শিব মহিম্না স্তোত্রম্

অথ শ্রী শিবমহিম্নস্তোত্রম্ ॥

মহিম্নঃ পারং তে পরমবিদুষো যদ্যসদৃশী
স্তুতির্ব্রহ্মাদীনামপি তদবসন্নাস্ত্বযি গিরঃ ।
অথাঽবাচ্যঃ সর্বঃ স্বমতিপরিণামাবধি গৃণন্
মমাপ্যেষ স্তোত্রে হর নিরপবাদঃ পরিকরঃ ॥ 1 ॥

অতীতঃ পংথানং তব চ মহিমা বাঙ্মনসযোঃ
অতদ্ব্যাবৃত্ত্যা যং চকিতমভিধত্তে শ্রুতিরপি ।
স কস্য স্তোতব্যঃ কতিবিধগুণঃ কস্য বিষযঃ
পদে ত্বর্বাচীনে পততি ন মনঃ কস্য ন বচঃ ॥ 2 ॥

মধুস্ফীতা বাচঃ পরমমমৃতং নির্মিতবতঃ
তব ব্রহ্মন্​ কিং বাগপি সুরগুরোর্বিস্মযপদম্ ।
মম ত্বেতাং বাণীং গুণকথনপুণ্যেন ভবতঃ
পুনামীত্যর্থেঽস্মিন্ পুরমথন বুদ্ধির্ব্যবসিতা ॥ 3 ॥

তবৈশ্বর্যং যত্তজ্জগদুদযরক্ষাপ্রলযকৃত্
ত্রযীবস্তু ব্যস্তং তিসৃষু গুণভিন্নাসু তনুষু ।
অভব্যানামস্মিন্ বরদ রমণীযামরমণীং
বিহংতুং ব্যাক্রোশীং বিদধত ইহৈকে জডধিযঃ ॥ 4 ॥

কিমীহঃ কিংকাযঃ স খলু কিমুপাযস্ত্রিভুবনং
কিমাধারো ধাতা সৃজতি কিমুপাদান ইতি চ ।
অতর্ক্যৈশ্বর্যে ত্বয্যনবসর দুঃস্থো হতধিযঃ
কুতর্কোঽযং কাংশ্চিত্ মুখরযতি মোহায জগতঃ ॥ 5 ॥

অজন্মানো লোকাঃ কিমবযববংতোঽপি জগতাং
অধিষ্ঠাতারং কিং ভববিধিরনাদৃত্য ভবতি ।
অনীশো বা কুর্যাদ্ ভুবনজননে কঃ পরিকরো
যতো মংদাস্ত্বাং প্রত্যমরবর সংশেরত ইমে ॥ 6 ॥

ত্রযী সাংখ্যং যোগঃ পশুপতিমতং বৈষ্ণবমিতি
প্রভিন্নে প্রস্থানে পরমিদমদঃ পথ্যমিতি চ ।
রুচীনাং বৈচিত্র্যাদৃজুকুটিল নানাপথজুষাং
নৃণামেকো গম্যস্ত্বমসি পযসামর্ণব ইব ॥ 7 ॥

মহোক্ষঃ খট্বাংগং পরশুরজিনং ভস্ম ফণিনঃ
কপালং চেতীযত্তব বরদ তংত্রোপকরণম্ ।
সুরাস্তাং তামৃদ্ধিং দধতি তু ভবদ্ভ্রূপ্রণিহিতাং
ন হি স্বাত্মারামং বিষযমৃগতৃষ্ণা ভ্রমযতি ॥ 8 ॥

ধ্রুবং কশ্চিত্ সর্বং সকলমপরস্ত্বধ্রুবমিদং
পরো ধ্রৌব্যাঽধ্রৌব্যে জগতি গদতি ব্যস্তবিষযে ।
সমস্তেঽপ্যেতস্মিন্ পুরমথন তৈর্বিস্মিত ইব
স্তুবন্​ জিহ্রেমি ত্বাং ন খলু ননু ধৃষ্টা মুখরতা ॥ 9 ॥

তবৈশ্বর্যং যত্নাদ্ যদুপরি বিরিংচির্হরিরধঃ
পরিচ্ছেত্তুং যাতাবনলমনলস্কংধবপুষঃ ।
ততো ভক্তিশ্রদ্ধা-ভরগুরু-গৃণদ্ভ্যাং গিরিশ যত্
স্বযং তস্থে তাভ্যাং তব কিমনুবৃত্তির্ন ফলতি ॥ 10 ॥

