সরস্বতী সহস্র নাম স্তোত্রম্

ধ্যানম্ ।
শ্রীমচ্চংদনচর্চিতোজ্জ্বলবপুঃ শুক্লাংবরা মল্লিকা-
মালালালিত কুংতলা প্রবিলসন্মুক্তাবলীশোভনা ।
সর্বজ্ঞাননিধানপুস্তকধরা রুদ্রাক্ষমালাংকিতা
বাগ্দেবী বদনাংবুজে বসতু মে ত্রৈলোক্যমাতা শুভা ॥

শ্রী নারদ উবাচ –
ভগবন্পরমেশান সর্বলোকৈকনাযক ।
কথং সরস্বতী সাক্ষাত্প্রসন্না পরমেষ্ঠিনঃ ॥ 2 ॥

কথং দেব্যা মহাবাণ্যাস্সতত্প্রাপ সুদুর্লভম্ ।
এতন্মে বদ তত্ত্বেন মহাযোগীশ্বর প্রভো ॥ 3 ॥

শ্রী সনত্কুমার উবাচ –
সাধু পৃষ্টং ত্বযা ব্রহ্মন্ গুহ্যাদ্গুহ্যমনুত্তমম্ ।
মযানুগোপিতং যত্নাদিদানীং সত্প্রকাশ্যতে ॥ 4 ॥

পুরা পিতামহং দৃষ্ট্বা জগত্স্থাবরজংগমম্ ।
নির্বিকারং নিরাভাসং স্তংভীভূতমচেতসম্ ॥ 5 ॥

সৃষ্ট্বা ত্রৈলোক্যমখিলং বাগভাবাত্তথাবিধম্ ।
আধিক্যাভাবতঃ স্বস্য পরমেষ্ঠী জগদ্গুরুঃ ॥ 6 ॥

দিব্যবর্ষাযুতং তেন তপো দুষ্করমুত্তমম্ ।
ততঃ কদাচিত্সংজাতা বাণী সর্বার্থশোভিতা ॥ 7 ॥

অহমস্মি মহাবিদ্যা সর্ববাচামধীশ্বরী ।
মম নাম্নাং সহস্রং তু উপদেক্ষ্যাম্যনুত্তমম্ ॥ 8 ॥

অনেন সংস্তুতা নিত্যং পত্নী তব ভবাম্যহম্ ।
ত্বযা সৃষ্টং জগত্সর্বং বাণীযুক্তং ভবিষ্যতি ॥ 9 ॥

ইদং রহস্যং পরমং মম নামসহস্রকম্ ।
সর্বপাপৌঘশমনং মহাসারস্বতপ্রদম্ ॥ 10 ॥

মহাকবিত্বদং লোকে বাগীশত্বপ্রদাযকম্ ।
ত্বং বা পরঃ পুমান্যস্তু স্তবেনাঽনেন তোষযেত্ ॥ 11 ॥

তস্যাহং কিংকরী সাক্ষাদ্ভবিষ্যামি ন সংশযঃ ।
ইত্যুক্ত্বাংতর্দধে বাণী তদারভ্য পিতামহঃ ॥ 12 ॥

স্তুত্বা স্তোত্রেণ দিব্যেন তত্পতিত্বমবাপ্তবান্ ।
বাণীযুক্তং জগত্সর্বং তদারভ্যাঽভবন্মুনে ॥ 13 ॥

তত্তেহং সংপ্রবক্ষ্যামি শৃণু যত্নেন নারদ ।
সাবধানমনা ভূত্বা ক্ষণং শুদ্ধো মুনীশ্বরঃ ॥ 14 ॥

[ ঐং বদ বদ বাগ্বাদিনী স্বাহা ]

বাগ্বাণী বরদা বংদ্যা বরারোহা বরপ্রদা ।
বৃত্তির্বাগীশ্বরী বার্তা বরা বাগীশবল্লভা ॥ 1 ॥

বিশ্বেশ্বরী বিশ্ববংদ্যা বিশ্বেশপ্রিযকারিণী ।
বাগ্বাদিনী চ বাগ্দেবী বৃদ্ধিদা বৃদ্ধিকারিণী ॥ 2 ॥

বৃদ্ধির্বৃদ্ধা বিষঘ্নী চ বৃষ্টির্বৃষ্টিপ্রদাযিনী ।
বিশ্বারাধ্যা বিশ্বমাতা বিশ্বধাত্রী বিনাযকা ॥ 3 ॥

বিশ্বশক্তির্বিশ্বসারা বিশ্বা বিশ্ববিভাবরী ।
বেদাংতবেদিনী বেদ্যা বিত্তা বেদত্রযাত্মিকা ॥ 4 ॥

বেদজ্ঞা বেদজননী বিশ্বা বিশ্ববিভাবরী ।
বরেণ্যা বাঙ্মযী বৃদ্ধা বিশিষ্টপ্রিযকারিণী ॥ 5 ॥

বিশ্বতোবদনা ব্যাপ্তা ব্যাপিনী ব্যাপকাত্মিকা ।
ব্যালঘ্নী ব্যালভূষাংগী বিরজা বেদনাযিকা ॥ 6 ॥

