নারাযণীয়ং দশক 53 – ধেনুকাসুরবধম্

অতীত্য় বাল্য়ং জগতাং পতে ত্বমুপেত্য় পৌগংডবয়ো মনোজ্ঞম্ ।
উপেক্ষ্য় বত্সাবনমুত্সবেন প্রাবর্তথা গোগণপালনায়াম্ ॥1॥

উপক্রমস্য়ানুগুণৈব সেয়ং মরুত্পুরাধীশ তব প্রবৃত্তিঃ ।
গোত্রাপরিত্রাণকৃতেঽবতীর্ণস্তদেব দেবাঽঽরভথাস্তদা যত্ ॥2॥

কদাপি রামেণ সমং বনাংতে বনশ্রিয়ং বীক্ষ্য় চরন্ সুখেন ।
শ্রীদামনাম্নঃ স্বসখস্য় বাচা মোদাদগা ধেনুককাননং ত্বম্ ॥3॥

উত্তালতালীনিবহে ত্বদুক্ত্য়া বলেন ধূতেঽথ বলেন দোর্ভ্য়াম্ ।
মৃদুঃ খরশ্চাভ্যপতত্পুরস্তাত্ ফলোত্করো ধেনুকদানবোঽপি ॥4॥

সমুদ্যতো ধৈনুকপালনেঽহং কথং বধং ধৈনুকমদ্য় কুর্বে ।
ইতীব মত্বা ধ্রুবমগ্রজেন সুরৌঘয়োদ্ধারমজীঘনস্ত্বম্ ॥5॥

তদীযভৃত্য়ানপি জংবুকত্বেনোপাগতানগ্রজসংয়ুতস্ত্বম্ ।
জংবূফলানীব তদা নিরাস্থস্তালেষু খেলন্ ভগবন্ নিরাস্থঃ ॥6॥

বিনিঘ্নতি ত্বয়্যথ জংবুকৌঘং সনামকত্বাদ্বরুণস্তদানীম্ ।
ভয়াকুলো জংবুকনামধেয়ং শ্রুতিপ্রসিদ্ধং ব্যধিতেতি মন্য়ে ॥7॥

তবাবতারস্য় ফলং মুরারে সংজাতমদ্য়েতি সুরৈর্নুতস্ত্বম্ ।
সত্য়ং ফলং জাতমিহেতি হাসী বালৈঃ সমং তালফলান্যভুংক্থাঃ ॥8॥

মধুদ্রবস্রুংতি বৃহংতি তানি ফলানি মেদোভরভৃংতি ভুক্ত্বা ।
তৃপ্তৈশ্চ দৃপ্তৈর্ভবনং ফলৌঘং বহদ্ভিরাগাঃ খলু বালকৈস্ত্বম্ ॥9॥

হতো হতো ধেনুক ইত্য়ুপেত্য় ফলান্যদদ্ভির্মধুরাণি লোকৈঃ ।
জয়েতি জীবেতি নুতো বিভো ত্বং মরুত্পুরাধীশ্বর পাহি রোগাত্ ॥10॥