গীতগোবিংদং ষষ্টঃ সর্গঃ – কুংঠ বৈকুংঠঃ

॥ ষষ্ঠঃ সর্গঃ ॥
॥ কুংঠবৈকুংঠঃ ॥

অথ তাং গংতুমশক্তাং চিরমনুরক্তাং লতাগৃহে দৃষ্ট্বা ।
তচ্চরিতং গোবিংদে মনসিজমংদে সখী প্রাহ ॥ 37 ॥

॥ গীতং 12 ॥

পশ্যতি দিশি দিশি রহসি ভবংতম্ ।
তদধরমধুরমধূনি পিবংতম্ ॥
নাথ হরে জগন্নাথ হরে সীদতি রাধা বাসগৃহে – ধ্রুবম্ ॥ 1 ॥

ত্বদভিসরণরভসেন বলংতী ।
পততি পদানি কিযংতি চলংতী ॥ 2 ॥

বিহিতবিশদবিসকিসলযবলযা ।
জীবতি পরমিহ তব রতিকলযা ॥ 3 ॥

মুহুরবলোকিতমংডনলীলা ।
মধুরিপুরহমিতি ভাবনশীলা ॥ 4 ॥

ত্বরিতমুপৈতি ন কথমভিসারম্ ।
হরিরিতি বদতি সখীমনুবারম্ ॥ 5 ॥

শ্লিষ্যতি চুংবতি জলধরকল্পম্ ।
হরিরুপগত ইতি তিমিরমনল্পম্ ॥ 6 ॥

ভবতি বিলংবিনি বিগলিতলজ্জা ।
বিলপতি রোদিতি বাসকসজ্জা ॥ 7 ॥

শ্রীজযদেবকবেরিদমুদিতম্ ।
রসিকজনং তনুতামতিমুদিতম্ ॥ 8 ॥

বিপুলপুলকপালিঃ স্ফীতসীত্কারমংত-র্জনিতজডিমকাকুব্যাকুলং ব্যাহরংতী ।
তব কিতব বিধত্তেঽমংদকংদর্পচিংতাং রসজলধিনিমগ্না ধ্যানলগ্না মৃগাক্ষী ॥ 38 ॥

অংগেষ্বাভরণং করোতি বহুশঃ পত্রেঽপি সংচারিণি প্রাপ্তং ত্বাং পরিশংকতে বিতনুতে শয্যাং চিরং ধ্যাযতি ।
ইত্যাকল্পবিকল্পতল্পরচনাসংকল্পলীলাশত-ব্যাসক্তাপি বিনা ত্বযা বরতনুর্নৈষা নিশাং নেষ্যতি ॥ 39 ॥

কিং বিশ্রাম্যসি কৃষ্ণভোগিভবনে ভাংডীরভূমীরুহি ভ্রাত র্যাহি নদৃষ্টিগোচরমিতস্সানংদনংদাস্পদম্।
রধাযাবচনং তদধ্বগমুখান্নংদাংতিকেগোপতো গোবিংদস্যজযংতি সাযমতিথিপ্রাশস্ত্যগর্ভাগিরঃ॥ 40 ॥

॥ ইতি গীতগোবিংদে বাসকসজ্জাবর্ণনে কুংঠবৈকুংঠো নাম ষষ্ঠঃ সর্গঃ ॥