বেদবেদাংতসংবেদ্যা বেদাংতজ্ঞানরূপিণী ।
বিভাবরী চ বিক্রাংতা বিশ্বামিত্রা বিধিপ্রিযা ॥ 7 ॥

বরিষ্ঠা বিপ্রকৃষ্টা চ বিপ্রবর্যপ্রপূজিতা ।
বেদরূপা বেদমযী বেদমূর্তিশ্চ বল্লভা ॥ 8 ॥

[ ওং হ্রীং গুরুরূপে মাং গৃহ্ণ গৃহ্ণ ঐং বদ বদ বাগ্বাদিনী স্বাহা ]

গৌরী গুণবতী গোপ্যা গংধর্বনগরপ্রিযা ।
গুণমাতা গুণাংতস্থা গুরুরূপা গুরুপ্রিযা ॥ 9 ॥ [ গুহাংতস্থা ]

গুরুবিদ্যা গানতুষ্টা গাযকপ্রিযকারিণী । [ গিরিবিদ্যা ]
গাযত্রী গিরীশারাধ্যা গীর্গিরীশপ্রিযংকরী ॥ 10 ॥

গিরিজ্ঞা জ্ঞানবিদ্যা চ গিরিরূপা গিরীশ্বরী ।
গীর্মাতা গণসংস্তুত্যা গণনীযগুণান্বিতা ॥ 11 ॥

গূঢরূপা গুহা গোপ্যা গোরূপা গৌর্গুণাত্মিকা ।
গুর্বী গুর্বংবিকা গুহ্যা গেযজা গৃহনাশিনী ॥ 12 ॥

গৃহিণী গৃহদোষঘ্নী গবঘ্নী গুরুবত্সলা ।
গৃহাত্মিকা গৃহারাধ্যা গৃহবাধাবিনাশিনী ॥ 13 ॥

গংগা গিরিসুতা গম্যা গজযানা গুহস্তুতা ।
গরুডাসনসংসেব্যা গোমতী গুণশালিনী ॥ 14 ॥

[ ওং ঐং নমঃ শারদে শ্রীং শুদ্ধে নমঃ শারদে বং ঐং বদ বদ বাগ্বাদিনী স্বাহা ]

শারদা শাশ্বতী শৈবী শাংকরী শংকরাত্মিকা ।
শ্রীশ্শর্বাণী শতঘ্নী চ শরচ্চংদ্রনিভাননা ॥ 15 ॥

শর্মিষ্ঠা শমনঘ্নী চ শতসাহস্ররূপিণী ।
শিবা শংভুপ্রিযা শ্রদ্ধা শ্রুতিরূপা শ্রুতিপ্রিযা ॥ 16 ॥

শুচিষ্মতী শর্মকরী শুদ্ধিদা শুদ্ধিরূপিণী ।
শিবা শিবংকরী শুদ্ধা শিবারাধ্যা শিবাত্মিকা ॥ 17 ॥

শ্রীমতী শ্রীমযী শ্রাব্যা শ্রুতিঃ শ্রবণগোচরা ।
শাংতিশ্শাংতিকরী শাংতা শাংতাচারপ্রিযংকরী ॥ 18 ॥

শীললভ্যা শীলবতী শ্রীমাতা শুভকারিণী ।
শুভবাণী শুদ্ধবিদ্যা শুদ্ধচিত্তপ্রপূজিতা ॥ 19 ॥

শ্রীকরী শ্রুতপাপঘ্নী শুভাক্ষী শুচিবল্লভা ।
শিবেতরঘ্নী শবরী শ্রবণীযগুণান্বিতা ॥ 20 ॥ [শর্বরী]

শারী শিরীষপুষ্পাভা শমনিষ্ঠা শমাত্মিকা ।
শমান্বিতা শমারাধ্যা শিতিকংঠপ্রপূজিতা ॥ 21 ॥

শুদ্ধিঃ শুদ্ধিকরী শ্রেষ্ঠা শ্রুতানংতা শুভাবহা ।
সরস্বতী চ সর্বজ্ঞা সর্বসিদ্ধিপ্রদাযিনী ॥ 22 ॥

[ ওং ঐং বদ বদ বাগ্বাদিনী স্বাহা ]

সরস্বতী চ সাবিত্রী সংধ্যা সর্বেপ্সিতপ্রদা ।
সর্বার্তিঘ্নী সর্বমযী সর্ববিদ্যাপ্রদাযিনী ॥ 23 ॥

সর্বেশ্বরী সর্বপুণ্যা সর্গস্থিত্যংতকারিণী ।
সর্বারাধ্যা সর্বমাতা সর্বদেবনিষেবিতা ॥ 24 ॥

সর্বৈশ্বর্যপ্রদা সত্যা সতী সত্বগুণাশ্রযা ।
সর্বক্রমপদাকারা সর্বদোষনিষূদিনী ॥ 25 ॥ [ স্বরক্রমপদাকারা ]

