KYTA 10 Maha Narayana Upanishad – Krishna Yajurveda Taittiriya Aranyaka Patha – Ambhasya Pare

kṛṣṇa yajurvēdīya taittirīya āraṇyakē daśamaḥ prapāṭhakaḥ – mahānārāyaṇōpaniṣat

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

sa̠ha nā̍ vavatu । sa̠ha nau̍ bhunaktu । sa̠ha vī̠rya̍-ṅkaravāvahai । tē̠ja̠svinā̠ vadhī̍tamastu̠ mā vi̍dviṣā̠vahai̎ ॥
ōṃ śānti̠-śśānti̠-śśānti̍ḥ ॥

anuvākaṃ 1
ambha̍sya pā̠rē bhuva̍nasya̠ maddhyē̠ nāka̍sya pṛ̠ṣṭhē ma̍ha̠tō mahī̍yān ।
śu̠krēṇa̠ jyōtīgṃ̍ṣi samanu̠pravi̍ṣṭaḥ pra̠jāpa̍tiścharati̠ garbhē̍ a̠ntaḥ ॥
yasmi̍nni̠dagṃ sañcha̠ vichaiti̠ sarva̠ṃ yasmi̍-ndē̠vā adhi̠ viśvē̍ niṣē̠duḥ ।
tadē̠va bhū̠ta-ntadu̠ bhavya̍mā i̠da-ntada̠kṣarē̍ para̠mē vyō̍mann ॥
yēnā̍ vṛ̠ta-ṅkhañcha̠ diva̍-mma̠hīñcha̠ yēnā̍di̠tya-stapa̍ti̠ tēja̍sā̠ bhrāja̍sā cha ।
yama̠nta-ssa̍mu̠drē ka̠vayō̠ vaya̍nti̠ yada̠kṣarē̍ para̠mē pra̠jāḥ ॥
yata̍ḥ prasū̠tā ja̠gata̍ḥ prasūtī̠ tōyē̍na jī̠vān vyacha̍sarja̠ (vyasa̍sarja̠) bhūmyā̎m ।
yadōṣa̍dhībhiḥ pu̠ruṣā̎-npa̠śūg​ścha̠ vivē̍śa bhū̠tāni̍ charācha̠rāṇi̍ ॥
ata̍ḥ para̠-nnānya̠-daṇī̍yasahi̠ parā̎-tpara̠ṃ ya-nmaha̍tō ma̠hānta̎m ।
yadē̍ka-ma̠vyakta̠-mana̍ntarūpa̠ṃ viśva̍-mpurā̠ṇa-ntama̍sa̠ḥ para̍stāt ॥ 1 ॥

tadē̠varta-ntadu̍ sa̠tyamā̍hu̠-stadē̠va brahma̍ para̠ma-ṅka̍vī̠nām ।
i̠ṣṭā̠pū̠rta-mba̍hu̠dhā jā̠ta-ñjāya̍mānaṃ vi̠śva-mbi̍bharti̠ bhuva̍nasya̠ nābhi̍ḥ ॥
tadē̠vāgni-stadvā̠yu-stathsūrya̠stadu̍ cha̠ndramā̎ḥ ।
tadē̠va śu̠krama̠mṛta̠-ntadbrahma̠ tadāpa̠-ssa pra̠jāpa̍tiḥ ॥
sarvē̍ nimē̠ṣā ja̠jñirē̍ vi̠dyuta̠ḥ puru̍ṣā̠dadhi̍ ।
ka̠lā mu̍hū̠rtāḥ kāṣṭhā̎śchāhō-rā̠trāścha̍ sarva̠śaḥ ॥
a̠rdha̠mā̠sā māsā̍ ṛ̠tava̍-ssaṃvathsa̠raścha̍ kalpantām । sa āpa̍ḥ pradu̠ghē u̠bhē i̠mē a̠ntari̍kṣa̠-mathō̠ suva̍ḥ ॥
naina̍-mū̠rdhva-nna ti̠rya-ñcha̠ na maddhyē̠ pari̍jagrabhat । na tasyē̍śē̠ kaścha̠na tasya̍ nāma ma̠hadyaśa̍ḥ ॥ 2 ॥

na sa̠dṛṃśē̍ tiṣṭhati̠ rūpa̍masya̠ na chakṣu̍ṣā paśyati̠ kaścha̠naina̎m ।
hṛ̠dā ma̍nī̠ṣā mana̍sā̠-‘bhi klṛ̍ptō̠ ya ē̍naṃ vi̠du-ramṛ̍tā̠stē bha̍vanti ॥

a̠dbhya-ssambhū̍taḥ pṛthi̠vyai rasā̎chcha । vi̠śvaka̍rmaṇa̠-ssama̍varta̠tādhi̍ ।
tasya̠ tvaṣṭā̍ vi̠dadha̍drū̠pamē̍ti ॥
tatpuru̍ṣasya̠ viśva̠mājā̍na̠magrē̎ ।
vēdā̠hamē̠ta-mpuru̍ṣa-mma̠hānta̎m ।
ā̠di̠tya va̍rṇa̠-ntama̍sa̠ḥ para̍stāt ।
tamē̠vaṃ vi̠dvāna̠mṛta̍ i̠ha bha̍vati । nānyaḥ panthā̍ vidya̠tē-‘ya̍nāya ॥
pra̠jāpa̍tiścharati̠ garbhē̍ a̠ntaḥ । a̠jāya̍mānō bahu̠dhā vijā̍yatē । tasya̠ dhīrā̠ḥ pari̍jānanti̠ yōni̎m । marī̍chīnā-mpa̠dami̍chChanti vē̠dhasa̍ḥ ॥ yō dē̠vēbhya̠ āta̍pati । yō dē̠vānā̎-mpu̠rōhi̍taḥ । pūrvō̠ yō dē̠vēbhyō̍ jā̠taḥ । namō̍ ru̠chāya̠ brāhma̍yē ॥ rucha̍-mbrā̠hma-ñja̠naya̍ntaḥ । dē̠vā agrē̠ tada̍bruvann ।
yastvai̠va-mbrā̎hma̠ṇō vi̠dyāt । tasya̍ dē̠vā asa̠n vaśē̎ ॥ hrīścha̍tē la̠kṣmīścha̠ patnyau̎ । a̠hō̠rā̠trē pā̠r​śvē । nakṣa̍trāṇi rū̠pam ।
a̠śvinau̠ vyātta̎m । i̠ṣṭa-mma̍niṣāṇa । a̠mu-mma̍niṣāṇa । sarva̍-mmaniṣāṇa ॥

hi̠ra̠ṇya̠ga̠rbha-ssama̍varta̠tāgrē̍ bhū̠tasya̍ jā̠taḥ pati̠rēka̍ āsīt ।
sa dā̍dhāra pṛthi̠vī-ndyāmu̠tēmā-ṅkasmai̍ dē̠vāya̍ ha̠viṣā̍ vidhēma ॥

yaḥ prā̍ṇa̠tō ni̍miṣa̠tō ma̍hi̠tvaika̠ idrājā̠ jaga̍tō ba̠bhūva̍ ।
ya īśē̍ a̠sya dvi̠pada̠-śchatu̍ṣpa̠daḥ kasmai̍ dē̠vāya̍ ha̠viṣā̍ vidhēma ॥

ya ā̎tma̠dā ba̍la̠dā yasya̠ viśva̍ upā̠sa̍tē pra̠śiṣa̠ṃ yasya̍ dē̠vāḥ ।
yasya̍ Chā̠yāmṛta̠ṃ yasya̍ mṛ̠tyuḥ kasmai̍ dē̠vāya̍ ha̠viṣā̍ vidhēma ॥

yasyē̠mē hi̠mava̍ntō mahi̠tvā yasya̍ samu̠dragṃ ra̠sayā̍ sa̠hā-”huḥ ।
yasyē̠māḥ pra̠diśō̠ yasya̍ bā̠hū kasmai̍ dē̠vāya̍ ha̠viṣā̍ vidhēma ॥

ya-ṅkranda̍sī̠ ava̍sā tastabhā̠nē a̠bhyaikṣē̍tā̠-mmana̍sā̠ rēja̍mānē ।
yatrādhi̠sūra̠ udi̍tau̠ vyēti̠ kasmai̍ dē̠vāya̍ ha̠viṣā̍ vidhēma ॥

yēna̠ dyauru̠grā pṛ̍thi̠vī cha̍ dṛ̠ḍhē yēna̠ suva̍s stabhi̠taṃ yēna̠ nāka̍ḥ ।
yō a̠ntari̍kṣē̠ raja̍sō vi̠māna̠ḥ kasmai̍ dē̠vāya̍ ha̠viṣā̍ vidhēma ॥

āpō̍ ha̠ yanma̍ha̠tī viśva̠māya̠n-dakṣa̠ndadhā̍nā ja̠naya̍ntī-ra̠gnim ।
tatō̍ dē̠vānā̠-nnira̍varta̠tāsu̠rēka̠ḥ kasmai̍ dē̠vāya̍ ha̠viṣā̍ vidhēma ॥

yaśchi̠dāpō̍ mahi̠nā pa̠ryapa̍śya̠-ddkṣa̠ndadhā̍nā ja̠naya̍ntī-ra̠gnim ।
yō dē̠vēṣvadhi̍ dē̠va yēka̠ āsī̠-tkasmai̍ dē̠vāya̍ ha̠viṣā̍ vidhēma ॥

a̠dbhya-ssambhū̍tō hiraṇyaga̠rbha itya̠ṣṭau ॥
ē̠ṣa hi dē̠vaḥ pra̠diśō-‘nu̠ sarvā̠ḥ pūrvō̍ hi jā̠ta-ssa u̠ garbhē̍ a̠ntaḥ ।
sa vi̠jāya̍māna-ssajani̠ṣyamā̍ṇaḥ pra̠tyaṃ-mukhā̎ stiṣṭhati vi̠śvatō̍mukhaḥ ॥
vi̠śvata̍ścha-kṣuru̠ta vi̠śvatō̍ mukhō vi̠śvatō̍ hasta u̠ta vi̠śvata̍spāt ।
sa-mbā̠hubhyā̠-nnama̍ti̠ sa-mpata̍trai̠-rdyāvā̍ pṛthi̠vī ja̠naya̍-ndē̠va ēka̍ḥ ॥
vē̠nasta-tpaśya̠n. viśvā̠ bhuva̍nāni vi̠dvān. yatra̠ viśva̠-mbhava̠tyēka̍-nīḻam ।
yasmi̍nni̠dagṃ sañcha̠ vichaika̠gṃ̠ sa ōta̠ḥ prōta̍ścha vi̠bhuḥ pra̠jāsu̍ ॥
pratadvō̍chē a̠mṛta̠nnu vi̠dvā-nga̍ndha̠rvō nāma̠ nihi̍ta̠-ṅguhā̍su ॥ 3 ॥

trīṇi̍ pa̠dā nihi̍tā̠ guhā̍su̠ yastadvēda̍ savi̠tuḥ pi̠tā-‘sa̍t ॥ sa nō̠ bandhu̍-rjani̠tā sa vi̍dhā̠tā dhāmā̍ni̠ vēda̠ bhuva̍nāni̠ viśvā̎ । yatra̍ dē̠vā a̠mṛta̍māna-śā̠nāstṛ̠tīyē̠ dhāmā̎nya̠-bhyaira̍yanta ॥
pari̠ dyāvā̍pṛthi̠vī ya̍nti sa̠dyaḥ pari̍ lō̠kā-npari̠ diśa̠ḥ pari̠ suva̍ḥ । ṛ̠tasya̠ tantu̍ṃ vitataṃ vi̠chṛtya̠ tada̍paśya̠-ttada̍bhava-tpra̠jāsu̍ ॥
pa̠rītya̍ lō̠kā-npa̠rītya̍ bhū̠tāni̍ pa̠rītya̠ sarvā̎ḥ pra̠diśō̠ diśa̍ścha । pra̠jāpa̍tiḥ prathama̠jā ṛ̠tasyā̠tmanā̠-”tmāna̍-ma̠bhi-samba̍bhūva ॥
sada̍sa̠spati̠-madbhu̍ta-mpri̠yamindra̍sya̠ kāmya̎m । sani̍-mmē̠dhā ma̍yāsiṣam ॥
uddī̎pyasva jātavēdō ‘pa̠ghnanniṛ̍rti̠-mmama̍ ॥ 4 ॥

pa̠śūg​ścha̠ mahya̠māva̍ha̠ jīva̍nañcha̠ diśō̍ diśa ॥
mānō̍ higṃsī jjātavēdō̠ gāmaśva̠-mpuru̍ṣa̠-ñjaga̍t ।
abi̍bhra̠dagna̠ āga̍hi śri̠yā mā̠ pari̍pātaya ॥
puru̍ṣasya vidma sahasrā̠kṣasya̍ mahādē̠vasya̍ dhīmahi । tannō̍ rudraḥ prachō̠dayā̎t ॥
tatpuru̍ṣāya vi̠dmahē̍ mahādē̠vāya̍ dhīmahi ।
tannō̍ rudraḥ prachō̠dayā̎t ॥
tatpuru̍ṣāya vi̠dmahē̍ vakratu̠ṇḍāya̍ dhīmahi ।
tannō̍ dantiḥ prachō̠dayā̎t ॥
tatpuru̍ṣāya vi̠dmahē̍ chakratu̠ṇḍāya̍ dhīmahi ॥ 5 ॥

tannō̍ nandiḥ prachō̠dayā̎t ॥
tatpuru̍ṣāya vi̠dmahē̍ mahāsē̠nāya̍ dhīmahi ।
tanna̍-ṣṣaṇmukhaḥ prachō̠dayā̎t ॥
tatpuru̍ṣāya vi̠dmahē̍ suvarṇapa̠kṣāya̍ dhīmahi । tannō̍ garuḍaḥ prachō̠dayā̎t ॥
vē̠dā̠tma̠nāya̍ vi̠dmahē̍ hiraṇyaga̠rbhāya̍ dhīmahi । tannō̎ brahma prachō̠dayā̎t ॥
nā̠rā̠ya̠ṇāya̍ vi̠dmahē̍ vāsudē̠vāya̍ dhīmahi ।
tannō̍ viṣṇuḥ prachō̠dayā̎t ॥
va̠jra̠na̠khāya̍ vi̠dmahē̍ tīkṣṇa-da̠gg̠ṣṭrāya̍ dhīmahi ॥ 6 ॥

tannō̍ nārasigṃhaḥ prachō̠dayā̎t ॥
bhā̠ska̠rāya̍ vi̠dmahē̍ mahaddyutika̠rāya̍ dhīmahi ।
tannō̍ ādityaḥ prachō̠dayā̎t ॥
vai̠śvā̠na̠rāya̍ vi̠dmahē̍ lālī̠lāya̍ dhīmahi ।
tannō̍ agniḥ prachō̠dayā̎t ॥
kā̠tyā̠ya̠nāya̍ vi̠dmahē̍ kanyaku̠māri̍ dhīmahi ।
tannō̍ durgiḥ prachō̠dayā̎t ॥
sa̠ha̠sra̠para̍mā dē̠vī̠ śa̠tamū̍lā śa̠tāṅku̍rā ।
sarvagṃ̍ haratu̍ mē pā̠pa̠-ndū̠rvā du̍ssvapna̠ nāśa̍nī ॥
kāṇḍā̎-tkāṇḍā-tpra̠rōha̍ntī̠ paru̍ṣaḥ paruṣa̠ḥ pari̍ ॥ 7 ॥

