ভবানী ভুজংগ প্রযাত স্তোত্রং

ষডাধারপংকেরুহাংতর্বিরাজ-
-ত্সুষুম্নাংতরালেঽতিতেজোল্লসংতীম্ ।
সুধামংডলং দ্রাবযংতীং পিবংতীং
সুধামূর্তিমীডে চিদানংদরূপাম্ ॥ 1 ॥

জ্বলত্কোটিবালার্কভাসারুণাংগীং
সুলাবণ্যশৃংগারশোভাভিরামাম্ ।
মহাপদ্মকিংজল্কমধ্যে বিরাজ-
-ত্ত্রিকোণে নিষণ্ণাং ভজে শ্রীভবানীম্ ॥ 2 ॥

ক্বণত্কিংকিণীনূপুরোদ্ভাসিরত্ন-
-প্রভালীঢলাক্ষার্দ্রপাদাব্জযুগ্মম্ ।
অজেশাচ্যুতাদ্যৈঃ সুরৈঃ সেব্যমানং
মহাদেবি মন্মূর্ধ্নি তে ভাবযামি ॥ 3 ॥

সুশোণাংবরাবদ্ধনীবীবিরাজ-
-ন্মহারত্নকাংচীকলাপং নিতংবম্ ।
স্ফুরদ্দক্ষিণাবর্তনাভিং চ তিস্রো
বলীরংব তে রোমরাজিং ভজেঽহম্ ॥ 4 ॥

লসদ্বৃত্তমুত্তুংগমাণিক্যকুংভো-
-পমশ্রি স্তনদ্বংদ্বমংবাংবুজাক্ষি ।
ভজে দুগ্ধপূর্ণাভিরামং তবেদং
মহাহারদীপ্তং সদা প্রস্নুতাস্যম্ ॥ 5 ॥

শিরীষপ্রসূনোল্লসদ্বাহুদংডৈ-
-র্জ্বলদ্বাণকোদংডপাশাংকুশৈশ্চ ।
চলত্কংকণোদারকেযূরভূষো-
-জ্জ্বলদ্ভির্লসংতীং ভজে শ্রীভবানীম্ ॥ 6 ॥

শরত্পূর্ণচংদ্রপ্রভাপূর্ণবিংবা-
-ধরস্মেরবক্ত্রারবিংদাং সুশাংতাম্ ।
সুরত্নাবলীহারতাটংকশোভাং
মহাসুপ্রসন্নাং ভজে শ্রীভবানীম্ ॥ 7 ॥

সুনাসাপুটং সুংদরভ্রূললাটং
তবৌষ্ঠশ্রিযং দানদক্ষং কটাক্ষম্ ।
ললাটে লসদ্গংধকস্তূরিভূষং
স্ফুরচ্ছ্রীমুখাংভোজমীডেঽহমংব ॥ 8 ॥

চলত্কুংতলাংতর্ভ্রমদ্ভৃংগবৃংদং
ঘনস্নিগ্ধধম্মিল্লভূষোজ্জ্বলং তে ।
স্ফুরন্মৌলিমাণিক্যবদ্ধেংদুরেখা-
-বিলাসোল্লসদ্দিব্যমূর্ধানমীডে ॥ 9 ॥

ইতি শ্রীভবানি স্বরূপং তবেদং
প্রপংচাত্পরং চাতিসূক্ষ্মং প্রসন্নম্ ।
স্ফুরত্বংব ডিংভস্য মে হৃত্সরোজে
সদা বাঙ্মযং সর্বতেজোমযং চ ॥ 10 ॥

গণেশাভিমুখ্যাখিলৈঃ শক্তিবৃংদৈ-
-র্বৃতাং বৈ স্ফুরচ্চক্ররাজোল্লসংতীম্ ।
পরাং রাজরাজেশ্বরি ত্রৈপুরি ত্বাং
শিবাংকোপরিস্থাং শিবাং ভাবযামি ॥ 11 ॥

ত্বমর্কস্ত্বমিংদুস্ত্বমগ্নিস্ত্বমাপ-
-স্ত্বমাকাশভূবাযবস্ত্বং মহত্ত্বম্ ।
ত্বদন্যো ন কশ্চিত্ প্রপংচোঽস্তি সর্বং
সদানংদসংবিত্স্বরূপং ভজেঽহম্ ॥ 12 ॥

শ্রুতীনামগম্যে সুবেদাগমজ্ঞা
মহিম্নো ন জানংতি পারং তবাংব ।
স্তুতিং কর্তুমিচ্ছামি তে ত্বং ভবানি
ক্ষমস্বেদমত্র প্রমুগ্ধঃ কিলাহম্ ॥ 13 ॥

গুরুস্ত্বং শিবস্ত্বং চ শক্তিস্ত্বমেব
ত্বমেবাসি মাতা পিতা চ ত্বমেব ।
ত্বমেবাসি বিদ্যা ত্বমেবাসি বংধু-
-র্গতির্মে মতির্দেবি সর্বং ত্বমেব ॥ 14 ॥

শরণ্যে বরেণ্যে সুকারুণ্যমূর্তে
হিরণ্যোদরাদ্যৈরগণ্যে সুপুণ্যে ।
ভবারণ্যভীতেশ্চ মাং পাহি ভদ্রে
নমস্তে নমস্তে নমস্তে ভবানি ॥ 15 ॥

ইতীমাং মহচ্ছ্রীভবানীভুজংগং
স্তুতিং যঃ পঠেদ্ভক্তিযুক্তশ্চ তস্মৈ ।
স্বকীযং পদং শাশ্বতং বেদসারং
শ্রিযং চাষ্টসিদ্ধিং ভবানী দদাতি ॥ 16 ॥

ভবানী ভবানী ভবানী ত্রিবারং
উদারং মুদা সর্বদা যে জপংতি ।
ন শোকং ন মোহং ন পাপং ন ভীতিঃ
কদাচিত্কথংচিত্কুতশ্চিজ্জনানাম্ ॥ 17 ॥

॥ ইতি শ্রীমচ্ছংকরাচার্যবিরচিতা ভবানী ভুজংগং সংপূর্ণম্ ॥