সহস্রাক্ষী সহস্রাস্যা সহস্রপদসংযুতা ।
সহস্রহস্তা সাহস্রগুণালংকৃতবিগ্রহা ॥ 26 ॥

সহস্রশীর্ষা সদ্রূপা স্বধা স্বাহা সুধামযী ।
ষড্গ্রংথিভেদিনী সেব্যা সর্বলোকৈকপূজিতা ॥ 27 ॥

স্তুত্যা স্তুতিমযী সাধ্যা সবিতৃপ্রিযকারিণী ।
সংশযচ্ছেদিনী সাংখ্যবেদ্যা সংখ্যা সদীশ্বরী ॥ 28 ॥

সিদ্ধিদা সিদ্ধসংপূজ্যা সর্বসিদ্ধিপ্রদাযিনী ।
সর্বজ্ঞা সর্বশক্তিশ্চ সর্বসংপত্প্রদাযিনী ॥ 29 ॥

সর্বাঽশুভঘ্নী সুখদা সুখসংবিত্স্বরূপিণী ।
সর্বসংভাষণী সর্বজগত্সম্মোহিনী তথা ॥ 30 ॥ [ সর্বসংভীষণী ]

সর্বপ্রিযংকরী সর্বশুভদা সর্বমংগলা ।
সর্বমংত্রমযী সর্বতীর্থপুণ্যফলপ্রদা ॥ 31 ॥

সর্বপুণ্যমযী সর্বব্যাধিঘ্নী সর্বকামদা ।
সর্ববিঘ্নহরী সর্ববংদিতা সর্বমংগলা ॥ 32 ॥

সর্বমংত্রকরী সর্বলক্ষ্মীঃ সর্বগুণান্বিতা ।
সর্বানংদমযী সর্বজ্ঞানদা সত্যনাযিকা ॥ 33 ॥

সর্বজ্ঞানমযী সর্বরাজ্যদা সর্বমুক্তিদা ।
সুপ্রভা সর্বদা সর্বা সর্বলোকবশংকরী ॥ 34 ॥

সুভগা সুংদরী সিদ্ধা সিদ্ধাংবা সিদ্ধমাতৃকা ।
সিদ্ধমাতা সিদ্ধবিদ্যা সিদ্ধেশী সিদ্ধরূপিণী ॥ 35 ॥

সুরূপিণী সুখমযী সেবকপ্রিযকারিণী ।
স্বামিনী সর্বদা সেব্যা স্থূলসূক্ষ্মাপরাংবিকা ॥ 36 ॥

সাররূপা সরোরূপা সত্যভূতা সমাশ্রযা ।
সিতাঽসিতা সরোজাক্ষী সরোজাসনবল্লভা ॥ 37 ॥

সরোরুহাভা সর্বাংগী সুরেংদ্রাদিপ্রপূজিতা ।

[ ওং হ্রীং ঐং মহাসরস্বতি সারস্বতপ্রদে ঐং বদ বদ বাগ্বাদিনী স্বাহা ]

মহাদেবী মহেশানী মহাসারস্বতপ্রদা ॥ 38 ॥

মহাসরস্বতী মুক্তা মুক্তিদা মোহনাশিনী । [ মলনাশিনী ]
মহেশ্বরী মহানংদা মহামংত্রমযী মহী ॥ 39 ॥

মহালক্ষ্মীর্মহাবিদ্যা মাতা মংদরবাসিনী ।
মংত্রগম্যা মংত্রমাতা মহামংত্রফলপ্রদা ॥ 40 ॥

মহামুক্তির্মহানিত্যা মহাসিদ্ধিপ্রদাযিনী ।
মহাসিদ্ধা মহামাতা মহদাকারসংযুতা ॥ 41 ॥

মহী মহেশ্বরী মূর্তির্মোক্ষদা মণিভূষণা ।
মেনকা মানিনী মান্যা মৃত্যুঘ্নী মেরুরূপিণী ॥ 42 ॥

মদিরাক্ষী মদাবাসা মখরূপা মখেশ্বরী । [ মহেশ্বরী ]
মহামোহা মহামাযা মাতৄণাং মূর্ধ্নিসংস্থিতা ॥ 43 ॥

মহাপুণ্যা মুদাবাসা মহাসংপত্প্রদাযিনী ।
মণিপূরৈকনিলযা মধুরূপা মদোত্কটা ॥ 44 ॥ [ মহোত্কটা ]

মহাসূক্ষ্মা মহাশাংতা মহাশাংতিপ্রদাযিনী ।
মুনিস্তুতা মোহহংত্রী মাধবী মাধবপ্রিযা ॥ 45 ॥

মা মহাদেবসংস্তুত্যা মহিষীগণপূজিতা ।
মৃষ্টান্নদা চ মাহেংদ্রী মহেংদ্রপদদাযিনী ॥ 46 ॥

মতির্মতিপ্রদা মেধা মর্ত্যলোকনিবাসিনী ।
মুখ্যা মহানিবাসা চ মহাভাগ্যজনাশ্রিতা ॥ 47 ॥