ē̠vā nō̍ dūrvē̠ prata̍nu sa̠hasrē̍ṇa śa̠tēna̍ cha ॥
yā śa̠tēna̍ prata̠nōṣi̍ sa̠hasrē̍ṇa vi̠rōha̍si ।
tasyā̎stē dēvīṣṭakē vi̠dhēma̍ ha̠viṣā̍ va̠yam ॥
aśva̍krā̠ntē ra̍thakrā̠ntē̠ vi̠ṣṇukrā̎mtē va̠sundha̍rā ।
śirasā̍ dhāra̍yiṣyā̠mi̠ ra̠kṣa̠sva mā̎-mpadē̠ padē ॥
bhūmi-rdhēnu-rdharaṇī lō̍kadhā̠riṇī ।
u̠dhṛtā̍-‘si va̍rāhē̠ṇa̠ kṛ̠ṣṇē̠na śa̍ta bā̠hunā ॥
mṛ̠ttikē̍ hana̍ mē pā̠pa̠ṃ ya̠nma̠yā du̍ṣkṛta̠-ṅkṛtam । mṛ̠ttikē̎ brahma̍dattā̠-‘si̠ kā̠śyapē̍nābhi̠mantri̍tā । mṛ̠ttikē̍ dēhi̍ mē pu̠ṣṭi̠-ntva̠yi sa̍rva-mpra̠tiṣṭhi̍tam ॥ 8 ॥

mṛ̠ttikē̎ pratiṣṭhi̍tē sa̠rva̠-nta̠nmē ni̍rṇuda̠ mṛtti̍kē । tayā̍ ha̠tēna̍ pāpē̠na̠ ga̠chChā̠mi pa̍ramā̠-ṅgatim ॥ yata̍ indra̠ bhayā̍mahē̠ tatō̍ nō̠ abha̍ya-ṅkṛdhi ।
magha̍van Cha̠gdhi tava̠ tanna̍ ū̠tayē̠ vidviṣō̠ vimṛdhō̍ jahi ॥
sva̠sti̠dā vi̠śaspati̍-rvṛtra̠hā vimṛdhō̍ va̠śī ।
vṛṣēndra̍ḥ pu̠ra ē̍tu na-ssvasti̠dā a̍bhayaṅka̠raḥ ॥
sva̠sti na̠ indrō̍ vṛ̠ddhaśra̍vā-ssva̠sti na̍ḥ pū̠ṣā vi̠śvavē̍dāḥ । sva̠sti na̠stārkṣyō̠ ari̍ṣṭanēmi-ssva̠sti nō̠ bṛha̠spati̍-rdadhātu ॥
āpā̎mta-manyustṛ̠pala̍prabharmā̠ dhuni̠-śśimī̍vā̠ṃ-Charu̍māgṃ ṛjī̠ṣī । sōmō̠ viśvā̎nyata̠sā vanā̍ni̠ nārvāgindra̍-mprati̠mānā̍ni dēbhuḥ ॥ 9 ॥

brahma̍ jajñā̠na-mpra̍tha̠ma-mpu̠rastā̠-dvisī̍ma̠ta-ssu̠ruchō̍ vē̠na ā̍vaḥ । sa bu̠dhniyā̍ upa̠mā a̍sya vi̠ṣṭhā-ssa̠taścha̠ yōni̠-masa̍taścha̠ viva̍ḥ ॥
syō̠nā pṛ̍thivi̠ bhavā̍ nṛkṣa̠rā ni̠vēśa̍nī । yachChā̍ na̠-śśarma̍ sa̠prathā̎ḥ ॥
ga̠ndha̠dvā̠rā-ndu̍rādha̠r​ṣā̠-nni̠tyapu̍ṣṭā-ṅkarī̠ṣiṇī̎m । ī̠śvarīgṃ̍ sarva̍bhūtā̠nā̠-ntāmi̠hōpa̍hvayē̠ śriyam ॥
śrī̎rmē bha̠jatu । alakṣmī̎rmē na̠śyatu ।
viṣṇu̍mukhā̠ vai dē̠vā-śChandō̍-bhiri̠mān ँlō̠kā-na̍napaja̠yya-ma̠bhya̍jayann । ma̠hāgṃ indrō̠ vajra̍bāhu-ṣṣōḍa̠śī śarma̍ yachChatu ॥ 10 ॥

sva̠sti nō̍ ma̠ghavā̍ karōtu̠ hantu̍ pā̠pmāna̠ṃ yō̎-‘smā-ndvēṣṭi̍ ॥
sō̠māna̠gg̠ svara̍ṇa-ṅkṛṇu̠hi bra̍hmaṇaspatē । ka̠kṣīva̍nta̠ṃ ya au̍śi̠jam ।
śarī̍raṃ yajñaśama̠la-ṅkusī̍da̠-ntasmi̎-nthsīdatu̠ yō̎-‘smā-ndvēṣṭi̍ ॥
chara̍ṇa-mpa̠vitra̠ṃ vita̍ta-mpurā̠ṇaṃ yēna̍ pū̠ta-stara̍ti duṣkṛ̠tāni̍ ।
tēna̍ pa̠vitrē̍ṇa śu̠ddhēna̍ pū̠tā ati̍ pā̠pmāna̠-marā̍ti-ntarēma ॥
sa̠jōṣā̍ indra̠ saga̍ṇō ma̠rudbhi̠-ssōma̍-mpiba vṛtrahañChūra vi̠dvān ।
ja̠hi śatrū̠gṃ̠ rapa̠ mṛdhō̍ nuda̠svāthābha̍ya-ṅkṛṇuhi vi̠śvatō̍ naḥ ॥
su̠mi̠trā na̠ āpa̠ ōṣa̍dhaya-ssantu durmi̠trāstasmai̍
bhūyāsu̠-ryā̎-‘smā-ndvēṣṭi̠ yañcha̍ va̠ya-ndvi̠ṣmaḥ ॥
āpō̠ hiṣṭhā ma̍yō̠ bhuva̠stā na̍ ū̠rjē da̍dhātana ॥ 11 ॥

ma̠hēraṇā̍ya̠ chakṣa̍sē । yō va̍-śśi̠vata̍mō̠ rasa̠-stasya̍ bhājayatē̠ ha na̍ḥ । u̠śa̠tī-ri̍va mā̠tara̍ḥ । tasmā̠ ara̍ṅgamāmavō̠ yasya̠ kṣayā̍ya̠ jinva̍tha ।
āpō̍ ja̠naya̍thā cha naḥ ॥ hira̍ṇyaśṛṅga̠ṃ varu̍ṇa̠-mprapa̍dyē tī̠rtha-mmē̍ dēhi̠ yāchi̍taḥ ।
ya̠nmayā̍ bhu̠kta-ma̠sādhū̍nā-mpā̠pēbhya̍ścha pra̠tigra̍haḥ ॥ yanmē̠ mana̍sā vā̠chā̠ ka̠rma̠ṇā vā du̍ṣkṛta̠-ṅkṛtam । tanna̠ indrō̠ varu̍ṇō̠ bṛha̠spati̍-ssavi̠tā cha̍ punantu̠ puna̍ḥ punaḥ ॥
namō̠-‘gnayē̎-‘phsu̠matē̠ nama̠ indrā̍ya̠ namō̠ varu̍ṇāya̠ namō vāruṇyai̍ namō̠-‘dbhyaḥ ॥ 12 ॥

yada̠pā-ṅkrū̠raṃ yada̍mē̠ddhyaṃ yada̍śā̠nta-ntadapa̍gachChatāt ॥ a̠tyā̠śa̠nā-da̍tīpā̠nā̠-dya̠chcha u̠grā-tpra̍ti̠grahā̎t । tannō̠ varu̍ṇō rā̠jā̠ pā̠ṇinā̎ hyava̠mar​śa̍tu ॥ sō̍-‘hama̍pā̠pō vi̠rajō̠ nirmu̠ktō mu̍ktaki̠lbiṣaḥ । nāka̍sya pṛ̠ṣṭhamāru̍hya̠ gachChē̠-dbrahma̍salō̠katām ॥ yaśchā̠phsu varu̍ṇa̠-ssa pu̠nātva̍ghamar​ṣa̠ṇaḥ ॥ i̠ma-mmē̍ gaṅgē yamunē sarasvati̠ śutu̍dri̠ stōmagṃ̍ sachatā̠ paru̠ṣṇiyā ।
a̠si̠kni̠yā ma̍rudvṛdhē vi̠tasta̠yā-”rjī̍kīyē śṛṇu̠hyā su̠ṣōma̍yā ॥
ṛ̠tañcha̍ sa̠tyañchā̠-bhī̎ddhā̠ ttapa̠sō-‘ddhya̍jāyata ।
tatō̠ rātri̍-rajāyata̠ tata̍-ssamu̠drō a̍rṇa̠vaḥ ॥ 13 ॥

sa̠mu̠drā-da̍rṇa̠vā-dadhi̍ saṃvathsa̠rō a̍jāyata ।
a̠hō̠rā̠trāṇi̍ vi̠dadha̠-d(mi̠dadha̠d) viśva̍sya miṣa̠tō va̠śī ॥ sū̠ryā̠cha̠ndra̠masau̍ dhā̠tā ya̍thā pū̠rva ma̍kalpayat । diva̍ñcha pṛthi̠vī-ñchā̠ntari̍kṣa̠ mathō̠ suva̍ḥ ॥ ya-tpṛ̍thi̠vyāgṃ raja̍ssva̠ māntari̍kṣē vi̠rōda̍sī । i̠māg​ stadā̠pō va̍ruṇaḥ pu̠nātva̍ghamar​ṣa̠ṇaḥ ॥ pu̠nantu̠ vasa̍vaḥ pu̠nātu̠ varu̍ṇaḥ pu̠nātva̍ghamar​ṣa̠ṇaḥ ।
ē̠ṣa bhū̠tasya̍ ma̠ddhyē bhuva̍nasya gō̠ptā ॥
ē̠ṣa pu̠ṇyakṛ̍tāṃ lō̠kā̠nē̠ṣa mṛ̠tyōr-hi̍ra̠ṇmaya̎m । dyāvā̍pṛthi̠vyōr-hi̍ra̠ṇmaya̠gṃ̠ sagg​śri̍ta̠gṃ̠ suva̍ḥ ॥ 14 ॥

sa na̠-ssuva̠-ssagṃ śi̍śādhi ॥
ārdra̠-ñjvala̍ti̠ jyōti̍-ra̠hama̍smi । jyōti̠-rjvala̍ti̠ brahmā̠hama̍smi । yō̍-‘hama̍smi̠ brahmā̠hama̍smi । a̠hama̍smi̠ brahmā̠hama̍smi । a̠hamē̠vāha-mmā-ñju̍hōmi̠ svāhā̎ ॥ a̠kā̠rya̠-kā̠rya̍va kī̠rṇī stē̠nō bhrū̍ṇa̠hā gu̍ruta̠lpagaḥ । varu̍ṇō̠-‘pāma̍ghamar​ṣa̠ṇa-stasmā̎-tpā̠pā-tpramu̍chyatē ॥
ra̠jōbhūmi̍stva̠māgṃ rōda̍yasva̠ prava̍danti̠ dhīrā̎ḥ ॥
ākrā̎m-thsamu̠draḥ pra̍tha̠mē vidha̍rma-ñja̠naya̍-npra̠jā bhuva̍nasya̠ rājā̎ ।
vṛṣā̍ pa̠vitrē̠ adhi̠sānō̠ avyē̍ bṛ̠ha-thsōmō̍
vāvṛdhē suvā̠na indu̍ḥ ॥ 15 ॥
(pura̍stā̠–dyaśō̠ – guhā̍su̠ – mama̍ – chakratu̠ṇḍāya̍ dhīmahi – tīkṣada̠gg̠ṣṭhrāya̍ dhīmahi̠ – pari̍ – pra̠tiṣṭhi̍taṃ – dēbhu–r yachChatu – dadhātanā̠- dbhyō̎ – ‘rṇa̠vaḥ – suvō̠ – rājaika̍-ñcha) (a. 1)

ru̠drō̠ ru̠draścha̠ danti̠ścha̠ na̠ndi̠-ṣṣa̠ṇmu̠kha̠ ē̠va cha̍ । ga̠ru̠ḍō̠ bra̠hma̠ vi̠ṣṇu̠ścha̠ nā̠ra̠si̠gṃ̠ha̠sta̠thai̠va cha̍ । ā̠di̠tyō̠-‘gni̠ścha̠ du̠rgi̠ścha̠ kra̠mē̠ṇa̠ dvāda̠śāmbha̍si ।