অযত্নাদাসাদ্য ত্রিভুবনমবৈরব্যতিকরং
দশাস্যো যদ্বাহূনভৃত রণকংডূ-পরবশান্ ।
শিরঃপদ্মশ্রেণী-রচিতচরণাংভোরুহ-বলেঃ
স্থিরাযাস্ত্বদ্ভক্তেস্ত্রিপুরহর বিস্ফূর্জিতমিদম্ ॥ 11 ॥

অমুষ্য ত্বত্সেবা-সমধিগতসারং ভুজবনং
বলাত্ কৈলাসেঽপি ত্বদধিবসতৌ বিক্রমযতঃ ।
অলভ্যা পাতালেঽপ্যলসচলিতাংগুষ্ঠশিরসি
প্রতিষ্ঠা ত্বয্যাসীদ্ ধ্রুবমুপচিতো মুহ্যতি খলঃ ॥ 12 ॥

যদৃদ্ধিং সুত্রাম্ণো বরদ পরমোচ্চৈরপি সতীং
অধশ্চক্রে বাণঃ পরিজনবিধেযত্রিভুবনঃ ।
ন তচ্চিত্রং তস্মিন্ বরিবসিতরি ত্বচ্চরণযোঃ
ন কস্যাপ্যুন্নত্যৈ ভবতি শিরসস্ত্বয্যবনতিঃ ॥ 13 ॥

অকাংড-ব্রহ্মাংড-ক্ষযচকিত-দেবাসুরকৃপা
বিধেযস্যাঽঽসীদ্​ যস্ত্রিনযন বিষং সংহৃতবতঃ ।
স কল্মাষঃ কংঠে তব ন কুরুতে ন শ্রিযমহো
বিকারোঽপি শ্লাঘ্যো ভুবন-ভয- ভংগ- ব্যসনিনঃ ॥ 14 ॥

অসিদ্ধার্থা নৈব ক্বচিদপি সদেবাসুরনরে
নিবর্তংতে নিত্যং জগতি জযিনো যস্য বিশিখাঃ ।
স পশ্যন্নীশ ত্বামিতরসুরসাধারণমভূত্
স্মরঃ স্মর্তব্যাত্মা ন হি বশিষু পথ্যঃ পরিভবঃ ॥ 15 ॥

মহী পাদাঘাতাদ্ ব্রজতি সহসা সংশযপদং
পদং বিষ্ণোর্ভ্রাম্যদ্ ভুজ-পরিঘ-রুগ্ণ-গ্রহ- গণম্ ।
মুহুর্দ্যৌর্দৌস্থ্যং যাত্যনিভৃত-জটা-তাডিত-তটা
জগদ্রক্ষাযৈ ত্বং নটসি ননু বামৈব বিভুতা ॥ 16 ॥

বিযদ্ব্যাপী তারা-গণ-গুণিত-ফেনোদ্গম-রুচিঃ
প্রবাহো বারাং যঃ পৃষতলঘুদৃষ্টঃ শিরসি তে ।
জগদ্দ্বীপাকারং জলধিবলযং তেন কৃতমিতি
অনেনৈবোন্নেযং ধৃতমহিম দিব্যং তব বপুঃ ॥ 17 ॥

রথঃ ক্ষোণী যংতা শতধৃতিরগেংদ্রো ধনুরথো
রথাংগে চংদ্রার্কৌ রথ-চরণ-পাণিঃ শর ইতি ।
দিধক্ষোস্তে কোঽযং ত্রিপুরতৃণমাডংবর-বিধিঃ
বিধেযৈঃ ক্রীডংত্যো ন খলু পরতংত্রাঃ প্রভুধিযঃ ॥ 18 ॥

হরিস্তে সাহস্রং কমল বলিমাধায পদযোঃ
যদেকোনে তস্মিন্​ নিজমুদহরন্নেত্রকমলম্ ।
গতো ভক্ত্যুদ্রেকঃ পরিণতিমসৌ চক্রবপুষঃ
ত্রযাণাং রক্ষাযৈ ত্রিপুরহর জাগর্তি জগতাম্ ॥ 19 ॥

ক্রতৌ সুপ্তে জাগ্রত্​ ত্বমসি ফলযোগে ক্রতুমতাং
ক্ব কর্ম প্রধ্বস্তং ফলতি পুরুষারাধনমৃতে ।
অতস্ত্বাং সংপ্রেক্ষ্য ক্রতুষু ফলদান-প্রতিভুবং
শ্রুতৌ শ্রদ্ধাং বদ্ধ্বা দৃঢপরিকরঃ কর্মসু জনঃ ॥ 20 ॥