মহিলা মহিমা মৃত্যুহারী মেধাপ্রদাযিনী ।
মেধ্যা মহাবেগবতী মহামোক্ষফলপ্রদা ॥ 48 ॥

মহাপ্রভাভা মহতী মহাদেবপ্রিযংকরী ।
মহাপোষা মহর্থিশ্চ মুক্তাহারবিভূষণা ॥ 49 ॥ [ মহর্দ্ধিশ্চ ]

মাণিক্যভূষণা মংত্রা মুখ্যচংদ্রার্ধশেখরা ।
মনোরূপা মনশ্শুদ্ধিঃ মনশ্শুদ্ধিপ্রদাযিনী ॥ 50 ॥

মহাকারুণ্যসংপূর্ণা মনোনমনবংদিতা ।
মহাপাতকজালঘ্নী মুক্তিদা মুক্তভূষণা ॥ 51 ॥

মনোন্মনী মহাস্থূলা মহাক্রতুফলপ্রদা ।
মহাপুণ্যফলপ্রাপ্যা মাযাত্রিপুরনাশিনী ॥ 52 ॥

মহানসা মহামেধা মহামোদা মহেশ্বরী ।
মালাধরী মহোপাযা মহাতীর্থফলপ্রদা ॥ 53 ॥

মহামংগলসংপূর্ণা মহাদারিদ্র্যনাশিনী ।
মহামখা মহামেঘা মহাকালী মহাপ্রিযা ॥ 54 ॥

মহাভূষা মহাদেহা মহারাজ্ঞী মুদালযা ।

[ ওং হ্রীং ঐং নমো ভগবতি ঐং বদ বদ বাগ্বাদিনী স্বাহা ]

ভূরিদা ভাগ্যদা ভোগ্যা ভোগ্যদা ভোগদাযিনী ॥ 55 ॥

ভবানী ভূতিদা ভূতিঃ ভূমির্ভূমিসুনাযিকা ।
ভূতধাত্রী ভযহরী ভক্তসারস্বতপ্রদা ॥ 56 ॥

ভুক্তির্ভুক্তিপ্রদা ভোক্ত্রী ভক্তির্ভক্তিপ্রদাযিনী । [ভেকী]
ভক্তসাযুজ্যদা ভক্তস্বর্গদা ভক্তরাজ্যদা ॥ 57 ॥

ভাগীরথী ভবারাধ্যা ভাগ্যাসজ্জনপূজিতা ।
ভবস্তুত্যা ভানুমতী ভবসাগরতারিণী ॥ 58 ॥

ভূতির্ভূষা চ ভূতেশী ভাললোচনপূজিতা । [ ফাললোচনপূজিতা ]
ভূতা ভব্যা ভবিষ্যা চ ভববিদ্যা ভবাত্মিকা ॥ 59 ॥

বাধাপহারিণী বংধুরূপা ভুবনপূজিতা ।
ভবঘ্নী ভক্তিলভ্যা চ ভক্তরক্ষণতত্পরা ॥ 60 ॥

ভক্তার্তিশমনী ভাগ্যা ভোগদানকৃতোদ্যমা ।
ভুজংগভূষণা ভীমা ভীমাক্ষী ভীমরূপিণী ॥ 61 ॥

ভাবিনী ভ্রাতৃরূপা চ ভারতী ভবনাযিকা ।
ভাষা ভাষাবতী ভীষ্মা ভৈরবী ভৈরবপ্রিযা ॥ 62 ॥

ভূতির্ভাসিতসর্বাংগী ভূতিদা ভূতিনাযিকা ।
ভাস্বতী ভগমালা চ ভিক্ষাদানকৃতোদ্যমা ॥ 63 ॥

ভিক্ষুরূপা ভক্তিকরী ভক্তলক্ষ্মীপ্রদাযিনী ।
ভ্রাংতিঘ্না ভ্রাংতিরূপা চ ভূতিদা ভূতিকারিণী ॥ 64 ॥

ভিক্ষণীযা ভিক্ষুমাতা ভাগ্যবদ্দৃষ্টিগোচরা ।
ভোগবতী ভোগরূপা ভোগমোক্ষফলপ্রদা ॥ 65 ॥

ভোগশ্রাংতা ভাগ্যবতী ভক্তাঘৌঘবিনাশিনী ।

[ ওং ঐং ক্লীং সৌঃ বালে ব্রাহ্মী ব্রহ্মপত্নী ঐং বদ বদ বাগ্বাদিনী স্বাহা ]

ব্রাহ্মী ব্রহ্মস্বরূপা চ বৃহতী ব্রহ্মবল্লভা ॥ 66 ॥

ব্রহ্মদা ব্রহ্মমাতা চ ব্রহ্মাণী ব্রহ্মদাযিনী ।
ব্রহ্মেশী ব্রহ্মসংস্তুত্যা ব্রহ্মবেদ্যা বুধপ্রিযা ॥ 67 ॥