ma̠ ma̠ va̠ cha̠ ma̠ su̠ vē̠ nā̠ va̠ bhā̠ vai̠ kā̠tyā̠ya̠nāya̍ ।

anuvākaṃ 2
jā̠tavē̍dasē sunavāma̠ sōma̍-marātīya̠tō nida̍hāti̠ vēda̍ḥ । sa na̍ḥ par​ṣa̠dati̍ du̠rgāṇi̠ viśvā̍ nā̠vēva̠ sindhu̍-nduri̠tā-‘tya̠gniḥ ॥
tāma̠gniva̍rṇā̠-ntapa̍sā jvala̠ntīṃ vai̍rōcha̠nī-ṅka̍rmapha̠lēṣu̠ juṣṭā̎m । du̠rgā-ndē̠vīgṃ śara̍ṇama̠ha-mprapa̍dyē su̠tara̍si tarasē̠ nama̍ḥ ॥
agnē̠ tva-mpā̍rayā̠ navyō̍ a̠smān-thsva̠sti-bhi̠rati̍ du̠rgāṇi̠ viśvā̎ । pūścha̍ pṛ̠thvī ba̍hu̠lā na̍ u̠rvī bhavā̍ tō̠kāya̠ tana̍yāya̠ śaṃyōḥ ॥
viśvā̍ni nō du̠rgahā̍ jātavēda̠-ssindhu̠-nna nā̠vā du̍ri̠tā-‘ti̍par​ṣi । agnē̍ atri̠va-nmana̍sā gṛṇā̠nō̎-‘smāka̍-mbōddhyavi̠tā ta̠nūnā̎m ॥
pṛ̠ta̠nā̠jita̠gṃ̠ saha̍māna-mu̠grama̠gnigṃ hu̍vēma para̠mā-thsa̠dhasthā̎t । sa na̍ḥ par​ṣa̠dati̍ du̠rgāṇi̠ viśvā̠ kṣāma̍ddē̠vō ati̍ duri̠tā-‘tya̠gniḥ ॥
pra̠tnōṣi̍-ka̠mīḍyō̍ addhva̠rēṣu̍ sa̠nāchcha̠ hōtā̠ navya̍ścha̠ sathsi̍ । svāñchā̎gnē ta̠nuva̍-mpi̠praya̍svā̠smabhya̍ñcha̠ saubha̍ga̠māya̍jasva ॥
gōbhi̠-rjuṣṭa̍ma̠yujō̠ niṣi̍kta̠-ntavē̎mdra viṣṇō̠-ranu̠sañcha̍rēma ।
nāka̍sya pṛ̠ṣṭhama̠bhi sa̠ṃvasā̍nō̠ vaiṣṇa̍vīṃ lō̠ka i̠ha mā̍dayantām ॥ 16 ॥
(du̠ri̠tā-‘tya̠gniścha̠tvāri̍ cha) (a. 2)

anuvākaṃ 3
bhū-ranna̍-ma̠gnayē̍ pṛthi̠vyai svāhā̠ ,
bhuvō-‘nna̍ṃ vā̠yavē̠-‘ntari̍kṣāya̠ svāhā̠,
suva̠ranna̍-mādi̠tyāya̍ di̠vē svāhā̠ ,
bhūrbhuva̠ssuva̠-ranna̍-ñcha̠ndrama̍sē di̠gbhya-ssvāhā̠ ,
namō̍ dē̠vēbhya̍-ssva̠dhā pi̠tṛbhyō̠ bhūrbhuva̠ssuva̠-ranna̠mōm ॥ 17 ॥

anuvākaṃ 4
bhūra̠gnayē̍ pṛthi̠vyai svāhā̠,
bhuvō̍ vā̠yavē̠-‘ntari̍kṣāya̠ svāhā̠ ,
suva̍rādi̠tyāya̍ di̠vē svāhā̠ ,
bhūrbhuva̠ssuva̍-ścha̠ndrama̍sē di̠gbhya-ssvāhā̠,
namō̍ dē̠vēbhya̍-ssva̠dhā pi̠tṛbhyō̠ bhūrbhuva̠ssuva̠-ragna̠ ōm ॥ 18 ॥

anuvākaṃ 5
bhūra̠gnayē̍ cha pṛthi̠vyai cha̍ maha̠tē cha̠ svāhā̠ ,
bhuvō̍ vā̠yavē̍ chā̠ntari̍kṣāya cha maha̠tē cha̠ svāhā̠ ,
suva̍rādi̠tyāya̍ cha di̠vē cha̍ maha̠tē cha̠ svāhā̠ ,
bhū-rbhuva̠ssuva̍-ścha̠ndrama̍sē cha̠ nakṣa̍trēbhyaścha di̠gbhyaścha̍ maha̠tē cha̠ svāhā̠,
namō̍ dē̠vēbhya̍-ssva̠dhā pi̠tṛbhyō̠ bhūrbhuva̠ssuva̠-rmaha̠rōm ॥ 19 ॥

anuvākaṃ 6
pāhi nō agna ēna̍sē svā̠hā । pāhi nō viśvavēda̍sē svā̠hā । yajña-mpāhi vibhāva̍sō svā̠hā । sarva-mpāhi śatakra̍tō svā̠hā ॥ 20 ॥

anuvākaṃ 7
pā̠hi nō̍ agna̠ ēka̍yā । pā̠hyu̍ta dvi̠tīya̍yā । pā̠hyūrja̍-ntṛ̠tīya̍yā ।
pā̠hi gī̠rbhi-ścha̍ta̠sṛbhi̍-rvasō̠ svāhā̎ ॥ 21 ॥

anuvākaṃ 8
yaśChanda̍sā-mṛṣa̠bhō vi̠śvarū̍pa̠-śChandō̎bhya̠ śChandāg̍syā vi̠vēśa̍ । sachāgṃ śikyaḥ purō vāchō̍pani̠ṣa-dindrō̎ jyē̠ṣṭha i̍ndri̠yāya̠ ṛṣi̍bhyō̠
namō̍ dē̠vēbhya̍-ssva̠dhā pi̠tṛbhyō̠ bhūrbhuva̠ssuva̠ śChanda̠ ōm ॥ 22 ॥

anuvākaṃ 9
namō̠ brahma̍ṇē dhā̠raṇa̍-mmē a̠stva-ni̍rākaraṇaṃ-dhā̠rayi̍tā bhūyāsa̠-ṅkarṇa̍yō-śśru̠ta-mmāchyō̎ḍhva̠-mmamā̠muṣya̠ ōm ॥ 23 ॥

anuvākaṃ 10
ṛ̠ta-ntapa̍-ssa̠tya-ntapa̍-śśru̠ta-ntapa̍-śśā̠nta-ntapō̠ dama̠ stapa̠-śśama̠stapō̠ dāna̠-ntapō̠ yajña̠-ntapō̠ bhūrbhuva̠ssuva̠-rbrahmai̠-tadupā̎syai̠-tattapa̍ḥ ॥ 24 ॥

anuvākaṃ 11
yathā̍ vṛ̠kṣasya̍ sa̠puṃṣpi̍tasya dū̠rā-dga̠ndhō vā̎tyē̠va-mpuṇya̍sya ka̠rmaṇō̍ dū̠rā-dga̠ndhō vā̍ti̠ yathā̍-‘sidhā̠rā-ṅka̠rtē-‘va̍hitā-mava̠krāmē̠ yadyuvē̠ yuvē̠ havā̍ vi̠hvayi̍ṣyāmi ka̠rta-mpa̍tiṣyā̠mītyē̠va-ma̠mṛtā̍-dā̠tmāna̍-ñju̠guphsē̎t ॥ 25 ॥

anuvākaṃ 12
a̠ṇō-raṇī̍yā-nmaha̠tō mahī̍yā-nā̠tmā guhā̍yā̠-nnihi̍tō-‘sya ja̠ntōḥ । tama̍kratu-mpaśyati vītaśō̠kō dhā̠tuḥ pra̠sādā̎-nmahi̠māna̍mīśam ॥
sa̠pta prā̠ṇāḥ pra̠bhava̍nti̠ tasmā̎-thsa̠ptārchiṣa̍-ssa̠midha̍-ssa̠pta ji̠hvāḥ । sa̠pta i̠mē lō̠kā yēṣu̠ chara̍nti prā̠ṇā gu̠hāśa̍yā̠-nnihi̍tā-ssa̠pta sa̍pta ॥
ata̍-ssamu̠drā gi̠raya̍ścha̠ sarvē̠-‘smā-thsyanda̍ntē̠ sindha̍va̠-ssarva̍rūpāḥ । ata̍ścha̠ viśvā̠ ōṣa̍dhayō̠ rasā̎chcha̠ yēnai̍ṣa bhū̠ta-sti̍ṣṭhatyantarā̠tmā ॥
bra̠hmā dē̠vānā̎-mpada̠vīḥ ka̍vī̠nā-mṛṣi̠-rviprā̍ṇā-mmahi̠ṣō mṛ̠gāṇā̎m ।
śyē̠nō gṛdhrā̍ṇā̠g̠ svadhi̍ti̠-rvanā̍nā̠gṃ̠ sōma̍ḥ pa̠vitra̠ matyē̍ti̠ rēbhann̍ ॥
a̠jā mēkā̠ṃ lōhi̍ta-śukla-kṛ̠ṣṇā-mba̠hvī-mpra̠jā-ñja̠naya̍ntī̠gṃ̠ sarū̍pām । a̠jō hyēkō̍ ju̠ṣamā̍ṇō-‘nu̠śētē̠ jahā̎tyēnā-mbhu̠kta-bhō̍gā̠majō̎-‘nyaḥ ॥ 26 ॥

ha̠gṃ̠sa-śśu̍chi̠ṣa-dvasu̍-rantarikṣa̠-saddhōtā̍ vēdi̠ṣa-dati̍thi-rdurōṇa̠sat ।
nṛ̠ṣadva̍ra̠-sadṛ̍ta̠-sa-dvyō̍ma̠-sada̠bjā gō̠jā ṛ̍ta̠jā a̍dri̠jā ṛ̠ta-mbṛ̠hat ॥
ghṛ̠ta-mmi̍mikṣirē ghṛ̠tama̍sya̠ yōni̍-rghṛ̠tē śri̠tō ghṛ̠tamu̍vasya̠ dhāma̍ ।
a̠nu̠ṣva̠dhamāva̍ha mā̠daya̍sva̠ svāhā̍ kṛtaṃ vṛṣabha vakṣi ha̠vyam ॥
sa̠mu̠drā dū̠rmi-rmadhu̍mā̠gṃ̠ udā̍ra-dupā̠gṃ̠śunā̠ sama̍mṛta̠tva mā̍naṭ ।
ghṛ̠tasya̠ nāma̠ guhya̠ṃ yadasti̍ ji̠hvā dē̠vānā̍-ma̠mṛta̍sya̠ nābhi̍ḥ ॥
va̠ya-nnāma̠ prabra̍vāmā ghṛ̠tēnā̠smin. ya̠jñē dhā̍rayāmā̠ namō̍bhiḥ ।
upa̍ bra̠hmā śṛ̍ṇavachCha̠syamā̍na̠-ñchatu̍-śśṛṅgō ‘vamī-dgau̠ra ē̠tat ॥
cha̠tvāri̠ śṛṅgā̠ trayō̍ asya̠ pādā̠ dvē śī̠ra̠.ṣē sa̠pta hastā̍sō a̠sya ।
tridhā̍ ba̠ddhō vṛ̍ṣa̠bhō rō̍ravīti ma̠hō dē̠vō martyā̠gṃ̠ āvi̍vēśa ॥ 27 ॥

tridhā̍ hi̠ta-mpa̠ṇibhi̍-rgu̠hyamā̍na̠-ṅgavi̍-dē̠vāsō̍ ghṛ̠tamanva̍vindann । indra̠ ēka̠gṃ̠ sūrya̠ ēka̍-ñjajāna vē̠nā dēkagg̍ sva̠dhayā̠ niṣṭa̍takṣuḥ ॥
yō dē̠vānā̎-mpratha̠ma-mpu̠rastā̠-dviśvā̠dhiyō̍ ru̠drō ma̠har​ṣi̍ḥ । hi̠ra̠ṇya̠ga̠rbha-mpa̍śyata̠ jāya̍māna̠gṃ̠ sanō̍ dē̠va-śśu̠bhayā̠ smṛtyā̠ saṃyu̍naktu ॥ yasmā̠tpara̠-nnāpa̍ra̠ masti̠ kiñchi̠dyasmā̠-nnāṇī̍yō̠ na jyāyō̎-‘sti̠ kaśchi̍t ।
vṛ̠kṣa i̍va stabdhō di̠vi ti̍ṣṭha̠-tyēka̠stēnē̠da-mpū̠rṇa-mpuru̍ṣēṇa̠ sarva̎m ॥
na karma̍ṇā na pra̠jayā̠ dhanē̍na̠ tyāgē̍naikē amṛta̠tva-mā̍na̠śuḥ ।
parē̍ṇa̠ nāka̠-nnihi̍ta̠-ṅguhā̍yāṃ vi̠bhrāja̍dē̠ta-dyata̍yō vi̠śanti̍ ॥ vē̠dā̠nta̠ vi̠jñāna̠-suni̍śchitā̠rthā-ssanyā̍sa yō̠gādyata̍ya-śśuddha̠ sattvā̎ḥ ।
tē bra̍hmalō̠kē tu̠ parā̎mtakālē̠ parā̍mṛtā̠-tpari̍muchyanti̠ sarvē̎ ॥ da̠hra̠ṃ vi̠pā̠pa-mpa̠ramē̎śma bhūta̠ṃ ya-tpu̍ṇḍarī̠ka-mpu̠rama̍ddhya sa̠gg̠stham । ta̠trā̠pi̠ da̠hra-ṅga̠gana̍ṃ viśōka̠-stasmi̍n. yada̠ntasta-dupā̍sita̠vyam ॥
yō vēdādau sva̍raḥ prō̠ktō̠ vē̠dāntē̍ cha
pra̠tiṣṭhi̍taḥ । tasya̍ pra̠kṛti̍-līna̠sya̠ ya̠ḥ para̍-ssa̠ ma̠hēśva̍raḥ ॥ 28 ॥
(ajō̎-‘nya̠ – āvi̍vēśa̠ – sarvē̍ cha̠tvāri̍ cha) (a. 12)