ক্রিযাদক্ষো দক্ষঃ ক্রতুপতিরধীশস্তনুভৃতাং
ঋষীণামার্ত্বিজ্যং শরণদ সদস্যাঃ সুর-গণাঃ ।
ক্রতুভ্রংশস্ত্বত্তঃ ক্রতুফল-বিধান-ব্যসনিনঃ
ধ্রুবং কর্তুঃ শ্রদ্ধা-বিধুরমভিচারায হি মখাঃ ॥ 21 ॥

প্রজানাথং নাথ প্রসভমভিকং স্বাং দুহিতরং
গতং রোহিদ্​ ভূতাং রিরমযিষুমৃষ্যস্য বপুষা ।
ধনুষ্পাণের্যাতং দিবমপি সপত্রাকৃতমমুং
ত্রসংতং তেঽদ্যাপি ত্যজতি ন মৃগব্যাধরভসঃ ॥ 22 ॥

স্বলাবণ্যাশংসা ধৃতধনুষমহ্নায তৃণবত্
পুরঃ প্লুষ্টং দৃষ্ট্বা পুরমথন পুষ্পাযুধমপি ।
যদি স্ত্রৈণং দেবী যমনিরত দেহার্ধ-ঘটনাত্
অবৈতি ত্বামদ্ধা বত বরদ মুগ্ধা যুবতযঃ ॥ 23 ॥

শ্মশানেষ্বাক্রীডা স্মরহর পিশাচাঃ সহচরাঃ
চিতা-ভস্মালেপঃ স্রগপি নৃকরোটী-পরিকরঃ ।
অমংগল্যং শীলং তব ভবতু নামৈবমখিলং
তথাপি স্মর্তৄণাং বরদ পরমং মংগলমসি ॥ 24 ॥

মনঃ প্রত্যক্চিত্তে সবিধমবিধাযাত্ত-মরুতঃ
প্রহৃষ্যদ্রোমাণঃ প্রমদ-সলিলোত্সংগতি-দৃশঃ ।
যদালোক্যাহ্লাদং হ্রদ ইব নিমজ্যামৃতমযে
দধত্যংতস্তত্ত্বং কিমপি যমিনস্তত্ কিল ভবান্ ॥ 25 ॥

ত্বমর্কস্ত্বং সোমস্ত্বমসি পবনস্ত্বং হুতবহঃ
ত্বমাপস্ত্বং ব্যোম ত্বমু ধরণিরাত্মা ত্বমিতি চ ।
পরিচ্ছিন্নামেবং ত্বযি পরিণতা বিভ্রতি গিরং
ন বিদ্মস্তত্তত্ত্বং বযমিহ তু যত্ ত্বং ন ভবসি ॥ 26 ॥

ত্রযীং তিস্রো বৃত্তীস্ত্রিভুবনমথো ত্রীনপি সুরান্
অকারাদ্যৈর্বর্ণৈস্ত্রিভিরভিদধত্ তীর্ণবিকৃতি ।
তুরীযং তে ধাম ধ্বনিভিরবরুংধানমণুভিঃ
সমস্তং ব্যস্তং ত্বাং শরণদ গৃণাত্যোমিতি পদম্ ॥ 27 ॥

ভবঃ শর্বো রুদ্রঃ পশুপতিরথোগ্রঃ সহ মহান্
তথা ভীমেশানাবিতি যদভিধানাষ্টকমিদম্ ।
অমুষ্মিন্ প্রত্যেকং প্রবিচরতি দেব শ্রুতিরপি
প্রিযাযাস্মৈধাম্নে প্রণিহিত-নমস্যোঽস্মি ভবতে ॥ 28 ॥

নমো নেদিষ্ঠায প্রিযদব দবিষ্ঠায চ নমঃ
নমঃ ক্ষোদিষ্ঠায স্মরহর মহিষ্ঠায চ নমঃ ।
নমো বর্ষিষ্ঠায ত্রিনযন যবিষ্ঠায চ নমঃ
নমঃ সর্বস্মৈ তে তদিদমিতিসর্বায চ নমঃ ॥ 29 ॥

বহুল-রজসে বিশ্বোত্পত্তৌ ভবায নমো নমঃ
প্রবল-তমসে তত্ সংহারে হরায নমো নমঃ ।
জন-সুখকৃতে সত্ত্বোদ্রিক্তৌ মৃডায নমো নমঃ
প্রমহসি পদে নিস্ত্রৈগুণ্যে শিবায নমো নমঃ ॥ 30 ॥