বালেংদুশেখরা বালা বলিপূজাকরপ্রিযা ।
বলদা বিংদুরূপা চ বালসূর্যসমপ্রভা ॥ 68 ॥

ব্রহ্মরূপা ব্রহ্মমযী ব্রধ্নমংডলমধ্যগা ।
ব্রহ্মাণী বুদ্ধিদা বুদ্ধির্বুদ্ধিরূপা বুধেশ্বরী ॥ 69 ॥

বংধক্ষযকরী বাধানাশিনী বংধুরূপিণী ।
বিংদ্বালযা বিংদুভূষা বিংদুনাদসমন্বিতা ॥ 70 ॥

বীজরূপা বীজমাতা ব্রহ্মণ্যা ব্রহ্মকারিণী ।
বহুরূপা বলবতী ব্রহ্মজ্ঞা ব্রহ্মচারিণী ॥ 71 ॥ [ব্রহ্মজা]

ব্রহ্মস্তুত্যা ব্রহ্মবিদ্যা ব্রহ্মাংডাধিপবল্লভা ।
ব্রহ্মেশবিষ্ণুরূপা চ ব্রহ্মবিষ্ণ্বীশসংস্থিতা ॥ 72 ॥

বুদ্ধিরূপা বুধেশানী বংধী বংধবিমোচনী ।

[ ওং হ্রীং ঐং অং আং ইং ঈং উং ঊং ঋং ৠং ~লুং ~লূং এং ঐং ওং ঔং কং খং গং ঘং ঙং চং ছং জং ঝং ঞং টং ঠং ডং ঢং ণং তং থং দং ধং নং পং ফং বং ভং মং যং রং লং বং শং ষং সং হং লং ক্ষং অক্ষমালে অক্ষরমালিকা সমলংকৃতে বদ বদ বাগ্বাদিনী স্বাহা ]

অক্ষমালাঽক্ষরাকারাঽক্ষরাঽক্ষরফলপ্রদা ॥ 73 ॥

অনংতাঽনংদসুখদাঽনংতচংদ্রনিভাননা ।
অনংতমহিমাঽঘোরানংতগংভীরসম্মিতা ॥ 74 ॥

অদৃষ্টাঽদৃষ্টদাঽনংতাদৃষ্টভাগ্যফলপ্রদা । [ দৃষ্টিদা ]
অরুংধত্যব্যযীনাথাঽনেকসদ্গুণসংযুতা ॥ 75 ॥

অনেকভূষণাঽদৃশ্যাঽনেকলেখনিষেবিতা ।
অনংতাঽনংতসুখদাঽঘোরাঽঘোরস্বরূপিণী ॥ 76 ॥

অশেষদেবতারূপাঽমৃতরূপাঽমৃতেশ্বরী ।
অনবদ্যাঽনেকহস্তাঽনেকমাণিক্যভূষণা ॥ 77 ॥

অনেকবিঘ্নসংহর্ত্রী ত্বনেকাভরণান্বিতা ।
অবিদ্যাজ্ঞানসংহর্ত্রী হ্যবিদ্যাজালনাশিনী ॥ 78 ॥

অভিরূপানবদ্যাংগী হ্যপ্রতর্ক্যগতিপ্রদা ।
অকলংকরূপিণী চ হ্যনুগ্রহপরাযণা ॥ 79 ॥

অংবরস্থাঽংবরমযাঽংবরমালাঽংবুজেক্ষণা ।
অংবিকাঽব্জকরাঽব্জস্থাঽংশুমত্যঽংশুশতান্বিতা ॥ 80 ॥

অংবুজাঽনবরাঽখংডাঽংবুজাসনমহাপ্রিযা ।
অজরাঽমরসংসেব্যাঽজরসেবিতপদ্যুগা ॥ 81 ॥

অতুলার্থপ্রদাঽর্থৈক্যাঽত্যুদারাত্বভযান্বিতা ।
অনাথবত্সলাঽনংতপ্রিযাঽনংতেপ্সিতপ্রদা ॥ 82 ॥

অংবুজাক্ষ্যংবুরূপাঽংবুজাতোদ্ভবমহাপ্রিযা ।
অখংডা ত্বমরস্তুত্যাঽমরনাযকপূজিতা ॥ 83 ॥

অজেযা ত্বজসংকাশাঽজ্ঞাননাশিন্যভীষ্টদা ।
অক্তাঘনেন চাঽস্ত্রেশী হ্যলক্ষ্মীনাশিনী তথা ॥ 84 ॥

অনংতসারাঽনংতশ্রীরনংতবিধিপূজিতা ।
অভীষ্টামর্ত্যসংপূজ্যা হ্যস্তোদযবিবর্জিতা ॥ 85 ॥

আস্তিকস্বাংতনিলযাঽস্ত্ররূপাঽস্ত্রবতী তথা ।
অস্খলত্যস্খলদ্রূপাঽস্খলদ্বিদ্যাপ্রদাযিনী ॥ 86 ॥

অস্খলত্সিদ্ধিদাঽঽনংদাঽংবুজাতাঽঽমরনাযিকা ।
অমেযাঽশেষপাপঘ্ন্যক্ষযসারস্বতপ্রদা ॥ 87 ॥