anuvākaṃ 13
sa̠ha̠sra̠śīr​ṣa̍-ndē̠va̠ṃ vi̠śvākṣa̍ṃ vi̠śva śa̍-mbhuvam । viśva̍-nnā̠rāya̍ṇa-ndē̠va̠ma̠kṣara̍-mpara̠ma-mpa̠dam ॥
vi̠śvata̠ḥ para̍mānni̠tya̠ṃ vi̠śva-nnā̍rāya̠ṇagṃ ha̍rim । viśva̍mē̠vēda-mpuru̍ṣa̠-sta-dviśva̠mupa̍jīvati ॥
pati̠ṃ viśva̍syā̠tmēśva̍ra̠gṃ̠ śāśva̍tagṃ śi̠vama̍chyutam । nā̠rāya̠ṇa-mma̍hājñē̠ya̠ṃ vi̠śvātmā̍na-mpa̠rāya̍ṇam ॥
nā̠rāya̠ṇa pa̍rō jyō̠ti̠rā̠tmā nā̍raya̠ṇaḥ pa̍raḥ ।
nā̠rāya̠ṇa pa̍ra-mbra̠hma̠ ta̠ttva-nnā̍rāya̠ṇaḥ pa̍raḥ । nā̠rāya̠ṇa pa̍rō dhyā̠tā̠ dhyā̠na-nnā̍rāya̠ṇaḥ pa̍raḥ ॥ yachcha̍ ki̠ñchij-ja̍ga-thsa̠rva̠-ndṛ̠śyatē̎ śrūya̠tē-‘pi̍ vā ॥ 29 ॥

anta̍-rba̠hiścha̍ ta-thsa̠rva̠ṃ vyā̠pya nā̍rāya̠ṇa-ssthi̍taḥ ॥
ana̍nta̠ mavya̍ya-ṅka̠vigṃ sa̍mu̠drē-‘nta̍ṃ vi̠śva śa̍bhuṃvam । pa̠dma̠kō̠śa-pra̍tīkā̠śa̠gṃ̠ hṛ̠daya̍-ñchāpya̠dhōmu̍kham ॥
adhō̍ ni̠ṣṭyā vi̍tastyā̠ntē̠ nā̠bhyāmu̍pari̠ tiṣṭha̍ti ।
jvā̠la̠mā̠lā ku̍la-mbhā̠tī̠ vi̠śvasyā̍yata̠na-mma̍hat ॥
santa̍tagṃ śi̠lābhi̍stu̠ lamba̍tyā kōśa̠sanni̍bham ।
tasyāntē̍ suṣi̠ragṃ sū̠kṣma-ntasmi̎m-thsa̠rva-mprati̍ṣṭhitam ॥
tasya̠ maddhyē̍ ma̠hāna̍gni-rvi̠śvārchi̍-rvi̠śvatō̍ mukhaḥ । sō-‘gra̍bhu̠g vibha̍ja-nti̠ṣṭha̠-nnāhā̍ra-maja̠raḥ ka̠viḥ । ti̠rya̠gū̠rdhva ma̍dha-śśā̠yī̠ ra̠śmaya̍stasya̠ santa̍tā ॥ sa̠ntā̠paya̍ti sva-ndē̠hamāpā̍datala̠ masta̍kam । tasya̠ maddhyē̠ vahni̍śikhā a̠ṇīyō̎rdhvā vya̠vasthi̍taḥ ॥
nī̠latō̍ yada̍ maddhya̠sthā̠-dvi̠dyullē̍khēva̠ bhāsva̍rā ।
nī̠vāra̠ śūka̍vatta̠nvī̠ pī̠tā bhā̎svatya̠ṇūpa̍mā ॥
tasyā̎-śśikhā̠yā ma̍ddhyē pa̠ramā̎tmā vya̠vasthi̍taḥ ।
sa brahma̠ sa śiva̠-ssa hari̠-ssēndra̠-ssō-‘kṣa̍raḥ para̠ma-ssva̠rāṭ ॥ 30 ॥
(api̍ vā̠ – santa̍tā̠ ṣaṭ cha̍) (a. 13)

anuvākaṃ 14
ā̠di̠tyō vā ē̠ṣa ē̠ta-nma̠ṇḍala̠-ntapa̍ti̠ tatra̠ tā ṛcha̠stadṛ̠chā ma̍ṇḍala̠gṃ̠ sa ṛ̠chāṃ lō̠kō-‘tha̠ya ē̠ṣa ē̠tasmi̍-nma̠ṇḍalē̠-‘rchi-rdī̠pyatē̠ tāni̠ sāmā̍ni̠ sa sā̠mnāṃ lō̠kō-‘tha̠ ya ē̠ṣa ē̠tasmi̍-nma̠ṇḍalē̠-‘rchiṣi̠ puru̍ṣa̠stāni̠ yajūgṃ̍ṣi̠ sa yaju̍ṣā maṇḍala̠gṃ̠ sa yaju̍ṣāṃ lō̠ka-ssaiṣā tra̠yyēva̍ vi̠dyā ta̍pati̠ ya ē̠ṣō̎-‘nta-rā̍di̠tyē hi̍ra̠ṇmaya̠ḥ puru̍ṣaḥ ॥ 31 ॥

anuvākaṃ 15
ā̠di̠tyō vai tēja̠ ōjō̠ bala̠ṃ yaśa̠-śchakṣu̠-śśrōtra̍mā̠tmā manō̍ ma̠nyu-rmanu̍-rmṛ̠tyu-ssa̠tyō mi̠trō vā̠yurā̍kā̠śaḥ prā̠ṇō lō̍kapā̠laḥ kaḥ ki-ṅka-nta-thsa̠tyamanna̍-ma̠mṛtā̍ jī̠vō viśva̍ḥ kata̠ma-ssva̍ya̠bhu-mbrahmai̠ tadamṛ̍ta ē̠ṣa puru̍ṣa ē̠ṣa bhū̠tānā̠-madhi̍pati̠-rbrahma̍ṇa̠-ssāyu̍jyagṃ salō̠katā̍-māpnō-tyē̠tāsā̍mē̠va dē̠vatā̍nā̠gṃ̠ sāyu̍jyagṃ sā̠r​ṣṭitāgṃ̍ samāna lō̠katā̍-māpnōti̠ ya ē̠vaṃ vēdē̎tyupa̠niṣat ॥ 32 ॥

anuvākaṃ 16
nidha̍napatayē̠ namaḥ । nidha̍napatāntikāya̠ namaḥ ।
ūrdhvāya̠ namaḥ । ūrdhvaliṅgāya̠ namaḥ ।
hiraṇyāya̠ namaḥ । hiraṇyaliṅgāya̠ namaḥ ।
suvarṇāya̠ namaḥ । suvarṇaliṅgāya̠ namaḥ ।
divyāya̠ namaḥ । divyaliṅgāya̠ namaḥ ॥ 33 ॥

bhavāya̠ namaḥ । bhavaliṅgāya̠ namaḥ ।
śarvāya̠ namaḥ । śarvaliṅgāya̠ namaḥ ।
śivāya̠ namaḥ । śivaliṅgāya̠ namaḥ ।
jvalāya̠ namaḥ । jvalaliṅgāya̠ namaḥ ।
ātmāya̠ namaḥ । ātmaliṅgāya̠ namaḥ ।
paramāya̠ namaḥ । paramaliṅgāya̠ namaḥ ।
ētathsōmasya̍ sūrya̠sya̠ sarvaliṅgagg̍ sthāpa̠ya̠ti̠ pāṇimantra̍-mpavi̠tram ॥ 34 ॥

anuvākaṃ 17
sa̠dyōjā̠ta-mpra̍padyā̠mi̠ sa̠dyōjā̠tāya̠ vai namō̠ nama̍ḥ । bha̠vē bha̍vē̠ nāti̍bhavē bhavasva̠ mām । bha̠vōdbha̍vāya̠ nama̍ḥ ॥ 35 ॥

anuvākaṃ 18
vā̠ma̠dē̠vāya̠ namō̎ jyē̠ṣṭhāya̠ nama̍-śśrē̠ṣṭhāya̠ namō̍ ru̠drāya̠ nama̠ḥ kālā̍ya̠
nama̠ḥ kala̍vikaraṇāya̠ namō̠ bala̍vikaraṇāya̠ namō̠ balā̍ya̠ namō̠ bala̍pramathanāya̠ nama̠-ssarva̍bhūtadamanāya̠ namō̍ ma̠nōnma̍nāya̠ nama̍ḥ ॥ 36 ॥

anuvākaṃ 19
a̠ghōrē̎bhyō-‘tha̠ ghōrē̎bhyō̠ ghōra̠ghōra̍tarēbhyaḥ ।
sarvē̎bhya-ssarva̠ śarvē̎bhyō̠ nama̍stē astu ru̠drarū̍pēbhyaḥ ॥ 37 ॥

anuvākaṃ 20
tatpuru̍ṣāya vi̠dmahē̍ mahādē̠vāya̍ dhīmahi ।
tannō̍ rudraḥ prachō̠dayā̎t ॥ 38 ॥

anuvākaṃ 21
īśāna-ssarva̍vidyā̠nā̠- mīśvara-ssarva̍bhūtā̠nā̠-mbrahmādhi̍pati̠-rbrahma̠ṇō-‘dhi̍pati̠-rbrahmā̍ śi̠vō mē̍ astu sadāśi̠vōm ॥ 39 ॥

anuvākaṃ 22
namō hiraṇyabāhavē hiraṇyavarṇāya hiraṇyarūpāya hiraṇyapatayē ‘biṅkāpataya umāpatayē paśupatayē̍ namō̠ namaḥ ॥ 40 ॥

anuvākaṃ 23
ṛ̠tagṃ sa̠tya-mpa̍ra-mbra̠hma̠ pu̠ruṣa̍-ṅkṛṣṇa̠piṅga̍lam । ū̠rdhvarē̍taṃ vi̍rūpā̠kṣa̠ṃ vi̠śvarū̍pāya̠ vai namō̠ nama̍ḥ ॥ 41 ॥

anuvākaṃ 24
sarvō̠ vai ru̠drastasmai̍ ru̠drāya̠ namō̍ astu ।
puru̍ṣō̠ vai ru̠dra-ssanma̠hō namō̠ nama̍ḥ ।
viśva̍-mbhū̠ta-mbhuva̍na-ñchi̠tra-mba̍hu̠dhā jā̠ta-ñjāya̍māna-ñcha̠ yat । sarvō̠ hyē̍ṣa ru̠drastasmai̍ ru̠drāya̠ namō̍ astu ॥ 42 ॥

anuvākaṃ 25
kadru̠drāya̠ prachē̍tasē mī̠ḍhuṣṭa̍māya̠ tavya̍sē । vō̠chēma̠ śanta̍magṃ hṛ̠dē ॥ sarvō̠hyē̍ṣa ru̠drastasmai̍ ru̠drāya̠ namō̍ astu ॥ 43 ॥

anuvākaṃ 26
yasya̠ vai ka̍ṅkatyagni-hōtra̠hava̍ṇī bhavati̠ pratyē̠vā-syāhu̍taya-stiṣṭha̠ntyathō̠ prati̍ṣṭhityai ॥ 44 ॥

anuvākaṃ 27
(ṭhis ēxpansion is appearing i-ntai. saṃ. 1.2.14.1 fo-rkṛ̠ṇu̠ṣva pāja̠ iti̠ pañcha̍ । )

kṛ̠ṇu̠ṣva pāja̠ḥ prasi̍ti̠nna pṛ̠thvīṃ yā̠hi rājē̠ vā̍mavā̠gṃ̠ ibhē̍na । tṛ̠ṣvīmanu̠ prasi̍ti-ndrūṇā̠nō-‘stā̍-‘si̠ viddhya̍ ra̠kṣa sa̠stapi̍ṣṭhaiḥ ॥ 1 ॥

tava̍ bhra̠māsa̍ āśu̠yā pa̍ta̠ntyanu̍ spṛśa dhṛṣa̠tā śōśu̍chānaḥ । tapūg̍ṣyagnē ju̠hvā̍ pata̠gānna sa̍nditō̠ visṛ̍ja̠ viṣva̍ gu̠lkāḥ ॥ 2 ॥

prati̠spaśō̠ visṛ̍ja̠ tūrṇi̍ tamō̠ bhavā̍ pā̠yu-rvi̠śō a̠syā ada̍bdhaḥ । yō nō̍ dū̠rē a̠ghaśagṃ̍sō̠ yō antya̍gnē̠ māki̍ṣṭē̠ vyathi̠rā
da̍dhar​ṣīt ॥ 3 ॥

uda̍gnē tiṣṭha̠ pratyā ta̍nuṣva̠nya̍ mitrāgṃ̍ ōṣatā-ttigmahētē । yō nō̠ arā̍tigṃ samidhāna cha̠krē nī̠chāta-ndha̍kṣyata̠ sanna śuṣka̎m ॥ 4 ॥

