Shiva Sankalpa Upanishad (Shiva Sankalpamastu)

yēnēdaṃ bhūtaṃ bhuvanaṃ bhaviṣyat parigṛhītamamṛtēna sarvam ।
yēna yajñastāyatē saptahōtā tanmē manaḥ śivasaṅkalpamastu ॥ 1॥

yēna karmāṇi pracharanti dhīrā yatō vāchā manasā chāru yanti ।
yatsammitamanu saṃyanti prāṇinastanmē manaḥ śivasaṅkalpamastu ॥ 2॥

yēna karmāṇyapasō manīṣiṇō yajñē kṛṇvanti vidathēṣu dhīrāḥ ।
yadapūrvaṃ yakṣamantaḥ prajānāṃ tanmē manaḥ śivasaṅkalpamastu ॥ 3॥

yatprajñānamuta chētō dhṛtiścha yajjyōtirantaramṛtaṃ prajāsu ।
yasmānna ṛtē kiñchana karma kriyatē tanmē manaḥ śivasaṅkalpamastu ॥ 4॥

suṣārathiraśvāniva yanmanuṣyānnēnīyatē’bhīśubhirvājina iva ।
hṛtpratiṣṭhaṃ yadajiraṃ javiṣṭhaṃ tanmē manaḥ śivasaṅkalpamastu ॥ 5॥

yasminnṛchaḥ sāma yajūṣi yasmin pratiṣṭhitā rathanābhāvivārāḥ ।
yasmiṃśchittaṃ sarvamōtaṃ prajānāṃ tanmē manaḥ śivasaṅkalpamastu ॥ 6॥

yadatra ṣaṣṭhaṃ triśataṃ suvīraṃ yajñasya guhyaṃ navanāvamāyyaṃ (?) ।
daśa pañcha triṃśataṃ yatparaṃ cha tanmē manaḥ śivasaṅkalpamastu ॥ 7॥

yajjāgratō dūramudaiti daivaṃ tadu suptasya tathaivaiti ।
dūraṅgamaṃ jyōtiṣāṃ jyōtirēkaṃ tanmē manaḥ śivasaṅkalpamastu ॥ 8॥

yēna dyauḥ pṛthivī chāntarikṣaṃ cha yē parvatāḥ pradiśō diśaścha ।
yēnēdaṃ jagadvyāptaṃ prajānāṃ tanmē manaḥ śivasaṅkalpamastu ॥ 9॥

yēnēdaṃ viśvaṃ jagatō babhūva yē dēvā api mahatō jātavēdāḥ ।
tadēvāgnistamasō jyōtirēkaṃ tanmē manaḥ śivasaṅkalpamastu ॥ 10॥

yē manō hṛdayaṃ yē cha dēvā yē divyā āpō yē sūryaraśmiḥ ।
tē śrōtrē chakṣuṣī sañcharantaṃ tanmē manaḥ śivasaṅkalpamastu ॥ 11॥

achintyaṃ chāpramēyaṃ cha vyaktāvyaktaparaṃ cha yat ।
sūkṣmātsūkṣmataraṃ jñēyaṃ tanmē manaḥ śivasaṅkalpamastu ॥ 12॥

ēkā cha daśa śataṃ cha sahasraṃ chāyutaṃ cha
niyutaṃ cha prayutaṃ chārbudaṃ cha nyarbudaṃ cha ।
samudraścha madhyaṃ chāntaścha parārdhaścha
tanmē manaḥ śivasaṅkalpamastu ॥ 13॥

yē pañcha pañchadaśa śataṃ sahasramayutaṃ nyarbudaṃ cha ।
tē’gnichityēṣṭakāstaṃ śarīraṃ tanmē manaḥ śivasaṅkalpamastu ॥ 14॥

vēdāhamētaṃ puruṣaṃ mahāntamādityavarṇaṃ tamasaḥ parastāt ।
yasya yōniṃ paripaśyanti dhīrāstanmē manaḥ śivasaṅkalpamastu ॥ 15॥

yasyēdaṃ dhīrāḥ punanti kavayō brahmāṇamētaṃ tvā vṛṇuta indum । [vṛṇutaṃ indum]
sthāvaraṃ jaṅgamaṃ dyaurākāśaṃ tanmē manaḥ śivasaṅkalpamastu ॥ 16॥

parāt parataraṃ chaiva yatparāchchaiva yatparam ।
yatparāt paratō jñēyaṃ tanmē manaḥ śivasaṅkalpamastu ॥ 17॥

parāt paratarō brahmā tatparāt paratō hariḥ ।
tatparāt paratō’dhīśastanmē manaḥ śivasaṅkalpamastu ॥ 18॥

yā vēdādiṣu gāyatrī sarvavyāpī mahēśvarī ।
ṛgyajussāmātharvaiścha tanmē manaḥ śivasaṅkalpamastu ॥ 19॥