[ ওং জ্যাং হ্রীং জয জয জগন্মাতঃ ঐং বদ বদ বাগ্বাদিনী স্বাহা ]

জযা জযংতী জযদা জন্মকর্মবিবর্জিতা ।
জগত্প্রিযা জগন্মাতা জগদীশ্বরবল্লভা ॥ 88 ॥

জাতির্জযা জিতামিত্রা জপ্যা জপনকারিণী ।
জীবনী জীবনিলযা জীবাখ্যা জীবধারিণী ॥ 89 ॥

জাহ্নবী জ্যা জপবতী জাতিরূপা জযপ্রদা ।
জনার্দনপ্রিযকরী জোষনীযা জগত্স্থিতা ॥ 90 ॥

জগজ্জ্যেষ্ঠা জগন্মাযা জীবনত্রাণকারিণী ।
জীবাতুলতিকা জীবজন্মী জন্মনিবর্হণী ॥ 91 ॥

জাড্যবিধ্বংসনকরী জগদ্যোনির্জযাত্মিকা ।
জগদানংদজননী জংবূশ্চ জলজেক্ষণা ॥ 92 ॥

জযংতী জংগপূগঘ্নী জনিতজ্ঞানবিগ্রহা ।
জটা জটাবতী জপ্যা জপকর্তৃপ্রিযংকরী ॥ 93 ॥

জপকৃত্পাপসংহর্ত্রী জপকৃত্ফলদাযিনী ।
জপাপুষ্পসমপ্রখ্যা জপাকুসুমধারিণী ॥ 94 ॥

জননী জন্মরহিতা জ্যোতির্বৃত্যভিদাযিনী ।
জটাজূটনচংদ্রার্ধা জগত্সৃষ্টিকরী তথা ॥ 95 ॥

জগত্ত্রাণকরী জাড্যধ্বংসকর্ত্রী জযেশ্বরী ।
জগদ্বীজা জযাবাসা জন্মভূর্জন্মনাশিনী ॥ 96 ॥

জন্মাংত্যরহিতা জৈত্রী জগদ্যোনির্জপাত্মিকা ।
জযলক্ষণসংপূর্ণা জযদানকৃতোদ্যমা ॥ 97 ॥

জংভরাদ্যাদিসংস্তুত্যা জংভারিফলদাযিনী ।
জগত্ত্রযহিতা জ্যেষ্ঠা জগত্ত্রযবশংকরী ॥ 98 ॥

জগত্ত্রযাংবা জগতী জ্বালা জ্বালিতলোচনা ।
জ্বালিনী জ্বলনাভাসা জ্বলংতী জ্বলনাত্মিকা ॥ 99 ॥

জিতারাতিসুরস্তুত্যা জিতক্রোধা জিতেংদ্রিযা ।
জরামরণশূন্যা চ জনিত্রী জন্মনাশিনী ॥ 100 ॥

জলজাভা জলমযী জলজাসনবল্লভা ।
জলজস্থা জপারাধ্যা জনমংগলকারিণী ॥ 101 ॥

[ ঐং ক্লীং সৌঃ কল্যাণী কামধারিণী বদ বদ বাগ্বাদিনী স্বাহা ]

কামিনী কামরূপা চ কাম্যা কাম্যপ্রদাযিনী । [ কামপ্রদাযিনী ]
কমৌলী কামদা কর্ত্রী ক্রতুকর্মফলপ্রদা ॥ 102 ॥

কৃতঘ্নঘ্নী ক্রিযারূপা কার্যকারণরূপিণী ।
কংজাক্ষী করুণারূপা কেবলামরসেবিতা ॥ 103 ॥

কল্যাণকারিণী কাংতা কাংতিদা কাংতিরূপিণী ।
কমলা কমলাবাসা কমলোত্পলমালিনী ॥ 104 ॥

কুমুদ্বতী চ কল্যাণী কাংতিঃ কামেশবল্লভা । [ কাংতা ]
কামেশ্বরী কমলিনী কামদা কামবংধিনী ॥ 105 ॥

কামধেনুঃ কাংচনাক্ষী কাংচনাভা কলানিধিঃ ।
ক্রিযা কীর্তিকরী কীর্তিঃ ক্রতুশ্রেষ্ঠা কৃতেশ্বরী ॥ 106 ॥

ক্রতুসর্বক্রিযাস্তুত্যা ক্রতুকৃত্প্রিযকারিণী ।
ক্লেশনাশকরী কর্ত্রী কর্মদা কর্মবংধিনী ॥ 107 ॥

কর্মবংধহরী কৃষ্টা ক্লমঘ্নী কংজলোচনা ।
কংদর্পজননী কাংতা করুণা করুণাবতী ॥ 108 ॥

ক্লীংকারিণী কৃপাকারা কৃপাসিংধুঃ কৃপাবতী ।
করুণার্দ্রা কীর্তিকরী কল্মষঘ্নী ক্রিযাকরী ॥ 109 ॥

ক্রিযাশক্তিঃ কামরূপা কমলোত্পলগংধিনী ।
কলা কলাবতী কূর্মী কূটস্থা কংজসংস্থিতা ॥ 110 ॥