ū̠rdhvō bha̍va̠ prati̍vid̠dhyā-dhya̠smadā̠ viṣkṛ̍ṇuṣva̠ daivyā̎nyagnē । ava̍sthi̠rā ta̍nuhi yātu̠ jūnā̎-ñjā̠mimajā̍mi̠-mpramṛ̍ṇīhi̠ śatrūn̍ ॥ 5 ॥
kṛ̠ṇu̠ṣva pāja̠ iti̠ pañcha̍ ॥ 45 ॥

anuvākaṃ 28
adi̍ti-rdē̠vā ga̍ndha̠rvā ma̍nu̠ṣyā̎ḥ pi̠tarō-‘su̍rā̠-stēṣāgṃ̍ sarva bhū̠tānā̎-mmā̠tā mē̠dinī̍ maha̠tā ma̠hī sā̍vi̠trī gā̍ya̠trī jaga̍tyu̠rvī pṛ̠thvī ba̍hu̠lā viśvā̍ bhū̠tā ka̍ta̠mā kāyā sā sa̠tyē-tya̠mṛtēti̍ vasi̠ṣṭhaḥ ॥ 46 ॥

anuvākaṃ 29
āpō̠ vā i̠dagṃ sarva̠ṃ viśvā̍ bhū̠tānyāpa̍ḥ prā̠ṇā vā āpa̍ḥ pa̠śava̠ āpō-‘nna̠māpō -‘mṛ̍ta̠māpa̍-ssa̠mrāḍāpō̍ vi̠rāḍāpa̍-ssva̠rāḍāpa̠-śChandā̠g̠syāpō̠ jyōtī̠g̠ṣyāpō̠ yajū̠g̠ṣyāpa̍-ssa̠tyamāpa̠-ssarvā̍ dē̠vatā̠ āpō̠ bhūrbhuva̠ssuva̠rāpa̠ ōm ॥ 47 ॥

anuvākaṃ 30
āpa̍ḥ punantu pṛthi̠vī-mpṛ̍thi̠vī pū̠tā pu̍nātu̠ mām ।
pu̠nantu̠ brahma̍ṇa̠spati̠-rbrahma̍ pū̠tā pu̍nātu̠
mām ॥

yaduchChi̍ṣṭa̠-mabhō̎jya̠ṃ yadvā̍ du̠śchari̍ta̠-mmama̍ । sarva̍-mpunantu̠ māmāpō̍-‘sa̠tāñcha̍ prati̠graha̠gg̠ svāhā̎ ॥ 48 ॥

anuvākaṃ 31
agniścha mā manyuścha manyupatayaścha manyu̍kṛtē̠bhyaḥ ।
pāpēbhyō̍ rakṣa̠ntām । yadahnā pāpa̍makā̠r̠ṣam ।
manasā vāchā̍ hastā̠bhyām । padbhyā-mudarē̍ṇa śi̠śnā ।
aha̠stada̍valu̠pantu । yatkiñcha̍ duri̠ta-mmayi̍ ।
idamaha-māmamṛ̍ta yō̠nau ।
satyē jyōtiṣi juhō̍mi svā̠hā ॥ 49 ॥

anuvākaṃ 32
sūryaścha mā manyuścha manyupatayaścha manyu̍kṛtē̠bhyaḥ । pāpēbhyō̍ rakṣa̠ntām । yadrātriyā pāpa̍makā̠r̠ṣam ।
manasā vāchā̍ hastā̠bhyām । padbhyā-mudarē̍ṇa śi̠śnā ।
rātri̠-stada̍valu̠pantu । yatkiñcha̍ duri̠ta-mmayi̍ ।
idamaha-māmamṛ̍ta yō̠nau । sūryē jyōtiṣi juhō̍mi svā̠hā ॥ 50 ॥

anuvākaṃ 33
ōmityēkākṣa̍ra-mbra̠hma । agnirdēvatā brahma̍ ityā̠r​ṣam । gāyatra-ñChanda-mparamātma̍ṃ sarū̠pam । sāyujyaṃ vi̍niyō̠gam ॥ 51 ॥

anuvākaṃ 34
āyā̍tu̠ vara̍dā dē̠vī̠ a̠kṣara̍-mbrahma̠ sammi̍tam ।
gā̠ya̠trī̎-ñChanda̍sā-mmā̠tēda-mbra̍hma ju̠ṣasva̍ mē ।
yadahnā̎-tkuru̍tē pā̠pa̠-ntadahnā̎-tprati̠muchya̍tē ।
ya-drātriyā̎-tkuru̍tē pā̠pa̠-nta-drātriyā̎-tprati̠muchya̍tē ।
sarva̍ va̠rṇē ma̍hādē̠vi̠ sa̠ndhyā vi̍dyē sa̠rasva̍ti ॥ 52 ॥

anuvākaṃ 35
ōjō̍-‘si̠ sahō̍-‘si̠ bala̍masi̠ bhrājō̍-‘si dē̠vānā̠-ndhāma̠nāmā̍̍-‘si̠ viśva̍masi vi̠śvāyu̠-ssarva̍masi sa̠rvāyu-rabhibhūrōṃ-gāyatrī-māvā̍hayā̠mi̠
sāvitrī-māvā̍hayā̠mi̠ sarasvatī-māvā̍hayā̠mi̠ Chandar​ṣī-nāvā̍hayā̠mi̠ śriya-māvā̍hayā̠mi̠ gāyatriyā gāyatrī Chandō viśvāmitra ṛṣi-ssavitā dēvatā-‘gnirmukha-mbrahmā śirō viṣṇur​hṛdayagṃ rudraḥ
śikhā pṛthivīyōniḥ prāṇāpāna-vyānōdāna-samānā saprāṇā śvētavarṇā sāṅkhyāyana-sagōtrā gāyatrī chaturvigṃśatyakṣarā tripadā̍ ṣaṭku̠kṣi̠ḥ pañcha śīr​ṣōpanayanē vi̍niyō̠ga̠,
ō-mbhūḥ । ō-mbhuvaḥ । ōgṃ suvaḥ । ō-mmahaḥ । ō-ñjanaḥ ।
ō-ntapaḥ । ōgṃ sa̠tyam । ō-nta-thsa̍vi̠turvarē̎ṇya̠-mbhargō̍ dē̠vasya̍ dhīmahi ।
dhiyō̠ yō na̍ḥ prachō̠dayā̎t ।
ōmāpō̠ jyōtī̠ rasō̠-‘mṛta̠-mbrahma̠ bhūrbhuva̠ssuva̠rōm ॥ 53 ॥

anuvākaṃ 36
u̠ttamē̍ śikha̍rē jā̠tē̠ bhū̠myā-mpa̍rvata̠ mūrdha̍ni ।
brā̠hmaṇē̎bhyō-‘bhya̍nujñā̠tā̠ ga̠chCha dē̍vi ya̠thāsu̍kham ॥ stutō mayā varadā vē̍damā̠tā̠ prachōdayantī pavanē̎ dvijā̠tā । āyuḥ pṛthivyāṃ-draviṇa-mbra̍hmava̠rcha̠sa̠-mmahya-ndatvā prajātuṃ
bra̍hmalō̠kam ॥ 54 ॥

anuvākaṃ 37
ghṛṇi̠-ssūrya̍ ādi̠tyō na prabhā̍-vā̠tyakṣa̍ram । madhu̍kṣaranti̠ ta-dra̍sam । sa̠tyaṃ vai ta-drasa̠-māpō̠ jyōtī̠rasō̠-‘mṛta̠-mbrahma̠
bhūrbhuva̠ssuva̠rōm ॥ 55 ॥

anuvākaṃ 38
brahma̍ mētu̠ mām । madhu̍ mētu̠ mām । brahma̍-mē̠va madhu̍ mētu̠ mām ॥ yāstē̍ sōma pra̠jāva̠thsō-‘bhi̠sō a̠ham । dusṣva̍pna̠ha-ndu̍ruṣvaha ।
yāstē̍ sōma prā̠ṇāg​stā-ñju̍hōmi ॥
trisu̍parṇa̠ mayā̍chita-mbrāhma̠ṇāya̍ dadyāt । bra̠hma̠ha̠tyāṃ vā ē̠tē ghna̍nti ।
yē brā̎hma̠ṇā-strisu̍parṇa̠-mpaṭha̍nti । tē sōma̠-mprāpnu̍vanti । ā̠sa̠ha̠srā-tpa̠kti-mpuna̍nti । ōm ॥ 56 ॥

anuvākaṃ 39
brahma̍ mē̠dhayā̎ । madhu̍ mē̠dhayā̎ । brahma̍mē̠va madhu̍ mē̠dhayā̎ ॥ a̠dyā nō̍ dēva savitaḥ pra̠jāva̍thsāvī̠-ssaubha̍gam । parā̍ du̠sṣvapni̍yagṃ suva । viśvā̍ni dēva savita-rduri̠tāni̠ parā̍suva । ya-dbha̠dra-ntanma̠ āsu̍va ॥ madhu̠vātā̍ ṛtāya̠tē madhu̍kṣaranti̠ sindha̍vaḥ । māddhvī̎rna-ssa̠ntvōṣa̍dhīḥ । madhu̠nakta̍ mu̠tōṣasi̠ madhu̍ma̠-tpārthi̍va̠gṃ̠ raja̍ḥ । madhu̠dyaura̍stu naḥ pi̠tā । madhu̍mānnō̠ vana̠spati̠-rmadhu̍māgṃ astu̠ sūrya̍ḥ ।
māddhvī̠ rgāvō̍ bhavantu naḥ ॥
ya i̠ma-ntrisu̍parṇa̠-mayā̍chita-mbrāhma̠ṇāya̍ dadyāt ।
bhrū̠ṇa̠ha̠tyāṃ vā ē̠tē ghna̍nti । yē brā̎hma̠ṇā-strisu̍parṇa̠-mpaṭha̍nti । tē sōma̠-mprāpnu̍vanti । ā̠sa̠ha̠srā-tpa̠kti-mpuna̍nti । ōm ॥ 57 ॥

anuvākaṃ 40
brahma̍ mē̠dhavā̎ । madhu̍ mē̠dhavā̎ । brahma̍mē̠va madhu̍ mē̠dhavā̎ ॥ bra̠hmā dē̠vānā̎-mpada̠vīḥ ka̍vī̠nā-mṛṣi̠-rviprā̍ṇā-mmahi̠ṣō mṛ̠gāṇā̎m ।
śyē̠nō gṛddhrā̍ṇā̠g̠ svadhi̍ti̠-rvanā̍nā̠gṃ̠ sōma̍ḥ pa̠vitra̠-matyē̍ti̠ rēbhann̍ ॥
ha̠gṃ̠sa-śśu̍chi̠ṣa-dvasu̍rantarikṣa̠ saddhōtā̍- vēdi̠ṣa-dati̍thi-rdurōṇa̠sat ।
nṛ̠ṣadva̍ra̠-sadṛ̍ta̠-sa-dvyō̍ma̠-sada̠bjā- gō̠jā ṛ̍ta̠jā a̍dri̠jā ṛ̠ta-mbṛ̠hat ॥ ṛ̠chētvā̍ ru̠chētvā̠ sami-thsra̍vanti sa̠ritō̠ na dhēnā̎ḥ ।
a̠ntar-hṛ̠dā mana̍sā pū̠yamā̍nāḥ ।
ghṛ̠tasya̠ dhārā̍ a̠bhichā̍kaśīmi ।
hi̠ra̠ṇyayō̍ vēta̠sō maddhya̍ āsām ।
tasmi̎m-thsupa̠rṇō ma̍dhu̠kṛ-tku̍lā̠yī bhaja̍nnāstē̠ madhu̍ dē̠vatā̎bhyaḥ ।
tasyā̍ satē̠ hara̍ya-ssa̠ptatīrē̎ sva̠dhā-nduhā̍nā a̠mṛta̍sya̠ dhārā̎m । ya i̠da-ntrisu̍parṇa̠-mayā̍chita-mbrāhma̠ṇāya̍ dadyāt । vī̠ra̠ha̠tyāṃ vā ē̠tē ghna̍nti । yē brā̎hma̠ṇā-strisu̍parṇa̠-mpaṭha̍nti ।
tē sōma̠-mprāpnu̍vanti । ā̠sa̠ha̠srā-tpa̠ṅkti-mpuna̍nti । ōm ॥ 58 ॥

anuvākaṃ 41
mē̠dhādē̠vī ju̠ṣamā̍ṇā na̠ āgā̎-dvi̠śvāchī̍ bha̠drā su̍mana̠sya mā̍nā । tvayā̠ juṣṭā̍ nu̠damā̍nā du̠ruktā̎-nbṛ̠hadva̍dēma vi̠dathē̍ su̠vīrā̎ḥ ॥
tvayā̠ juṣṭa̍ ṛ̠ṣi-rbha̍vati dēvi̠ tvayā̠ brahmā̍-”ga̠taśrī̍ ru̠ta tvayā̎ । tvayā̠ juṣṭa̍śchi̠traṃ vi̍ndatē vasu̠ sā nō̍ juṣasva̠ dravi̍ṇō namēdhē ॥ 59 ॥

anuvākaṃ 42
mē̠dhā-mma̠ indrō̍ dadātu mē̠dhā-ndē̠vī sara̍svatī ।
mē̠dhā-mmē̍ a̠śvinā̍-vu̠bhāvādha̍ttā̠-mpuṣka̍rasrajā ॥ a̠phsa̠rāsu̍ cha̠ yā mē̠dhā ga̍ndha̠rvēṣu̍ cha̠ yanmana̍ḥ ।
daivī̎-mmē̠dhā sara̍svatī̠ sā mā̎-mmē̠dhā su̠rabhi̍-rjuṣatā̠g̠ svāhā̎ ॥ 60 ॥

anuvākaṃ 43
āmā̎-mmē̠dhā su̠rabhi̍-rvi̠śvarū̍pā̠ hira̍ṇyavarṇā̠ jaga̍tī jaga̠myā । ūrja̍svatī̠ paya̍sā̠ pinva̍mānā̠ sā mā̎-mmē̠dhā su̠pratī̍kā juṣantām ॥ 61 ॥

anuvākaṃ 44
mayi̍ mē̠dhā-mmayi̍ pra̠jā-mmayya̠gnistējō̍ dadhātu̠ mayi̍ mē̠dhā-mmayi̍ pra̠jā-mmayīndra̍ indri̠ya-nda̍dhātu̠ mayi̍ mē̠dhā-mmayi̍ pra̠jā-mmayi̠ sūryō̠ bhrājō̍ dadhātu ॥ 62 ॥

anuvākaṃ 45
apai̍tu mṛ̠tyu-ra̠mṛta̍nna̠ āga̍n vaivasva̠tō nō̠ abha̍yaṅkṛṇōtu । pa̠rṇaṃ vana̠spatē̍ rivā̠bhina̍-śśīyatāgṃ ra̠yi-ssacha̍tānna̠-śśachī̠pati̍ḥ ॥ 63 ॥

anuvākaṃ 46
para̍-mmṛtyō̠ anu̠ parē̍hi̠ panthā̠ṃ yastē̠sva ita̍rō dēva̠yānā̎t । chakṣu̍ṣmatē śṛṇva̠tē tē̎ bravīmi̠ māna̍ḥ pra̠jāgṃ rī̍riṣō̠ mōta vī̠rān ॥ 64 ॥

anuvākaṃ 47
vāta̍-mprā̠ṇa-mmana̍sā̠ nvāra̍bhāmahē pra̠jāpa̍ti̠ṃ yō bhuva̍nasya gō̠pāḥ । sanō̍ mṛ̠tyō strā̍yatā̠-mpātvagṃha̍sō̠ jyōg jī̠vā ja̠rāma̍śīmahi ॥ 65 ॥
anuvākaṃ 48
a̠mu̠tra̠ bhūyā̠dadha̠ yad ya̠masya̠ bṛha̍spatē a̠bhiśa̍stē̠ra mu̍ñchaḥ । pratyau̍hatā ma̠śvinā̍ mṛ̠tyu ma̍smā-ddē̠vānā̍magnē bhi̠ṣajā̠ śachī̍bhiḥ ॥ 66 ॥

