শ্রীমদ্ভগবদ্গীতা মূলম্ – পংচমোঽধ্যাযঃ

ওং শ্রী পরমাত্মনে নমঃ
অথ পংচমোঽধ্যাযঃ ।
কর্মসন্ন্যাসযোগঃ

অর্জুন উবাচ
সংন্যাসং কর্মণাং কৃষ্ণ পুনর্যোগং চ শংসসি ।
যচ্ছ্রেয এতযোরেকং তন্মে ব্রূহি সুনিশ্চিতম্ ॥ 1 ॥

শ্রীভগবানুবাচ
সংন্যাসঃ কর্মযোগশ্চ নিঃশ্রেযসকরাবুভৌ ।
তযোস্তু কর্মসংন্যাসাত্কর্মযোগো বিশিষ্যতে ॥ 2 ॥

জ্ঞেযঃ স নিত্যসংন্যাসী যো ন দ্বেষ্টি ন কাংক্ষতি ।
নির্দ্বংদ্বো হি মহাবাহো সুখং বংধাত্প্রমুচ্যতে ॥ 3 ॥

সাংখ্যযোগৌ পৃথগ্বালাঃ প্রবদংতি ন পংডিতাঃ ।
একমপ্যাস্থিতঃ সম্যগুভযোর্বিংদতে ফলম্ ॥ 4 ॥

যত্সাংখ্যৈঃ প্রাপ্যতে স্থানং তদ্যোগৈরপি গম্যতে ।
একং সাংখ্যং চ যোগং চ যঃ পশ্যতি স পশ্যতি ॥ 5 ॥

সংন্যাসস্তু মহাবাহো দুঃখমাপ্তুমযোগতঃ ।
যোগযুক্তো মুনির্ব্রহ্ম নচিরেণাধিগচ্ছতি ॥ 6 ॥

যোগযুক্তো বিশুদ্ধাত্মা বিজিতাত্মা জিতেংদ্রিযঃ ।
সর্বভূতাত্মভূতাত্মা কুর্বন্নপি ন লিপ্যতে ॥ 7 ॥

নৈব কিংচিত্করোমীতি যুক্তো মন্যেত তত্ত্ববিত্ ।
পশ্যঞ্শৃণ্বন্স্পৃশংজিঘ্রন্নশ্নন্গচ্ছন্স্বপঞ্শ্বসন্ ॥ 8 ॥

প্রলপন্বিসৃজন্গৃহ্ণন্নুন্মিষন্নিমিষন্নপি ।
ইংদ্রিযাণীংদ্রিযার্থেষু বর্তংত ইতি ধারযন্ ॥ 9 ॥

ব্রহ্মণ্যাধায কর্মাণি সংগং ত্যক্ত্বা করোতি যঃ ।
লিপ্যতে ন স পাপেন পদ্মপত্রমিবাংভসা ॥ 10 ॥

কাযেন মনসা বুদ্ধ্যা কেবলৈরিংদ্রিযৈরপি ।
যোগিনঃ কর্ম কুর্বংতি সংগং ত্যক্ত্বাত্মশুদ্ধযে ॥ 11 ॥

যুক্তঃ কর্মফলং ত্যক্ত্বা শাংতিমাপ্নোতি নৈষ্ঠিকীম্ ।
অযুক্তঃ কামকারেণ ফলে সক্তো নিবধ্যতে ॥ 12 ॥

সর্বকর্মাণি মনসা সংন্যস্যাস্তে সুখং বশী ।
নবদ্বারে পুরে দেহী নৈব কুর্বন্ন কারযন্ ॥ 13 ॥

ন কর্তৃত্বং ন কর্মাণি লোকস্য সৃজতি প্রভুঃ ।
ন কর্মফলসংযোগং স্বভাবস্তু প্রবর্ততে ॥ 14 ॥

নাদত্তে কস্যচিত্পাপং ন চৈব সুকৃতং বিভুঃ ।
অজ্ঞানেনাবৃতং জ্ঞানং তেন মুহ্যংতি জংতবঃ ॥ 15 ॥

