নারাযণীযং দশক 7 – বিরাট্স্ব্রহ্মণঃ জন্ম, তপঃ তথা বৈকুংঠদর্শনম্বরূপবর্ণনম্

এবং দেব চতুর্দশাত্মকজগদ্রূপেণ জাতঃ পুন-
স্তস্যোর্ধ্বং খলু সত্যলোকনিলযে জাতোঽসি ধাতা স্বযম্ ।
যং শংসংতি হিরণ্যগর্ভমখিলত্রৈলোক্যজীবাত্মকং
যোঽভূত্ স্ফীতরজোবিকারবিকসন্নানাসিসৃক্ষারসঃ ॥1॥

সোঽযং বিশ্ববিসর্গদত্তহৃদযঃ সংপশ্যমানঃ স্বযং
বোধং খল্বনবাপ্য বিশ্ববিষযং চিংতাকুলস্তস্থিবান্ ।
তাবত্ত্বং জগতাং পতে তপ তপেত্যেবং হি বৈহাযসীং
বাণীমেনমশিশ্রবঃ শ্রুতিসুখাং কুর্বংস্তপঃপ্রেরণাম্ ॥2॥

কোঽসৌ মামবদত্ পুমানিতি জলাপূর্ণে জগন্মংডলে
দিক্ষূদ্বীক্ষ্য কিমপ্যনীক্ষিতবতা বাক্যার্থমুত্পশ্যতা ।
দিব্যং বর্ষসহস্রমাত্ততপসা তেন ত্বমারাধিত –
স্তস্মৈ দর্শিতবানসি স্বনিলযং বৈকুংঠমেকাদ্ভুতম্ ॥3॥

মাযা যত্র কদাপি নো বিকুরুতে ভাতে জগদ্ভ্যো বহিঃ
শোকক্রোধবিমোহসাধ্বসমুখা ভাবাস্তু দূরং গতাঃ ।
সাংদ্রানংদঝরী চ যত্র পরমজ্যোতিঃপ্রকাশাত্মকে
তত্তে ধাম বিভাবিতং বিজযতে বৈকুংঠরূপং বিভো ॥4॥

যস্মিন্নাম চতুর্ভুজা হরিমণিশ্যামাবদাতত্বিষো
নানাভূষণরত্নদীপিতদিশো রাজদ্বিমানালযাঃ ।
ভক্তিপ্রাপ্ততথাবিধোন্নতপদা দীব্যংতি দিব্যা জনা-
তত্তে ধাম নিরস্তসর্বশমলং বৈকুংঠরূপং জযেত্ ॥5॥

নানাদিব্যবধূজনৈরভিবৃতা বিদ্যুল্লতাতুল্যযা
বিশ্বোন্মাদনহৃদ্যগাত্রলতযা বিদ্যোতিতাশাংতরা ।
ত্বত্পাদাংবুজসৌরভৈককুতুকাল্লক্ষ্মীঃ স্বযং লক্ষ্যতে
যস্মিন্ বিস্মযনীযদিব্যবিভবং তত্তে পদং দেহি মে ॥6॥

তত্রৈবং প্রতিদর্শিতে নিজপদে রত্নাসনাধ্যাসিতং
ভাস্বত্কোটিলসত্কিরীটকটকাদ্যাকল্পদীপ্রাকৃতি ।
শ্রীবত্সাংকিতমাত্তকৌস্তুভমণিচ্ছাযারুণং কারণং
বিশ্বেষাং তব রূপমৈক্ষত বিধিস্তত্তে বিভো ভাতু মে ॥7॥

কালাংভোদকলাযকোমলরুচীচক্রেণ চক্রং দিশা –
মাবৃণ্বানমুদারমংদহসিতস্যংদপ্রসন্নাননম্ ।
রাজত্কংবুগদারিপংকজধরশ্রীমদ্ভুজামংডলং
স্রষ্টুস্তুষ্টিকরং বপুস্তব বিভো মদ্রোগমুদ্বাসযেত্ ॥8॥

দৃষ্ট্বা সংভৃতসংভ্রমঃ কমলভূস্ত্বত্পাদপাথোরুহে
হর্ষাবেশবশংবদো নিপতিতঃ প্রীত্যা কৃতার্থীভবন্ ।
জানাস্যেব মনীষিতং মম বিভো জ্ঞানং তদাপাদয
দ্বৈতাদ্বৈতভবত্স্বরূপপরমিত্যাচষ্ট তং ত্বাং ভজে ॥9॥

আতাম্রে চরণে বিনম্রমথ তং হস্তেন হস্তে স্পৃশন্
বোধস্তে ভবিতা ন সর্গবিধিভির্বংধোঽপি সংজাযতে ।
ইত্যাভাষ্য গিরং প্রতোষ্য নিতরাং তচ্চিত্তগূঢঃ স্বযং
সৃষ্টৌ তং সমুদৈরযঃ স ভগবন্নুল্লাসযোল্লাঘতাম্ ॥10॥