anuvākaṃ 49
hari̠gṃ̠ hara̍nta̠- manu̍yanti dē̠vā viśva̠syēśā̍naṃ vṛṣa̠bha-mma̍tī̠nām । brahma̠ sarū̍pa̠-manu̍mē̠damā̍gā̠-daya̍na̠-mmā viva̍dhī̠-rvikra̍masva ॥ 67 ॥

anuvākaṃ 50
śalkai̍ra̠gni-mi̍ndhā̠na u̠bhau lō̠kau sa̍nēma̠ham ।
u̠bhayō̎ rlō̠kayā̍r-ṛ̠dhdvā-‘ti̍ mṛ̠tyu-nta̍rāmya̠ham ॥ 68 ॥

anuvākaṃ 51
mā Chi̍dō mṛtyō̠ mā va̍dhī̠rmā mē̠ bala̠ṃ vivṛ̍hō̠ mā pramō̍ṣīḥ । pra̠jā-mmā mē̍ rīriṣa̠ āyu̍rugra nṛ̠chakṣa̍sa-ntvā ha̠viṣā̍ vidhēma ॥ 69 ॥

anuvākaṃ 52
mā nō̍ ma̠hānta̍mu̠ta mā nō̍ arbha̠ka-mmā na̠ ukṣa̍ntamu̠ta mā na̍ ukṣi̠tam ।
mā nō̍ vadhīḥ pi̠tara̠-mmōta mā̠tara̍-mpri̠yā mā na̍sta̠nuvō̍ rudra rīriṣaḥ ॥ 70 ॥

anuvākaṃ 53
mā na̍stō̠kē tana̍yē̠ mā na̠ āyu̍ṣi̠ mā nō̠ gōṣu̠ mā nō̠ aśvē̍ṣu rīriṣaḥ । vī̠rānmā nō̍ rudra bhāmi̠tōva̍dhīr-ha̠viṣma̍ntō̠ nama̍sā vidhēma tē ॥ 71 ॥

anuvākaṃ 54
prajā̍patē̠ na tvadē̠tā-nya̠nyō viśvā̍ jā̠tāni̠ pari̠tā ba̍bhūva । ya-tkā̍māstē juhu̠mastannō̍ astu va̠yagg​ syā̍ma̠ pata̍yō rayī̠ṇām ॥ 72 ॥

anuvākaṃ 55
sva̠sti̠dā vi̠śaspati̍-rvṛtra̠hā vimṛdhō̍ va̠śī ।
vṛṣēndra̍ḥ pu̠ra ē̍tu nassvasti̠dā a̍bhaya-ṅka̠raḥ ॥ 73 ॥

anuvākaṃ 56
trya̍mbakaṃ yajāmahē suga̠ndhi-mpu̍ṣṭi̠vardha̍nam । u̠rvā̠ru̠kami̍va̠ bandha̍nā-nmṛ̠tyō-rmu̍kṣīya̠ mā-‘mṛtā̎t ॥ 74 ॥

anuvākaṃ 57
yē tē̍ sa̠hasra̍ma̠yuta̠-mpāśā̠ mṛtyō̠ martyā̍ya̠ hanta̍vē । tān. ya̠jñasya̍ mā̠yayā̠ sarvā̠nava̍ yajāmahē ॥ 75 ॥

anuvākaṃ 58
mṛ̠tyavē̠ svāhā̍ mṛ̠tyavē̠ svāhā̎ ॥ 76 ॥

anuvākaṃ 59
dē̠vakṛ̍ta̠syaina̍sō-‘va̠yaja̍namasi̠ svāhā̎ ।
ma̠nu̠ṣyakṛ̍ta̠syaina̍sō ‘va̠yaja̍namasi̠ svāhā̎ ।
pi̠tṛkṛ̍ta̠syaina̍sō ‘va̠yaja̍namasi̠ svāhā̎ ।
ā̠tmakṛ̍ta̠syaina̍sō ‘va̠yaja̍namasi̠ svāhā̎ ।
a̠nyakṛ̍ta̠syaina̍sō ‘va̠yaja̍namasi̠ svāhā̎ ।
a̠smatkṛ̍ta̠syaina̍sō ‘va̠yaja̍namasi̠ svāhā̎ ।
yaddi̠vā cha̠ nakta̠-ñchaina̍śchakṛ̠ma tasyā̍ va̠yaja̍namasi̠ svāhā̎ ।
ya-thsva̠panta̍ścha̠ jāgra̍ta̠-śchaina̍ścha-kṛ̠ma tasyā̍ va̠yaja̍namasi̠ svāhā̎ ।
ya-thsu̠ṣupta̍ścha̠ jāgra̍ta̠-śchaina̍ścha-kṛ̠ma tasyā̍ va̠yaja̍namasi̠ svāhā̎ ।
ya-dvi̠dvāgṃsa̠śchā vi̍dvāgṃsa̠śchaina̍ścha-kṛ̠ma tasyā̍ va̠yaja̍namasi̠ svāhā̎ ।
ēnasa ēnasō vayajanama̍si svā̠hā ॥ 77 ॥

anuvākaṃ 60
yadvō̍ dēvāśchakṛ̠ma ji̠hvayā̍ gu̠rumana̍sō vā̠ prayu̍tī dēva̠ hēḍa̍nam ।
arā̍vā̠yō nō̍ a̠bhidu̍chChunā̠yatē̠ tasmi̠-ntadēnō̍ vasavō̠ nidhē̍tana̠ svāhā̎ ॥ 78 ॥

anuvākaṃ 61
kāmō-‘kār​ṣī̎-nnamō̠ namaḥ ।
kāmō-‘kār​ṣī-tkāmaḥ karōti nāha-ṅkarōmi
kāmaḥ kartā nāha-ṅkartā kāma̍ḥ kāra̠yitā nāha̍-ṅkāra̠yitā ēṣa tē kāma kāmā̍ya svā̠hā ॥ 79 ॥

anuvākaṃ 62
manyurakār​ṣī̎-nnamō̠ namaḥ ।
manyurakār​ṣī-nmanyuḥ karōti nāha-ṅkarōmi manyuḥ kartā nāha-ṅkartā manyu̍ḥ kāra̠yitā nāha̍-ṅkāra̠yitā ēṣa tē manyō manya̍vē svā̠hā ॥ 80 ॥

anuvākaṃ 63
tilāñjuhōmi sarasāgṃ sapiṣṭā-ngandhāra mama chittē rama̍ntu svā̠hā ॥ gāvō hiraṇya-ndhanamannapānagṃ sarvēṣāg​ śri̍yai svā̠hā ॥ śriyañcha lakṣmiñcha puṣṭiñcha kīrti̍-ñchā nṛ̠ṇyatām ।
brahmaṇya-mba̍hupu̠tratām । śraddhāmēdhē prajā-ssandadā̍tu svā̠hā ॥ 81 ॥

anuvākaṃ 64
tilāḥ kṛṣṇā-sti̍lā-śśvē̠tā̠-stilā-ssaumyā va̍śānu̠gāḥ ।
tilāḥ punantu̍ mē pā̠pa̠ṃ yatkiñchi-ddurita-mma̍yi svā̠hā ॥ chōra̠syānna-nna̍vaśrā̠ddha̠-mbra̠hma̠hā gu̍ruta̠lpagaḥ । gōstēyagṃ sa̍rāpā̠na̠-mbhrūṇahatyā tilā śāntigṃ śamaya̍ntu svā̠hā ॥
śrīścha lakṣmīścha puṣṭīścha kīrti̍-ñchā nṛ̠ṇyatām ।
brahmaṇya-mba̍hupu̠tratām ।
śraddhāmēdhē prajñātu jātavēda-ssandadā̍tu svā̠hā ॥ 82 ॥

anuvākaṃ 65
prāṇāpāna-vyānōdāna-samānā mē̍ śuddhya̠ntā̠ṃ
jyōti̍ ra̠haṃ vi̠rajā̍ vipā̠pmā bhū̍yāsa̠gg̠ svāhā̎ ॥
vāṃ-mana-śchakṣuḥ-śrōtra-jihvā-ghrāṇa-rētō-buddhyākūti-ssaṅkalpā mē̍ śuddhya̠ntā̠-ñjyōti̍ ra̠haṃ vi̠rajā̍ vipā̠pmā bhū̍yāsa̠gg̠ svāhā̎ ॥
tvak-charma-māgṃsa-rudhira-mēdō-majjā-snāyavō-‘sthīni
mē̍ śuddhya̠ntā̠-ñjyōti̍ ra̠haṃ vi̠rajā̍ vipā̠pmā bhū̍yāsa̠gg̠ svāhā̎ ॥
śiraḥ pāṇi pāda pār​śva pṛṣṭhō-rūdara-jaṅgha-śiśrnōpastha pāyavō mē̍ śuddhya̠ntā̠-ñjyōti̍ ra̠haṃ vi̠rajā̍ vipā̠pmā bhū̍yāsa̠gg̠ svāhā̎ ॥
uttiṣṭha puruṣa harita-piṅgala lōhitākṣi dēhi dēhi dadāpayitā mē̍ śuddhya̠ntā̠-ñjyōti̍ ra̠haṃ vi̠rajā̍ vipā̠pmā bhū̍yāsa̠gg̠ svāhā̎ ॥ 83 ॥

anuvākaṃ 66
pṛthivyāpa stējō vāyu-rākāśā mē̍ śuddhya̠ntā̠ṃ
jyōti̍ ra̠haṃ vi̠rajā̍ vipā̠pmā bhū̍yāsa̠gg̠ svāhā̎ ॥
śabda-spar​śa-rūparasa-gandhā mē̍ śuddhya̠ntā̠ṃ
jyōti̍ ra̠haṃ vi̠rajā̍ vipā̠pmā bhū̍yāsa̠gg̠ svāhā̎ ॥
manō-vāk-kāya-karmāṇi mē̍ śuddhya̠ntā̠ṃ
jyōti̍ ra̠haṃ vi̠rajā̍ vipā̠pmā bhū̍yāsa̠gg̠ svāhā̎ ॥
avyaktabhāvai-ra̍haṅkā̠ra̠-rjyōti̍ ra̠haṃ vi̠rajā̍ vipā̠pmā bhū̍yāsa̠gg̠ svāhā̎ ॥
ātmā mē̍ śuddhya̠ntā̠-ñjyōti̍ ra̠haṃ vi̠rajā̍ vipā̠pmā bhū̍yāsa̠gg̠ svāhā̎ ॥
antarātmā mē̍ śuddhya̠ntā̠-ñjyōti̍ ra̠haṃ vi̠rajā̍ vipā̠pmā bhū̍yāsa̠gg̠ svāhā̎ ॥
paramātmā mē̍ śuddhya̠ntā̠-ñjyōti̍ ra̠haṃ vi̠rajā̍ vipā̠pmā bhū̍yāsa̠gg̠ svāhā̎ ॥
kṣu̠dhē svāhā̎ ॥ kṣutpi̍pāsāya̠ svāhā̎ ॥
vivi̍ṭyai̠ svāhā̎ ॥ ṛgvi̍dhānāya̠ svāhā̎ ॥ ka̠ṣō̎tkāya̠ svāhā̎ ॥
kṣu̠tpi̠pā̠sāma̍la-ñjyē̠ṣṭhā̠ma̠la̠kṣmī-rnā̍śayā̠myaham ।
abhū̍ti̠-masa̍mṛddhi̠ñcha̠ sarvāṃ (sarvā) nirṇuda mē pāpmā̍nagg​ svā̠hā ॥
annamaya-prāṇamaya-manōmaya-vijñānamaya-mānandamaya-mātmā mē̍ śuddhya̠ntā̠-ñjyōti̍ ra̠haṃ vi̠rajā̍ vipā̠pmā bhū̍yāsa̠gg̠ svāhā̎ ॥ 84 ॥

anuvākaṃ 67
a̠gnayē̠ svāhā̎ । viśvē̎bhyō dē̠vēbhya̠-ssvāhā̎ । dhru̠vāya̍ bhū̠māya̠ svāhā̎ । dhru̠va̠kṣita̍yē̠ svāhā̎ । a̠chyu̠ta̠kṣita̍yē̠ svāhā̎ । a̠gnayē̎ sviṣṭa̠kṛtē̠ svāhā̎ ॥ dharmā̍ya̠ svāhā̎ । adha̍rmāya̠ svāhā̎ । a̠dbhya-ssvāhā̎ । ō̠ṣa̠dhi̠va̠na̠spa̠tibhya̠-ssvāhā̎ ॥ 85 ॥

ra̠kṣō̠dē̠va̠ja̠nēbhya̠-ssvāhā̎ ।
gṛhyā̎bhya̠-ssvāhā̎ । a̠va̠sānē̎bhya̠-ssvāhā̎ । a̠va̠sāna̍patibhya̠-ssvāhā̎ ।
sa̠rva̠bhū̠tēbhya̠-ssvāhā̎ । kāmā̍ya̠ svāhā̎ । a̠ntari̍kṣāya̠ svāhā̎ । yadēja̍ti̠ jaga̍ti̠ yachcha̠ chēṣṭa̍ti̠ nāmnō̍ bhā̠gō-‘ya-nnāmnē̠ svāhā̎ ।
pṛ̠thi̠vyai svāhā̎ । a̠ntari̍kṣāya̠ svāhā̎ ॥ 86 ॥

di̠vē svāhā̎ । sūryā̍ya̠ svāhā̎ । cha̠ndrama̍sē̠ svāhā̎ । nakṣa̍trēbhya̠-ssvāhā̎ । indrā̍ya̠ svāhā̎ । bṛha̠spata̍yē̠ svāhā̎ । pra̠jāpa̍tayē̠ svāhā̎ ।
brahma̍ṇē̠ svāhā̎ । sva̠dhā pi̠tṛbhya̠-ssvāhā̎ ।
namō̍ ru̠drāya̍ paśu̠pata̍yē̠ svāhā̎ ॥ 87 ॥

