Devi Mahatmyam Devi Suktam

ōṃ a̠haṃ ru̠drēbhi̠rvasu̍bhiścharāmya̠hamā̎di̠tyairu̠ta vi̠śvadē̎vaiḥ ।
a̠ha-mmi̠trāvaru̍ṇō̠bhā bi̍bharmya̠hami̎ndrā̠gnī a̠hama̠śvinō̠bhā ॥1॥

a̠haṃ sōma̍māha̠nasa̎-mbibharmya̠ha-ntvaṣṭā̎ramu̠ta pū̠ṣaṇa̠-mbhagam̎ ।
a̠ha-nda̍dhāmi̠ dravi̍ṇaṃ ha̠viṣma̍tē suprā̠vyē̠ yē̍ ​3 yaja̍mānāya sunva̠tē ॥2॥

a̠haṃ rāṣṭrī̎ sa̠ṅgama̍nī̠ vasū̎nā-ñchiki̠tuṣī̎ pratha̠mā ya̠jñiyā̎nām ।
tā-mmā̎ dē̠vā vya̍dadhuḥ puru̠trā bhūri̍sthātrā̠-mbhū~ryā̎vē̠śayantī̎m ॥3॥

mayā̠ sō anna̍matti yō vi̠paśya̍ti̠ yaḥ prāṇi̍ti̠ ya ī̎ṃ śṛ̠ṇōtyu̠ktam ।
a̠ma̠nta̠vō̠mānta upa̍kṣiyanti̠ śru̠dhi śru̍taṃ śraddhi̠va-ntē̎ vadāmi ॥4॥

a̠hamē̠va sva̠yami̠daṃ vadā̍mi̠ juṣṭa̎-ndē̠vēbhi̍ru̠ta mānu̍ṣēbhiḥ ।
ya-ṅkā̠mayē̠ ta-nta̍mu̠gra-ṅkṛ̍ṇōmi̠ ta-mbra̠hmāṇa̠-ntamṛṣi̠-ntaṃ su̍mē̠dhām ॥5॥

a̠haṃ ru̠drāya̠ dhanu̠rāta̍nōmi brahma̠dviṣē̠ śara̍vē hanta̠ vā u̍ ।
a̠ha-ñjanā̎ya sa̠mada̎-ṅkṛṇōmya̠ha-ndyāvā̎pṛthi̠vī āvi̍vēśa ॥6॥

a̠haṃ su̍vē pi̠tara̍masya mū̠rdha-nmama̠ yōni̍ra̠psva̠nta-ssa̍mu̠drē ।
tatō̠ viti̍ṣṭhē̠ bhuva̠nānu̠ viśvō̠tāmū-ndyāṃ va̠r​ṣmaṇōpa̍ spṛśāmi ॥7॥

a̠hamē̠va vāta̍ iva̠ pravā̎myā̠-rabha̍māṇā̠ bhuva̍nāni̠ viśvā̎ ।
pa̠rō di̠vāpara̠ ē̠nā pṛ̍thi̠vyai-tāva̍tī mahi̠nā samba̍bhūva ॥8॥

ōṃ śānti̠-śśānti̠-śśānti̍ḥ ॥

॥ iti ṛgvēdōkta-ndēvīsūktaṃ samāptam ॥
॥ta-thsat ॥