātu mē pādau pātu sarvāṅgamīśvaraḥ ।
itīdaṃ kavachaṃ dēvi paramānandadāyakam ॥ 8 ॥

jñānavāgarthadaṃ vīryamaṇimādivibhūtidam ।
āyurārōgyamaiśvaryamapamṛtyubhayāpaham ॥ 9 ॥

prātaḥ kālē śuchirbhūtvā trivāraṃ sarvadā japēt ।
nityaṃ pūjāsamāyuktaḥ saṃvatsaramatandritaḥ ॥ 10 ॥

japēt trisandhyaṃ yō vidvān vēdaśāstrārthapāragaḥ ।
gadyapadyaistathā chāpi nāṭakāḥ svayamēva hi ।
nirgachChanti mukhāmbhōjātsatyamētanna saṃśayaḥ ॥ 11 ॥

iti rudrayāmalē umāmahēśvarasaṃvādē śrī dakṣiṇāmūrti kavacham ॥