dē̠vēbhya̠-ssvāhā̎ । pi̠tṛbhya̍-ssva̠dhā-‘stu̍ । bhū̠tēbhyō̠ nama̍ḥ । ma̠nu̠ṣyē̎bhyō̠ hantā̎ । pra̠jāpa̍tayē̠ svāhā̎ । pa̠ra̠mē̠ṣṭhinē̠ svāhā̎ ॥
yathā kū̍pa-śśa̠tadhā̍ra-ssa̠hasra̍dhārō̠ akṣi̍taḥ ।
ē̠vā mē̍ astu dhā̠nyagṃ sa̠hasra̍dhāra̠-makṣi̍tam । dhana̍dhānyai̠ svāhā̎ ॥
yē bhū̠tāḥ pra̠chara̍nti̠ divā̠nakta̠-mbali̍-mi̠chChantō̍ vi̠tuda̍sya̠ prēṣyā̎ḥ । tēbhyō̍ ba̠li-mpu̍ṣṭi̠kāmō̍ harāmi̠ mayi̠ puṣṭi̠-mpuṣṭi̍pati-rdadhātu̠ svāhā̎ ॥ 88 ॥
(ō̠ṣa̠dhi̠va̠na̠spa̠tibhya̠-ssvāhā̠ – ‘ntari̍kṣāya̠ svāhā̠ – namō̍ ru̠drāya̍ paśu̠pata̍yē̠ svāhā̍ – vi̠tuda̍sya̠ prēṣyā̠ ēka̍-ñcha) (a. 67)

anuvākaṃ 68
ō̎-nta-dbra̠hma । ō̎-nta-dvā̠yuḥ । ō̎-ntadā̠tmā । ō̎-nta-thsa̠tyam । ō̎-nta-thsarva̎m । ō̎-nta-tpurō̠-rnamaḥ ।
antaścharati̍ bhūtē̠ṣu̠ guhāyāṃ vi̍śva mū̠rtiṣu ।
tvaṃ yajñastvaṃ vaṣaṭkārastva-midrastvagṃ rudrastvaṃviṣṇustva-mbrahmatva̍-mprajā̠patiḥ ।
tva-nta̍dāpa̠ āpō̠ jyōtī̠ rasō̠-‘mṛta̠-mbrahma̠ bhūrbhuva̠ssuva̠rōm ॥ 89 ॥

anuvākaṃ 69
śra̠ddhāyā̎-mprā̠ṇē nivi̍ṣṭō̠-‘mṛta̍-ñjuhōmi ।
śra̠ddhāyā̍mapā̠nē nivi̍ṣṭō̠-‘mṛta̍-ñjuhōmi ।
śra̠ddhāyā̎ṃ vyā̠nē nivi̍ṣṭō̠-‘mṛta̍-ñjuhōmi ।
śra̠ddhāyā̍mudā̠nē nivi̍ṣṭō̠-‘mṛta̍-ñjuhōmi ।
śra̠ddhāyāgṃ̍ samā̠nē nivi̍ṣṭō̠-‘mṛta̍-ñjuhōmi ।
brahma̍ṇi ma ā̠tmā-‘mṛ̍ta̠tvāya̍ ॥ a̠mṛ̠tō̠pa̠stara̍ṇamasi ॥
śra̠ddhāyā̎-mprā̠ṇē nivi̍ṣṭō̠-‘mṛta̍-ñjuhōmi ।
śi̠vō mā̍ vi̠śāpra̍dāhāya । prā̠ṇāya̠ svāhā̎ ।
śra̠ddhāyā̍mapā̠nē nivi̍ṣṭō̠-‘mṛta̍-ñjuhōmi ।
śi̠vō mā̍ vi̠śāpra̍dāhāya । a̠pā̠nāya̠ svāhā̎ ।
śra̠ddhāyā̎ṃ vyā̠nē nivi̍ṣṭō̠-‘mṛta̍-ñjuhōmi । śi̠vō mā̍ vi̠śāpra̍dāhāya । vyā̠nāya̠ svāhā̎ ।
śra̠ddhāyā̍-mudā̠nē nivi̍ṣṭō̠-‘mṛta̍-ñjuhōmi ।
śi̠vō mā̍ vi̠śāpra̍dāhāya । u̠dā̠nāya̠ svāhā̎ ।
śra̠ddhāyāgṃ̍ samā̠nē nivi̍ṣṭō̠-‘mṛta̍-ñjuhōmi । śi̠vō mā̍ vi̠śāpra̍dāhāya । sa̠mā̠nāya̠ svāhā̎ ।
brahma̍ṇi ma ā̠tmā-‘mṛ̍ta̠tvāya̍ ॥ a̠mṛ̠tā̠pi̠dhā̠nama̍si ॥ 90 ॥

anuvākaṃ 70
śra̠ddhāyā̎-mprā̠ṇē nivi̍śyā̠-‘mṛtagṃ̍ hu̠tam । prā̠ṇa mannē̍nāpyāyasva ।
śra̠ddhāyā̍mapā̠nē nivi̍śyā̠-‘mṛtagṃ̍ hu̠tam । a̠pā̠na mannē̍nāpyāyasva ।
śra̠ddhāyā̎ṃ vyā̠nē nivi̍śyā̠-‘mṛtagṃ̍ hu̠tam । vyā̠na mannē̍nāpyāyasva ।
śra̠ddhāyā̍-mudā̠nē nivi̍śyā̠-‘mṛtagṃ̍ hu̠tam । u̠dā̠na mannē̍nāpyāyasva ।
śra̠ddhāyāgṃ̍ samā̠nē nivi̍śyā̠-‘mṛtagṃ̍ hu̠tam ।
sa̠māna̠ mannē̍nāpyāyasva ॥ 91 ॥

anuvākaṃ 71
aṅguṣṭhamātraḥ puruṣō-‘ṅguṣṭhañcha̍ samā̠śritaḥ ।
īśa-ssarvasya jagataḥ prabhuḥ prīṇāti̍ viśva̠bhuk ॥ 92 ॥

anuvākaṃ 72
vāmma̍ ā̠sann । na̠sōḥ prā̠ṇaḥ । a̠kṣyō-śchakṣu̍ḥ । karṇa̍yō̠-śśrōtra̎m । bā̠hu̠vō-rbala̎m । ū̠ru̠vō rōja̍ḥ । ari̍ṣṭā̠ viśvā̠nyaṅgā̍ni ta̠nūḥ ।
ta̠nuvā̍ mē sa̠ha nama̍stē astu̠ mā mā̍ higṃsīḥ ॥ 93 ॥

anuvākaṃ 73
vaya̍-ssupa̠rṇā upa̍sēdu̠rindra̍-mpri̠ya mē̍dhā̠ ṛṣa̍yō̠ nādha̍mānāḥ । apa̍ddhvā̠nta mū̎rṇu̠hi pū̠rdhi chakṣu̍-rmumu̠gdhya̍smā-nni̠dhayē̍ ‘vaba̠ddhān ॥ 94 ॥

anuvākaṃ 74
prāṇānā-ṅgranthirasi rudrō mā̍ viśā̠ntakaḥ ।
tēnānnēnā̎-pyāya̠sva ॥ 95 ॥

anuvākaṃ 75
namō rudrāya viṣṇavē mṛtyu̍rmē pā̠hi ॥ 96 ॥

anuvākaṃ 76
tvama̍gnē̠ dyubhi̠-stvamā̍śu-śu̠kṣaṇi̠-stvama̠dbhya-stvamaśma̍na̠spari̍ । tvaṃ vanē̎bhya̠-stvamōṣa̍dhībhya̠-stva-nnṛ̠ṇā-nnṛ̍patē jāyasē̠ śuchi̍ḥ ॥ 97 ॥

anuvākaṃ 77
śi̠vēna̍ mē̠ santi̍ṣṭhasva syō̠nēna̍ mē̠ santi̍ṣṭhasva subhū̠tēna̍ mē̠ santi̍ṣṭhasva brahmavarcha̠sēna̍ mē̠ santi̍ṣṭhasva ya̠jñasyardhi̠ manu̠ santi̍ṣṭha̠ svōpa̍ tē yajña̠ nama̠ upa̍ tē̠ nama̠ upa̍ tē̠ nama̍ḥ ॥ 98 ॥

anuvākaṃ 78
sa̠tya-mpara̠-mparagṃ̍ sa̠tyagṃ sa̠tyēna̠ na su̍va̠rgā-llō̠kāchchya̍vantē
ka̠dācha̠na sa̠tāgṃ hi sa̠tya-ntasmā̎-thsa̠tyē ra̍mantē̠, (1)

tapa̠ iti̠ tapō̠ nānaśa̍nā̠-tpara̠ṃ yaddhi para̠-ntapa̠sta-ddudha̍r​ṣa̠ṃ
ta-ddurā̍dhar​ṣa̠-ntasmā̠-ttapa̍si ramantē̠, (2)

dama̠ iti̠ niya̍ta-mbrahmachā̠riṇa̠-stasmā̠-ddamē̍ ramantē̠, (3)

śama̠ ityara̍ṇyē mu̠naya̠-stasmā̠chChamē̍ ramantē, (4)

dā̠namiti̠ sarvā̍ṇi bhū̠tāni̍ pra̠śagṃsa̍nti dā̠nānnāti̍ du̠śchara̠-ntasmā̎-ddā̠nē ra̍mantē, (5)
dha̠rma iti̠ dharmē̍ṇa̠ sarva̍mi̠da-mpari̍gṛhīta-ndha̠rmānnāti̍-du̠ṣkara̠ṃ
tasmā̎–ddha̠rmē ra̍mantē, (6)

pra̠jana̠ iti̠ bhūyāgṃ̍̍sa̠-stasmā̠-dbhūyi̍ṣṭhā̠ḥ prajā̍yantē̠ tasmā̠-dbhūyi̍ṣṭhāḥ pra̠jana̍nē ramantē̠, (7)

-‘gnaya̠ ityā̍ha̠ tasmā̍-da̠gnaya̠ ādhā̍tavyā agnihō̠tra-mityā̍ha̠ tasmā̍-dagnihō̠trē ra̍mantē, (8)

ya̠jña iti̍ ya̠jñō hi dē̠vā stasmā̎-dya̠jñē ra̍mantē, (9)

māna̠sa-miti̍ vi̠dvāgṃsa̠-stasmā̎-dvi̠dvāgṃsa̍ ē̠va mā̍na̠sē
ra̍mantē, (10)

nyā̠sa iti̍ bra̠hmā bra̠hmā hi para̠ḥ parō̍ hi bra̠hmā tāni̠ vā ē̠tānyava̍rāṇi̠
parāgṃ̍si nyā̠sa ē̠vātya̍rēchaya̠-dya ē̠vaṃ vēdē̎tyupa̠niṣat ॥ 99 ॥

anuvākaṃ 79
prā̠jā̠pa̠tyō hāru̍ṇi-ssupa̠rṇēya̍ḥ pra̠jāpa̍ti-mpi̠tara̠-mupa̍sasāra̠ ki-mbha̍gava̠ntaḥ pa̍ra̠maṃ va̍da̠ntīti̠ tasmai̠ prō̍vācha, (1)

sa̠tyēna̍ vā̠yurāvā̍ti sa̠tyē-nā̍di̠tyō rō̍chatē di̠vi sa̠tyaṃ vā̠chaḥ pra̍ti̠ṣṭhā sa̠tyē sa̠rva-mprati̍ṣṭhita̠-ntasmā̎-thsa̠tya-mpa̍ra̠maṃ vada̍nti̠, (2)

tapa̍sā dē̠vā dē̠vatā̠-magra̍ āya̠-ntapa̠sar​ṣa̍ya̠-ssuva̠ranva̍-vinda̠-ntapa̍sā sa̠patnā̠-npraṇu̍dā̠-mārā̍tī̠ stapa̍si sa̠rva-mprati̍ṣṭhita̠-ntasmā̠-ttapa̍ḥ para̠maṃ vada̍nti̠, (3)

damē̍na dā̠ntāḥ ki̠lbiṣa̍-mavadhū̠nvanti̠ damē̍na brahmachā̠riṇa̠-ssuva̍ragachCha̠-ndamō̍ bhū̠tānā̎-ndurā̠dhar​ṣa̠-ndamē̍ sa̠rva-mprati̍ṣṭhita̠-ntasmā̠-ddama̍ḥ para̠maṃ vada̍nti̠, (4)