কালিকা কল্মষঘ্নী চ কমনীযজটান্বিতা ।
করপদ্মা করাভীষ্টপ্রদা ক্রতুফলপ্রদা ॥ 111 ॥

কৌশিকী কোশদা কাব্যা কর্ত্রী কোশেশ্বরী কৃশা । [ কন্যা ]
কূর্মযানা কল্পলতা কালকূটবিনাশিনী ॥ 112 ॥

কল্পোদ্যানবতী কল্পবনস্থা কল্পকারিণী ।
কদংবকুসুমাভাসা কদংবকুসুমপ্রিযা ॥ 113 ॥

কদংবোদ্যানমধ্যস্থা কীর্তিদা কীর্তিভূষণা ।
কুলমাতা কুলাবাসা কুলাচারপ্রিযংকরী ॥ 114 ॥

কুলনাথা কামকলা কলানাথা কলেশ্বরী ।
কুংদমংদারপুষ্পাভা কপর্দস্থিতচংদ্রিকা ॥ 115 ॥

কবিত্বদা কাম্যমাতা কবিমাতা কলাপ্রদা । [কাব্যমাতা]

[ ওং সৌঃ ক্লীং ঐং ততো বদ বদ বাগ্বাদিনী স্বাহা ]

তরুণী তরুণীতাতা তারাধিপসমাননা ॥ 116 ॥

তৃপ্তিস্তৃপ্তিপ্রদা তর্ক্যা তপনী তাপিনী তথা ।
তর্পণী তীর্থরূপা চ ত্রিপদা ত্রিদশেশ্বরী ॥ 117 ॥ [ ত্রিদশা ]

ত্রিদিবেশী ত্রিজননী ত্রিমাতা ত্র্যংবকেশ্বরী ।
ত্রিপুরা ত্রিপুরেশানী ত্র্যংবকা ত্রিপুরাংবিকা ॥ 118 ॥

ত্রিপুরশ্রীস্ত্রযীরূপা ত্রযীবেদ্যা ত্রযীশ্বরী ।
ত্রয্যংতবেদিনী তাম্রা তাপত্রিতযহারিণী ॥ 119 ॥

তমালসদৃশী ত্রাতা তরুণাদিত্যসন্নিভা ।
ত্রৈলোক্যব্যাপিনী তৃপ্তা তৃপ্তিকৃত্তত্ত্বরূপিণী ॥ 120 ॥

তুর্যা ত্রৈলোক্যসংস্তুত্যা ত্রিগুণা ত্রিগুণেশ্বরী ।
ত্রিপুরঘ্নী ত্রিমাতা চ ত্র্যংবকা ত্রিগুণান্বিতা ॥ 121 ॥

তৃষ্ণাচ্ছেদকরী তৃপ্তা তীক্ষ্ণা তীক্ষ্ণস্বরূপিণী ।
তুলা তুলাদিরহিতা তত্তদ্ব্রহ্মস্বরূপিণী ॥ 122 ॥

ত্রাণকর্ত্রী ত্রিপাপঘ্নী ত্রিদশা ত্রিদশান্বিতা ।
তথ্যা ত্রিশক্তিস্ত্রিপদা তুর্যা ত্রৈলোক্যসুংদরী ॥ 123 ॥

তেজস্করী ত্রিমূর্ত্যাদ্যা তেজোরূপা ত্রিধামতা ।
ত্রিচক্রকর্ত্রী ত্রিভগা তুর্যাতীতফলপ্রদা ॥ 124 ॥

তেজস্বিনী তাপহারী তাপোপপ্লবনাশিনী ।
তেজোগর্ভা তপস্সারা ত্রিপুরারিপ্রিযংকরী ॥ 125 ॥

তন্বী তাপসসংতুষ্টা তপনাংগজভীতিনুত্ ।
ত্রিলোচনা ত্রিমার্গা চ তৃতীযা ত্রিদশস্তুতা ॥ 126 ॥

ত্রিসুংদরী ত্রিপথগা তুরীযপদদাযিনী ।

[ ওং হ্রীং শ্রীং ক্লীং ঐং নমশ্শুদ্ধফলদে ঐং বদ বদ বাগ্বাদিনী স্বাহা ]

শুভা শুভাবতী শাংতা শাংতিদা শুভদাযিনী ॥ 127 ॥

শীতলা শূলিনী শীতা শ্রীমতী চ শুভান্বিতা ।

[ ওং ঐং যাং যীং যূং যৈং যৌং যঃ ঐং বদ বদ বাগ্বাদিনী স্বাহা ]

যোগসিদ্ধিপ্রদা যোগ্যা যজ্ঞেনপরিপূরিতা ॥ 128 ॥

যজ্ঞা যজ্ঞমযী যক্ষী যক্ষিণী যক্ষিবল্লভা ।
যজ্ঞপ্রিযা যজ্ঞপূজ্যা যজ্ঞতুষ্টা যমস্তুতা ॥ 129 ॥

