শ্রী দুর্গা স্তোত্রম্ (যুধিষ্ঠির কৃতং)

বিরাটনগরং রম্যং গচ্ছমানো যুধিষ্ঠিরঃ ।
অস্তুবন্মনসা দেবীং দুর্গাং ত্রিভুবনেশ্বরীম্ ॥ 1 ॥

যশোদাগর্ভসংভূতাং নারাযণবরপ্রিযাম্ ।
নংদগোপকুলে জাতাং মংগল্যাং কুলবর্ধিনীম্ ॥ 2 ॥

কংসবিদ্রাবণকরীমসুরাণাং ক্ষযংকরীম্ ।
শিলাতটবিনিক্ষিপ্তামাকাশং প্রতি গামিনীম্ ॥ 3 ॥

বাসুদেবস্য ভগিনীং দিব্যমাল্যবিভূষিতাম্ ।
দিব্যাংবরধরাং দেবীং খড্গখেটকধারিণীম্ ॥ 4 ॥

ভারাবতরণে পুণ্যে যে স্মরংতি সদাশিবাম্ ।
তান্ বৈ তারযতে পাপাত্ পংকে গামিব দুর্বলাম্ ॥ 5 ॥

স্তোতুং প্রচক্রমে ভূযো বিবিধৈঃ স্তোত্রসংভবৈঃ ।
আমংত্র্য দর্শনাকাংক্ষী রাজা দেবীং সহানুজঃ ॥ 6 ॥

নমোঽস্তু বরদে কৃষ্ণে কুমারি ব্রহ্মচারিণি ।
বালার্কসদৃশাকারে পূর্ণচংদ্রনিভাননে ॥ 7 ॥

চতুর্ভুজে চতুর্বক্ত্রে পীনশ্রোণিপযোধরে ।
মযূরপিচ্ছবলযে কেযূরাংগদধারিণি ॥ 8 ॥

ভাসি দেবি যথা পদ্মা নারাযণপরিগ্রহঃ ।
স্বরূপং ব্রহ্মচর্যং চ বিশদং তব খেচরি ॥ 9 ॥

কৃষ্ণচ্ছবিসমা কৃষ্ণা সংকর্ষণসমাননা ।
বিভ্রতী বিপুলৌ বাহূ শক্রধ্বজসমুচ্ছ্রযৌ ॥ 10 ॥

পাত্রী চ পংকজী ঘংটী স্ত্রীবিশুদ্ধা চ যা ভুবি ।
পাশং ধনুর্মহাচক্রং বিবিধান্যাযুধানি চ ॥ 11 ॥

কুংডলাভ্যাং সুপূর্ণাভ্যাং কর্ণাভ্যাং চ বিভূষিতা ।
চংদ্রবিস্পর্ধিনা দেবি মুখেন ত্বং বিরাজসে ॥ 12 ॥

মুকুটেন বিচিত্রেণ কেশবংধেন শোভিনা ।
ভুজংগাভোগবাসেন শ্রোণিসূত্রেণ রাজতা ॥ 13 ॥

বিভ্রাজসে চাবদ্ধেন ভোগেনেবেহ মংদরঃ ।
ধ্বজেন শিখিপিচ্ছানামুচ্ছ্রিতেন বিরাজসে ॥ 14 ॥

কৌমারং ব্রতমাস্থায ত্রিদিবং পাবিতং ত্বযা ।
তেন ত্বং স্তূযসে দেবি ত্রিদশৈঃ পূজ্যসেঽপি চ ॥ 15 ॥

ত্রৈলোক্যরক্ষণার্থায মহিষাসুরনাশিনি ।
প্রসন্না মে সুরশ্রেষ্ঠে দযাং কুরু শিবা ভব ॥ 16 ॥

জযা ত্বং বিজযা চৈব সংগ্রামে চ জযপ্রদা ।
মমাপি বিজযং দেহি বরদা ত্বং চ সাংপ্রতম্ ॥ 17 ॥

বিংধ্যে চৈব নগশ্রেষ্ঠে তব স্থানং হি শাশ্বতম্ ।
কালি কালি মহাকালি শীধুমাংসপশুপ্রিযে ॥ 18 ॥

কৃতানুযাত্রা ভূতৈস্ত্বং বরদা কামচারিণী ।
ভারাবতারে যে চ ত্বাং সংস্মরিষ্যংতি মানবাঃ ॥ 19 ॥