śamē̍na śā̠ntā-śśi̠va-mā̠chara̍nti̠ śamē̍na nā̠ka-mmu̠nayō̠-‘nvavi̍nda̠n Chamō̍ bhū̠tānā̎-ndurā̠dhar​ṣa̠-ñChamē̍ sa̠rva-mprati̍ṣṭhita̠-ntasmā̠chChama̍ḥ para̠maṃ vada̍nti, (5)

dā̠naṃ ya̠jñānā̠ṃ varū̍tha̠-ndakṣi̍ṇā lō̠kē dā̠tāragṃ̍ sarva bhū̠tānyu̍pajī̠vanti̍ dā̠nēnārā̍tī̠-rapā̍nudanta dā̠nēna̍ dviṣa̠ntō mi̠trā bha̍vanti dā̠nē sa̠rva-mprati̍ṣṭhita̠-ntasmā̎-ddā̠na-mpa̍ra̠maṃ vada̍nti, (6)

dha̠rmō viśva̍sya̠ jaga̍taḥ prati̠ṣṭhā lō̠kē dha̠rmiṣṭha̍-mpra̠jā u̍pasa̠rpanti̍ dha̠rmēṇa̍ pā̠pa-ma̍pa̠nuda̍ti dha̠rmē sa̠rva-mprati̍ṣṭhita̠-ntasmā̎-ddha̠rma-mpa̍ra̠maṃ vada̍nti, (7)

pra̠jana̍na̠ṃ vai pra̍ti̠ṣṭhā lō̠kē sā̠dhu pra̠jāyā̎ sta̠ntun-ta̍nvā̠naḥ pi̍tṛ̠ṇā
ma̍nṛ̠ṇō bhava̍ti̠ tadē̍va ta̠syā anṛ̍ṇa̠-ntasmā̎-tpra̠jana̍na-mpara̠maṃ vada̍ntya̠, (8)

gnayō̠ vai trayī̍ vi̠dyā dē̍va̠yāna̠ḥ panthā̍ gār​hapa̠tya ṛk-pṛ̍thi̠vī ra̍thanta̠ra -ma̍nvāhā-rya̠pacha̍na̠ṃ yaju̍ra̠ntari̍kṣaṃ vāmadē̠vya mā̍hava̠nīya̠-ssāma̍suva̠rgō lō̠kō bṛ̠hat-tasmā̍-da̠gnī-npa̍ra̠maṃ vada̍ntya, (9)

gnihō̠tragṃ sā̍ya-mprā̠ta-rgṛ̠hāṇā̠ṃ-niṣkṛ̍ti̠-ssvi̍ṣṭagṃ suhu̠taṃ ya̍jñakratū̠nā-mprāya̍ṇagṃ suva̠rgasya̍ lō̠kasya̠ jyōti̠-stasmā̍-dagnihō̠tra-mpa̍ra̠maṃ vada̍nti, (10)

ya̠jña iti̍ ya̠jñēna̠ hi dē̠vā diva̍-ṅga̠tā ya̠jñēnāsu̍rā̠-napā̍nudanta ya̠jñēna̍ dviṣa̠ntō mi̠trā bha̍vanti ya̠jñē sa̠rva-mprati̍ṣṭhita̠-ntasmā̎-dya̠jña-mpa̍ra̠maṃ vada̍nti, (11)

māna̠saṃ vai prā̍jāpa̠tya-mpa̠vitra̍-mmāna̠sēna̠ mana̍sā sā̠dhu pa̍śyati māna̠sā ṛṣa̍yaḥ pra̠jā a̍sṛjanta māna̠sē sa̠rva-mprati̍ṣṭhita̠-ntasmā̎-nmāna̠sa-mpa̍ra̠maṃ vada̍nti, (12)

nyā̠sa i̠tyāhu̍-rmanī̠ṣiṇō̎ bra̠hmāṇa̍-mbra̠hmā viśva̍ḥ kata̠ma-ssva̍ya̠bhuṃḥ pra̠jāpa̍ti-ssaṃvathsara̠ iti̍, (13)

saṃvathsa̠rō̍ ‘sāvā̍di̠tyō ya ē̠ṣa ā̍di̠tyē puru̍ṣa̠-ssa pa̍ramē̠ṣṭhī brahmā̠tmā, (14)

yābhi̍rādi̠tya-stapa̍ti ra̠śmibhi̠stābhi̍ḥ pa̠rjanyō̍ var​ṣati pa̠rjanyē̍-nauṣadhi-vanaspa̠taya̠ḥ prajā̍yanta ōṣadhi-vanaspa̠tibhi̠-ranna̍-mbhava̠tyannē̍na prā̠ṇāḥ prā̠ṇai-rbala̠-mbalē̍na̠ tapa̠-stapa̍sā śra̠ddhā śra̠ddhayā̍ mē̠dhā mē̠dhayā̍ manī̠ṣā ma̍nī̠ṣayā̠ manō̠ mana̍sā̠ śānti̠-śśāntyā̍ chi̠tta-ñchi̠ttēna̠ smṛti̠gg̠ smṛtyā̠ smāra̠gg̠ smārē̍ṇa vi̠jñāna̍ṃ vi̠jñānē̍-nā̠tmāna̍ṃ vēdayati̠ tasmā̍da̠nna-ndada̠n-thsarvā̎ṇyē̠tāni̍ dadā̠-tyannā̎-tprā̠ṇā bha̍vanti bhū̠tānā̎-mprā̠ṇai-rmanō̠ mana̍saścha vi̠jñāna̍ṃ vi̠jñānā̍-dāna̠ndō bra̍hma yō̠niḥ, (15)

sa vā ē̠ṣa puru̍ṣaḥ pañcha̠dhā pa̍ñchā̠tmā yēna̠ sarva̍mi̠da-mprōta̍-mpṛthi̠vī chā̠ntari̍kṣa-ñcha̠ dyauścha̠ diśa̍śchāvāntaradi̠śāścha̠ sa vai sarva̍mi̠da-ñjaga̠thsa sa̠bhūtagṃ̍ sa bha̠vya-ñji̍jñāsa klṛ̠pta ṛ̍ta̠jā rayi̍ṣṭhā śra̠ddhā sa̠tyō maha̍svā-nta̠pasō̠ pari̍ṣṭhā̠d, (vari̍ṣṭhā̠d) (16)

jñātvā̍ tamē̠va-mmana̍sā hṛ̠dā cha̠ bhūyō̍ na mṛ̠tyu-mupa̍yāhi vi̠dvān (17)

tasmā̎-nnyā̠sa-mē̠ṣā-ntapa̍sā-matirikta̠māhu̍r, (18)

vasura̠ṇvō̍ vi̠bhūra̍si prā̠ṇē tvamasi̍ sandhā̠tā brahma̍-ntvamasi̍ viśva̠dhṛttē̍-jō̠dās tvama̍sya̠gni-ra̍si varchō̠dā-stvama̍si̠ sūrya̍sya dyumnō̠dā stvama̍si cha̠ndrama̍sa upayā̠magṛ̍hītō-‘si bra̠hmaṇē̎
tvā̠ mahasa̠, (19)

ōmityā̠tmāna̍ṃ yuñjītai̠tadvai ma̍hōpa̠niṣa̍da-ndē̠vānā̠-ṅguhya̠ṃ ya ē̠vaṃ vēda̍
bra̠hmaṇō̍ mahi̠māna̍-māpnōti̠ tasmā̎-dbra̠hmaṇō̍ mahi̠māna̍-mityupa̠niṣat ॥ 100 ॥

anuvākaṃ 80
tasyai̠vaṃ vi̠duṣō̍ ya̠jñasyā̠tmā yaja̍mānaḥ-śra̠dhdāpatnī̠ śarī̍ra-mi̠ddhmamurō̠ vēdi̠-rlōmā̍ni ba̠ra̠.hi-rvē̠daḥ-śikhā̠ hṛda̍ya̠ṃ yūpa̠ḥ kāma̠ ājya̍-mma̠nyuḥ pa̠śu-stapō̠-‘gni-rdama̍-śśamayi̠tā dakṣi̍ṇā̠-vāghōtā̎ prā̠ṇa u̍dga̠tā chakṣu̍radhva̠ryu-rmanō̠ brahmā̠ śrōtra̍ma̠gnī-

dyāva̠dhdriya̍tē̠ sā dī̠kṣā yadaśrnā̍ti̠ tadhdavi̠-ryatpiba̍ti̠ tada̍sya sōmapā̠naṃ yadrama̍tē̠ tadu̍pa̠sadō̠ ya-thsa̠ñchara̍-tyupa̠viśa̍-tyu̠ttiṣṭha̍tē cha̠ sapra̍va̠rgyō̍ yanmukha̠-ntadā̍hava̠nīyō̠ yā vyāhṛ̍ti-rāhu̠ti-ryada̍sya vi̠jñāna̠-ntajju̠hōti̠ yathsā̠ya-mprā̠tara̍tti̠ tathsa̠midha̠ṃ yatprā̠ta-rma̠ddhyandi̍nagṃ sā̠ya-ñcha̠ tāni̠ sava̍nāni̠

yē a̍hōrā̠trē tē da̍r​śapūrṇamā̠sau yē̎-‘rdhamā̠sāścha̠ māsā̎ścha̠ tē chā̍turmā̠syāni̠ ya ṛ̠tava̠stē pa̍śuba̠ndhā yē sa̍ṃvathsa̠rāścha̍ parivathsa̠rāścha̠ tē-‘ha̍rga̠ṇā-ssa̍rva vēda̠saṃ vā ē̠ta-thsa̠traṃ yanmara̍ṇa̠-ntada̍va̠bhṛtha̍

ē̠tadvai ja̍rāmarya-magnihō̠tragṃ sa̠traṃ ya ē̠vaṃ vi̠dvā-nu̍da̠gaya̍nē pra̠mīya̍tē dē̠vānā̍mē̠va ma̍hi̠māna̍-ṅga̠tvā-”di̠tyasya̠ sāyu̍jya-ṅgachCha̠tyatha̠ yō da̍kṣi̠ṇē pra̠mīya̍tē pitṛ̠ṇā-mē̠va ma̍hi̠māna̍-ṅga̠tvā cha̠ndrama̍sa̠-ssāyu̍jyagṃ salō̠katā̍-māpnōtyē̠tau vai sū̎ryā chandra̠masau̎-rmahi̠mānau̎ brāhma̠ṇō vi̠dvā-na̠bhija̍yati̠ tasmā̎-dbra̠hmaṇō̍ mahi̠māna̍māpnōti̠ tasmā̎-dbra̠hmaṇō̍ mahi̠māna̍-mityupa̠niṣat ॥ 101 ॥

sa̠ha nā̍ vavatu । sa̠ha nau̍ bhunaktu । sa̠ha vī̠rya̍-ṅkaravāvahai ।
tē̠ja̠svinā̠ vadhī̍tamastu̠ mā vi̍dviṣā̠vahai̎ ॥
ōṃ śānti̠-śśānti̠-śśānti̍ḥ ॥

॥ iti mahānārāyaṇōpaniṣa-thsamāptā ॥

(ambha̠syaika̍pañchā̠śachCha̠taṃ – jā̠tavē̍dasē̠ chatu̍rdaśa̠ – bhūranna̠ṃ – bhūra̠gnayē̠ – bhūra̠gnayē̠ chaika̍mēkaṃ – pāhi – pā̠hi cha̠tvāri̍ chatvāri̠ – yaśChanda̍sā̠-ndvē – namō̠ brahma̍ṇē – ṛ̠ta-ntapō̠ – yathā̍ vṛ̠kṣasyaika̍ mēka – ma̠ṇōraṇī̍yā̠g̠ śchatu̍strigṃśath – sahasra̠śī̍ṣa̠gṃ̠ ṣaṭvi̍gṃśati – rādi̠tyō vā ē̠ṣa – ā̍di̠tyō vai tēja̠ ēka̍mēka̠ṃ – nidha̍napatayē̠ trayō̍vigṃśatiḥ – sa̠dyōjā̠ta-ntrīṇi̍ – vāmadē̠vāyaika̍ – ma̠ghōrē̎bhya̠ – statpuru̍ṣāya̠ dvē dvē̠ – īśānō – namō hiraṇyabāhava̠ ēka̍mēka – mṛ̠tagṃ sa̠tya-ndvē – sarvō̠ vai cha̠tvāri̠ – kadru̠drāya̠ trīṇi̠ – yasya̠ vai kaṅka̍tī – kṛṇu̠ṣva pājō – ‘di̍ti̠ – rāpō̠ vā i̠dagṃ sarva̠ mēka̍mēka̠ – māpa̍ḥ punantu cha̠tvā – ryagniścha – sūryaścha nava̍ – na̠vōmiti̍ cha̠tvā – ryāyā̍tu̠ pachau – jō̍-‘si̠ daśō̠ – ttamē̍ cha̠tvāri̠ – ghṛṇi̠strīṇi̠ – brahma̍mētu̠ māṃ yāstē̎ brahmaha̠tyā-ndvāda̍śa̠ – brahma̍ mē̠dhayā̠-‘dyā na̍ i̠maṃ
bhrū̍ṣaha̠tyāṃ – brahma̍ mē̠dhavā̎ bra̠hmā dē̠vānā̍mi̠daṃ vī̍raha̠tyāmēkā̠nna vi̍gṃśati̠ rēkā̠nnavi̍gṃśati–r mē̠dhā dē̠vī – mē̠dhā-mma̠ indra̍ścha̠tvāri̍ chatvā̠ryā – mā̎-mmē̠dhā dvē – mayi̍ mē̠dhā mēka̠- mapai̍tu̠ – para̠ṃ – ँvāta̍-mprā̠ṇa – ma̍mutra̠bhūyā̠-d- ddhari̠gṃ̠ – śalkai̍ra̠gniṃ – mā Chi̍dō mṛtyō̠ – mā nō̍ ma̠hānta̠ṃ – māna̍stō̠kē – prajā̍patē – svasti̠dā – trya̍mbaka̠ṃ – ँyē tē̍ sa̠hasra̠-ndvē dvē – mṛ̠tyavē̠ svāhaika̍ṃ – dē̠vakṛ̍ta̠syaikā̍daśa̠ – yadvō̍ dēvā̠ḥ – kāmō-‘kār​ṣī̠n – manyurakār​ṣī̠-ddvē dvē̠ – tilāñjuhōmi gāva-śśriya-mpra̍jāḥ pañcha̠ – tilāḥ kṛṇṣāśchōra̍sya̠ śrīḥ prajñātu jātavē̍da-ssa̠pta – prāṇa vā-ktvak Chira uttiṣṭha puruṣa̍ pañcha̠ – pṛthivī śabda manō vāg vyaktā-”tmā-‘ntarātmā paramātmā mē̎ kṣu̠dhē-‘nnamaya̠ pañcha̍daśā̠ – gnayē̠ svāhaika̍chatvāri̠gṃ̠śa – rdō̎ ntadbra̠hma nava̍ –
śra̠ddhāyā̎-mprā̠ṇē niviṣṭa̠ śchatu̍rvigṃśatiḥ – śra̠ddhāyā̠-ndaśā – ṅguṣṭha mātraḥ puruṣō dvē – vāmma̍ ā̠sanna̠ṣṭau – vaya̍-ssupa̠r​ṣāḥ – prāṇānā-ṅgranthirasi dvē dvē – namō rudrāyaika̠ṃ – tvama̍gnē̠ dyubhir̠ dvē – śi̠vēna̍ mē̠ santi̍ṣṭhasva – sa̠tyaṃ – prā̍jāpa̠tya – stasyai̠va mēka̍ mēka̠ maśatiḥ)

(ambha̍syapā̠rē – sva̠sti na̍ḥ – pā̠hi nō̍ agna̠ ēka̍yā – ”di̠tyō vā ē̠ṣa – ṛ̠tagṃ sa̠tya – mō mityā – mā̎-mmē̠dhā – mā na̍stō̠kē – tilājuhōmi – śra̠ddhāyā̎-mprā̠ṇē nivi̍śya̠ – tasyai̠va mēkōtta̍raśa̠tam)

॥ hari̍ḥ ōm ॥
॥ kṛṣṇa yajurvēdīya taittirīya āraṇyakē daśamaḥ prapāṭhaka-ssamāptaḥ ॥

॥ iti taittirīya yajurāraṇyakaṃ samāptam ॥