যামিনীযপ্রভা যাম্যা যজনীযা যশস্করী ।
যজ্ঞকর্ত্রী যজ্ঞরূপা যশোদা যজ্ঞসংস্তুতা ॥ 130 ॥

যজ্ঞেশী যজ্ঞফলদা যোগযোনির্যজুস্স্তুতা ।
যমিসেব্যা যমারাধ্যা যমিপূজ্যা যমীশ্বরী ॥ 131 ॥

যোগিনী যোগরূপা চ যোগকর্তৃপ্রিযংকরী ।
যোগযুক্তা যোগমযী যোগযোগীশ্বরাংবিকা ॥ 132 ॥

যোগজ্ঞানমযী যোনির্যমাদ্যষ্টাংগযোগতা ।
যংত্রিতাঘৌঘসংহারা যমলোকনিবারিণী ॥ 133 ॥

যষ্টিব্যষ্টীশসংস্তুত্যা যমাদ্যষ্টাংগযোগযুক্ ।
যোগীশ্বরী যোগমাতা যোগসিদ্ধা চ যোগদা ॥ 134 ॥

যোগারূঢা যোগমযী যোগরূপা যবীযসী ।
যংত্ররূপা চ যংত্রস্থা যংত্রপূজ্যা চ যংত্রিকা ॥ 135 ॥ [ যংত্রিতা ]

যুগকর্ত্রী যুগমযী যুগধর্মবিবর্জিতা ।
যমুনা যামিনী যাম্যা যমুনাজলমধ্যগা ॥ 136 ॥ [ যমিনী ]

যাতাযাতপ্রশমনী যাতনানাংনিকৃংতনী ।
যোগাবাসা যোগিবংদ্যা যত্তচ্ছব্দস্বরূপিণী ॥ 137 ॥

যোগক্ষেমমযী যংত্রা যাবদক্ষরমাতৃকা ।
যাবত্পদমযী যাবচ্ছব্দরূপা যথেশ্বরী ॥ 138 ॥

যত্তদীযা যক্ষবংদ্যা যদ্বিদ্যা যতিসংস্তুতা ।
যাবদ্বিদ্যামযী যাবদ্বিদ্যাবৃংদসুবংদিতা ॥ 139 ॥

যোগিহৃত্পদ্মনিলযা যোগিবর্যপ্রিযংকরী ।
যোগিবংদ্যা যোগিমাতা যোগীশফলদাযিনী ॥ 140 ॥

যক্ষবংদ্যা যক্ষপূজ্যা যক্ষরাজসুপূজিতা ।
যজ্ঞরূপা যজ্ঞতুষ্টা যাযজূকস্বরূপিণী ॥ 141 ॥

যংত্রারাধ্যা যংত্রমধ্যা যংত্রকর্তৃপ্রিযংকরী ।
যংত্রারূঢা যংত্রপূজ্যা যোগিধ্যানপরাযণা ॥ 142 ॥

যজনীযা যমস্তুত্যা যোগযুক্তা যশস্করী ।
যোগবদ্ধা যতিস্তুত্যা যোগজ্ঞা যোগনাযকী ॥ 143 ॥

যোগিজ্ঞানপ্রদা যক্ষী যমবাধাবিনাশিনী ।
যোগিকাম্যপ্রদাত্রী চ যোগিমোক্ষপ্রদাযিনী ॥ 144 ॥

ফলশ্রুতিঃ
ইতি নাম্নাং সরস্বত্যাঃ সহস্রং সমুদীরিতম্ ।
মংত্রাত্মকং মহাগোপ্যং মহাসারস্বতপ্রদম্ ॥ 1 ॥

যঃ পঠেচ্ছৃণুযাদ্ভক্ত্যাত্ত্রিকালং সাধকঃ পুমান্ ।
সর্ববিদ্যানিধিঃ সাক্ষাত্ স এব ভবতি ধ্রুবম্ ॥ 2 ॥

লভতে সংপদঃ সর্বাঃ পুত্রপৌত্রাদিসংযুতাঃ ।
মূকোঽপি সর্ববিদ্যাসু চতুর্মুখ ইবাপরঃ ॥ 3 ॥

ভূত্বা প্রাপ্নোতি সান্নিধ্যং অংতে ধাতুর্মুনীশ্বর ।
সর্বমংত্রমযং সর্ববিদ্যামানফলপ্রদম্ ॥ 4 ॥

মহাকবিত্বদং পুংসাং মহাসিদ্ধিপ্রদাযকম্ ।
কস্মৈ চিন্ন প্রদাতব্যং প্রাণৈঃ কংঠগতৈরপি ॥ 5 ॥

মহারহস্যং সততং বাণীনামসহস্রকম্ ।
সুসিদ্ধমস্মদাদীনাং স্তোত্রং তে সমুদীরিতম্ ॥ 6 ॥

ইতি শ্রীস্কাংদপুরাণাংতর্গত শ্রীসনত্কুমার সংহিতাযাং নারদ সনত্কুমার সংবাদে শ্রী সরস্বতী সহস্রনাম স্তোত্রং সংপূর্ণম্ ॥