প্রণমংতি চ যে ত্বাং হি প্রভাতে তু নরা ভুবি ।
ন তেষাং দুর্লভং কিংচিত্ পুত্রতো ধনতোঽপি বা ॥ 20 ॥

দুর্গাত্ তারযসে দুর্গে তত্ ত্বং দুর্গা স্মৃতা জনৈঃ ।
কাংতারেষ্ববসন্নানাং মগ্নানাং চ মহার্ণবে ।
দস্যুভির্বা নিরুদ্ধানাং ত্বং গতিঃ পরমা নৃণাম্ ॥ 21 ॥

জলপ্রতরণে চৈব কাংতারেষ্বটবীষু চ ।
যে স্মরংতি মহাদেবি ন চ সীদংতি তে নরাঃ ॥ 22 ॥

ত্বং কীর্তিঃ শ্রীর্ধৃতিঃ সিদ্ধির্হ্রীর্বিদ্যা সংততির্মতিঃ ।
সংধ্যা রাত্রিঃ প্রভা নিদ্রা জ্যোত্স্না কাংতিঃ ক্ষমা দযা ॥ 23 ॥

নৃণাং চ বংধনং মোহং পুত্রনাশং ধনক্ষযম্ ।
ব্যাধিং মৃত্যুং ভযং চৈব পূজিতা নাশযিষ্যসি ॥ 24 ॥

সোঽহং রাজ্যাত্পরিভ্রষ্টঃ শরণং ত্বাং প্রপন্নবান্ ।
প্রণতশ্চ যথা মূর্ধ্না তব দেবি সুরেশ্বরি ॥ 25 ॥

ত্রাহি মাং পদ্মপত্রাক্ষি সত্যে সত্যা ভবস্ব নঃ ।
শরণং ভব মে দুর্গে শরণ্যে ভক্তবত্সলে ॥ 26 ॥

এবং স্তুতা হি সা দেবী দর্শযামাস পাংডবম্ ।
উপগম্য তু রাজানামিদং বচনমব্রবীত্ ॥ 27 ॥

দেব্যুবাচ ।
শৃণু রাজন্ মহাবাহো মদীযং বচনং প্রভো ।
ভবিষ্যত্যচিরাদেব সংগ্রামে বিজযস্তব ॥ 28 ॥

মম প্রসাদান্নির্জিত্য হত্বা কৌরববাহিনীম্ ।
রাজ্যং নিষ্কংটকং কৃত্বা ভোক্ষ্যসে মেদিনীং পুনঃ ॥ 29 ॥

ভাত্রৃভিঃ সহিতো রাজন্ প্রীতিং প্রাপ্স্যসি পুষ্কলাম্ ।
মত্প্রসাদাচ্চ তে সৌখ্যমারোগ্যং চ ভবিষ্যতি ॥ 30 ॥

যে চ সংকীর্তযিষ্যংতি লোকে বিগতকল্মষাঃ ।
তেষাং তুষ্টা প্রদাস্যামি রাজ্যমাযুর্বপুঃ সুতম্ ॥ 31 ॥

প্রবাসে নগরে চাপি সংগ্রামে শত্রুসংকটে ।
অটব্যাং দুর্গকাংতারে সাগরে গহনে গিরৌ ॥ 32 ॥

যে স্মরিষ্যংতি মাং রাজন্ যথাঽহং ভবতা স্মৃতা ।
ন তেষাং দুর্লভং কিংচিদস্মিল্লোকে ভবিষ্যতি ॥ 33 ॥

ইদং স্তোত্রবরং ভক্ত্যা শৃণুযাদ্বা পঠেত বা ।
তস্য সর্বাণি কার্যাণি সিদ্ধিং যাস্যংতি পাংডবাঃ ॥ 34 ॥

মত্প্রসাদাচ্চ বঃ সর্বান্বিরাটনগরে স্থিতান্ ।
ন প্রজ্ঞাস্যংতি কুরবো নরা বা তন্নিবাসিনঃ ॥ 35 ॥

ইত্যুক্ত্বা বরদা দেবী যুধিষ্ঠিরমরিংদমম্ ।
রক্ষাং কৃত্বা চ পাংডূনাং তত্রৈবাংতরধীযত ॥ 36 ॥

ইতি শ্রীমন্মহাভারতে বিরাটপর্বণি অষ্টমোঽধ্যাযে যুধিষ্ঠির কৃত শ্রী দুর্গা স্তোত্রম্ ।