yō vai dēvaṃ mahādēvaṃ praṇavaṃ puruṣōttamam ।
yaḥ sarvē sarvavēdaiścha tanmē manaḥ śivasaṅkalpamastu ॥ 20॥

prayataḥ praṇavōṅkāraṃ praṇavaṃ puruṣōttamam ।
ōṅkāraṃ praṇavātmānaṃ tanmē manaḥ śivasaṅkalpamastu ॥ 21॥

yō’sau sarvēṣu vēdēṣu paṭhyatē hyaja iśvaraḥ ।
akāyō nirguṇō hyātmā tanmē manaḥ śivasaṅkalpamastu ॥ 22॥

gōbhirjuṣṭaṃ dhanēna hyāyuṣā cha balēna cha ।
prajayā paśubhiḥ puṣkarākṣaṃ tanmē manaḥ śivasaṅkalpamastu ॥ 23॥

triyambakaṃ [tryambakaṃ] yajāmahē sugandhiṃ puṣṭivardhanam ।
urvārukamiva bandhanānmṛtyōrmukṣīya
mā’mṛtāttanmē manaḥ śivasaṅkalpamastu ॥ 24॥

kailāsaśikharē ramyē śaṅkarasya śivālayē ।
dēvatāstatra mōdantē tanmē manaḥ śivasaṅkalpamastu ॥ 25॥

viśvataśchakṣuruta viśvatōmukhō viśvatōhasta uta viśvataspāt ।
sambāhubhyāṃ namati sampatatrairdyāvāpṛthivī
janayan dēva ēkastanmē manaḥ śivasaṅkalpamastu ॥ 26॥

chaturō vēdānadhīyīta sarvaśāstramayaṃ viduḥ ।
itihāsapurāṇānāṃ tanmē manaḥ śivasaṅkalpamastu ॥ 27॥

mā nō mahāntamuta mā nō arbhakaṃ mā na ukṣantamuta mā na ukṣitam ।
mā nō vadhīḥ pitaraṃ mōta mātaraṃ priyā mā naḥ
tanuvō rudra rīriṣastanmē manaḥ śivasaṅkalpamastu ॥ 28॥

mā nastōkē tanayē mā na āyuṣi mā nō gōṣu mā nō aśvēṣu rīriṣaḥ ।
vīrānmā nō rudra bhāmitō vadhīrhaviṣmantaḥ
namasā vidhēma tē tanmē manaḥ śivasaṅkalpamastu ॥ 29॥

ṛtaṃ satyaṃ paraṃ brahma puruṣaṃ kṛṣṇapiṅgaḻam ।
ūrdhvarētaṃ virūpākṣaṃ viśvarūpāya vai namō namaḥ
tanmē manaḥ śivasaṅkalpamastu ॥ 30॥

kadrudrāya prachētasē mīḍhuṣṭamāya tavyasē ।
vōchēma śantamaṃ hṛdē । sarvō hyēṣa rudrastasmai rudrāya
namō astu tanmē manaḥ śivasaṅkalpamastu ॥ 31॥

brahma jajñānaṃ prathamaṃ purastāt vi sīmataḥ suruchō vēna āvaḥ ।
sa budhniyā upamā asya viṣṭhāḥ sataścha yōniṃ
asataścha vivastanmē manaḥ śivasaṅkalpamastu ॥ 32॥

yaḥ prāṇatō nimiṣatō mahitvaika idrājā jagatō babhūva ।
ya īśē asya dvipadaśchatuṣpadaḥ kasmai dēvāya
haviṣā vidhēma tanmē manaḥ śivasaṅkalpamastu ॥ 33॥

ya ātmadā baladā yasya viśvē upāsatē praśiṣaṃ yasya dēvāḥ ।
yasya Chāyā’mṛtaṃ yasya mṛtyuḥ kasmai dēvāya
haviṣā vidhēma tanmē manaḥ śivasaṅkalpamastu ॥ 34॥

yō rudrō agnau yō apsu ya ōṣadhīṣu yō rudrō viśvā bhuvanā”vivēśa ।
tasmai rudrāya namō astu tanmē manaḥ śivasaṅkalpamastu ॥ 35॥

gandhadvārāṃ durādharṣāṃ nityapuṣṭāṃ karīṣiṇīm ।
īśvarīṃ sarvabhūtānāṃ tāmihōpahvayē śriyaṃ
tanmē manaḥ śivasaṅkalpamastu ॥ 36॥

ya idaṃ śivasaṅkalpaṃ sadā dhyāyanti brāhmaṇāḥ ।
tē paraṃ mōkṣaṃ gamiṣyanti tanmē manaḥ śivasaṅkalpamastu ॥ 37॥

iti śivasaṅkalpamantrāḥ samāptāḥ ।
(śaiva-upaniṣadaḥ)

iti śivasaṅkalpōpaniṣat samāptā ।