কৃশ-পরিণতি-চেতঃ ক্লেশবশ্যং ক্ব চেদং
ক্ব চ তব গুণ-সীমোল্লংঘিনী শশ্বদৃদ্ধিঃ ।
ইতি চকিতমমংদীকৃত্য মাং ভক্তিরাধাদ্
বরদ চরণযোস্তে বাক্য-পুষ্পোপহারম্ ॥ 31 ॥

অসিত-গিরি-সমং স্যাত্ কজ্জলং সিংধু-পাত্রে
সুর-তরুবর-শাখা লেখনী পত্রমুর্বী ।
লিখতি যদি গৃহীত্বা শারদা সর্বকালং
তদপি তব গুণানামীশ পারং ন যাতি ॥ 32 ॥

অসুর-সুর-মুনীংদ্রৈরর্চিতস্যেংদু-মৌলেঃ
গ্রথিত-গুণমহিম্নো নির্গুণস্যেশ্বরস্য ।
সকল-গণ-বরিষ্ঠঃ পুষ্পদংতাভিধানঃ
রুচিরমলঘুবৃত্তৈঃ স্তোত্রমেতচ্চকার ॥ 33 ॥

অহরহরনবদ্যং ধূর্জটেঃ স্তোত্রমেতত্
পঠতি পরমভক্ত্যা শুদ্ধ-চিত্তঃ পুমান্ যঃ ।
স ভবতি শিবলোকে রুদ্রতুল্যস্তথাঽত্র
প্রচুরতর-ধনাযুঃ পুত্রবান্ কীর্তিমাংশ্চ ॥ 34 ॥

মহেশান্নাপরো দেবো মহিম্নো নাপরা স্তুতিঃ ।
অঘোরান্নাপরো মংত্রো নাস্তি তত্ত্বং গুরোঃ পরম্ ॥ 35 ॥

দীক্ষা দানং তপস্তীর্থং জ্ঞানং যাগাদিকাঃ ক্রিযাঃ ।
মহিম্নস্তব পাঠস্য কলাং নার্হংতি ষোডশীম্ ॥ 36 ॥

কুসুমদশন-নামা সর্ব-গংধর্ব-রাজঃ
শশিধরবর-মৌলের্দেবদেবস্য দাসঃ ।
স খলু নিজ-মহিম্নো ভ্রষ্ট এবাস্য রোষাত্
স্তবনমিদমকার্ষীদ্ দিব্য-দিব্যং মহিম্নঃ ॥ 37 ॥

সুরগুরুমভিপূজ্য স্বর্গ-মোক্ষৈক-হেতুং [সুরবরমুনিপূজ্যং স্বর্গ-মোক্ষৈক-হেতুং]
পঠতি যদি মনুষ্যঃ প্রাংজলির্নান্য-চেতাঃ ।
ব্রজতি শিব-সমীপং কিন্নরৈঃ স্তূযমানঃ
স্তবনমিদমমোঘং পুষ্পদংতপ্রণীতম্ ॥ 38 ॥

শ্রী পুষ্পদংত-মুখ-পংকজ-নির্গতেন
স্তোত্রেণ কিল্বিষ-হরেণ হর-প্রিযেণ ।
কংঠস্থিতেন পঠিতেন সমাহিতেন
সুপ্রীণিতো ভবতি ভূতপতির্মহেশঃ ॥ 43 ॥

আসমাপ্তমিদং স্তোত্রং পুণ্যং গংধর্ব-ভাষিতম্ ।
অনৌপম্যং মনোহারি সর্বমীশ্বরবর্ণনম্ ॥ 39 ॥

তব তত্ত্বং ন জানামি কীদৃশোঽসি মহেশ্বর ।
যাদৃশোঽসি মহাদেব তাদৃশায নমো নমঃ ॥ 41 ॥

এককালং দ্বিকালং বা ত্রিকালং যঃ পঠেন্নরঃ ।
সর্বপাপ-বিনির্মুক্তঃ শিব লোকে মহীযতে ॥ 42 ॥

ইত্যেষা বাঙ্মযী পূজা শ্রীমচ্ছংকর-পাদযোঃ ।
অর্পিতা তেন দেবেশঃ প্রীযতাং মে সদাশিবঃ ॥ 40 ॥

॥ ইতি শ্রী পুষ্পদংত বিরচিতং শিবমহিম্ন-স্তোত্রং সমাপ্তম্ ॥