জ্ঞানেন তু তদজ্ঞানং যেষাং নাশিতমাত্মনঃ ।
তেষামাদিত্যবজ্জ্ঞানং প্রকাশযতি তত্পরম্ ॥ 16 ॥

তদ্বুদ্ধযস্তদাত্মানস্তন্নিষ্ঠাস্তত্পরাযণাঃ ।
গচ্ছংত্যপুনরাবৃত্তিং জ্ঞাননির্ধূতকল্মষাঃ ॥ 17 ॥

বিদ্যাবিনযসংপন্নে ব্রাহ্মণে গবি হস্তিনি ।
শুনি চৈব শ্বপাকে চ পংডিতাঃ সমদর্শিনঃ ॥ 18 ॥

ইহৈব তৈর্জিতঃ সর্গো যেষাং সাম্যে স্থিতং মনঃ ।
নির্দোষং হি সমং ব্রহ্ম তস্মাদ্ব্রহ্মণি তে স্থিতাঃ ॥ 19 ॥

ন প্রহৃষ্যেত্প্রিযং প্রাপ্য নোদ্বিজেত্প্রাপ্য চাপ্রিযম্ ।
স্থিরবুদ্ধিরসংমূঢো ব্রহ্মবিদ্ব্রহ্মণি স্থিতঃ ॥ 20 ॥

বাহ্যস্পর্শেষ্বসক্তাত্মা বিংদত্যাত্মনি যত্সুখম্ ।
স ব্রহ্মযোগযুক্তাত্মা সুখমক্ষযমশ্নুতে ॥ 21 ॥

যে হি সংস্পর্শজা ভোগা দুঃখযোনয এব তে ।
আদ্যংতবংতঃ কৌংতেয ন তেষু রমতে বুধঃ ॥ 22 ॥

শক্নোতীহৈব যঃ সোঢুং প্রাক্শরীরবিমোক্ষণাত্ ।
কামক্রোধোদ্ভবং বেগং স যুক্তঃ স সুখী নরঃ ॥ 23 ॥

যোঽংতঃসুখোঽংতরারামস্তথাংতর্জ্যোতিরেব যঃ ।
স যোগী ব্রহ্মনির্বাণং ব্রহ্মভূতোঽধিগচ্ছতি ॥ 24 ॥

লভংতে ব্রহ্মনির্বাণমৃষযঃ ক্ষীণকল্মষাঃ ।
ছিন্নদ্বৈধা যতাত্মানঃ সর্বভূতহিতে রতাঃ ॥ 25 ॥

কামক্রোধবিযুক্তানাং যতীনাং যতচেতসাম্ ।
অভিতো ব্রহ্মনির্বাণং বর্ততে বিদিতাত্মনাম্ ॥ 26 ॥

স্পর্শান্কৃত্বা বহির্বাহ্যাংশ্চক্ষুশ্চৈবাংতরে ভ্রুবোঃ ।
প্রাণাপানৌ সমৌ কৃত্বা নাসাভ্যংতরচারিণৌ ॥ 27 ॥

যতেংদ্রিযমনোবুদ্ধির্মুনির্মোক্ষপরাযণঃ ।
বিগতেচ্ছাভযক্রোধো যঃ সদা মুক্ত এব সঃ ॥ 28 ॥

ভোক্তারং যজ্ঞতপসাং সর্বলোকমহেশ্বরম্ ।
সুহৃদং সর্বভূতানাং জ্ঞাত্বা মাং শাংতিমৃচ্ছতি ॥ 29 ॥

ওং তত্সদিতি শ্রীমদ্ভগবদ্গীতাসূপনিষত্সু ব্রহ্মবিদ্যাযাং যোগশাস্ত্রে
শ্রীকৃষ্ণার্জুনসংবাদে কর্মসংন্যাসযোগো নাম পংচমোঽধ্যাযঃ ॥5 ॥